ಐಎಂಎಯಿಂದ ಪಾಸಾದ ಮೊದಲ ಮಹಿಳಾ ಅಧಿಕಾರಿಯಾದ ಸಾಯಿ ಜಾಧವ್ | Indian Army

ಡೆಹರಾಡೂನ್ : ಭಾರತೀಯ ಸಶಸ್ತ್ರ ಪಡೆಗಳಿಗೆ ಐತಿಹಾಸಿಕ ನೂತನ ಮೈಲಿಗಲ್ಲನ್ನು  ಮಹಾರಾಷ್ಟ್ರದ ಕೊಲ್ಹಾಪುರದ ಲೆಫ್ಟಿನೆಂಟ್ ಸಾಯಿ ಜಾಧವ್ ಸ್ಥಾಪಿಸಿದ್ದಾರೆ. ಡೆಹ್ರಾಡೂನ್‌ನ ಪ್ರತಿಷ್ಠಿತ ಭಾರತೀಯ ಮಿಲಿಟರಿ ಅಕಾಡೆಮಿಯ (IMA) 93 ವರ್ಷಗಳ ಮೊದಲ ಬಾರಿಗೆ ಪಾಸಾದ ಮಹಿಳಾ ಅಧಿಕಾರಿ ಎನ್ನುವ ಹೆಗ್ಗಳಿಕೆ ಇವರದ್ದಾಗಿದೆ. 1932 ರಲ್ಲಿ ಸ್ಥಾಪನೆಯಾದಾಗಿನಿಂದ, ಭಾರತೀಯ ಮಿಲಿಟರಿ ಅಕಾಡೆಮಿ 67,000 ಕ್ಕೂ ಹೆಚ್ಚು ಅಧಿಕಾರಿ ಕೆಡೆಟ್‌ಗಳಿಗೆ ತರಬೇತಿ ನೀಡಿದೆ. ಆದರೆ ಅವರೆಲ್ಲರೂ ಪುರುಷರಾಗಿದ್ದರು. IMA ನಲ್ಲಿ ತರಬೇತಿಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿ ಮತ್ತು ಅಧಿಕಾರಿಯಾಗಿ ನಿಯೋಜನೆಗೊಂಡ ಮೊದಲ ಮಹಿಳೆ ಎಂಬ ಹೆಗ್ಗಳಿಕೆ ಸಾಯಿ ಜಾಧವ್ ಅವರದ್ದಾಗಿದೆ. ಸಾಯಿ ಜಾಧವ್ ಅವರನ್ನು ಪ್ರಾದೇಶಿಕ ಸೈನ್ಯದಲ್ಲಿ (TA) ಲೆಫ್ಟಿನೆಂಟ್ ಆಗಿ ನಿಯೋಜನೆಗೊಳಿಸಲಾಗಿದೆ. ಮಹಿಳಾ ಅಧಿಕಾರಿಗಳು ಈ ಹಿಂದೆ ಪ್ರಾದೇಶಿಕ ಸೈನ್ಯದಲ್ಲಿ ಸೇವೆ ಸಲ್ಲಿಸಿದ್ದರೂ, IMA ನಲ್ಲಿ ತರಬೇತಿಯನ್ನು ಪೂರ್ಣಗೊಳಿಸಿದ ನಂತರ TA ಗೆ ಸೇರಿದ ಮೊದಲ ಮಹಿಳಾ ಅಧಿಕಾರಿ ಇವರಾಗಿದ್ದಾರೆ.

ಸಾಯಿ ದೇಶ ಸೇವೆಗಾಗಿ ತಮ್ಮ ಜೀವನವನ್ನು ಸವೆಸಿದ ಕುಟುಂಬಕ್ಕೆ ಸೇರಿದವರಾಗಿದ್ದು, ಅವರ ಮುತ್ತಜ್ಜ ಬ್ರಿಟಿಷ್ ಸೈನ್ಯದಲ್ಲಿ ಸೇವೆ ಸಲ್ಲಿಸಿದ್ದರು, ಅವರ ಅಜ್ಜ ಭಾರತೀಯ ಸೈನ್ಯದಲ್ಲಿ ಅಧಿಕಾರಿಯಾಗಿದ್ದರು ಮತ್ತು ಅವರ ತಂದೆ ಸಂದೀಪ್ ಜಾಧವ್ ಪ್ರಸ್ತುತ ಭಾರತೀಯ ಸೈನ್ಯದಲ್ಲಿ ಅಧಿಕಾರಿಯಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಸಾಯಿ ಪಡೆಗಳಿಗೆ ಸೇರುವುದರೊಂದಿಗೆ, ಜಾಧವ್ ಕುಟುಂಬವು ಈಗ ನಾಲ್ಕು ತಲೆಮಾರುಗಳು ಸಮವಸ್ತ್ರದಲ್ಲಿ ದೇಶಕ್ಕೆ ಸೇವೆ ಸಲ್ಲಿಸಿದಂತಾಗಿದೆ.

