ಕ್ಲಾಸೆನ್, ಕಿಶನ್ ಆರ್ಭಟ! ಸಿಎಸ್‌ಕೆ ಧೂಳೀಪಟ ಮಾಡಿ ಪ್ಲೇ-ಆಫ್ಸ್ ತಲುಪಿದ ಹೈದರಾಬಾದ್ | CSKvsSRH

ಬೃಹತ್ ರನ್ ಚೇಸಿಂಗ್ ಆರಂಭಿಸಿದ ಹೈದರಾಬಾದ್ ತಂಡಕ್ಕೆ ಆರಂಭದಲ್ಲೇ ಇಶಾನ್ ಕಿಶನ್(70 ರನ್​) ಅಬ್ಬರದ ಬ್ಯಾಟಿಂಗ್ ಮೂಲಕ ಆಸರೆಯಾದರು. ಸಿಎಸ್‌ಕೆ ಬೌಲರ್‌ಗಳನ್ನು ಮೈದಾನದ ಮೂಲೆ ಮೂಲೆಗೂ ಅಟ್ಟಿದ ಕಿಶನ್ ಬಿರುಸಿನ ಅರ್ಧಶತಕ ಸಿಡಿಸಿ ಮಿಂಚಿದರು. ಇವರಿಗೆ ಮಧ್ಯಮ ಕ್ರಮಾಂಕದಲ್ಲಿ ಹೆನ್ರಿಚ್ ಕ್ಲಾಸೆನ್(47 ರನ್​) ಭರ್ಜರಿ ಸಾಥ್ ನೀಡಿದರು. ಕೇವಲ 3 ರನ್‌ಗಳಿಂದ ಅರ್ಧಶತಕ ವಂಚಿತರಾದ ಕ್ಲಾಸೆನ್, 47 ರನ್ ಗಳಿಸಿ ಸಿಎಸ್‌ಕೆ ಕೈಯಿಂದ ಪಂದ್ಯವನ್ನು ಸಂಪೂರ್ಣವಾಗಿ ಕಸಿದುಕೊಂಡರು. 18 ಓವರ್‌ಗಳ ಮುಕ್ತಾಯಕ್ಕೆ ಎಸ್‌ಆರ್‌ಹೆಚ್ 168/4 ರನ್ ಗಳಿಸಿ ಸಂಪೂರ್ಣ ಹಿಡಿತ ಸಾಧಿಸಿತ್ತು. ಕೊನೆಯಲ್ಲಿ ಇಶಾನ್ ಕಿಶನ್ ಮತ್ತು ಸಲೀಲ್ ಅರೋರಾ ಜವಾಬ್ದಾರಿಯುತ ಆಟವಾಡಿ ತಂಡವನ್ನು ವಿಜಯದ ದಡ ಮುಟ್ಟಿಸಿದರು.

ಪಂದ್ಯದ ಅತ್ಯಂತ ರೋಮಾಂಚಕ ಕ್ಷಣ ಮೂಡಿಬಂದಿದ್ದು ಹೆನ್ರಿಚ್ ಕ್ಲಾಸೆನ್ ಅವರ ವಿಕೆಟ್ ಪತನದ ವೇಳೆ. ಕ್ರೀಸ್‌ನಲ್ಲಿ ಭೀಕರವಾಗಿ ಬ್ಯಾಟಿಂಗ್ ಮಾಡುತ್ತಿದ್ದ ಕ್ಲಾಸೆನ್ ಅವರನ್ನು ವಿಕೆಟ್ ಕೀಪರ್ ಸಂಜು ಸ್ಯಾಮ್ಸನ್ ನರಸಿಂಹನಂತೆ ಸ್ಟಂಪ್ ಔಟ್ ಮಾಡಿದರು. ದಂತಕಥೆ ಎಂ.ಎಸ್. ಧೋನಿ ಅವರ ಹೆಜ್ಜೆಯನ್ನೇ ನೆನಪಿಸುವಂತಿದ್ದ ಈ ಅತಿ ವೇಗದ ಸ್ಟಂಪಿಂಗ್ ಇಡೀ ಮೈದಾನವನ್ನು ಮೂಕವಿಸ್ಮಿತಗೊಳಿಸಿತು. ಆದರೆ ಈ ವಿಕೆಟ್ ಸಿಎಸ್‌ಕೆ ತಂಡಕ್ಕೆ ಬಿಗ್ ರಿಲೀಫ್ ನೀಡಿದರೂ, ಇಶಾನ್ ಕಿಶನ್ ಅವರ ರನ್ ಜ್ವಾಲೆಯನ್ನು ತಣಿಸಲು ಸಾಧ್ಯವಾಗಲಿಲ್ಲ.

