Love Trap: 20ಕ್ಕೂ ಹೆಚ್ಚು ಹುಡುಗಿಯರ ಖಾಸಗಿ ವಿಡಿಯೋ ಇಟ್ಟುಕೊಂಡು ಲಕ್ಷ ಲಕ್ಷ ಸುಲಿಗೆ! 23ರ ಕಾಮುಕ ಅರೆಸ್ಟ್

ಕೇವಲ ಎರಡು ವರ್ಷಗಳಲ್ಲಿ ಈತ ತೆಲಂಗಾಣ ಮತ್ತು ಆಂಧ್ರಪ್ರದೇಶದ 20ಕ್ಕೂ ಹೆಚ್ಚು ಶ್ರೀಮಂತ ಕುಟುಂಬದ ಹೆಣ್ಣುಮಕ್ಕಳನ್ನು ವಂಚಿಸಿ, ಕೋಟ್ಯಂತರ ರೂಪಾಯಿ ಮೌಲ್ಯದ ನಗದು ಹಾಗೂ ಚಿನ್ನಾಭರಣ ಸುಲಿಗೆ ಮಾಡಿರುವುದು ತನಿಖೆಯಲ್ಲಿ ಬಯಲಾಗಿದೆ.

ಆರೋಪಿ ಚಂದ್ರಶೇಖರ್ ಆಜಾದ್ ಅತ್ಯಂತ ಕುತಂತ್ರಿ ಮನಸ್ಸಿನವನಾಗಿದ್ದು, ಶ್ರೀಮಂತ ಹುಡುಗಿಯರನ್ನೇ ಗುರಿಯಾಗಿಸಿಕೊಂಡು ತನ್ನ ಜಾಲ ಹೆಣೆಯುತ್ತಿದ್ದ.

ಮಾಹಿತಿ ಸಂಗ್ರಹ: ಹೈದರಾಬಾದ್‌ನ ಪ್ರತಿಷ್ಠಿತ ಏರಿಯಾಗಳಲ್ಲಿರುವ ಮನೆಗಳ ವಾಚ್‌ಮನ್ ಮತ್ತು ಗಾರ್ಡನರ್‌ಗಳ ಜೊತೆ ಸ್ನೇಹ ಬೆಳೆಸುತ್ತಿದ್ದ ಈತ, ಆ ಮನೆಯಲ್ಲಿರುವ ಯುವತಿಯರ ಬಗ್ಗೆ ಸಂಪೂರ್ಣ ಮಾಹಿತಿ ಪಡೆಯುತ್ತಿದ್ದ.

ನಕಲಿ ಐಷಾರಾಮಿ ಬದುಕು: ಸಾಮಾಜಿಕ ಜಾಲತಾಣಗಳಲ್ಲಿ 'ಅರ್ಜುನ್' ಎಂಬ ಹೆಸರಿನಲ್ಲಿ ಪೋಸ್ ಕೊಡುತ್ತಿದ್ದ ಈತ, ಬಾಡಿಗೆಗೆ ಪಡೆದ ದುಬಾರಿ ಕಾರುಗಳು ಮತ್ತು ಪಬ್‌ಗಳ ಫೋಟೋಗಳನ್ನು ಅಪ್‌ಲೋಡ್ ಮಾಡಿ ತಾನು ದೊಡ್ಡ ಉದ್ಯಮಿ ಎಂಬಂತೆ ಬಿಂಬಿಸಿಕೊಳ್ಳುತ್ತಿದ್ದ.

ಬ್ಲಾಕ್‌ಮೇಲ್ ತಂತ್ರ: ಮಾತುಗಳಿಂದ ಮರುಳು ಮಾಡಿ ಹತ್ತಿರವಾಗುತ್ತಿದ್ದ ಈತ, ಅವರ ಖಾಸಗಿ ಫೋಟೋ ಮತ್ತು ವಿಡಿಯೋಗಳನ್ನು ರಹಸ್ಯವಾಗಿ ಚಿತ್ರೀಕರಿಸುತ್ತಿದ್ದ. ನಂತರ ಅವುಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಡುವುದಾಗಿ ಬೆದರಿಸಿ ಹಣಕ್ಕೆ ಬೇಡಿಕೆ ಇಡುತ್ತಿದ್ದ.

ಆರೋಪಿಯ ಬೆದರಿಕೆಗೆ ಹೆದರಿದ ಅನೇಕ ಬಾಲಕಿಯರು ತಮ್ಮ ಮನೆಯಲ್ಲಿದ್ದ ನಗದು ಮತ್ತು ಬಂಗಾರವನ್ನು ಕದ್ದು ಈತನಿಗೆ ನೀಡಿದ್ದಾರೆ. ಜುಬಿಲಿ ಹಿಲ್ಸ್‌ನ 15 ವರ್ಷದ ಬಾಲಕಿಯೊಬ್ಬಳು ಈತನ ಕಾಟ ತಾಳಲಾರದೆ ಮನೆಯಲ್ಲಿದ್ದ 29 ಲಕ್ಷ ರೂಪಾಯಿ ಹಣವನ್ನು ಕದ್ದಿದ್ದಾಳೆ. ಅದರಲ್ಲಿ 13 ಲಕ್ಷವನ್ನು ಆರೋಪಿಗೆ ಹಾಗೂ ಉಳಿದ ಹಣವನ್ನು ಈ ಕಿರುಕುಳಕ್ಕೆ ಸಾಥ್ ನೀಡಿದ ಚಾಲಕನ ಪತ್ನಿಗೆ ನೀಡಿದ್ದಾಳೆ ಎನ್ನಲಾಗಿದೆ.

ಈ ಹಿಂದೆ ಒಮ್ಮೆ ಜೈಲಿಗೆ ಹೋಗಿ ಬಂದಿದ್ದರೂ ಈತನ ಚಾಳಿ ಬದಲಾಗಿರಲಿಲ್ಲ. ಇತ್ತೀಚೆಗೆ ನರಸಿಂಗಿ ಪ್ರದೇಶದ ಮತ್ತೊಬ್ಬ ಯುವತಿಯನ್ನು ಹೋಟೆಲ್‌ಗೆ ಕರೆದೊಯ್ದು ಲೈಂಗಿಕ ದೌರ್ಜನ್ಯ ಎಸಗಿ, ಚಿನ್ನದ ಸರ ಸುಲಿಗೆ ಮಾಡಿದ್ದ. ಬಾಲಕಿಯ ತಾಯಿ ನೀಡಿದ ದೂರಿನ ಮೇರೆಗೆ ಜುಬಿಲಿ ಹಿಲ್ಸ್ ಪೊಲೀಸರು ಈಗ ಈತನನ್ನು ಅರೆಸ್ಟ್ ಮಾಡಿ ಜೈಲಿಗಟ್ಟಿದ್ದಾರೆ.

ನಿಮ್ಮ ಮನೆಯ ಕೆಲಸಗಾರರು ಮತ್ತು ಮಕ್ಕಳ ಮೊಬೈಲ್ ಬಳಕೆಯ ಬಗ್ಗೆ ನಿಗಾ ಇರಲಿ. ಅಪರಿಚಿತರ ಸ್ನೇಹ ಮತ್ತು ಆಮಿಷಗಳಿಗೆ ಬಲಿಯಾಗದಂತೆ ಮಕ್ಕಳಿಗೆ ತಿಳಿಹೇಳುವುದು ಇಂದಿನ ಕಾಲದ ಅನಿವಾರ್ಯತೆಯಾಗಿದೆ,(ಎಜೆನ್ಸೀಸ್​).