ಸಿಯಾ ಓದಿಕೊಂಡಿದ್ದೇ ಇಷ್ಟು! ಕೇತನ್​ ಕುಟುಂಬಕ್ಕೂ ಈ ಸತ್ಯವನ್ನು ಹೇಳಿದ್ದೆ ಎಂದ ಆರೋಪಿ ತಾಯಿ | Ketan Murder Case

Ketan Murder Case: ಸಂಭ್ರಮ, ಸಡಗರದಿಂದ ನಡೆಯಬೇಕಿದ್ದ ಅದ್ಧೂರಿ ಮದುವೆಯು ಕೊಲೆ ಪ್ರಕರಣದಿಂದ ಮುರಿದು ಬಿದ್ದ ಘಟನೆ ಸದ್ಯ ಇಡೀ ದೇಶವನ್ನೇ ಬೆಚ್ಚಿಬೀಳಿಸಿದೆ. ನೂರಾರು ಆಸೆಗಳನ್ನು ಕಟ್ಟಿಕೊಂಡು, ಹೊಸ ಬಾಳಿನ ಹೊಸ್ತಿಲಲ್ಲಿದ್ದ ಕೇತನನ್ನು ಬೆಟ್ಟದ ಮೇಲಿಂದ ತಳ್ಳಿ ಕೊಂದ ಸಿಯಾ ಗೋಯಲ್​ ಪಾಪದ ಕೃತ್ಯಕ್ಕೆ ಜನರು ಹಿಡಿಶಾಪ ಹಾಕುತ್ತಿದ್ದಾರೆ. ಪ್ರಸ್ತುತ ತನಿಖೆಯಲ್ಲಿರುವ ಪ್ರಕರಣಕ್ಕೆ ಮತ್ತೊಂದು ಟ್ವಿಸ್ಟ್​ ಸಿಕ್ಕಿದ್ದು, ಆರೋಪಿಯ ತಾಯಿ ಕೆಲವು ಸತ್ಯ ಸಂಗತಿಗಳನ್ನು ಈಗ ಬಿಚ್ಚಿಟ್ಟಿದ್ದಾರೆ.

ಪ್ರಸ್ತುತ ಕೇತನ್​ ಕೊಲೆಗೈದ ಆರೋಪಿ ಸಿಯಾ ಗೋಯಲ್​ ಬಂಧಿತಳಾಗಿದ್ದು, ಪೊಲೀಸರ ವಿಚಾರಣೆಯಲ್ಲಿ ಒಂದಷ್ಟು ವಿಷಯಗಳನ್ನು ಬಾಯ್ಬಿಟ್ಟಿದ್ದಾಳೆ. ಇದರ ಸುತ್ತವೇ ಇಲಾಖೆ ತನಿಖೆಯನ್ನು ತೀವ್ರಗೊಳಿಸಿದ್ದರೆ, ಅತ್ತ ಮಗನನ್ನು ಕಳೆದುಕೊಂಡ ತಾಯಿ ಮತ್ತು ಆರೋಪಿ ಪೋಷಕರ ನಡುವೆ ಆರೋಪ-ಪ್ರತ್ಯಾರೋಪಗಳ ವಾಕ್ಸಮರವೇ ನಡೆದಿವೆ. ಈ ಮಧ್ಯೆ, ಸಿಯಾ ತಾಯಿ ಪೂಜಾ ಗೋಯಲ್​ ಮಾತನಾಡಿ, ಸಿಯಾಳ ವಿದ್ಯಾರ್ಹತೆ ಬಗ್ಗೆ ಕೇತನ್​ ಕುಟುಂಬದಿಂದ ಮುಚ್ಚಿಟ್ಟ ವಿಷಯವನ್ನು ಹಂಚಿಕೊಂಡಿದ್ದಾರೆ.

