ಈ ಸಂಕಟಕ್ಕೆ ಗಂಭೀರ ಮತ್ತು ದೀರ್ಘಕಾಲೀನ ಪರಿಹಾರ ನೀಡುವವರು ಸ್ವಾಮಿ ವಿವೇಕಾನಂದರು. ಸಮಸ್ಯೆಯ ಮೂಲವನ್ನು ಅವರು ಹೊರಗಿನ ವ್ಯವಸ್ಥೆಯಲ್ಲಷ್ಟೇ ಅಲ್ಲ, ಯುವಕರ ಒಳಗಿನ ಧೈರ್ಯ, ಶ್ರದ್ಧೆ ಮತ್ತು ದೃಷ್ಟಿಕೋನದಲ್ಲಿಯೂ ಹುಡುಕುತ್ತಾರೆ. ನಿಮ್ಮ ಮೇಲೆ ನಿಮಗೆ ನಂಬಿಕೆ ಇರಲಿ; ಆತ್ಮಶ್ರದ್ಧೆಯೇ ಮಹತ್ತರ ಶಕ್ತಿ ಎಂಬ ಅವರ ಮಾತು ಯುವಹತಾಶೆಗೆ ಮೊದಲ ಔಷಧಿ. ಆತ್ಮವಿಶ್ವಾಸ ಕಳೆದುಕೊಂಡ ಯುವಕನಿಗೆ ಅವಕಾಶಗಳೂ ನಿರರ್ಥಕವಾಗುತ್ತವೆ ಎಂಬ ಸತ್ಯವನ್ನು ಅವರು ನೆನಪಿಸುತ್ತಾರೆ.

ವಿವೇಕಾನಂದರ ಚಿಂತನೆಯ ಕೇಂದ್ರಬಿಂದು ಕರ್ಮಯೋಗ. ಅವರು ಸ್ಪಷ್ಟವಾಗಿ ಹೇಳುತ್ತಾರೆ ಕೆಲಸವೇ ಪೂಜೆ, ಉದ್ಯೋಗ ಸಿಗಲಿಲ್ಲವೆಂದು ಕೈಕಟ್ಟಿ ಕುಳಿತುಕೊಳ್ಳುವುದು ಸೋಲಿನ ಮೊದಲ ಹೆಜ್ಜೆ. ಸಣ್ಣ ಕೆಲಸ, ದೊಡ್ಡ ಕೆಲಸ ಎಂಬ ಭೇದವನ್ನು ಮರೆತು, ಮಾಡುವ ಪ್ರತಿಯೊಂದು ಕಾರ್ಯವನ್ನೂ ದೇವರ ಸೇವೆಯೆಂದು ಭಾವಿಸಿ ಪೂರ್ಣ ಮನಸ್ಸಿನಿಂದ ಮಾಡಿದರೆ, ಅದೇ ವ್ಯಕ್ತಿತ್ವವನ್ನು ಗಟ್ಟಿಗೊಳಿಸುತ್ತದೆ. ಒಬ್ಬ ವ್ಯಕ್ತಿಯ ಮಹತ್ವ ಅವನು ಮಾಡುವ ಕೆಲಸದ ಗಾತ್ರದಲ್ಲಿ ಅಲ್ಲ, ಅದನ್ನು ಮಾಡುವ ಮನೋಭಾವದಲ್ಲಿ ಇದೆ ಎಂಬ ಸಂದೇಶ ಇಲ್ಲಿ ಅರ್ಥಪೂರ್ಣವಾಗುತ್ತದೆ.

