ಕಿಶನ್, ಅನಿಖೇತ್ ವರ್ಮಾ ಅಬ್ಬರ: ಆರ್‌ಸಿಬಿಗೆ 202 ರನ್​ಗಳ ಬೃಹತ್​ ಗುರಿ ನೀಡಿದ ಸನ್ ರೈಸರ್ಸ್ | RCBvsSRH

ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಹೈದರಾಬಾದ್‌ಗೆ ಆರ್‌ಸಿಬಿಯ ಹೊಸ ವೇಗಿ ಜಾಕೋಬ್ ಡಫಿ ಆರಂಭದಲ್ಲೇ ಸಿಂಹಸ್ವಪ್ನವಾದರು. ತಮ್ಮ ಸೆನ್ಸೇಷನಲ್ ಸ್ಪೆಲ್ ಮೂಲಕ ಎಸ್‌ಆರ್‌ಎಚ್‌ನ ಅಗ್ರ ಕ್ರಮಾಂಕವನ್ನು ನಡುಗಿಸಿದ ಡಫಿ, 3 ವಿಕೆಟ್​ ಪಡೆದು ಮಿಂಚಿದರು. ಅಲ್ಲದೆ, ಬೆಂಗಳೂರು ತಂಡಕ್ಕೆ ಆರಂಭಿಕ ಮೇಲುಗೈ ತಂದುಕೊಟ್ಟರು. ಒಂದು ಹಂತದಲ್ಲಿ ಆರ್‌ಸಿಬಿ ಪಂದ್ಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಿತ್ತು.

ಆರಂಭಿಕ ವಿಕೆಟ್ ಉರುಳಿದರೂ ಎದೆಗುಂದದ ಇಶಾನ್ ಕಿಶನ್, ಬೆಂಗಳೂರು ಬೌಲರ್‌ಗಳ ಮೇಲೆ ಸವಾರಿ ಮಾಡಿದರು. ಕೇವಲ 38 ಎಸೆತಗಳಲ್ಲಿ 80 ರನ್ ಚಚ್ಚಿದ ಕಿಶನ್, ಮೈದಾನದ ಮೂಲೆ ಮೂಲೆಗೂ ಚೆಂಡನ್ನು ಅಟ್ಟಿದರು. ಅವರ ಈ ಸ್ಫೋಟಕ ಇನ್ನಿಂಗ್ಸ್‌ನಲ್ಲಿ ಭರ್ಜರಿ ಸಿಕ್ಸರ್‌ಗಳ ಸುರಿಮಳೆಯೇ ಇತ್ತು. ಕಿಶನ್ ಅವರ ಈ ದಿಟ್ಟ ಹೋರಾಟವು ಸನ್ ರೈಸರ್ಸ್ ತಂಡವನ್ನು ಸಂಕಷ್ಟದಿಂದ ಪಾರು ಮಾಡಿದ್ದಲ್ಲದೆ, ಆರ್‌ಸಿಬಿ ಕ್ಯಾಂಪ್‌ನಲ್ಲಿ ಆತಂಕ ಸೃಷ್ಟಿಸಿತು. ಆದರೆ, ಡೆತ್ ಓವರ್‌ಗಳಿಗೂ ಮುನ್ನವೇ ಕಿಶನ್ ಔಟ್ ಆಗಿದ್ದು ತಂಡಕ್ಕೆ ಹಿನ್ನಡೆಯಾಯಿತು.

ಇಶಾನ್ ಔಟ್ ಆದ ಬಳಿಕ ಹೈದರಾಬಾದ್ ರನ್ ವೇಗ ಕುಸಿಯಬಹುದು ಎಂದು ನಿರೀಕ್ಷಿಸಲಾಗಿತ್ತು. ಆದರೆ, ಯುವ ಪ್ರತಿಭೆ ಅನಿಖೇತ್ ವರ್ಮಾ ಎಲ್ಲರ ಲೆಕ್ಕಾಚಾರವನ್ನು ತಲೆಕೆಳಗು ಮಾಡಿದರು. ಕೇವಲ 18 ಎಸೆತಗಳಲ್ಲಿ 43 ರನ್ ಸಿಡಿಸಿದ ಅನಿಖೇತ್, ಆರ್‌ಸಿಬಿ ಬೌಲರ್‌ಗಳನ್ನು ಕಂಗೆಡಿಸಿದರು. ಅನಿಖೇತ್ ಅವರ ಈ ಮಿಂಚಿನ ಕ್ಯಾಮಿಯೊ ನೆರವಿನಿಂದ ಹೈದರಾಬಾದ್ 200 ರನ್‌ಗಳ ಗಡಿ ದಾಟಲು ಸಾಧ್ಯವಾಯಿತು.

ಆರ್‌ಸಿಬಿ ಪರ ಜಾಕೋಬ್ ಡಫಿ ಅದ್ಭುತವಾಗಿ ಬೌಲಿಂಗ್ ಮಾಡಿದರೂ, ಮಧ್ಯಮ ಓವರ್‌ಗಳಲ್ಲಿ ಕಿಶನ್ ದಾಳಿಗೆ ಬೆದರಿದರು. ಕೊನೆಯಲ್ಲಿ ವಿಕೆಟ್‌ಗಳನ್ನು ಪಡೆಯುವ ಮೂಲಕ ಹೈದರಾಬಾದ್ ಅನ್ನು 201 ರನ್‌ಗಳಿಗೆ ಕಟ್ಟಿಹಾಕುವಲ್ಲಿ ಬೆಂಗಳೂರು ಯಶಸ್ವಿಯಾಗಿದೆ. ಈಗ ಆರ್‌ಸಿಬಿ ಬ್ಯಾಟರ್‌ಗಳ ಮುಂದೆ 202 ರನ್‌ಗಳ ಬೃಹತ್ ಗುರಿ ಇದೆ.,(ಏಜೆನ್ಸೀಸ್).