ಇದನ್ನೂ ಓದಿ : ಚಿನ್ನ ಕಳ್ಳ ಸಾಗಣೆ ಪ್ರಕರಣ: ನಟಿ ರನ್ಯಾ ರಾವ್‌, ತರುಣ್‌, ಸಾಹಿಲ್‌ ಬಂಧನ ಎತ್ತಿ ಹಿಡಿದ ಹೈಕೋರ್ಟ್‌

ಮೂಲತಃ ಮಹಾರಾಷ್ಟ್ರದ ಕೊಲ್ಹಾಪುರದವರಾದ ಸಾಯಿ, ಅವರ ಕುಟುಂಬದ ಸೇವಾ ಹಿನ್ನೆಲೆಯಿಂದಾಗಿ ದೇಶದ ವಿವಿಧ ಭಾಗಗಳಲ್ಲಿ ಶಾಲಾ ಶಿಕ್ಷಣವನ್ನು ಪೂರ್ಣಗೊಳಿಸಿದರು. ಅವರು ತಮ್ಮ 12 ನೇ ತರಗತಿ ಶಿಕ್ಷಣವನ್ನು ಬೆಳಗಾವಿಯಲ್ಲಿ ಮುಗಿಸಿದರು ಮತ್ತು ನಂತರ ಪದವಿಯನ್ನು ಪೂರ್ಣಗೊಳಿಸಿದರು. ರಾಷ್ಟ್ರೀಯ ಮಟ್ಟದ ಸ್ಪರ್ಧಾತ್ಮಕ ಪರೀಕ್ಷೆಯಲ್ಲಿ ಉತ್ತೀರ್ಣರಾದ ನಂತರ,  ಸೇವಾ ಆಯ್ಕೆ ಮಂಡಳಿ (SSB) ನಡೆಸುವ ಸಂದರ್ಶನವನ್ನು ಎದುರಿಸಿ ಭಾರತೀಯ ಮಿಲಿಟರಿ ಅಕಾಡೆಮಿಯಲ್ಲಿ ಸ್ಥಾನ ಗಳಿಸಿಕೊಂಡರು. ಆರು ತಿಂಗಳ ತೀವ್ರ ಮಿಲಿಟರಿ ತರಬೇತಿಯನ್ನು ಪೂರ್ಣಗೊಳಿಸಿದರು. ಪ್ರಸ್ತುತ, ಎಂಟು ಮಹಿಳಾ ಅಧಿಕಾರಿ ಕೆಡೆಟ್‌ಗಳು ಭಾರತೀಯ ಮಿಲಿಟರಿ ಅಕಾಡೆಮಿಯಲ್ಲಿ ತರಬೇತಿ ಪಡೆಯುತ್ತಿದ್ದಾರೆ. ಅವರೆಲ್ಲರೂ 2022 ರಲ್ಲಿ ರಾಷ್ಟ್ರೀಯ ರಕ್ಷಣಾ ಅಕಾಡೆಮಿ (NDA) ಮೂಲಕ ಆಯ್ಕೆಯಾದ ಮೊದಲ ಮಹಿಳಾ ಬ್ಯಾಚ್‌ಗೆ ಸೇರಿದವರು. ಸಾಯಿ ಅವರ ಯಶಸ್ಸು ದೇಶಾದ್ಯಂತ ಅನೇಕ ಯುವತಿಯರನ್ನು ಸಶಸ್ತ್ರ ಪಡೆಗಳಲ್ಲಿ ವೃತ್ತಿಜೀವನವನ್ನು ಪರಿಗಣಿಸಲು ಪ್ರೇರೇಪಿಸುವ ನಿರೀಕ್ಷೆಯಿದೆ. ಕೇವಲ 23 ವರ್ಷ ವಯಸ್ಸಿನಲ್ಲಿ, ಸಾಯಿ ಜಾಧವ್ ಯಾವುದೇ ಮಹಿಳೆ ಸಾಧಿಸದ ಸಾಧನೆ ಮಾಡಿದ್ದಾರೆ. ಅವರು ಈಗ ಜೂನ್ 2026 ರಲ್ಲಿ ಚೆಟ್ವೋಡ್ ಕಟ್ಟಡದಲ್ಲಿ ನಡೆಯುವ ಪ್ರತಿಷ್ಠಿತ ಪಾಸಿಂಗ್-ಔಟ್ ಪೆರೇಡ್‌ನಲ್ಲಿ ಪುರುಷ ಕೆಡೆಟ್‌ಗಳೊಂದಿಗೆ ಹೆಗಲಿಗೆ ಹೆಗಲು ಕೊಟ್ಟು ಮೆರವಣಿಗೆ ಮಾಡಲಿದ್ದಾರೆ.(ಏಜನ್ಸೀಸ್).