ಮಗಳಿಗೆ ಓದಿನಲ್ಲಿ ಹೆಚ್ಚಿನ ಆಸಕ್ತಿ ಇರಲಿಲ್ಲ. 12ನೇ ತರಗತಿ ಪರೀಕ್ಷೆಯಲ್ಲಿ ಅನುತ್ತೀರ್ಣಳಾದಳು. ನಿಶ್ಚಿತಾರ್ಥ ಅಂತಿಮಗೊಳ್ಳುವ ಮುನ್ನ ಈ ವಿಷಯವನ್ನು ನಾನು ಕೇತನ್ ಅಗರ್ವಾಲ್ ಅವರ ಕುಟುಂಬಕ್ಕೆ ಬಹಿರಂಗಪಡಿಸಿದೆ. ಓದಿನಲ್ಲಿ ಮುಂದುವರಿಸಲು ಇಚ್ಛಿಸದ ಮಗಳು, ಮನೆಯಲ್ಲೇ ಬೇಕಿಂಗ್ ವ್ಯವಹಾರವನ್ನು ಶುರು ಮಾಡಿದ್ದಳು ಎಂದು ಹೇಳಿದ್ದಾರೆ. ಆದರೆ, ಶಾಕಿಂಗ್ ವಿಷಯ ಏನೆಂದರೆ, ಆರೋಪಿ ಸಿಯಾ ಬೇಕಿಂಗ್​ ಬಿಜಿನೆಸ್​ ಬಗ್ಗೆ ಇಲ್ಲಿಯವರೆಗೂ ಯಾರಿಗೂ ಸರಿಯಾದ ಮಾಹಿತಿಯೇ ಇಲ್ಲ ಎನ್ನಲಾಗಿದೆ.

ಮೃತ ಕೇತನ್​ಗೆ ನ್ಯಾಯ ಬೇಕೇ ಬೇಕು ಎಂದು ಪೋಷಕರಾದ ರಾಖಿ ಅಗರ್ವಾಲ್​ ಮತ್ತು ವಿಶಾಲ್​ ಅಗರ್ವಾಲ್​ ಹಾಗೂ ಕುಟುಂಬಸ್ಥರು ಮೆಣದ ಬತ್ತಿಯನ್ನು ಹಿಡಿದು ರಸ್ತೆಗಳಲ್ಲಿ ಪ್ರತಿಭಟನೆ ನಡೆಸಿದ್ದಾರೆ. ಪುತ್ರನನ್ನು ಕೊಂದ ಪಾತಕಿಗಳನ್ನು ನೇಣಿಗೆ ಹಾಕಬೇಕು ಎಂದು ಆಗ್ರಹಿಸಿದ್ದು, ಒಂದೇ ಒಂದು ಬಲವಾದ ಕಾರಣಗಳಿಲ್ಲದೇ, ತಮ್ಮ ಬಯಕೆಗಳಿಗೆ ಮಗನನ್ನು ಭೀಕರವಾಗಿ ಕೊಂದಿರುವುದು ಅಕ್ಷಮ್ಯ. ಇಲ್ಲಿ ಕೇತನ್​ದು ಯಾವುದೇ ತಪ್ಪಿಲ್ಲ ಎಂದು ಕಣ್ಣೀರಿಟ್ಟಿದ್ದಾರೆ.

ಕೇತನ್​ಗೆ ಮದುವೆ ಮಾಡಿ, ನಮ್ಮ ಕುಟುಂಬಕ್ಕೆ ಸೊಸೆಯನ್ನು ಕರೆತರಬೇಕು ಎಂಬ ಆಸೆ ನಮ್ಮಲ್ಲಿ ತುಂಬಿತ್ತು. ಇದನ್ನು ಈಡೇರಿಸಿಕೊಳ್ಳಲು ಹೋಗಿ ಈಗ ಅವನನ್ನೇ ಕಳೆದುಕೊಂಡಿದ್ದೀವಿ. ನಮಗೆ ಕಾನೂನು ಮತ್ತು ಸುವ್ಯವಸ್ಥೆ ಮೇಲೆ ಸಂಪೂರ್ಣ ನಂಬಿಕೆಯಿದೆ. ಕೊಲೆಗಡುಕರಿಗೆ ಗಲ್ಲು ಶಿಕ್ಷೆ ವಿಧಿಸುವವರೆಗೂ ಈ ಹೋರಾಟ ಮುಂದುವರಿಯುತ್ತದೆ. ನಮ್ಮೊಂದಿಗೆ ಎಲ್ಲರೂ ದನಿಗೂಡಿಸಿರುವುದಕ್ಕೆ ಧನ್ಯವಾದ. ಶಿಕ್ಷೆಯಾಗುವವರೆಗೂ ಜೊತೆಗೆ ನಿಲ್ಲುತ್ತೀರಿ ಎಂಬ ನಂಬಿಕೆ ನನಗಿದೆ ಎಂದು ಮೃತನ ತಂದೆ ಹೇಳಿದ್ದಾರೆ,(ಏಜೆನ್ಸೀಸ್).