ಕೊನೆಯ ಕರೆ 'Runway in Sight': ಆ ಒಂದು ನಿಮಿಷದಲ್ಲಿ ಎಲ್ಲವೂ ಉಲ್ಟಾಪಲ್ಟಾ! ವಿಮಾನ ಭಸ್ಮದ ಪಿನ್​ ಟು ಪಿನ್​ ಮಾಹಿತಿ ಕೊಟ್ಟ DGCA

ದೆಹಲಿ ಮೂಲದ VSR ವೆಂಚರ್ಸ್ ಪ್ರೈವೇಟ್ ಲಿಮಿಟೆಡ್ ಕಂಪನಿಗೆ ಸೇರಿದ VT-SSK ನೋಂದಣಿ ಸಂಖ್ಯೆಯ ವಿಮಾನವು ಬೆಳಿಗ್ಗೆ 8:10ಕ್ಕೆ ಮುಂಬೈನಿಂದ ಟೇಕ್ ಆಫ್ ಆಗಿತ್ತು.

08:18 AM: ವಿಮಾನವು ಮೊದಲ ಬಾರಿಗೆ ಬಾರಾಮತಿ ಎಟಿಸಿ (ATC) ಸಂಪರ್ಕಕ್ಕೆ ಬಂದಿತು.

08:35 AM: ಪೈಲಟ್‌ಗಳು ರನ್‌ವೇ ಗೋಚರತೆಯ ಬಗ್ಗೆ ವಿಚಾರಿಸಿದರು. ಆಗ ಗಾಳಿ ಶಾಂತವಾಗಿತ್ತು ಮತ್ತು 3000 ಮೀಟರ್ ಗೋಚರತೆ ಇತ್ತು.

ಮೊದಲ ಯತ್ನ ವಿಫಲ: ವಿಮಾನವು ಮೊದಲ ಬಾರಿಗೆ ಲ್ಯಾಂಡಿಂಗ್ ಮಾಡಲು ಪ್ರಯತ್ನಿಸಿದಾಗ ರನ್‌ವೇ ಕಾಣಿಸದ ಕಾರಣ 'ಗೋ-ಅರೌಂಡ್' (ಮತ್ತೆ ಮೇಲೆ ಹಾರುವುದು) ಮಾಡಿತು.

ದಾರುಣ ಅಂತ್ಯ: ಎರಡನೇ ಬಾರಿ ಲ್ಯಾಂಡಿಂಗ್‌ಗೆ ಅನುಮತಿ ಪಡೆದ ವಿಮಾನವು 8:43ಕ್ಕೆ ರನ್‌ವೇ ಕಡೆಗೆ ಬಂದಿತು. ಆದರೆ, ಮರುಕ್ಷಣವೇ (8:44ಕ್ಕೆ) ರನ್‌ವೇ 11ರ ಆರಂಭದಲ್ಲೇ ವಿಮಾನವು ಅಪ್ಪಳಿಸಿ ಬೆಂಕಿ ಹೊತ್ತಿಕೊಂಡಿತು. ಬೆಂಕಿ ಎಷ್ಟು ಭೀಕರವಾಗಿತ್ತೆಂದರೆ ರಕ್ಷಣಾ ಸಿಬ್ಬಂದಿ ಬರುವಷ್ಟರಲ್ಲಿ ವಿಮಾನವು ಸಂಪೂರ್ಣ ಸುಟ್ಟು ಕರಕಲಾಗಿತ್ತು.

ವಿಮಾನದಲ್ಲಿದ್ದ ಐವರೂ ಮೃತಪಟ್ಟಿದ್ದು, ಅವರಲ್ಲಿ ಇಬ್ಬರು ಪೈಲಟ್‌ಗಳು ಮತ್ತು ಅಜಿತ್ ಪವಾರ್ ಅವರ ಸಿಬ್ಬಂದಿ ಸೇರಿದ್ದಾರೆ:

ಅಜಿತ್ ಪವಾರ್: ಮಹಾರಾಷ್ಟ್ರ ಉಪಮುಖ್ಯಮಂತ್ರಿ.

