ಅಮ್ಮನಿಗೆ ಹುಷಾರಿಲ್ಲ ಅಂದಾಗ ಓಡಿಹೋದ್ರು!...ಭವಿಷ್ಯದಲ್ಲಿ ಜನರೇ ನಿಮ್ಮ ಲೆಕ್ಕ ಕೇಳ್ತಾರೆ; ಪಕ್ಷಾಂತರಿಗಳ ವಿರುದ್ಧ ದೀದಿ ಕಿಡಿ | Mamata Banerjee

ಉತ್ತರ ಕೋಲ್ಕತಾ ಜಿಲ್ಲಾ ಟಿಎಂಸಿ ವರ್ಚುವಲ್ ಸಭೆಯನ್ನುದ್ದೇಶಿಸಿ ಮಾತನಾಡಿದ ದೀದಿ, ಕೇಂದ್ರದ ಬಿಜೆಪಿ ನೇತೃತ್ವದ ಸರ್ಕಾರದಿಂದ ತೀವ್ರ ದಬ್ಬಾಳಿಕೆ ನಡೆಯುತ್ತಿದೆ ಎಂದು ಆರೋಪಿಸಿದರಲ್ಲದೆ, ಪಕ್ಷದ ಕಾರ್ಯಕರ್ತರಲ್ಲಿ ಧೈರ್ಯ ತುಂಬುವ ಕೆಲಸ ಮಾಡಿದರು.

ಪಕ್ಷ ತೊರೆದ ನಾಯಕರನ್ನು ತರಾಟೆಗೆ ತೆಗೆದುಕೊಂಡ ಮಮತಾ, ಜೀವನ ಪೂರ್ತಿ ನಿಮ್ಮನ್ನು ಸಾಕಿ ಬೆಳೆಸಿದ ತಾಯಿ ಅನಾರೋಗ್ಯಕ್ಕೆ ಒಳಗಾದಾಗ ಆಕೆಯನ್ನು ನೋಡಿಕೊಳ್ಳಲು ನಿರಾಕರಿಸುವ ಸ್ವಭಾವ ಇವರದ್ದು. ಇಂತಹ ದ್ರೋಹಿಗಳಿಗೆ ಎಂದಿಗೂ ಕ್ಷಮೆಯಿಲ್ಲ. ಇವರು ಇಂದು ತನಿಖಾ ಸಂಸ್ಥೆಗಳಿಂದ ತಮ್ಮನ್ನು ತಾವು ಬಚಾವ್ ಮಾಡಿಕೊಳ್ಳಬಹುದು. ಆದರೆ ಭವಿಷ್ಯದಲ್ಲಿ ಜನಸಾಮಾನ್ಯರು ಮತ್ತು ಪಕ್ಷದ ಕಾರ್ಯಕರ್ತರು ಇವರಿಂದ ಖಂಡಿತ ಲೆಕ್ಕ ಕೇಳಲಿದ್ದಾರೆ ಎಂದು ಎಚ್ಚರಿಸಿದರು.

ತಮ್ಮ ಸ್ವಂತ ಆಸ್ತಿಪಾಸ್ತಿ ಮತ್ತು ಕಾನೂನು ಸಂಸ್ಥೆಗಳ ಕೇಸ್‌ಗಳಿಗೆ ಹೆದರಿ ಕೆಲವರು ಪಕ್ಷ ಬದಲಾಯಿಸುತ್ತಿದ್ದಾರೆ ಎಂದು ಆರೋಪಿಸಿದ ದೀದಿ, ಅವರಿಗೆ ತಾಳ್ಮೆಯಿಲ್ಲ. ತಾವು ಯಾರ ವಿರುದ್ಧ ಹೋರಾಡಿದ್ದರೋ ಅದೇ ಪಕ್ಷದವರ ಜೊತೆ ಕೈಜೋಡಿಸುತ್ತಿದ್ದಾರೆ. ಕೇವಲ ಹಣ ಮತ್ತು ಸ್ವಾರ್ಥಕ್ಕಾಗಿ ಧರ್ಮ, ಕೋಮು ಸೌಹಾರ್ದತೆ ಹಾಗೂ ನೈತಿಕ ಮೌಲ್ಯಗಳನ್ನು ಮಾರಿಕೊಂಡಿದ್ದಾರೆ. ಇನ್ನೂ ಬುದ್ಧಿ ಇರುವವರು ವಾಪಸ್ ಬನ್ನಿ, ಇಲ್ಲದಿದ್ದರೆ ನೀವು ಎಲ್ಲೂ ಇಲ್ಲದಂತಾಗುತ್ತೀರಿ ಎಂದರು.