ಯುವಕರಿಗೆ ವಿವೇಕಾನಂದರು ನೀಡಿದ ಅತ್ಯಂತ ಶಕ್ತಿಶಾಲಿ ಕರೆ ಏಳಿ, ಎದ್ದೇಳಿ, ಗುರಿ ಮುಟ್ಟುವ ತನಕ ನಿಲ್ಲದಿರಿ. ಇದು ಕೇವಲ ಪ್ರೇರಣಾ ವಾಕ್ಯವಲ್ಲ; ಜೀವನದ ತತ್ವ. ಸೋಲು ಅಂತಿಮವಲ್ಲ, ಅದು ತರಬೇತಿ. ಒಮ್ಮೆ ವಿಫಲನಾದವನು ಸೋತವನಲ್ಲ; ಮತ್ತೆ ಪ್ರಯತ್ನಿಸದವನೇ ಸೋತವನು ಎಂಬ ಅರ್ಥವನ್ನು ಅವರ ಮಾತುಗಳು ಒಳಗೊಂಡಿವೆ. ನಿರುದ್ಯೋಗದ ಸಂದರ್ಭದಲ್ಲಿ ಸತತ ಪ್ರಯತ್ನ, ಹೊಸ ಕೌಶಲ್ಯಗಳ ಅಭ್ಯಾಸ, ಮತ್ತು ಸ್ವಾವಲಂಬನೆಯ ದಾರಿ ಹಿಡಿಯುವುದೇ ನಿಜವಾದ ವಿಜಯ.

ವಿವೇಕಾನಂದರು ಯುವಕರಿಗೆ ಭಯವನ್ನು ತ್ಯಜಿಸುವಂತೆ ಕರೆ ನೀಡುತ್ತಾರೆ. ಭಯವೇ ಪಾಪ; ಭಯವೇ ಅಜ್ಞಾನ ಎಂಬ ಅವರ ವಾಕ್ಯ ಯುವಮನಸ್ಸನ್ನು ಎಚ್ಚರಿಸುತ್ತದೆ. ಉದ್ಯೋಗದ ಭಯ, ಸಮಾಜದ ಟೀಕೆ, ವಿಫಲತೆಯ ಆತಂಕ ಇವೆಲ್ಲವೂ ವ್ಯಕ್ತಿಯ ಶಕ್ತಿಯನ್ನು ಕುಗ್ಗಿಸುತ್ತವೆ. ಧೈರ್ಯ ಮತ್ತು ಶ್ರಮದಿಂದ ಮಾತ್ರ ಈ ಭಯದ ಗೋಡೆಯನ್ನು ಒಡೆದು ಹಾಕಬಹುದು. ಅದಕ್ಕಾಗಿಯೇ ಅವರು ಹೇಳುತ್ತಾರೆ ಶಕ್ತಿ ಜೀವನ; ದೌರ್ಬಲ್ಯ ಮರಣ.

ಅವರು ಮತ್ತೊಂದು ಮಹತ್ವದ ವಿಚಾರವನ್ನು ಒತ್ತಿ ಹೇಳುತ್ತಾರೆ ಪಾತ್ರ ನಿರ್ಮಾಣ ಪಾತ್ರವಿಲ್ಲದ ವಿದ್ಯೆ ಅಪಾಯಕರ ಎಂಬ ಅವರ ಎಚ್ಚರಿಕೆ ಇಂದಿನ ಯುಗಕ್ಕೆ ಅತ್ಯಂತ ಸೂಕ್ತ. ಕೇವಲ ಉದ್ಯೋಗ ಪಡೆಯುವ ಉದ್ದೇಶದಿಂದ ಅಲ್ಲ, ಸಮಾಜಕ್ಕೆ ಉಪಯುಕ್ತನಾಗುವ ದೃಷ್ಟಿಯಿಂದ ಯುವಕರು ತಮ್ಮ ಜೀವನ ರೂಪಿಸಿಕೊಳ್ಳಬೇಕು. ಸೇವಾಭಾವ, ಶಿಸ್ತು ಮತ್ತು ಸತ್ಯನಿಷ್ಠೆ ಇವು ಉದ್ಯೋಗಕ್ಕಿಂತಲೂ ದೊಡ್ಡ ಬಂಡವಾಳಗಳು.