ವಿದೀಪ್ ಜಾಧವ್: ಪವಾರ್ ಅವರ ವೈಯಕ್ತಿಕ ಭದ್ರತಾ ಅಧಿಕಾರಿ (PSO).

ಸುಮಿತ್ ಕಪೂರ್: ಪೈಲಟ್ (15,000 ಗಂಟೆಗಳ ಹಾರಾಟದ ಅನುಭವ ಹೊಂದಿದ್ದ ನುರಿತ ಪೈಲಟ್).

ಸಾಂಭವಿ ಪಾಠಕ್: ಸಹ ಪೈಲಟ್.

ಪಿಂಕಿ ಮಾಲಿ: ಫ್ಲೈಟ್ ಅಟೆಂಡೆಂಟ್.

ಅಪಘಾತಕ್ಕೀಡಾದ ಲಿಯರ್‌ಜೆಟ್ 45 ವಿಮಾನವನ್ನು 2010 ರಲ್ಲಿ ತಯಾರಿಸಲಾಗಿತ್ತು. ಇದೇ ಕಂಪನಿಯ ಮತ್ತೊಂದು ವಿಮಾನವು 2023 ರಲ್ಲಿ ಮುಂಬೈನಲ್ಲಿ ಅಪಘಾತಕ್ಕೀಡಾಗಿತ್ತು. ಸದ್ಯ ವಾಯು ಅಪಘಾತ ತನಿಖಾ ಸಂಸ್ಥೆ (AAIB) ಘಟನಾ ಸ್ಥಳಕ್ಕೆ ಧಾವಿಸಿದ್ದು, ತನಿಖೆ ಕೈಗೆತ್ತಿಕೊಂಡಿದೆ. ಜಿಲ್ಲಾ ಪಂಚಾಯತ್ ಚುನಾವಣೆ ನಿಮಿತ್ತ ನಾಲ್ಕು ಸಾರ್ವಜನಿಕ ಸಭೆಗಳಲ್ಲಿ ಭಾಗವಹಿಸಲು ಅಜಿತ್ ಪವಾರ್ ಅವರು ಬಾರಾಮತಿಗೆ ತೆರಳುತ್ತಿದ್ದರು.

ಬಾರಾಮತಿ ವಿಮಾನ ನಿಲ್ದಾಣದಲ್ಲಿ ಪತನಗೊಂಡ ಲಿಯರ್‌ಜೆಟ್ 45 (VT-SSK) ವಿಮಾನವು ದೆಹಲಿ ಮೂಲದ 'ಮೆಸರ್ಸ್ ವಿಎಸ್ಆರ್ ವೆಂಚರ್ಸ್' ಸಂಸ್ಥೆಗೆ ಸೇರಿದ್ದಾಗಿದೆ. ಈ ಸಂಸ್ಥೆಯು 17 ವಿಮಾನಗಳ ಬೃಹತ್ ಪಡೆಯನ್ನು ಹೊಂದಿದ್ದು, 2014 ರಿಂದ ಚಾರ್ಟರ್ಡ್ ಸೇವೆ ನೀಡುತ್ತಿದೆ. ಆಘಾತಕಾರಿ ವಿಷಯವೆಂದರೆ, ಇದೇ ಸಂಸ್ಥೆಯ ಮತ್ತೊಂದು ಲಿಯರ್‌ಜೆಟ್ ವಿಮಾನ (VT-DBL) 2023 ರ ಸೆಪ್ಟೆಂಬರ್‌ನಲ್ಲಿ ಮುಂಬೈನಲ್ಲಿ ಲ್ಯಾಂಡಿಂಗ್ ವೇಳೆ ಅಪಘಾತಕ್ಕೀಡಾಗಿತ್ತು.

