ದ್ವೇಷ ಬಿತ್ತಿದವರಿಗಿಲ್ಲದ ಶಿಕ್ಷೆ, ಪ್ರತಿಕ್ರಿಯಿಸಿದವರಿಗೇಕೆ..? ಸನಾತನ ಧರ್ಮದ ನಿರ್ಮೂಲನೆಯ ಹೇಳಿಕೆಗೆ ಮದ್ರಾಸ್​ ಹೈಕೋರ್ಟ್ ಗರಂ! | Udhayanidhi Case

ಡಿಸಿಎಂ ಉದಯನಿಧಿ ಭಾಷಣ ದ್ವೇಷ ಭಾಷಣಕ್ಕೆ ಸಮನಾಗಿದೆ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದ್ದು, ಮಾಳವೀಯ ಅರ್ಜಿಯನ್ನು ಮಾನ್ಯ ಮಾಡಿದ ನ್ಯಾಯಮೂರ್ತಿ ಎಸ್ ಶ್ರೀಮತಿ, ಉದಯನಿಧಿಯವರ 2023 ರ ಹೇಳಿಕೆಗಳನ್ನು ನರಮೇಧಕ್ಕೆ ಕರೆ ಎಂದು ವಿವರಿಸಿದ ಪೋಸ್ಟ್ ಯಾವುದೇ ಕ್ರಿಮಿನಲ್ ಅಪರಾಧವಲ್ಲ ಎಂದು ತೀರ್ಪು ನೀಡಿದರು.

ಉದಯನಿಧಿ ಭಾಷಣವು ಸನಾತನ ಧರ್ಮವನ್ನು ಅನುಸರಿಸುವ ಹಿಂದೂಗಳನ್ನು ಗುರಿಯಾಗಿಸಿಕೊಂಡಿದೆ ಮತ್ತು ಮಾಳವೀಯ ಸ್ವತಃ ಅನುಯಾಯಿಯಾಗಿರುವುದರಿಂದ ಅಂತಹ ಹೇಳಿಕೆಗಳ ಸಂತ್ರಸ್ತನಾಗಿ ಕಾಣಬಹುದು ಎಂದು ನ್ಯಾಯಾಧೀಶರು ಅಭಿಪ್ರಾಯಪಟ್ಟಿದ್ದಾರೆ.

ಉದಯನಿಧಿ ಭಾಷಣದಲ್ಲಿ ಅನೇಕ ಕಡೆ ಬಳಸಲಾದ 'ಓಳಿಪ್ಪು' ಎಂಬ ತಮಿಳು ಪದವನ್ನು ನ್ಯಾಯಾಧೀಶರು ಪರಿಶೀಲಿಸಿದ್ದು, ಇದರರ್ಥ ರದ್ದುಗೊಳಿಸು, ಸನಾತನ ಧರ್ಮವನ್ನು ರದ್ದುಗೊಳಿಸಬೇಕಾದರೆ, ಅದನ್ನು ಅನುಸರಿಸುವವರು ಅಸ್ತಿತ್ವದಲ್ಲಿರಬಾರದು ಎನ್ನುವುದನ್ನು ಅವರ ಮಾತು ಸೂಚಿಸುತ್ತದೆ ಎಂದು ನ್ಯಾಯಾಲಯ ಗಮನಿಸಿದ್ದು, ಸನಾತನ ಓಳಿಪ್ಪು ಎಂಬ ಪದ ನರಮೇಧ ಅಥವಾ ಸಾಂಸ್ಕೃತಿಕ ನಿರ್ಮೂಲನೆಯನ್ನು ಪ್ರತಿಪಾದಿಸುತ್ತದೆ ಎಂದು ಅರ್ಥೈಸಬಹುದು ಎಂದು ಅಭಿಪ್ರಾಯಪಟ್ಟಿದೆ.

ಉದಯನಿಧಿ ಹೇಳಿಕೆಗಳನ್ನು ದ್ವೇಷ ಭಾಷಣ ಎಂದು ವರ್ಗೀಕರಿಸಲಾದ ಮತ್ತೊಂದು ಪ್ರಕರಣದಲ್ಲಿ ಮದ್ರಾಸ್ ಹೈಕೋರ್ಟ್‌ನ ಮಾರ್ಚ್ 2024 ರ ಆದೇಶವನ್ನು ನ್ಯಾಯಾಲಯ ಉಲ್ಲೇಖಿಸಿದೆ. ಒಬ್ಬ ಸಚಿವರು ದ್ವೇಷ ಭಾಷಣ ಮಾಡಿದಾಗ, ಅದನ್ನು ವಿರೋಧಿಸುವುದನ್ನು ಕ್ರಿಮಿನಲ್ ಕೃತ್ಯವೆಂದು ಪರಿಗಣಿಸಲಾಗುವುದಿಲ್ಲ ಎಂದು ನ್ಯಾಯಾಧೀಶರು ಹೇಳಿದರು, ಮಾಳವೀಯ ಹಿಂಸಾಚಾರವನ್ನು ಪ್ರಚೋದಿಸಿಲ್ಲ ಅಥವಾ ಯಾವುದೇ ಆಂದೋಲನಕ್ಕೆ ಕರೆ ನೀಡಿಲ್ಲ ಎಂದು ಹೇಳಿತ್ತು.

2023 ರ ಸೆಪ್ಟೆಂಬರ್​ನಲ್ಲಿ ತಮಿಳುನಾಡು ಡಿಸಿಎಂ ಉದಯನಿಧಿ ಸ್ಟಾಲಿನ್ ಸನಾತನ ಧರ್ಮದ ಬಗ್ಗೆ ನೀಡಿದ ಹೇಳಿಕೆಗಳು ರಾಷ್ಟ್ರಾದ್ಯಂತ ಆಕ್ರೋಶಕ್ಕೆ ಕಾರಣವಾಗಿತ್ತು. ಸಾರ್ವಜನಿಕ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ್ದ ಸಿಎಂ ಸ್ಟಾಲಿನ್​ ಪುತ್ರ, ಕೆಲವು ವಿಷಯಗಳನ್ನು ವಿರೋಧಿಸಲು ಸಾಧ್ಯವಿಲ್ಲ, ಅವುಗಳನ್ನು ರದ್ದುಗೊಳಿಸಬೇಕು. ನಾವು ಡೆಂಗ್ಯೂ, ಸೊಳ್ಳೆಗಳು, ಮಲೇರಿಯಾ ಅಥವಾ ಕೊರೊನಾವನ್ನು ವಿರೋಧಿಸಲು ಸಾಧ್ಯವಿಲ್ಲ, ಅವುಗಳನ್ನು ನಿರ್ಮೂಲನೆ ಮಾಡಬೇಕು. ಅದೇ ರೀತಿ, ನಾವು ಸನಾತನವನ್ನು ವಿರೋಧಿಸುವ ಬದಲು ಅದನ್ನು ನಿರ್ಮೂಲನೆ ಮಾಡಬೇಕು ಎಂದು ಹೇಳಿದ್ದರು(ಏಜೆನ್ಸೀಸ್​).