ಪ್ರಸ್ತುತ ದೇಶದಲ್ಲಿ ಭಯ ಹಾಗೂ ಆರ್ಥಿಕ ಸಂಕಷ್ಟದ ವಾತಾವರಣವಿದೆ ಎಂದ ಮಮತಾ ಬ್ಯಾನರ್ಜಿ, ಡಿಜಿಟಲ್ ಮಾಧ್ಯಮಗಳ ಧ್ವನಿ ಅಡಗಿಸಲಾಗುತ್ತಿದೆ ಎಂದು ದೂರಿದರು. ಯೂಟ್ಯೂಬ್, ಫೇಸ್‌ಬುಕ್ ಅಥವಾ ಇನ್‌ಸ್ಟಾಗ್ರಾಮ್‌ನಲ್ಲಿ ಸರ್ಕಾರದ ವಿರುದ್ಧ ಧ್ವನಿ ಎತ್ತಿದವರನ್ನು ಬಂಧಿಸಲಾಗುತ್ತಿದೆ. ಬಿಜೆಪಿಗೆ ಒಂದು ದೇಶ, ಒಂದು ಪಕ್ಷ ಎಂಬ ಸರ್ವಾಧಿಕಾರ ಬೇಕಾಗಿದೆ, ಇದನ್ನು ನಾವು ಒಪ್ಪಲ್ಲ. ಪೊಲೀಸರ ನಡೆ ಕೂಡ ಈಗ ಕಾನೂನುಬಾಹಿರವಾಗಿದೆ ಎಂದು ಆರೋಪಿಸಿದರು.

ಇದೇ ವೇಳೆ ಬಿಜೆಪಿಯ ಸಂವಿಧಾನ ಹತ್ಯಾ ದಿನದ ಆಚರಣೆಯನ್ನು ಪ್ರಶ್ನಿಸಿದ ಅವರು, ಈಗ ದೇಶದಲ್ಲಿ ಸಂವಿಧಾನ ಉಳಿದಿದೆಯೇ...? ಕಾನೂನಿನ ಆಡಳಿತವಿದೆಯೇ..? ತಮ್ಮಿಷ್ಟದಂತೆ ನಡೆದುಕೊಳ್ಳುತ್ತಾ ಜನರನ್ನು ಬೆದರಿಸಲಾಗುತ್ತಿದೆ ಎಂದು ಕಿಡಿಕಾರಿದರು. ಪಕ್ಷದ್ರೋಹದ ವಿಷಯ ಪ್ರಸ್ತಾಪಿಸುತ್ತಾ ತಮ್ಮ ಸ್ವಂತ ಕುಟುಂಬದ ಉದಾಹರಣೆ ನೀಡಿದ ಮಮತಾ, ದ್ರೋಹ ಬಗೆದ ಕಾರಣಕ್ಕೆ ತಾವು ತಮ್ಮ ಇಬ್ಬರು ಸಹೋದರರಿಂದ ದೂರ ಸರಿದಿರುವುದಾಗಿ ತಿಳಿಸಿದರು. ಆದರೆ ತಮ್ಮ ಸೋದರಳಿಯ ಅಭಿಷೇಕ್ ಬ್ಯಾನರ್ಜಿ ಕುಟುಂಬ ತಮ್ಮೊಂದಿಗೆ ಗಟ್ಟಿಯಾಗಿ ನಿಂತಿದೆ, ಸಿಐಡಿ, ಇಡಿ ಮತ್ತು ಸಿಬಿಐ ಸಂಸ್ಥೆಗಳಿಂದ ಅಭಿಷೇಕ್ ಬ್ಯಾನರ್ಜಿಗೆ ನಿರಂತರ ಸಮನ್ಸ್ ನೀಡಲಾಗುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದರು(ಏಜೆನ್ಸೀಸ್​​).