ಪ್ರಸ್ತುತ ದುರಂತಕ್ಕೀಡಾದ ವಿಮಾನವು 2010 ರಲ್ಲಿ ತಯಾರಾಗಿದ್ದು, ಹಾರಾಟಕ್ಕೆ ಅಗತ್ಯವಿರುವ ಎಲ್ಲಾ ಪ್ರಮಾಣಪತ್ರಗಳನ್ನು (CofR, CofA, ARC) ಹೊಂದಿತ್ತು. 2025 ರ ಫೆಬ್ರವರಿಯಲ್ಲಿ ನಡೆದ ಡಿಜಿಸಿಎ (DGCA) ಲೆಕ್ಕಪರಿಶೋಧನೆಯಲ್ಲಿಯೂ ಯಾವುದೇ ಗಂಭೀರ ಲೋಪಗಳು ಕಂಡುಬಂದಿರಲಿಲ್ಲ. ಆದರೂ, 4900 ಗಂಟೆಗಳಿಗೂ ಹೆಚ್ಚು ಹಾರಾಟ ನಡೆಸಿದ್ದ ಈ ವಿಮಾನವು ಲ್ಯಾಂಡಿಂಗ್ ವೇಳೆ ವಿಫಲವಾದದ್ದು ತಾಂತ್ರಿಕ ಸುರಕ್ಷತೆಯ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಎತ್ತಿದೆ.

ದುರಂತದ ಸಮಯದಲ್ಲಿ ವಿಮಾನವನ್ನು ಅಪ್ರತಿಮ ಅನುಭವ ಹೊಂದಿದ್ದ ಪೈಲಟ್‌ಗಳು ಚಾಲನೆ ಮಾಡುತ್ತಿದ್ದರು ಎಂಬುದು ಗಮನಾರ್ಹ. ಮುಖ್ಯ ಪೈಲಟ್ (PIC) 15,000 ಗಂಟೆಗಳಿಗೂ ಹೆಚ್ಚು ಹಾರಾಟದ ಅನುಭವ ಹೊಂದಿದ್ದ ನುರಿತ ವಿಮಾನ ಚಾಲಕರಾಗಿದ್ದು, ಸಹ-ಪೈಲಟ್ ಕೂಡ 1,500 ಗಂಟೆಗಳ ಅನುಭವ ಹೊಂದಿದ್ದರು. ಇಬ್ಬರೂ ಪೈಲಟ್‌ಗಳು ಇತ್ತೀಚೆಗಷ್ಟೇ ವೈದ್ಯಕೀಯ ಪರೀಕ್ಷೆ ಮತ್ತು ತಾಂತ್ರಿಕ ಪ್ರಾವೀಣ್ಯತೆಯ (IR/PPC) ತಪಾಸಣೆಗಳನ್ನು ಪೂರೈಸಿದ್ದರು. ವಿಮಾನದ ಎಂಜಿನ್ ಮತ್ತು ಬಿಡಿಭಾಗಗಳು ನಿಗದಿತ ಮಿತಿಯಲ್ಲೇ ಕಾರ್ಯನಿರ್ವಹಿಸುತ್ತಿದ್ದವು ಎಂದು ದಾಖಲೆಗಳು ಹೇಳುತ್ತಿವೆ. ಹೀಗಿದ್ದರೂ, ಅನುಭವೀ ಸಿಬ್ಬಂದಿ ಮತ್ತು ಸುಸ್ಥಿತಿಯಲ್ಲಿದ್ದ ವಿಮಾನವು ಲ್ಯಾಂಡಿಂಗ್ ವೇಳೆ ರನ್‌ವೇ ತಪ್ಪಿ ಬೆಂಕಿಗಾಹುತಿಯಾಗಿರುವುದು ನಿಗೂಢವಾಗಿದ್ದು, ಈಗ AAIB (ವಾಯು ಅಪಘಾತ ತನಿಖಾ ಸಂಸ್ಥೆ) ಈ ಬಗ್ಗೆ ಸಮಗ್ರ ತನಿಖೆ ನಡೆಸುತ್ತಿದೆ,ಏಜೆನ್ಸೀಸ್.