ಲೋಕಸಭೆಯ ಟಿಎಂಸಿ ಉಪನಾಯಕನಾಗಿ ಹಿರಿಯ ಸಂಸದ ಸೌಗತ ರಾಯ್ ನೇಮಿಸಿದ ಮಮತಾ ಬ್ಯಾನರ್ಜಿ | MP Saugata Roy

ನವದೆಹಲಿ: ಸಂಸದೆ ಶತಾಬ್ದಿ ರಾಯ್ ಬಂಡಾಯ ಬಣಕ್ಕೆ ಸೇರಿದ ಹಿನ್ನೆಲೆ ತೃಣಮೂಲ ಕಾಂಗ್ರೆಸ್ ಮುಖ್ಯಸ್ಥೆ ಮತ್ತು ಮಾಜಿ ಸಿಎಂ ಮಮತಾ ಬ್ಯಾನರ್ಜಿಯವರು, ಶುಕ್ರವಾರ(ಜು. 24) ಪಕ್ಷದ ಹಿರಿಯ ಸಂಸದ ಸೌಗತ ರಾಯ್(MP Saugata Roy) ಅವರನ್ನು ಲೋಕಸಭೆಯ ಉಪ ನಾಯಕರನ್ನಾಗಿ ನೇಮಕ ಮಾಡಿದ್ದಾರೆ.

20 ಸಂಸದರ ಬಂಡಾಯದ ನಂತರ ಟಿಎಂಸಿಯ ಸಂಸದೀಯ ಶ್ರೇಣಿಯಲ್ಲಿ ಪ್ರಮುಖ ಸಾಂಸ್ಥಿಕ ಪುನರ್ರಚನೆ ನಡೆದಿದ್ದು, ಲೋಕಸಭೆಯಲ್ಲಿ ಟಿಎಂಸಿಯ ಉಪನಾಯಕರಾಗಿ ಸೇವೆ ಸಲ್ಲಿಸುತ್ತಿದ್ದ ಸತಾಬ್ದಿ ರಾಯ್ ಅವರು ಬಂಡಾಯ ಬಣಕ್ಕೆ ಸೇರಿದ ಹಿನ್ನೆಲೆ ಅವರಿಂದ ತೆರವಾದ ಸ್ಥಾನಕ್ಕೆ ಸೌಗತ್ ರಾಯ್ ಅವರನ್ನು ನೇಮಕ ಮಾಡಿದೆ.

ಸೌಗತ ರಾಯ್ ಟಿಎಂಸಿಯ ಅತ್ಯಂತ ಹಿರಿಯ ಸಂಸದರಲ್ಲಿ ಒಬ್ಬರು. ಮತ್ತು ಲೋಕಸಭೆಯಲ್ಲಿ ರಾಜಕೀಯ ಮತ್ತು ನೀತಿ ವಿಷಯಗಳಲ್ಲಿ ಪಕ್ಷದ ಪ್ರಮುಖ ಧ್ವನಿಯಾಗಿದ್ದಾರೆ. ನಿವೃತ್ತ ಭೌತಶಾಸ್ತ್ರ ಪ್ರಾಧ್ಯಾಪಕರಾಗಿರುವ ರಾಯ್, ಐದು ಬಾರಿ ಲೋಕಸಭಾ ಸಂಸದರಾಗಿದ್ದು, ಪ್ರಸ್ತುತ ಪಶ್ಚಿಮ ಬಂಗಾಳದ ಡಮ್-ಡಮ್ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿದ್ದಾರೆ. 

ಸೌಗತ್ ರಾಯ್ ಮೊದಲು 1977ರಲ್ಲಿ ಬ್ಯಾರಕ್‌ಪೋರ್‌ನಿಂದ ಲೋಕಸಭೆಗೆ ಪ್ರವೇಶಿಸಿದರು. ನಂತರ ಅವರು 1987 ಮತ್ತು 2009ರ ನಡುವೆ ಸತತ ಐದು ಅವಧಿಗೆ ಪಶ್ಚಿಮ ಬಂಗಾಳ ವಿಧಾನಸಭೆ ಶಾಸಕರಾಗಿ ಸೇವೆ ಸಲ್ಲಿಸಿದ್ದಾರೆ. 2009ರಲ್ಲಿ ಡಮ್-ಡಮ್‌ನಿಂದ ಮತ್ತೆ ಸಂಸತ್ತಿಗೆ ಮರಳಿದ್ದು, ನಿರಂತರ ಗೆಲುವು ಸಾಧಿಸಿದ್ದಾರೆ. ಟಿಎಂಸಿ ಸೇರುವ ಮೊದಲು, ರಾಯ್ ಕಾಂಗ್ರೆಸ್​ನಲ್ಲಿದ್ದರು.

ರಾಯ್ ಅವರು ಚರಣ್ ಸಿಂಗ್ ಸರ್ಕಾರದಲ್ಲಿ ಕೇಂದ್ರ ಪೆಟ್ರೋಲಿಯಂ ಮತ್ತು ರಾಸಾಯನಿಕಗಳ ರಾಜ್ಯ ಸಚಿವರಾಗಿದ್ದರು. ಮತ್ತು ಬಳಿಕ ಮಾಜಿ ಪ್ರಧಾನಿ ಮನಮೋಹನ್ ಸಿಂಗ್ ನೇತೃತ್ವದ ಯುಪಿಎ ಸರ್ಕಾರದಲ್ಲಿ ಕೇಂದ್ರ ನಗರಾಭಿವೃದ್ಧಿ ರಾಜ್ಯ ಸಚಿವರಾಗಿ ಸೇವೆ ಸಲ್ಲಿಸಿದ್ದಾರೆ.

ಇನ್ನೂ ಟಿಎಂಸಿ ಪಕ್ಷದಿಂದ ಬಂಡಾಯವೆದ್ದರಿರುವ 20 ಸಂಸದರು ನ್ಯಾಷನಲಿಸ್ಟ್ ಸಿಟಿಜನ್ಸ್ ಪಾರ್ಟಿ ಆಫ್ ಇಂಡಿಯಾ (ಎನ್‌ಸಿಪಿಐ) ಎಂಬ ಪಕ್ಷದಲ್ಲಿ ವಿಲೀನಗೊಂಡಿದ್ದಾರೆ (ಏಜೆನ್ಸೀಸ್).