ಭಾಷೆ ಎಂದರೆ ಕೇವಲ ಸಂವಹನವಲ್ಲ, ಅದು ನಮ್ಮ ಅಸ್ಮಿತೆ; ಉದಯನಿಧಿ ಸ್ಟಾಲಿನ್ | Udayanidhi Stalin

ಈ ಬಗ್ಗೆ ಭಾಷಾ ಹುತಾತ್ಮರ ದಿನಾಚರಣೆಯಲ್ಲಿ ಭಾಗವಹಿಸಿ ಮಾತನಾಡಿದ ಉದಯನಿಧಿ, 1960ರ ದಶಕದಲ್ಲಿ ಹಿಂದಿ ವಿರೋಧಿ ಹೋರಾಟದಲ್ಲಿ ಪ್ರಾಣತ್ಯಾಗ ಮಾಡಿದವರಿಗೆ ಗೌರವ ಸಲ್ಲಿಸಿದರು. ಇದೇ ವೇಳೆ ಡಿಎಂಕೆ ಸರ್ಕಾರದ ದ್ವಿಭಾಷಾ ನೀತಿಯನ್ನು ಸಮರ್ಥಿಸಿಕೊಂಡ ಅವರು, ಕೇಂದ್ರದ ತ್ರಿಭಾಷಾ ನೀತಿಯನ್ನು ಕಟುವಾಗಿ ವಿರೋಧಿಸಿದ್ದಾರೆ.

ಉತ್ತರ ಭಾರತದ ಹಲವು ರಾಜ್ಯಗಳಲ್ಲಿ ಹಿಂದಿ ಭಾಷೆಯ ಅತಿಯಾದ ಪ್ರಭಾವದಿಂದಾಗಿ ಅಲ್ಲಿನ ಮೂಲ ಮಾತೃಭಾಷೆಗಳು ಹೇಗೆ ಅಸ್ತಿತ್ವ ಕಳೆದುಕೊಳ್ಳುತ್ತಿವೆ ಎಂಬುದನ್ನು ಉದಯನಿಧಿ ಉದಾಹರಣೆ ಸಮೇತ ವಿವರಿಸಿದ್ದಾರೆ.

ಇಂದು ಅನೇಕ ರಾಜ್ಯಗಳಲ್ಲಿ ಅವರ ಮಾತೃಭಾಷೆ ಮಾಯವಾಗಿದೆ. ಉದಾಹರಣೆಗೆ, ಹರಿಯಾಣದ ಮಾತೃಭಾಷೆ ಹರಿಯಾನ್ವಿ. ಅಲ್ಲಿ ಹಿಂದಿ ಪ್ರವೇಶಿಸಿದ ನಂತರ ಹರಿಯಾನ್ವಿ ಕಣ್ಮರೆಯಾಗಿದೆ. ಬಿಹಾರದ ಮಾತೃಭಾಷೆ ಬಿಹಾರಿ, ಆದರೆ ಜನರು ಈಗ ಹಿಂದಿ ಪ್ರಭಾವದಿಂದ ಬಿಹಾರಿಯನ್ನೇ ಮರೆತಿದ್ದಾರೆ. ಇದೇ ರೀತಿ ಉತ್ತರ ಪ್ರದೇಶದ ಭೋಜಪುರಿ ಮತ್ತು ಛತ್ತೀಸ್‌ಗಢದ ಛತ್ತೀಸ್‌ಗಢಿ ಭಾಷೆಗಳ ಸ್ಥಿತಿಯೂ ಹದಗೆಟ್ಟಿದೆ. ಹಿಂದಿ ಎಂಬುದು ಹಲವು ಪ್ರಾದೇಶಿಕ ಭಾಷೆಗಳನ್ನು ನುಂಗುತ್ತಿರುವ ಭಾಷೆಯಾಗಿದೆ ಎಂದು ಉದಯನಿಧಿ ಅಭಿಪ್ರಾಯಪಟ್ಟಿದ್ದಾರೆ.

ಕೇಂದ್ರ ಸರ್ಕಾರವು ತ್ರಿಭಾಷಾ ನೀತಿಯನ್ನು ಜಾರಿಗೆ ತರಲು ಹವಣಿಸುತ್ತಿದೆ. ಇದು ಕೇವಲ ಒಂದು ಶಿಕ್ಷಣ ನೀತಿಯಲ್ಲ, ಬದಲಾಗಿ ನಮ್ಮ ಮೇಲೆ ಹಿಂದಿಯನ್ನು ಹೇರುವ ಒಂದು ವ್ಯವಸ್ಥಿತ ಷಡ್ಯಂತ್ರವಾಗಿದೆ. ನಾವು ತಮಿಳು ಮತ್ತು ಇಂಗ್ಲಿಷ್ ಎಂಬ ದ್ವಿಭಾಷಾ ನೀತಿಗೆ ಬದ್ಧರಾಗಿದ್ದೇವೆ. ತಮಿಳು ನಮ್ಮ ಸಂಸ್ಕೃತಿಯನ್ನು ಉಳಿಸಿದರೆ, ಇಂಗ್ಲಿಷ್ ನಮಗೆ ಜಗತ್ತಿನೊಂದಿಗೆ ಸಂಪರ್ಕ ಕಲ್ಪಿಸುತ್ತದೆ. ನಮಗೆ ಮೂರನೇ ಭಾಷೆಯಾಗಿ ಹಿಂದಿಯ ಅಗತ್ಯವಿಲ್ಲ ಎಂದು ಉದಯನಿಧಿ ತೀವ್ರ ವಾಗ್ದಾಳಿ ನಡೆಸಿದ್ದಾರೆ.