ಹೀಗಾಗಿ, ನಿರುದ್ಯೋಗದ ಅಂಧಕಾರದಲ್ಲಿ ಹತಾಶರಾಗುತ್ತಿರುವ ಇಂದಿನ ಯುವಕರು ವಿವೇಕಾನಂದರ ವಾಣಿಯನ್ನು ತಮ್ಮ ಒಳಗಿನ ಧ್ವನಿಯನ್ನಾಗಿ ಮಾಡಿಕೊಂಡರೆ, ಪರಿಸ್ಥಿತಿಯೇ ಬದಲಾಗುತ್ತದೆ. ಆತ್ಮಶ್ರದ್ಧೆ, ಕರ್ಮಯೋಗ, ಧೈರ್ಯ ಮತ್ತು ಸತತ ಪ್ರಯತ್ನ ಇವುಗಳ ಸಂಯೋಜನೆಯೇ ಯುವಶಕ್ತಿಯನ್ನು ಪುನರುಜ್ಜೀವನಗೊಳಿಸುತ್ತದೆ. ತಾರುಣ್ಯ ವ್ಯರ್ಥವಾಗ ಬಾರದು; ಅದು ಸಮಾಜ ಮತ್ತು ರಾಷ್ಟ್ರ ನಿರ್ವಣಕ್ಕೆ ಬೆಳಕಾಗಬೇಕು. ವಿವೇಕಾನಂದರ ಈ ಶಾಶ್ವತ ಸಂದೇಶವೇ ನಿರುದ್ಯೋಗದ ಸಂಕಟದಲ್ಲೂ ಯುವಕರಿಗೆ ಹೊಸ ದಿಕ್ಕು, ಹೊಸ ದೃಷ್ಟಿ ನೀಡುವ ಅಮೃತವಾಣಿ.

ಇಂದು ನಮ್ಮ ಸಮಾಜವು ಹಲವು ರೀತಿಯ ಅಸಮಾನತೆಗಳು ಮತ್ತು ಸಂಘರ್ಷಗಳಿಂದ ಬಳಲುತ್ತಿದೆ. ಜಾತಿ, ಧರ್ಮ, ಭಾಷೆ, ಆರ್ಥಿಕ ಸ್ಥಿತಿ ಮತ್ತು ಸಾಮಾಜಿಕ ಹಿನ್ನಲೆಗಳ ಆಧಾರದ ಮೇಲೆ ಮನುಷ್ಯರನ್ನು ಮನುಷ್ಯರಿಂದ ಬೇರ್ಪಡಿಸುವ ಮನೋಭಾವ ಹೆಚ್ಚಾಗುತ್ತಿದೆ. ಇದರಿಂದ ಪರಸ್ಪರ ದ್ವೇಷ, ಅವಿಶ್ವಾಸ ಮತ್ತು ಅಶಾಂತಿಯ ವಾತಾವರಣ ನಿರ್ವಣವಾಗುತ್ತಿದೆ. ಈ ಸಮಸ್ಯೆಗಳಿಗೆ ಶಾಶ್ವತ ಪರಿಹಾರ ನೀಡಿದವರು ರಾಷ್ಟ್ರಸಂತ ಸ್ವಾಮಿ ವಿವೇಕಾನಂದರು.

ಅವರು ಹೇಳಿದಂತೆ, ಸಾರ್ವತ್ರಿಕ ಪ್ರೇಮ ಮತ್ತು ಸೇವಾ ಮನೋಭಾವವೇ ಸಮಾಜದ ಏಕತೆಗೆ ಮೂಲ. ಅವರು ಬೋಧಿಸಿದ ಮಾನವೀಯತೆಯ ತತ್ವವು ಯಾವುದೇ ಜಾತಿಧರ್ಮದ ಗಡಿಗಳನ್ನು ಮೀರಿ ಎಲ್ಲರನ್ನು ಒಂದಾಗಿ ನೋಡುವ ದೃಷ್ಟಿಕೋನವನ್ನು ನೀಡುತ್ತದೆ. ಬಡವರಲ್ಲಿ, ದೀನದಲಿತರಲ್ಲಿ ದೇವರನ್ನು ಯಾರು ಕಾಣುತ್ತಾರೋ ಅವರೇ ನಿಜವಾದ ಭಕ್ತರು ಎಂಬ ಅವರ ವಾಕ್ಯ ನಮಗೆ ಆಳವಾದ ಸಂದೇಶವನ್ನು ನೀಡುತ್ತದೆ.