ಪಂದ್ಯದ ಆರಂಭಕ್ಕೂ ಮುನ್ನವೇ ಚೆನ್ನೈ ಸೂಪರ್ ಕಿಂಗ್ಸ್ ತಂಡಕ್ಕೆ ವಿಧಿಯ ಆಟ ಭಾರಿ ಆಘಾತ ನೀಡಿತ್ತು. ಸಿಎಸ್‌ಕೆ ಗಾಡ್‌ಫಾದರ್ ಎಂ.ಎಸ್. ಧೋನಿ ಅವರು ಪಂದ್ಯದ ಮುನ್ನ ಮತ್ತೊಮ್ಮೆ ಗಾಯದ ಸಮಸ್ಯೆಗೆ ತುತ್ತಾಗಿ ಪ್ಲೇಯಿಂಗ್ ಇಲೆವೆನ್‌ನಿಂದ ಹೊರಬಿದ್ದಿದ್ದರು. ಧೋನಿ ಅವರ ಗೈರುಹಾಜರಿ ತಂಡದ ನಾಯಕತ್ವ ಹಾಗೂ ರಣತಂತ್ರದಲ್ಲಿ ಸ್ಪಷ್ಟವಾಗಿ ಎದ್ದು ಕಾಣುತ್ತಿತ್ತು. ಈ ಮುನ್ನ ಮೊದಲು ಬ್ಯಾಟಿಂಗ್ ಮಾಡಿದ್ದ ಚೆನ್ನೈ, ಡೆವಾಲ್ಡ್ ಬ್ರೆವಿಸ್ ಅವರ ಹೋರಾಟದ 44 ರನ್‌ಗಳ ನೆರವಿನಿಂದ 20 ಓವರ್‌ಗಳಲ್ಲಿ 180 ರನ್ ಕಲೆಹಾಕಿತ್ತು. ಎಸ್‌ಆರ್‌ಹೆಚ್ ಕ್ಯಾಪ್ಟನ್ ಪ್ಯಾಟ್ ಕಮಿನ್ಸ್ 3 ವಿಕೆಟ್ ಪಡೆದು ಸಿಎಸ್‌ಕೆಯನ್ನು ಕಟ್ಟಿಹಾಕಿದ್ದರು.

ಸನ್‌ರೈಸರ್ಸ್ ಹೈದರಾಬಾದ್ ಸಾಧಿಸಿದ ಈ ಭರ್ಜರಿ ಜಯ ಕೇವಲ ಅವರಿಗಷ್ಟೇ ಅಲ್ಲದೆ ಗುಜರಾತ್ ಟೈಟನ್ಸ್ ತಂಡಕ್ಕೂ ಮಹಾ ಲಾಟರಿ ತಂದುಕೊಟ್ಟಿದೆ. ಅಂಕಪಟ್ಟಿಯಲ್ಲಿ ಹೈದರಾಬಾದ್ ಟಾಪ್-೪ ತಲುಪಿ ಅಧಿಕೃತವಾಗಿ ಪ್ಲೇ-ಆಫ್ಸ್ ತಲುಪುತ್ತಿದ್ದಂತೆ, ಇತ್ತ ಗುಜರಾತ್ ಟೈಟನ್ಸ್ ಕೂಡ ಮುಂದಿನ ಹಂತಕ್ಕೆ ಕ್ವಾಲಿಫೈ ಆಗಿದೆ. ಆದರೆ, ಸಿಎಸ್‌ಕೆ ಪರಿಸ್ಥಿತಿ ಈಗ ತೀವ್ರ ಚಿಂತಾಜನಕವಾಗಿದ್ದು, ಮುಂದಿನ ಪಂದ್ಯಗಳಲ್ಲಿ ಇತರ ತಂಡಗಳ ಫಲಿತಾಂಶದ ಮೇಲೆ ಬದುಕುಳಿಯಬೇಕಾದ ದಯನೀಯ ಸ್ಥಿತಿಗೆ ತಲುಪಿದೆ,(ಏಜೆನ್ಸೀಸ್​).