ಕೆಲವರು ಹೇಳುತ್ತಾರೆ, ಹಿಂದಿ ಕಲಿಯದಿದ್ದರೆ ಅಭಿವೃದ್ಧಿ ಸಾಧ್ಯವಿಲ್ಲ ಎಂದು. ಆದರೆ ತಮಿಳುನಾಡು ಇವತ್ತು ಶಿಕ್ಷಣ, ಆರೋಗ್ಯ ಮತ್ತು ಕೈಗಾರಿಕೆಯಲ್ಲಿ ದೇಶಕ್ಕೆ ಮಾದರಿಯಾಗಿದೆ. ನಾವು ಕೇವಲ ತಮಿಳು ಮತ್ತು ಇಂಗ್ಲಿಷ್ ಬಳಸಿಕೊಂಡೇ ಈ ಸಾಧನೆ ಮಾಡಿದ್ದೇವೆ. ಭಾಷಾ ಅಸ್ಮಿತೆಯನ್ನು ಉಳಿಸಿಕೊಂಡೇ ನಾವು ಬೆಳೆಯಬಲ್ಲೆವು ಎಂದು ನಾವು ಜಗತ್ತಿಗೆ ತೋರಿಸಿಕೊಟ್ಟಿದ್ದೇವೆ ಎಂದು ತಮಿಳುನಾಡು ಡಿಸಿಎಂ ಗುಡುಗಿದ್ದಾರೆ.

ನಮ್ಮ ನಾಯಕ ಕರುಣಾನಿಧಿ ಅವರು ತೋರಿಸಿದ ಹಾದಿಯಲ್ಲಿ ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಅವರು ಹಿಂದಿ ಹೇರಿಕೆಯ ವಿರುದ್ಧ ಗಟ್ಟಿಯಾಗಿ ನಿಂತಿದ್ದಾರೆ. ತಮಿಳು ಭಾಷೆಯ ಮೇಲೆ ದಾಳಿಯಾದಾಗಲೆಲ್ಲಾ ಡಿಎಂಕೆ ಮೊದಲ ಧ್ವನಿಯಾಗಿ ನಿಲ್ಲಲಿದೆ. ನಮ್ಮ ಭಾಷೆ, ನಮ್ಮ ಹಕ್ಕು ಮತ್ತು ನಮ್ಮ ಗುರುತನ್ನು ಯಾರೂ ಕಿತ್ತುಕೊಳ್ಳಲು ಸಾಧ್ಯವಿಲ್ಲ ಎಂದು ಉದಯನಿಧಿ ತಿಳಿಸಿದ್ದಾರೆ.

ತಮಿಳುನಾಡಿನಲ್ಲಿ ದಶಕಗಳಿಂದ ಜಾರಿಯಲ್ಲಿರುವ ತಮಿಳು ಮತ್ತು ಇಂಗ್ಲಿಷ್ ನೀತಿಯನ್ನು ಉದಯನಿಧಿ ಸಮರ್ಥಿಸಿಕೊಂಡಿದ್ದಾರೆ. ಈ ದ್ವಿಭಾಷಾ ನೀತಿಯು ಒಂದು ಯಶಸ್ವಿ ಮಾದರಿಯಾಗಿದೆ. ಇದರಿಂದಾಗಿ ತಮಿಳುನಾಡು ಶಿಕ್ಷಣ, ಕೈಗಾರಿಕೆ, ಆರೋಗ್ಯ ಮತ್ತು ಒಟ್ಟಾರೆ ಅಭಿವೃದ್ಧಿಯಲ್ಲಿ ದೇಶದಲ್ಲೇ ಮುಂಚೂಣಿಯಲ್ಲಿದೆ. ನಮ್ಮ ಭಾಷೆಯನ್ನು ಕಾಪಾಡಿಕೊಳ್ಳುವುದು ನಮ್ಮ ಹಕ್ಕು ಮತ್ತು ಕರ್ತವ್ಯ ಎಂದು ಉದಯನಿಧಿ ಸ್ಟಾಲಿನ್ ಗುಡುಗಿದ್ದಾರೆ.

ಭಾಷಾ ಪ್ರಾಬಲ್ಯವು ಪ್ರಾದೇಶಿಕ ಅಸ್ಮಿತೆ ಮತ್ತು ಸಾಂಸ್ಕೃತಿಕ ಪರಂಪರೆಯನ್ನು ನಾಶಪಡಿಸುತ್ತದೆ ಎಂಬ ಅವರ ಮಾತುಗಳು ಈಗ ದಕ್ಷಿಣ ಭಾರತದಾದ್ಯಂತ ಭಾರಿ ಚರ್ಚೆಗೆ ನಾಂದಿ ಹಾಡಿವೆ,(ಏಜೆನ್ಸೀಸ್).