ಎಐ ಹೊಡೆತಕ್ಕೆ ಉದ್ಯೋಗ ನಷ್ಟ: 2026ರ ಮೊದಲ 3 ತಿಂಗಳಲ್ಲಿ 92 ಸಾವಿರ ಉದ್ಯೋಗಿಗಳಿಗೆ ಗೇಟ್​ಪಾಸ್

ಕಳೆದ ಒಂದು ವರ್ಷದಿಂದ ಜಾಗತಿಕವಾಗಿ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (ಎಐ) ಪ್ರಭಾವ ಹೆಚ್ಚಾಗುತ್ತಿದ್ದು, ಅಮೆರಿಕವೊಂದರಲ್ಲೇ ಪ್ರತಿ ತಿಂಗಳು ಸರಾಸರಿ 16,000 ಜನರು ಕೆಲಸ ಕಳೆದುಕೊಳ್ಳುತ್ತಿದ್ದಾರೆ. 2026ರ ಏಪ್ರಿಲ್ ತಿಂಗಳ ಒಟ್ಟು ಉದ್ಯೋಗ ಕಡಿತದಲ್ಲಿ ಶೇಕಡ 26ರಷ್ಟು ಪಾಲು ಎಐ ತಂತ್ರಜ್ಞಾನದ್ದೇ ಆಗಿದೆ ಎಂಬ ಆಘಾತಕಾರಿ ಸಂಗತಿ, ಮಾಹಿತಿ-ತಂತ್ರಜ್ಞಾನ ವಲಯವನ್ನು ಬೆಚ್ಚಿಬೀಳಿಸಿದೆ. ಟೆಕ್ ದೈತ್ಯ ಮೆಟಾ ಹಾಗೂ ಮೈಕ್ರೋಸಾಫ್ಟ್- ಈ ಎರಡು ಕಂಪನಿಗಳೇ 20 ಸಾವಿರ ಸಿಬ್ಬಂದಿಯನ್ನು ತೆಗೆದು ಹಾಕಿವೆ. ಅಮೆಜಾನ್, ಗೂಗಲ್, ಒರಾಕಲ್, ಸೇಲ್ಸ್​ಫೋರ್ಸ್, ನೈಕಿ, ಸ್ನಾ್ಯಪ್ ಸೇರಿದಂತೆ ಹಲವು ಕಂಪನಿಗಳು ಉದ್ಯೋಗ ಕಡಿತ ಮಾಡಿವೆ. ಮೆಟಾ ಕಂಪನಿಯಂತೂ ಮುಂಬರುವ ದಿನಗಳಲ್ಲಿ ಮತ್ತೆ 8 ಸಾವಿರ ಸಿಬ್ಬಂದಿಯನ್ನು ಕೈ ಬಿಡುವ ಯೋಜನೆ ಹಾಕಿಕೊಂಡಿದೆಯಲ್ಲದೆ, 6 ಸಾವಿರ ಹುದ್ದೆಗಳಿಗೆ ಹೊಸದಾಗಿ ನೇಮಕಾತಿ ಮಾಡದಿರಲು ನಿರ್ಧರಿಸಿದೆ. ಮೈಕ್ರೋಸಾಫ್ಟ್ ಕಂಪನಿ ತನ್ನ ಅಮೆರಿಕದ ಉದ್ಯೋಗಿಗಳಲ್ಲಿ ಶೇಕಡ 7 ಮಂದಿಗೆ ಸ್ವಯಂನಿವೃತ್ತಿ ಪಡೆದುಕೊಳ್ಳುವಂತೆ ಹೇಳಿದೆ. ನೈಕಿ 1,400 ಹುದ್ದೆಗಳನ್ನೇ ರದ್ದು ಮಾಡಿದೆ.