ಮಾನವ ಸೇವೆಯೇ ಮಾಧವ ಸೇವೆ ಎಂದು ವಿವೇಕಾನಂದರು ಸಾರಿದರು. ಅಂದರೆ, ಮಾನವನಿಗೆ ಮಾಡುವ ಸೇವೆಯೇ ದೇವರಿಗೆ ಸಲ್ಲಿಸುವ ಪೂಜೆಯಂತೆ. ಬಡವರಿಗೆ ಅನ್ನ, ವಿದ್ಯೆ, ಆರೋಗ್ಯ ಮತ್ತು ಗೌರವವನ್ನು ನೀಡುವುದೇ ನಿಜವಾದ ಆಧ್ಯಾತ್ಮಿಕ ಸಾಧನೆ ಎಂದು ಅವರು ನಂಬಿದ್ದರು. ಈ ಸೇವಾ ಮನೋಭಾವವನ್ನು ಜೀವನದಲ್ಲಿ ಅಳವಡಿಸಿಕೊಂಡರೆ, ಜಾತಿ- ಧರ್ಮದ ಹೆಸರಿನಲ್ಲಿ ಉಂಟಾಗುವ ಭೇದಭಾವ ಸ್ವತಃ ನಾಶವಾಗುತ್ತದೆ.

ಸಾಮಾಜಿಕ ಸಂಘರ್ಷಗಳ ಮೂಲವೇ ಅಹಂಕಾರ, ಅಜ್ಞಾನ ಮತ್ತು ಸ್ವಾರ್ಥ. ವಿವೇಕಾನಂದರ ಸಂದೇಶ ಈ ಮೂರನ್ನೂ ನಿವಾರಿಸುವ ಶಕ್ತಿ ಹೊಂದಿದೆ. ಅವರು ಪ್ರತಿಯೊಬ್ಬರಲ್ಲೂ ದಿವ್ಯ ಶಕ್ತಿ ಅಡಗಿದೆ ಎಂದು ಹೇಳುತ್ತಿದ್ದರು. ಮನುಷ್ಯ ತನ್ನಲ್ಲಿರುವ ಆಂತರಿಕ ಶಕ್ತಿಯನ್ನು ಅರಿತು, ಇತರರಲ್ಲೂ ಅದೇ ದಿವ್ಯತೆಯನ್ನು ಕಾಣಲು ಕಲಿತಾಗ, ಅಸಮಾನತೆಗಳು ಕರಗಿಹೋಗುತ್ತವೆ.

ಇಂದು ನಮ್ಮ ಯುವಜನರು ಈ ತತ್ವಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳುವುದು ಅತ್ಯಂತ ಅಗತ್ಯ. ವಿದ್ಯಾಭ್ಯಾಸದ ಜತೆಗೆ ಸೇವಾ ಕಾರ್ಯಗಳಲ್ಲಿ ತೊಡಗಿಕೊಳ್ಳಬೇಕು. ಬಡವರಿಗಾಗಿ ಕೆಲಸ ಮಾಡಬೇಕು. ಸಮಾಜದ ದುರ್ಬಲ ವರ್ಗಗಳೊಂದಿಗೆ ನಿಲ್ಲಬೇಕು. ಇದರಿಂದ ಮಾತ್ರ ನಿಜವಾದ ರಾಷ್ಟ್ರ ನಿರ್ಮಾಣ ಸಾಧ್ಯ. ರಾಮಕೃಷ್ಣ ಪರಂಪರೆಯ ಮೂಲ ಉದ್ದೇಶವೇ ಆತ್ಮೋನ್ನತಿ ಮತ್ತು ಜಗದಕಲ್ಯಾಣ. ಆತ್ಮಜಾಗೃತಿಯೊಂದಿಗೆ ಸಮಾಜಸೇವೆಯನ್ನು ಬೆಸೆದಾಗ ಮಾತ್ರ ಶಾಂತಿ, ಸಮಾನತೆ, ಸೌಹಾರ್ದತೆಯ ಸಮಾಜ ನಿರ್ವಣವಾಗುತ್ತದೆ. ವಿವೇಕಾನಂದರ ತತ್ವಗಳು ಇಂದಿಗೂ, ನಾಳೆಗೂ ದಾರಿದೀಪವಾಗಿವೆ. ನಾವು ಎಲ್ಲರೂ ಈ ಸಂದೇಶವನ್ನು ಹೃದಯದಲ್ಲಿ ಧರಿಸಿ, ಪ್ರೇಮ, ಸೇವೆ, ಸಮಾನತೆಯ ಮಾರ್ಗದಲ್ಲಿ ನಡೆಯೋಣ. ಅದೇ ನಮ್ಮ ದೇಶದ ಹಾಗೂ ಸಮಾಜದ ಶ್ರೇಷ್ಠ ಭವಿಷ್ಯಕ್ಕೆ ದಾರಿ.

