Kanpur ಬೀದಿಯಲ್ಲಿ ಬಿದ್ದ ಚಾಕೋಲೇಟ್​ ತೆಗೆದುಕೊಳ್ಳುತ್ತಿರುವ ಸವಾರರು; ಪುಕ್ಸಟ್ಟೆ ಸಿಕ್ರೆ ಎಕ್ಸಪೈರಿ ಆಗಿರೋದನ್ನು ಬಿಡಲ್ವೇನ್ರೋ? ಎಂದ ನೆಟ್ಟಿಗರು

ಕಾನ್ಪುರ: ಏನಾದರೂ ಪುಕ್ಸಟ್ಟೆಗೆ ಸಿಗುತ್ತೇ ಎಂದರೆ ಅಲ್ಲಿ ನೂಕು ನುಗ್ಗಲು ಇರುತ್ತೆ. ಮೈ ಪರಚಿಕೊಳ್ಳುವ ಮೂಲಕ ಆ ಪದಾರ್ಥಗಳನ್ನು ಸಂಗ್ರಹಿಸಿಕೊಳ್ಳುವುದು ಕೆಲವರ ಅಭ್ಯಾಸ. ಇದಕ್ಕೆ ದುಬಾರಿ ಜೀವನಶೈಲಿಯೂ ಕಾರಣ. ಹೆದ್ದಾರಿ ಮಧ್ಯೆ ಬಿದ್ದ ಎಣ್ಣೆ ಟ್ಯಾಂಕರ್​, ಹಣ್ಣುಗಳು, ಡ್ರೈ ಫ್ರೂಟ್ಸ್​​, ಸಿಲಿಂಡರ್​​ ಇವುಗಳನ್ನು ಆಯ್ದುಕೊಳ್ಳಲು ಜನರು ಊರುಗಳಿಂದ ಘಟನಾ ಸ್ಥಳಕ್ಕೆ ಬಂದುಬಿಡುತ್ತಾರೆ.

ಆದರೆ, ಸದ್ಯ ಸೋಶಿಯಲ್​ ಮೀಡಿಯಾದಲ್ಲಿ ಸದ್ದು ಮಾಡ್ತಿರುವ ವಿಚಾರ ಎಂದರೆ, ಎಕ್ಸ್ಪೈರಿ ಆಗಿರುವ ಚಾಕೋಲೇಟ್​ಗಳನ್ನು ಕಾರ್ಖಾನೆಯೊಂದು ಕಾನ್ಪುರದಲ್ಲಿ ಎಸೆದಿದೆ. ಅದನ್ನೂ ಬಿಡದ ಜನರು ಬ್ಯಾಗ್​ಗಳಲ್ಲಿ ತುಂಬಿಕೊಂಡು ಹೋಗುತ್ತಿರುವ ದೃಶ್ಯಗಳು ವೈರಲ್​ ಆಗಿದೆ. ಪುಕ್ಸಟ್ಟೆ ಸಿಕ್ರೆ ಏನನ್ನು ಬಿಡಲ್ವಾ? ಜನ ಯಾಕೆ ಹೀಗಾದ್ರು ಎಂದು ನೆಟ್ಟಿಗರು ಬೇಸರ ವ್ಯಕ್ತಪಡಿಸಿದ್ದಾರೆ