ಬ್ಲಾಕ್ ಮತ್ತು ಕಾಯಿನ್​ಬೇಸ್​ನಂತಹ ಪ್ರಮುಖ ಕಂಪನಿಗಳು ಎಐ ಬಳಕೆಯಿಂದ ಕಡಿಮೆ ಸಿಬ್ಬಂದಿಯೊಂದಿಗೆ ಕೆಲಸ ಮಾಡಲು ಮುಂದಾಗಿವೆ. ‘ಬ್ಲಾಕ್’ ಕಂಪನಿಯು ತನ್ನ ಸಿಬ್ಬಂದಿ ಸಂಖ್ಯೆಯಲ್ಲಿ ಶೇಕಡ 40ರಷ್ಟು ಕಡಿತ ಮಾಡಿದೆ. ಎಐ ಪ್ರಭಾವ ಹೆಚ್ಚಿರುವ ಕ್ಷೇತ್ರಗಳಲ್ಲಿ ಯುವ ನೌಕರರ ಉದ್ಯೋಗದ ಬೆಳವಣಿಗೆಯ ದರವು ಶೇ.16ರಷ್ಟು ಕುಂಠಿತಗೊಂಡಿದೆ. ಎಐ ಬಳಕೆ ಹೆಚ್ಚಿರುವುದರಿಂದ ಪೋ›ಗ್ರಾಮಿಂಗ್, ಅಕೌಂಟಿಂಗ್, ಕಾನೂನು ನೆರವು ಮತ್ತು ಗ್ರಾಹಕ ಸೇವೆ ಸೇರಿದಂತೆ ಹಲವು ಕ್ಷೇತ್ರಗಳು ಅಪಾಯ ಎದುರಿಸುತ್ತಿವೆ. ಜಾಗತಿಕವಾಗಿ 30 ಕೋಟಿ ಉದ್ಯೋಗಗಳ ಮೇಲೆ ಎಐ ಪರಿಣಾಮ ಬೀರಲಿದೆ ಎಂದು ಅಧ್ಯಯನಗಳು ಅಂದಾಜಿಸಿವೆ. ಆದರೆ, ಇದು ಸಂಪೂರ್ಣವಾಗಿ ಕೆಲಸಗಳನ್ನು ಕಸಿದುಕೊಳ್ಳುವ ಬದಲಿಗೆ, ಕೆಲಸ ಮಾಡುವ ವಿಧಾನವನ್ನು ಬದಲಿಸುತ್ತಿದೆ. ಮುಂಬರುವ 5 ವರ್ಷಗಳಲ್ಲಿ ಅಮೆರಿಕದ ಶೇ.10ರಿಂದ 15ರಷ್ಟು ಉದ್ಯೋಗಗಳು ಸಂಪೂರ್ಣವಾಗಿ ಬದಲಾಗಲಿವೆ. ವಿಶ್ವ ಆರ್ಥಿಕ ವೇದಿಕೆ ಪ್ರಕಾರ, ಉದ್ಯೋಗ ಮಾರುಕಟ್ಟೆಯ ಮೇಲೆ ಎಐ ಪರಿಣಾಮವು ಮಿಶ್ರಿತವಾಗಿದೆ. 2030ರ ವೇಳೆಗೆ ಜಗತ್ತಿನಾದ್ಯಂತ 9.2 ಕೋಟಿ ಉದ್ಯೋಗಗಳು ಎಐ ಮತ್ತು ತಂತ್ರಜ್ಞಾನದ ಬದಲಾವಣೆಯಿಂದಾಗಿ ಸ್ಥಳಾಂತರಗೊಳ್ಳಬಹುದು ಅಥವಾ ರದ್ದಾಗಬಹುದು ಎಂದು ಅಂದಾಜಿಸಲಾಗಿದೆ. ಇದೇ ಅವಧಿಯಲ್ಲಿ, ಎಐ ತಂತ್ರಜ್ಞಾನವು ಹೊಸ ಉದ್ಯೋಗಗಳನ್ನು ಸೃಷ್ಟಿಸುವ ನಿರೀಕ್ಷೆಯಿದೆ.

