ಪಹಲ್ಗಾಮ್​ ಉಗ್ರರ ದಾಳಿ ಪರ ಪೋಸ್ಟ್: ಸೌದಿಯಿಂದ ಬರುತ್ತಿದ್ದಂತೆ ಕೇರಳ ಏರ್‌ಪೋರ್ಟ್‌ನಲ್ಲಿ ಯುವಕನ ಬಂಧನ..Pahalgam

ಬಂಧಿತ ಆರೋಪಿ ಎರ್ನಾಕುಲಂ ಜಿಲ್ಲೆಯ ನಾರ್ತ್ ಪರವೂರ್ ನಿವಾಸಿ ಮೊಹಮ್ಮದ್ ಸನೂಪ್  ಎಂದು ಪೊಲೀಸರು ಗುರುತಿಸಿದ್ದಾರೆ. ಈತ ಸೌದಿ ಅರೇಬಿಯಾದಲ್ಲಿ ಕೆಲಸ ಮಾಡುತ್ತಿದ್ದ. ಶುಕ್ರವಾರ ಮುಂಜಾನೆ ಕರಿಪುರ ವಿಮಾನ ನಿಲ್ದಾಣಕ್ಕೆ ಬಂದಿಳಿದ ತಕ್ಷಣ, ಮಾಹಿತಿ ಪಡೆದುಕೊಂಡ ಕರಿಪುರ ಪೊಲೀಸರು ಆತನನ್ನು ಕೂಡಲೇ ವಶಕ್ಕೆ ಪಡೆದಿದ್ದಾರೆ.

ಕಳೆದ ಒಂದು ವರ್ಷದ ಹಿಂದೆ ಪಹಲ್ಗಾಮ್ ಉಗ್ರರ ದಾಳಿಯಲ್ಲಿ ಮಲಯಾಳಿ ಮೂಲದ ರಾಮಚಂದ್ರನ್ ಎಂಬುವವರು ಮೃತಪಟ್ಟಿದ್ದರು. ಈ ಭೀಕರ ಘಟನೆಯ ಬಗ್ಗೆ  ವರದಿ ಮಾಡಲಾಗಿತ್ತು. ವರದಿಯಲ್ಲಿ ಮೃತ ರಾಮಚಂದ್ರನ್ ಅವರ ಪುತ್ರಿಯ ಹೇಳಿಕೆಯೂ ಇತ್ತು. ಆರೋಪಿ ಮೊಹಮ್ಮದ್ ಸನೂಪ್ ಆ ಮಾಧ್ಯಮದ ವರದಿಯ ಕೆಳಗೆ ಅತ್ಯಂತ ಆಕ್ಷೇಪಾರ್ಹ ಹಾಗೂ ದೇಶವಿರೋಧಿ ಕಾಮೆಂಟ್ ಮಾಡಿದ್ದನು.

ವಿದೇಶದಲ್ಲಿದ್ದಾಗ ಈ ಬಗ್ಗೆ ಕಾಮೆಂಟ್​ ಮಾಡಿದ್ದನ್ನು ಯುವಮೋರ್ಚಾ ರಾಜ್ಯ ಕಾರ್ಯದರ್ಶಿ ಅಡೀನಾ ಭಾರತಿ  ಅವರು  ಸ್ಕ್ರೀನ್‌ಶಾಟ್  ತೆಗೆದುಕೊಂಡು ತೇಡುಪುಳದ ಮುಟ್ಟಂ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು. ದೂರು ದಾಖಲಿಸಿಕೊಂಡ ಪೊಲೀಸರು  ಆತನ ವಿರುದ್ಧ ಲುಕೌಟ್ ನೋಟಿಸ್ ಹೊರಡಿಸಿದ್ದರು. 

ಶುಕ್ರವಾರ ಮೊಹಮ್ಮದ್ ಸನೂಪ್  ಮುಂಜಾನೆ ಸೌದಿ ಅರೇಬಿಯಾದಿಂದ ಕರಿಪುರ ವಿಮಾನ ನಿಲ್ದಾಣಕ್ಕೆ ಸನೂಪ್ ಬರುತ್ತಿದ್ದಂತೆ ಪೊಲೀಸರು ಆತನನ್ನು ವಶಕ್ಕೆ ಪಡೆದಿದ್ದಾರೆ. ಬಳಿಕ ಆತನನ್ನು ಮುಟ್ಟಂ ಪೊಲೀಸರಿಗೆ ಹಸ್ತಾಂತರಿಸಲಾಗಿದೆ. ಬಂಧಿತ ಆರೋಪಿಯನ್ನು ಮುಟ್ಟಂ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, ನ್ಯಾಯಾಲಯವು ಆತನಿಗೆ 14 ದಿನಗಳ ನ್ಯಾಯಾಂಗ ಬಂಧನ ವಿಧಿಸಿದೆ ಎಂದು ಪೊಲೀಸ್​ ಮೂಲಗಳು ಮಾಹಿತಿ ಹಂಚಿಕೊಂಡಿದೆ.

"ಪಹಲ್ಗಾಮ್ ಉಗ್ರರ ದಾಳಿಯಲ್ಲಿ ನಮ್ಮದೇ ಕೇರಳದ ವ್ಯಕ್ತಿಯೊಬ್ಬರು ಕ್ರೂರವಾಗಿ ಹತ್ಯೆಯಾಗಿದ್ದನ್ನು ಸಂಭ್ರಮಿಸುವ ಮಟ್ಟಿಗೆ ಮಲಯಾಳಿ ಯುವಕನೊಬ್ಬನ ಮಿದುಳು ತೊಳೆಯಲ್ಪಟ್ಟಿರುವುದು ಹೇಗೆ?". ಇದೊಂದು ಎಚ್ಚರಿಕೆಯ ಗಂಟೆಯಾಗಿದ್ದು, ಇದು ಕೇವಲ ಪ್ರತ್ಯೇಕ ಘಟನೆಯಲ್ಲ, ಬದಲಿಗೆ ಕಾಂಗ್ರೆಸ್ ಮತ್ತು ಸಿಪಿಐ(ಎಂ) ಪಕ್ಷಗಳ ವರ್ಷಗಳ ತುಷ್ಟೀಕರಣ, ಮೂಲಭೂತವಾದ ಮತ್ತು ರಾಜಕೀಯ ಬೂಟಾಟಿಕೆಯ ಫಲಿತಾಂಶವಾಗಿದೆ ಎಂದು  ಕೇರಳ ಬಿಜೆಪಿ ರಾಜ್ಯಾಧ್ಯಕ್ಷ ರಾಜೀವ್ ಚಂದ್ರಶೇಖರ್ ಆರೋಪಿಸಿದ್ದಾರೆ, (ಏಜೆನ್ಸೀಸ್).