ಪ್ರತಿ ಮನೆಯಲ್ಲೂ ಐಷಾರಾಮಿ ಕಾರುಗಳು... ಭಾರತದಲ್ಲಿರುವ ಈ ಗ್ರಾಮದ ಕಥೆ ಕೇಳಿದ್ರೆ ನಿಮ್ಮ ಹುಬ್ಬೇರುತ್ತೆ! Dharmaj village

Dharmaj village  : ಭಾರತದ ಯಾವುದೇ ಹಳ್ಳಿಯ ಬಗ್ಗೆ ನಾವು ಯೋಚಿಸುವಾಗ, ನಮ್ಮ ತಲೆಗೆ ಬರುವ ಮೊದಲ ಕಲ್ಪನೆ ಎಂದರೆ, ಹದಗೆಟ್ಟ ರಸ್ತೆಗಳು, ಗುಡಿಸಲುಗಳು ಹಾಗೂ ಹಂಚಿನ ಮನೆಗಳು. ಒಟ್ಟಾರೆ ಮೂಲ ಸೌಕರ್ಯಗಳ ಕೊರತೆ ಹಾಗೂ ಜನರ ಸರಳ ಜೀವನ ನಮ್ಮ ಕಣ್ಣ ಮುಂದೆ ಬರುತ್ತವೆ. ಆದರೆ, ಗುಜರಾತಿನ ಆನಂದ್ ಜಿಲ್ಲೆಯ ಧರ್ಮಜ್ ಗ್ರಾಮವು ಈ ಕಲ್ಪನೆಗಳಿಗೆ ಸಂಪೂರ್ಣವಾಗಿ ವಿರುದ್ಧವಾಗಿದೆ. 

ಧರ್ಮಜ್​ ಗ್ರಾಮವು ಗ್ರಾಮೀಣ ಸೌಂದರ್ಯದ ಜತೆಗೆ ಅಂತಾರಾಷ್ಟ್ರೀಯ ಸಂಪತ್ತಿನ ಮಿಶ್ರಣವಾಗಿದೆ. ಇಲ್ಲಿನ ಪ್ರತಿ ಮನೆಯ ಮುಂದೆ ಬಿಎಂಡಬ್ಲ್ಯು ಮತ್ತು ಮರ್ಸಿಡಿಸ್‌ನಂತಹ ಐಷಾರಾಮಿ ಕಾರುಗಳನ್ನು ನೀವು ಕಾಣಬಹುದು. ಒಳ್ಳೆಯ ಸ್ಥಾನ ಸಿಕ್ಕರೆ ಹುಟ್ಟಿದ ಊರನ್ನೇ ಮರೆಯುವ ಈ ಕಾಲದಲ್ಲಿ, ತಮ್ಮ ಬೇರುಗಳನ್ನು ಮರೆಯದೆ ಹಳ್ಳಿಯ ಅಭಿವೃದ್ಧಿಗಾಗಿ ಕೆಲಸ ಮಾಡುವ ಇಲ್ಲಿನ ಜನರ ಕಥೆ ನಮಗೆಲ್ಲರಿಗೂ ಸ್ಪೂರ್ತಿದಾಯಕವಾಗಿದೆ. ಸಂಪತ್ತನ್ನು ಕೇವಲ ತಮ್ಮಲ್ಲೇ ಕೂಡಿಟ್ಟುಕೊಳ್ಳದೇ, ಹಳ್ಳಿಯ ಉದ್ಧಾರಕ್ಕಾಗಿ ಬಳಸುತ್ತಿರುವ ಪರಿಣಾಮ ಇಂದು ಭಾರತದಲ್ಲಿ ಧರ್ಮಜ್​ ಗ್ರಾಮ ಜನಪ್ರಿಯವಾಗಿದೆ.