ಕೆಲಸ ಕಳೆದುಕೊಳ್ಳುವ ಭೀತಿಯು ಉದ್ಯೋಗಿಗಳಲ್ಲಿ ತೀವ್ರ ಆತಂಕ, ಖಿನ್ನತೆ ಮತ್ತು ‘ಟೆಕ್ನೋ-ಸ್ಟ್ರೆಸ್’ ಹೆಚ್ಚಾಗಲು ಕಾರಣವಾಗುತ್ತಿದೆ. ಇದು ಉದ್ಯೋಗಿಗಳ ಮಾನಸಿಕ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀರುತ್ತಿದೆ. ಕೆಲ ಕಂಪನಿಗಳು ಉದ್ಯೋಗ ಕಡಿತದ ಮುಂಚೆ ಸಿಬ್ಬಂದಿಯೊಂದಿಗೆ ಆಪ್ತ ಸಮಾಲೋಚನೆ ನಡೆಸುತ್ತಿವೆ. ಎಐ ಅಳವಡಿಕೆಯಿಂದಾಗಿ ನಿರುದ್ಯೋಗ ದರದಲ್ಲಿ ತಾತ್ಕಾಲಿಕವಾಗಿ ಹೆಚ್ಚಳವಾಗುವ ಸಾಧ್ಯತೆ ಇದೆ. ಆದಾಗ್ಯೂ, ಇದು ಕೇವಲ ಉದ್ಯೋಗಗಳ ನಷ್ಟವಲ್ಲ; ಬದಲಿಗೆ ಹೊಸ ರೀತಿಯ ಕೌಶಲಗಳನ್ನು ಹೊಂದಿರುವ ಉದ್ಯೋಗಿಗಳ ಸೃಷ್ಟಿಗೆ ನಾಂದಿ ಹಾಡಲಿದೆ. ಭವಿಷ್ಯದಲ್ಲಿ ಕೆಲಸಗಾರರು ಹೊಸ ತಂತ್ರಜ್ಞಾನಕ್ಕೆ ಒಗ್ಗಿಕೊಳ್ಳುವುದು ಅನಿವಾರ್ಯವಾಗಲಿದೆ.

ಹಿಂದೆ ಕೋಡಿಂಗ್ ಮಾಡಲು ದಿನಗಟ್ಟಲೇ ಸಮಯ ಬೇಕಾಗುತ್ತಿತ್ತು, ಆದರೆ ಈಗ ಎಐ ಸಹಾಯಕಗಳು ಈ ಪ್ರಕ್ರಿಯೆಯನ್ನು ವೇಗಗೊಳಿಸಿವೆ. ಪ್ರಸ್ತುತ ಸಕ್ರಿಯ ಡೆವಲಪರ್​ಗಳು ಬರೆಯುವ ಒಟ್ಟು ಕೋಡ್​ನಲ್ಲಿ 46%ರಷ್ಟು ಎಐ ಸಹಾಯದಿಂದ ಸಿದ್ಧವಾಗುತ್ತಿದೆ. ಪುನರಾವರ್ತಿತ ಮತ್ತು ಸಾಂಪ್ರದಾಯಿಕ ಕೋಡಿಂಗ್ ಕೆಲಸಗಳನ್ನು ಎಐ ಕ್ಷಣಮಾತ್ರದಲ್ಲಿ ಮಾಡುವುದರಿಂದ, ಡೆವಲಪರ್​ಗಳು ಸಂಕೀರ್ಣವಾದ ‘ಸಿಸ್ಟಮ್ ಡಿಸೈನ್’ ಮತ್ತು ಆರ್ಕಿಟೆಕ್ಚರ್ ಕಡೆ ಗಮನ ಹರಿಸಲು ಸಾಧ್ಯವಾಗುತ್ತಿದೆ. ಅಲ್ಲದೆ, ಉಪಕರಣಗಳು ಸಾಫ್ಟ್​ವೇರ್​ನಲ್ಲಿರುವ ತಪ್ಪುಗಳನ್ನು ಮನುಷ್ಯರಿಗಿಂತ ವೇಗವಾಗಿ ಪತ್ತೆಹಚ್ಚಿ ಸರಿಪಡಿಸುತ್ತಿವೆ. ಸರ್ವರ್​ಗಳು ಅಥವಾ ನೆಟ್​ವರ್ಕ್​ಗಳಲ್ಲಿ ಸಮಸ್ಯೆಗಳು ಉಂಟಾಗುವ ಮೊದಲೇ ಎಐ ಅದನ್ನು ಮುನ್ಸೂಚಿಸಿ ಸರಿಪಡಿಸುತ್ತದೆ. ಎಐ ಬಳಸುವ ಐಟಿ ತಂಡಗಳು ತಮ್ಮ ಕಾರ್ಯಾಚರಣೆಯ ವೆಚ್ಚದಲ್ಲಿ 15%-20%ರಷ್ಟು ಉಳಿತಾಯ ಮಾಡುತ್ತಿವೆ. ಎಐ ಐಟಿ ಕ್ಷೇತ್ರವನ್ನು ಕಡಿಮೆ ಕೆಲಸ, ಹೆಚ್ಚು ಫಲಿತಾಂಶ ಎಂಬ ದಿಕ್ಕಿನತ್ತ ಕೊಂಡೊಯ್ಯುತ್ತಿದೆ. ಐಟಿ ವೃತ್ತಿಪರರು ಕೇವಲ ಕೋಡ್ ಬರೆಯುವವರಾಗಿ ಉಳಿಯದೆ, ಎಐ ಅನ್ನು ಸರಿಯಾಗಿ ನಿರ್ವಹಿಸುವ ‘ತಾಂತ್ರಿಕ ವ್ಯವಸ್ಥಾಪಕ’ರಾಗಿ ಬದಲಾಗುತ್ತಿದ್ದಾರೆ.

