ಪುಣೆಗೆ ಬಂದ ಮೇಡ್​ ಇನ್​ ಪಾಕಿಸ್ತಾನ್​ ಚಾದರ್​: ಮಹಿಳೆ ವಿಡಿಯೋ ನೋಡಿ ಅಖಾಡಕ್ಕಿಳಿದ ಪೊಲೀಸರು! Made In Pakistan

ಪುಣೆ: ಸಾಮಾಜಿಕ ಮಾಧ್ಯಮದಲ್ಲಿ ಸದ್ಯ ಪುಣೆಯ ಮಹಿಳೆಯೊಬ್ಬರು ಹಂಚಿಕೊಂಡಿರುವ ವಿಡಿಯೋ ಸಿಕ್ಕಾಪಟ್ಟೆ ವೈರಲ್ ಆಗ್ತಿದೆ. ಪಿಂಪ್ರಿ-ಚಿಂಚ್‌ವಾಡ್‌ನ ಸ್ಥಳೀಯ ಧಾರ್ಮಿಕ ಮೇಳವೊಂದರಲ್ಲಿ ಖರೀದಿಸಿದ ಬೆಡ್‌ಶೀಟ್ ಮೇಲೆ ಮೇಡ್ ಇನ್ ಪಾಕಿಸ್ತಾನ (Made in Pakistan) ಎನ್ನುವ ಲೇಬಲ್ ಪತ್ತೆಯಾಗಿದ್ದು, ಜನಸಾಮಾನ್ಯರಷ್ಟೇ ಅಲ್ಲದೇ ಈಗ ಪೊಲೀಸ್ ಅಧಿಕಾರಿಗಳೂ ಅಲರ್ಟ್ ಆಗಿದ್ದಾರೆ.

ಭಾರತ ಮತ್ತು ಪಾಕಿಸ್ತಾನ ನಡುವೆ ಆಮದು ನಿರ್ಬಂಧಗಳಿದ್ದರೂ, ಈ ಪ್ರಾಡಕ್ಟ್ ಸ್ಥಳೀಯ ಮಾರ್ಕೆಟ್‌ಗೆ ಹೆಂಗೆ ಬಂತು? ಎನ್ನುವುದನ್ನು ಪತ್ತೆ ಹಚ್ಚಲು ಪೊಲೀಸ್​ ಅಧಿಕಾರಿಗಳು ಈಗ ತನಿಖೆ ಕೈಗೆತ್ತಿಕೊಂಡಿದ್ದಾರೆ.

ಪೂಜಾ ಸರಾಫ್ ಎಂಬ ಮಹಿಳೆ ಈ ವಿಡಿಯೋ ಪೋಸ್ಟ್ ಮಾಡಿದ್ದು, ಸಂಕಷ್ಟಿ ಚತುರ್ಥಿಯ ಸಂದರ್ಭದಲ್ಲಿ ಪಿಂಪ್ರಿ-ಚಿಂಚ್‌ವಾಡ್‌ನ ಪ್ರಸಿದ್ಧ ಮೊರಾಯ ಗೋಸಾವಿ ದೇವಸ್ಥಾನದ ಹತ್ತಿರ ನಡೆದ ಜಾತ್ರೆಯಲ್ಲಿ ಅವರು ಈ ಬೆಡ್‌ಶೀಟ್ ಖರೀದಿಸಿದ್ದರು. ತಂದ ಹೊಸ ಚಾದರ್ ಅನ್ನು ತೊಳೆಯಲು ಹೋದಾಗ ಅವರಿಗೆ ಈ ಶಾಕಿಂಗ್ ವಿಷಯ ಗೊತ್ತಾಗಿದೆ.