ಧರ್ಮಜ್ ಗ್ರಾಮವನ್ನು 'ಭಾರತದ ಎನ್‌ಆರ್‌ಐ ಗ್ರಾಮ' ಎಂದು ಕರೆಯಲಾಗುತ್ತದೆ. ಈ ಸಣ್ಣ ಹಳ್ಳಿಯ ಸುಮಾರು 3,000 ಕುಟುಂಬಗಳು ಯುಕೆ, ಯುಎಸ್‌ಎ, ಕೆನಡಾ ಮತ್ತು ಆಸ್ಟ್ರೇಲಿಯಾದಂತಹ ದೇಶಗಳಲ್ಲಿ ನೆಲೆಸಿವೆ. ಈ ಎನ್‌ಆರ್‌ಐಗಳು ತಮ್ಮ ತವರು ಹಳ್ಳಿಯ ಮೇಲಿನ ಪ್ರೀತಿಯಿಂದ ವಿದೇಶದಲ್ಲಿ ಕಷ್ಟಪಟ್ಟು ಸಂಪಾದಿಸಿದ ಹಣವನ್ನು ಇಲ್ಲಿನ ಬ್ಯಾಂಕುಗಳಲ್ಲಿ ಸಂಗ್ರಹಿಸುತ್ತಿದ್ದಾರೆ. ಇದರ ಪರಿಣಾಮವಾಗಿ, ಈ ಹಳ್ಳಿಯಲ್ಲಿರುವ 11 ಕ್ಕೂ ಹೆಚ್ಚು ಬ್ಯಾಂಕುಗಳಲ್ಲಿ 1000 ಕೋಟಿಗೂ ಹೆಚ್ಚು ಠೇವಣಿಗಳಿವೆ ಎಂದು ವರದಿಯಾಗಿದೆ. ಅತ್ಯುತ್ತಮ ಆರ್‌ಸಿಸಿ ರಸ್ತೆಗಳು ಇಲ್ಲಿವೆ. ಅಲ್ಲದೆ, 1972 ರಿಂದ ಕಾರ್ಯನಿರ್ವಹಿಸುತ್ತಿರುವ ಭೂಗತ ಒಳಚರಂಡಿ ವ್ಯವಸ್ಥೆ ಮತ್ತು ಎಲ್ಲಾ ಸೌಕರ್ಯಗಳೊಂದಿಗೆ, ಧರ್ಮಜ್ ಗ್ರಾಮವು ಅನೇಕ ನಗರಗಳಿಗಿಂತ ಉತ್ತಮವಾಗಿದೆ.

ಧರ್ಮಜ್ ಗ್ರಾಮದ ನಿಜವಾದ ಸಂಪತ್ತು ಕೇವಲ ಐಷಾರಾಮಿ ಕಾರುಗಳು ಮತ್ತು ಬ್ಯಾಂಕ್ ಬ್ಯಾಲೆನ್ಸ್‌ಗಳ ರೂಪದಲ್ಲಿ ಇಲ್ಲ ಬದಲಾಗಿ, ಅಲ್ಲಿನ ಜನರು ತಮ್ಮ ಗ್ರಾಮವನ್ನು ತಾವೇ ಅಭಿವೃದ್ಧಿಪಡಿಸಬೇಕೆಂಬ ದೃಢಸಂಕಲ್ಪದಲ್ಲಿ ಅಡಗಿದೆ. ವಿದೇಶಕ್ಕೆ ಹೋದಾಗಲೂ, ಅವರು ತಮ್ಮ ಬೇರುಗಳನ್ನು ಮರೆಯುವುದಿಲ್ಲ ಮತ್ತು ನಿರಂತರವಾಗಿ ಹಳ್ಳಿಗೆ ಹಣವನ್ನು ಕಳುಹಿಸುತ್ತಾರೆ ಮತ್ತು ಪ್ರತಿಯೊಂದು ಕೆಲಸದಲ್ಲೂ ಭಾಗವಹಿಸುತ್ತಾರೆ. ಸರ್ಕಾರದ ಸಹಾಯವಿಲ್ಲದೆ ತಮ್ಮ ಗ್ರಾಮದ ಅಭಿವೃದ್ಧಿಗಾಗಿ ತಮ್ಮ ಸ್ವಂತ ನಿಧಿಯಿಂದ ಹಣವನ್ನು ನೀಡುತ್ತಾರೆ. ಒಂದು ಸಣ್ಣ ಹಳ್ಳಿಯು ವಿಶ್ವ ದರ್ಜೆಯ ಮೂಲಸೌಕರ್ಯ ಮತ್ತು ಐಷಾರಾಮಿ ಜೀವನವನ್ನು ಹೇಗೆ ಸೃಷ್ಟಿಸಬಹುದು ಎಂಬುದಕ್ಕು ಧರ್ಮಜ್​ ಗ್ರಾಮ ಸಾಕ್ಷಿಯಾಗಿದೆ.

ಅಂದಹಾಗೆ, ಧರ್ಮಜ್ ಗ್ರಾಮದ ಕತೆ ನಮಗೆ ಒಂದು ಪ್ರಮುಖ ಪಾಠವನ್ನು ಕಲಿಸುತ್ತದೆ. ನಾವು ಎಷ್ಟೇ ಎತ್ತರಕ್ಕೆ ಏರಿದರೂ, ನಾವು ಬಂದ ಮಣ್ಣನ್ನು ಎಂದಿಗೂ ಮರೆಯದಿದ್ದರೆ, ನಾವು ಪವಾಡಗಳನ್ನೇ ಸೃಷ್ಟಿಸಬಹುದು. ಐಷಾರಾಮಿ ಕಾರುಗಳು ಕೇವಲ ಸಂಪತ್ತಿನ ಸಂಕೇತಗಳಲ್ಲ, ಅವು ಕಠಿಣ ಪರಿಶ್ರಮ, ಕೌಟುಂಬಿಕ ಸಂಬಂಧ ಮತ್ತು ಸಾಮೂಹಿಕ ಅಭಿವೃದ್ಧಿಯ ಬದ್ಧತೆಗೆ ಸಾಕ್ಷಿಯಾಗಿದೆ, (ಏಜೆನ್ಸೀಸ್​).