ಆಲ್ಪಬೆಟ್, ಮೆಟಾ, ಮೈಕ್ರೋಸಾಫ್ಟ್ ಮತ್ತು ಅಮೆಜಾನ್ ಕಂಪನಿಗಳು ಈ ವರ್ಷ ಎಐ ತಂತ್ರಜ್ಞಾನಕ್ಕಾಗಿ 66 ಲಕ್ಷ ಕೋಟಿ ರೂ.ಗಳನ್ನು ಹೂಡಿಕೆ ಮಾಡುತ್ತಿವೆ. ಇತರ ಕಂಪನಿಗಳು ಕೂಡ ಇದೇ ಹಾದಿ ಹಿಡಿದಿವೆ. ಸಿಬ್ಬಂದಿ ಸಂಖ್ಯೆಯನ್ನು ಕಡಿತಗೊಳಿಸಿ, ಅದರಿಂದ ಉಳಿತಾಯವಾಗುವ ಹಣವನ್ನು ಎಐ ತಂತ್ರಜ್ಞಾನದ ಅಳವಡಿಕೆಗೆ ಹೂಡಿಕೆ ಮಾಡುತ್ತಿವೆ. ಭಾರತದ ಐಟಿ ಕ್ಷೇತ್ರದಲ್ಲಿ ಹೂಡಿಕೆಯ ಮಾದರಿ ಬದಲಾಗಿದೆ. 2026ರಲ್ಲಿ ಭಾರತೀಯ ಕಂಪನಿಗಳ ತಾಂತ್ರಿಕ ಬಜೆಟ್​ನಲ್ಲಿ 40%ರಿಂದ 45%ರಷ್ಟು ಹಣವನ್ನು ಕೇವಲ ಎಐ ಮತ್ತು ಡೇಟಾ ಸಂಬಂಧಿತ ಬದಲಾವಣೆಗಳಿಗಾಗಿ ಮೀಸಲಿಡಲಾಗುತ್ತಿದೆ. ಭಾರತದ ಐಟಿ ವೆಚ್ಚವು 2026ರಲ್ಲಿ 10.6%ರಷ್ಟು ಏರಿಕೆ ಕಂಡು 176 ಬಿಲಿಯನ್ ಡಾಲರ್ ತಲುಪುವ ನಿರೀಕ್ಷೆಯಿದೆ. ಎಐನಿಂದಾಗಿ ಕೆಲವು ಹಳೆಯ ಉದ್ಯೋಗಗಳು ಮರೆಯಾಗುತ್ತಿದ್ದರೂ, ಹೊಸ ಉನ್ನತ ಮಟ್ಟದ ಉದ್ಯೋಗಗಳು ಸೃಷ್ಟಿಯಾಗುತ್ತಿವೆ. ಎಐ ಸಾಫ್ಟ್ ವೇರ್ ಆರ್ಕಿಟೆಕ್ಟ್, ಮಷಿನ್ ಲರ್ನಿಂಗ್ ಇಂಜಿನಿಯರ್ ಮತ್ತು ಎಐ ಸೈಬರ್ ಸೆಕ್ಯುರಿಟಿ ಸ್ಪೆಷಲಿಸ್ಟ್​ಗಳಿಗೆ ಬೇಡಿಕೆ ಹೆಚ್ಚಿದೆ. ಸಾಂಪ್ರದಾಯಿಕ ಐಟಿ ಉದ್ಯೋಗಿಗಳಿಗಿಂತ ಎಐ ಕೌಶಲ ಹೊಂದಿರುವವರಿಗೆ ಮಾರುಕಟ್ಟೆಯಲ್ಲಿ 30%ರಿಂದ 50% ಹೆಚ್ಚು ವೇತನ ನೀಡಲಾಗುತ್ತಿದೆ.