ಸ್ವಾಮಿ ವಿವೇಕಾನಂದರ ಜೀವನವನ್ನು ಕುರಿತು ಆಲೋಚಿಸುತ್ತಿರುವಾಗ ಮಹಾಭಾರತದ ಈ ಹೇಳಿಕೆ ನೆನಪಿಗೆ ಬರುತ್ತದೆ. ಮುಹೂರ್ತಂ ಜ್ವಲಿತಂ ಶ್ರೇಯಃ ನ ತೂ ಧೂಮಾ ಇತಂ ಚಿರಂ ಚಿರಕಾಲ ಹೊಗೆಯಾಡುತ್ತಿರುವುದಕ್ಕಿಂತ ಕ್ಷಣಕಾಲ ಜ್ವಲಿಸಿ ಮರೆಯಾಗುವುದು ಲೇಸು. ಕೆಲವೊಮ್ಮೆ ಪ್ರಜ್ವಲಿಸುವ ಆಕಾಶಕಾಯಗಳು ಕೆಲಕಾಲ ಬೆಳಗಿ ಕಣ್ಮರೆಯಾಗುತ್ತವೆ.

ಅವು ವಿಶ್ವದ ಎಲ್ಲೆಡೆಯೂ ಸುತ್ತುತ್ತಿದ್ದು ಒಮ್ಮೊಮ್ಮೆ ಭೂಮಿಯ ಸಮೀಪ ಬಂದು ದೃಗ್ಗೋಚರವಾಗುತ್ತವೆ. ಹಾಗೆಯೇ ಸ್ವಾಮಿ ವಿವೇಕಾನಂದರು ಯಾವುದೋ ಲೋಕದಿಂದ ಬಂದು ಭೂಮಿಗೆ ಒಮ್ಮೆ ಭೇಟಿ ಇತ್ತು, ಕಣ್ಮರೆಯಾದಂತೆ ಕಂಡುಬರುತ್ತದೆ. ಆದರೆ ಅವರು ಕಣ್ಮರೆಯಾದರೂ ನಮ್ಮ ಹೃದಯದಿಂದ ಮರೆಯಾಗಲಿಲ್ಲ. ಮೃತರ ನಿಜವಾದ ಗೋರಿ ಜೀವಿಸುವವರ ಹೃದಯ ಎನ್ನುವಂತೆ ಸ್ವಾಮಿ ವಿವೇಕಾನಂದರು ನಮ್ಮ ಹೃದಯದಲ್ಲಿ ಶಾಶ್ವತ ಸ್ಥಾನವನ್ನು ಪಡೆದಿದ್ದಾರೆ.

ಸ್ವಾಮಿ ಅಭೇದಾನಂದರು ಹೀಗೆ ಹೇಳುತ್ತಾರೆ, ಸ್ವಾಮಿ ವಿವೇಕಾನಂದರು ತೀರಿ ಹೋಗಿಲ್ಲ, ಅವರು ಈಗಲೂ ಎಂದೆಂದಿಗೂ ನಮ್ಮೊಡನಿದ್ದಾರೆ. ಅವರು ಇಡೀ ಜಗತ್ತಿಗೆ ಹಿರಿಯಣ್ಣ. ಸ್ವಾಮಿ ವಿವೇಕಾನಂದರು ಕೇವಲ ನಮ್ಮ ಹೃದಯದಲ್ಲಿ ಮಾತ್ರ ನೆಲೆಸಿರುವುದಲ್ಲ, ಅವರು ಎಲ್ಲೆಲ್ಲಿಯೂ ನೆಲೆಸಿದ್ದಾರೆ- ಧಾರ್ವಿುಕ ಕ್ಷೇತ್ರದಲ್ಲಿ, ಸಾಮಾಜಿಕ ವ್ಯವಸ್ಥೆಯಲ್ಲಿ, ಶಿಕ್ಷಣ ಕ್ಷೇತ್ರದಲ್ಲಿ, ರಾಜಕೀಯ ವಲಯದಲ್ಲಿ, ವಿಶ್ವ ಚಿಂತನೆಯಲ್ಲಿ, ಎಲ್ಲೆಲ್ಲಿಯೂ ಅವರು ತಮ್ಮ ಮುದ್ರೆಯನ್ನು ಒತ್ತಿ ಹೋಗಿದ್ದಾರೆ. ಸರ್ವತಹಃ ಪಾಣಿಪಾದಂ ಸರ್ವತೋಕ್ಷಿ ಶಿರೋಮುಖಂ ಆಗಿ ಅವರು ಎಲ್ಲೆಲ್ಲಿಯೂ ವಾಸಿಸುತ್ತಿದ್ದಾರೆ.

