ಒಂದೇ ತಿಂಗಳಲ್ಲಿ ಎರಡನೇ ವಿಕೆಟ್ ಪತನ!
ಕಳೆದ ತಿಂಗಳಷ್ಟೇ ದುಬೈನಿಂದ ಹೈದರಾಬಾದ್‌ನ ರಾಜೀವ್ ಗಾಂಧಿ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ಪ್ರಮುಖ ಆರೋಪಿ ಅಭಿಷೇಕ್ ಕುಮಾರ್‌ನನ್ನು ಸಿಬಿಐ ರೆಡ್‌ಹ್ಯಾಂಡ್‌ ಆಗಿ ಅರೆಸ್ಟ್ ಮಾಡಿತ್ತು. ಆ ಬೆನ್ನಲ್ಲೇ ಈಗ ನೇರವಾಗಿ ಸಿಂಡಿಕೇಟ್‌ನ ಕಿಂಗ್ಪಿನ್ ಸೌರಭ್ ಚಂದ್ರಕರ್ ನನ್ನು ಭಾರತಕ್ಕೆ ಎಳೆದುತಂದಿರುವುದು ಸಿಬಿಐಗೆ ಸಿಕ್ಕ ಅತಿ ದೊಡ್ಡ ಗೆಲುವಾಗಿದೆ. ದೇಶದ ಹೊರಗೆ ಕುಳಿತು ಅಕ್ರಮ ದಂಧೆ ನಡೆಸುತ್ತಿದ್ದ ಪರಾರಿಯಾದವರ ಬೇಟೆಯಲ್ಲಿ ಇದೊಂದು 'ಐತಿಹಾಸಿಕ ಮೈಲಿಗಲ್ಲು' ಎಂದು ತನಿಖಾ ಸಂಸ್ಥೆ ಬಣ್ಣಿಸಿದೆ.
ಏನಿದು ಮಹಾದೇವ್ ಬೆಟ್ಟಿಂಗ್ ಮಾಯಾಲೋಕ?
ಭಾರತದಾದ್ಯಂತ ಫ್ರಾಂಚೈಸಿ, ಏಜೆಂಟ್‌ಗಳು ಮತ್ತು 'ಪ್ಯಾನೆಲ್'ಗಳ ಜಾಲ ಸೃಷ್ಟಿಸಿ ಕ್ರಿಕೆಟ್, ಫುಟ್‌ಬಾಲ್ ಹಾಗೂ ಕಾರ್ಡ್ ಆಟಗಳ ಮೇಲೆ ಸಾವಿರಾರು ಕೋಟಿ ಬೆಟ್ಟಿಂಗ್ ಕಟ್ಟಿಸಿಕೊಳ್ಳಲಾಗುತ್ತಿತ್ತು.
ಹವಾಲಾ ಮಾರ್ಗ: ಜನರ ಹಣವನ್ನು ನಕಲಿ ಬ್ಯಾಂಕ್ ಖಾತೆಗಳ ಮೂಲಕ ವರ್ಗಾಯಿಸಿ, ಹಲವು ಹಂತಗಳಲ್ಲಿ ಸುತ್ತಿ, ಹವಾಲಾ ಮುಖಾಂತರ ದುಬೈ, ಓಮನ್‌ನಂತಹ ವಿದೇಶಗಳಿಗೆ ಕೋಟ್ಯಂತರ ಹಣ ಸಾಗಿಸಲಾಗುತ್ತಿತ್ತು.
ರಕ್ಷಣೆಗೆ ಲಂಚದ ಹೊಳೆ: ಈ ಅಕ್ರಮ ಸಾಮ್ರಾಜ್ಯಕ್ಕೆ ಯಾವುದೇ ಅಡ್ಡಿಯಾಗದಂತೆ ನೋಡಿಕೊಳ್ಳಲು, ಸಾರ್ವಜನಿಕ ಅಧಿಕಾರಿಗಳು ಮತ್ತು ಪ್ರಭಾವಿಗಳಿಗೆ ಕೋಟಿ ಕೋಟಿ ರೂಪಾಯಿಗಳ ಹಫ್ತಾ ಮುಟ್ಟಿಸಲಾಗುತ್ತಿತ್ತು ಎಂದು ಸಿಬಿಐ ಪತ್ತೆಹಚ್ಚಿದೆ.