ಎಐ ಈಗ ಸೈಬರ್ ದಾಳಿಗಳನ್ನು ತಡೆಯುವ ಪ್ರಬಲ ಅಸ್ತ್ರವಾಗಿದೆ. ಹ್ಯಾಕರ್​ಗಳು ಎಐ ಬಳಸಿ ದಾಳಿ ಮಾಡುತ್ತಿರುವುದರಿಂದ, ಐಟಿ ಕಂಪನಿಗಳು ಅದಕ್ಕೆ ಪ್ರತಿಯಾಗಿ ಹೆಚ್ಚು ಶಕ್ತಿಶಾಲಿ ಎಐ ಭದ್ರತಾ ವ್ಯವಸ್ಥೆಗಳನ್ನು ಅಳವಡಿಸಿಕೊಳ್ಳುತ್ತಿವೆ.

ಶೇಕಡ 90ರಷ್ಟು ಸಂಸ್ಥೆಗಳು ತಮಗೆ ಬೇಕಾದ ಕೌಶಲದ ಕೊರತೆಯನ್ನು ಎದುರಿಸುತ್ತಿವೆ. ಉದ್ಯೋಗಿಗಳು ಕೌಶಲ ಹೆಚ್ಚಿಸಿಕೊಳ್ಳುವುದು ಅನಿವಾರ್ಯವಾಗಿದೆ. ಎಐ ಬಳಸುವ ಉದ್ಯೋಗಿಗಳು ವಾರಕ್ಕೆ ಸರಾಸರಿ 12 ಗಂಟೆಗಳ ಸಮಯವನ್ನು ಉಳಿಸುತ್ತಿದ್ದಾರೆ ಮತ್ತು ಅವರ ಉತ್ಪಾದಕತೆ 25%ರಷ್ಟು ಹೆಚ್ಚಾಗಿದೆ. ವರದಿಗಳ ಪ್ರಕಾರ, ಮಹಿಳೆಯರು ಹೆಚ್ಚಾಗಿರುವ ಆಡಳಿತಾತ್ಮಕ ಮತ್ತು ಕ್ಲರಿಕಲ್ ಹುದ್ದೆಗಳು ಎಐನಿಂದ ಹೆಚ್ಚು ಬಾಧಿತವಾಗುವ ಸಾಧ್ಯತೆಯಿದೆ (70-75% ಮಹಿಳಾ ಉದ್ಯೋಗಿಗಳು ಈ ಅಪಾಯದ ವ್ಯಾಪ್ತಿಯಲ್ಲಿದ್ದಾರೆ). ಆದ್ದರಿಂದ, ಮುಂಬರುವ ದಿನಗಳಲ್ಲಿ ತಾಂತ್ರಿಕ ಜ್ಞಾನದ ಜೊತೆಗೆ ಸೃಜನಶೀಲತೆ ಮತ್ತು ವಿಮರ್ಶಾತ್ಮಕ ಆಲೋಚನೆ ಹೊಂದಿರುವವರಿಗೆ ಬೇಡಿಕೆ ಹೆಚ್ಚಲಿದೆ.

ಎಐ ಅಳವಡಿಕೆಯಿಂದ 2026ರ ಮೊದಲ 3 ತಿಂಗಳಲ್ಲೇ ಜಾಗತಿಕವಾಗಿ 92,000ಕ್ಕೂ ಹೆಚ್ಚು ಉದ್ಯೋಗ ಕಡಿತಗಳು ನಡೆದಿವೆ. ಭಾರತದಲ್ಲಿ ಎಐ ಸಂಬಂಧಿತ ಉದ್ಯೋಗ ಕಡಿತವು ಸೀಮಿತವಾಗಿದ್ದರೂ (ಭಾರತದಲ್ಲಿ ಕಳೆದ 4 ತಿಂಗಳಲ್ಲಿ 2 ಸಾವಿರಕ್ಕೂ ಲೇ-ಆಫ್​ಗಳು ಆಗಿವೆ), ಸಾಂಪ್ರದಾಯಿಕ ಐಟಿ ಸೇವೆಗಳಲ್ಲಿ ನೇಮಕಾತಿ ಪ್ರಕ್ರಿಯೆ ಮಂದಗತಿ ಯಲ್ಲಿದೆ. 80%ರಷ್ಟು ಗ್ರಾಹಕ ಸೇವಾ ಕಾರ್ಯಗಳು ಮುಂದಿನ ಕೆಲವು ವರ್ಷಗಳಲ್ಲಿ ಸ್ವಯಂಚಾಲಿತಗೊಳ್ಳುವ ಸಾಧ್ಯತೆಯಿದೆ.