ಎಲ್ಲ ಜ್ಞಾನ ಚಕ್ಷುಗಳ ಮೂಲಕ ಇಣುಕಿ ನೋಡುತ್ತಿದ್ದಾರೆ. ಅವರ ಘನ ಗರ್ಜನೆಯ ಪ್ರತಿಧ್ವನಿ ಎಲ್ಲೆಲ್ಲಿಯೂ ಮೊಳಗುತ್ತಿದೆ. ನಾನೊಂದು ರೂಪರಹಿತ ಧ್ವನಿ ( I am voice without a form) ಎಂದು ವಿವೇಕಾನಂದರು ತಮ್ಮ ಬಗ್ಗೆ ಹೇಳಿದ್ದಾರೆ. ಅದೊಂದು ಸನಾತನ ಧ್ವನಿ. ಪುರಾತನ ವೇದ ಋಷಿಗಳ ಅನುಭವ ಗಹ್ವರದಿಂದ ಹೊರಹೊಮ್ಮಿದ ವಿವಿಧ ಜ್ಞಾನ ಶೃತಿಗಳಿಂದ ಕೂಡಿದ, ಆಧುನಿಕ ಸ್ವರಮೇಳದೊಂದಿಗೆ ಧ್ವನಿಗೂಡಿಸುವ, ದಶದಿಕ್ಕುಗಳಿಂದಲೂ ಅನುರಣಿತಗೊಳ್ಳುತ್ತಿರುವ ಅಪೂರ್ವ ಧ್ವನಿ ಅದು. ಅದು ಸ್ವಲ್ಪ ಕಾಲ ಮಾತ್ರ (39 ವರ್ಷ) ಮೂರ್ತೀಭವಿಸಿತು. ಈಗ ಅದು ಮತ್ತೆ ಅಮೂರ್ತ ರೂಪದಲ್ಲಿ ಎಲ್ಲೆಲ್ಲಿಯೂ ಕೇಳಿ ಬರುತ್ತಿದೆ. ರವಿಕಿರಣವು ಪ್ರಿಸಮ್ ಮೂಲಕ ಹಾದು ಬಂದಾಗ ವರ್ಣರಂಜಿತವಾಗಿ ಕಾಣುವಂತೆ ಆ ಧ್ವನಿಯೂ ವಿವೇಕಾನಂದರ ಶರೀರದ ಮೂಲಕ ವಿವಿಧ ರಾಗ ರಾಗಿಣಿಗಳಿಂದ ಹೊರಹೊಮ್ಮಿತು.

ಸಿಡಿಲ ಸಂತ ಸ್ವಾಮಿ ವಿವೇಕಾನಂದರ ಚಿಂತನೆಗಳು ವ್ಯಕ್ತಿತ್ವ ನಿರ್ಮಾಣದಲ್ಲಿ ನಿಜಕ್ಕೂ ಕ್ರಾಂತಿಕಾರಿ. ವ್ಯಕ್ತಿಯ ಆಂತರಿಕ ಶಕ್ತಿ ಜಾಗೃತಗೊಂಡರೆ ಮಹೋನ್ನತ ಸಾಧನೆಯ ಹಂತ ತಲುಪಲು ಸಾಧ್ಯ ಎಂಬುದನ್ನು ಗಟ್ಟಿಧ್ವನಿಯಲ್ಲಿ ಸಾರಿದರು. ನಿನ್ನನ್ನು ನೀನು ನಂಬು, ಇಡೀ ಜಗತ್ತು ನಿನ್ನ ಕಾಲಡಿಯಲ್ಲಿರುತ್ತದೆ ಎಂಬ ಅವರ ಮಾತು ವ್ಯಕ್ತಿಯ ಆಂತರಿಕ ಶಕ್ತಿಯನ್ನು ಎಚ್ಚರಿಸುತ್ತದೆ.