ವಿನೀತ್ ಕೆ ಎಂಬುವವರು ವಿಡಿಯೋ ಹಂಚಿಕೊಂಡಿದ್ದಾರೆ. ಅದರಲ್ಲಿ, ಉತ್ತರ ಪ್ರದೇಶದ ಕಾನ್ಪುರದಲ್ಲಿನ ಪಂಕಿ ಕೈಗಾರಿಕಾ ಪ್ರದೇಶದ ರಸ್ತೆಯ ಬದಿಯೊಂದರಲ್ಲಿ ದೊಡ್ಡ ಬಾಕ್ಸ್​​ಗಳಲ್ಲಿ ಡೇಟ್​ ಬಾರ್​ ಆದ ಚಾಕೋಲೇಟ್​ಗಳನ್ನು ಎಸೆಯಲಾಗಿದೆ. ಅದೇ ಮಾರ್ಗದಲ್ಲಿ ಬಂದ ವಾಹನ ಸವಾರರು ರಾಶಿ ಬಿದ್ದ ಚಾಕೋಲೇಟ್​​​ ಬಾಕ್ಸ್​ಗಳನ್ನು ಕೈಗೆ ಸಿಕ್ಕಷ್ಟು ಕವರ್​ ಹಾಗೂ ಚೀಲದಲ್ಲಿ ತುಂಬಿಕೊಂಡು ಹೋಗುತ್ತಿರುವುದು ಕಂಡು ಬಂದಿದೆ. ಅಲ್ಲದೇ ಇದು ಎಕ್ಸ್​ಪೈರಿ ಆದ್ದದ್ದು ಎಂದು ಎಕ್ಸ್​​ನಲ್ಲಿ ಹಂಚಿಕೊಂಡಿರುವ ವಿಡಿಯೋಗಳಲ್ಲಿ ಉಲ್ಲೇಖಿಸಲಾಗಿದೆ.

ಅವಧಿ ಮೀರಿದ ವಸ್ತುಗಳನ್ನು ಹೀಗೆ ವಿಲೇವಾರಿ ಮಾಡೋದೆ ತಪ್ಪು. ಸರಿಯಾದ ರೀತಿಯಲ್ಲಿ ಕ್ರಮ ಕೈಗೊಳ್ಳದ ಇವರ ವಿರುದ್ಧ ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ ಕಾನೂನು ಕ್ರಮ ಕೈಗೊಳ್ಳಲಿ ಎಂದು ಕೆಲವರು ಕಾಮೆಂಟ್ ಮಾಡಿದ್ದಾರೆ.

ಅಲ್ಲ ಇದು ನಿಜಕ್ಕೂ ನಂಬಲಾಗುತ್ತಿಲ್ಲ. ಕಾನ್ಪುರದ ಒಂದು ಚಾಕೊಲೇಟ್ ಕಾರ್ಖಾನೆ ಅವಧಿ ಮೀರಿದ ಚಾಕೊಲೇಟ್‌ಗಳನ್ನು ಎಸೆದಿತ್ತು. ಅದನ್ನು ಜನರು ತೆಗೆದುಕೊಂಡು ಹೋಗಲು ಧಾವಿಸುತ್ತಿದ್ದಾರೆ. ಜನರು ಪುಕ್ಸಟ್ಟೆ ಸಿಗುತ್ತೆ ಎಂದು ಈ ಹಂತಕ್ಕೆಯಾಕೆ ಇಳಿದರು. ಉಚಿತ ಎಂದ ಮಾತ್ರಕ್ಕೆ ತಿನ್ನಲು ಯೋಗ್ಯವಲ್ಲದನ್ನು ಕೊಂಡೊಯ್ಯೋದು ತಪ್ಪು ಎಂದು ಬರೆದುಕೊಂಡಿದ್ದಾರೆ.

ಎಂಜಿ ಎಂಬುವವರು ಕಾಮೆಂಟ್ ಮಾಡಿದ್ದು, ಡೇಟ್​ ಬಾರ್​ ಆದವಸ್ತುಗಳನ್ನು ವಿಲೇವಾರಿ ಮಾಡಲು ಇದು ಸರಿಯಾದ ವಿಧಾನವೇ? ದಯವಿಟ್ಟು ಸಂಬಂಧಪಟ್ಟ ಕಂಪನಿಯೊಂದಿಗೆ ಪರಿಶೀಲಿಸಿ. ಇತರ ಆಹಾರ ಕಂಪನಿಗಳಿಗೂ ನಿರ್ದೇಶನ ಕೊಡಿ ಎಂದು ಹೇಳಿದ್ದಾರೆ, (ಏಜೆನ್ಸೀಸ್).