ನಾವೇನು ಗಡಿ ಪ್ರದೇಶದಲ್ಲಿ ವಾಸಿಸುತ್ತಿಲ್ಲ. ಆದರೂ ನಮ್ಮ ಮನೆ ಒಳಗಡೆ ಮೇಡ್ ಇನ್ ಪಾಕಿಸ್ತಾನ್ ಲೇಬಲ್ ಇರೋ ವಸ್ತು ಬಂದಿದೆ! ಎಂದು ಅವರು ಬೆಡ್‌ಶೀಟ್‌ನಲ್ಲಿದ್ದ ಟ್ಯಾಗ್ ತೋರಿಸುತ್ತಾ ಆತಂಕ ವ್ಯಕ್ತಪಡಿಸಿದ್ದಾರೆ.

ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡುತ್ತಿದ್ದಂತೆ ಪಿಂಪ್ರಿ-ಚಿಂಚ್‌ವಾಡ್ ಪೊಲೀಸರು ತಾವಾಗಿಯೇ ವಿಷಯವನ್ನು ಗಂಭೀರವಾಗಿ ಪರಿಗಣಿಸಿದ್ದಾರೆ. ಯಾವುದೇ ಅಧಿಕೃತ ದೂರು ದಾಖಲಾಗದಿದ್ದರೂ, ವೈರಲ್ ವಿಡಿಯೋ ಆಧರಿಸಿ ಪ್ರಾಡಕ್ಟ್‌ನ ಅಸಲಿಯತ್ತು ಮತ್ತು ಅದು ಎಲ್ಲಿಂದ ಬಂತು ಎನ್ನುವುದನ್ನು ಪತ್ತೆ ಹಚ್ಚಲು ಒಂದು ಸ್ಪೆಷಲ್ ಟೀಮ್ ರೆಡಿ ಮಾಡಿದ್ದಾರೆ.

ಅಷ್ಟೇ ಅಲ್ಲದೇ, ಪಿಂಪ್ರಿ-ಚಿಂಚ್‌ವಾಡ್ ಮುನ್ಸಿಪಲ್ ಕಾರ್ಪೊರೇಷನ್‌ಗೂ ಪತ್ರ ಬರೆದಿರೋ ಪೊಲೀಸರು, ಆ ಮೇಳದಲ್ಲಿ ಅಂಗಡಿ ಹಾಕಿದ್ದ ವ್ಯಾಪಾರಿಗಳ ಲಿಸ್ಟ್ ಚೆಕ್ ಮಾಡಲು ಮತ್ತು ಕಾನೂನು ಉಲ್ಲಂಘನೆ ಆಗಿದ್ದರೆ ಸೂಕ್ತ ಕ್ರಮ ಕೈಗೊಳ್ಳಲು ಸೂಚಿಸಿದ್ದಾರೆ.

ನನಗೆ ತುಂಬಾ ಬೇಸರವಾಗುತ್ತಿದೆ. ನನ್ನ ಹಾಗೆ ಇನ್ನು ಎಷ್ಟೋ ಜನ ಅಲ್ಲಿಂದ ಚಾದರ್‌ಗಳನ್ನು ತಂದಿರ್ತಾರೆ. ನಮ್ಮ ಅರಿವಿಗೆ ಬರದೆ ಈ ವಸ್ತುಗಳು ಜನರ ಮನೆ ತಲುಪಿವೆ, ಎಂದು ಪೂಜಾ ಸರಾಫ್ ಕಳವಳ ವ್ಯಕ್ತಪಡಿಸಿದ್ದಾರೆ. ಕೊನೆಯದಾಗಿ ಜನರಿಗೆ ಒಂದು ಕಿವಿಮಾತು ಹೇಳಿರೋ ಅವರು, ಇನ್ಮುಂದೆ ಮಾರ್ಕೆಟ್‌ಗೆ ಹೋಗಿ ಶಾಪಿಂಗ್ ಮಾಡುವಾಗ ಕಣ್ಣು ಕಿವಿಯನ್ನ ತೆರೆದಿಟ್ಟುಕೊಳ್ಳಿ. ನನಗಂತೂ ಈಗ ಬುದ್ಧಿ ಬಂದಿದೆ ಎಂದು ಹೇಳಿದ್ದಾರೆ,(ಏಜನ್ಸೀಸ್).