ಹಿಂದೂಗಳನ್ನು ಸಹಿಸಿಕೊಳ್ಳುತ್ತೇವೆ ಎಂದ ಪಾಕ್ ಅಧ್ಯಕ್ಷ: ಮುಟ್ಟಿ ನೋಡಿಕೊಳ್ಳುವಂತೆ ಜಾವೇದ್ ಅಖ್ತರ್ ಕೌಂಟರ್​!...ಏನಿದು 10% ವಿವಾದ..? | Javed Akhtar

ತಮ್ಮ ಎಕ್ಸ್​ ಖಾತೆಯಲ್ಲಿ ಪೋಸ್ಟ್ ಹಂಚಿಕೊಂಡಿರುವ ಅಖ್ತರ್, ಭ್ರಷ್ಟಾಚಾರದ ಆರೋಪಗಳ ಕಾರಣದಿಂದಾಗಿ ಜರ್ದಾರಿ ಅವರಿಗೆ ಬಂದಿರುವ ಮಿಷ್ಟರ್ 10 ಪರ್ಸೆಂಟ್ ಎಂಬ ಅಡ್ಡಹೆಸರನ್ನು ಉಲ್ಲೇಖಿಸಿ ಟಾಂಗ್ ನೀಡಿದ್ದಾರೆ. ಬೆನಜೀರ್ ಭುಟ್ಟೋ ಅವರನ್ನು ಮದುವೆಯಾದ ನಂತರ ಬೆಳಕಿಗೆ ಬಂದ ಪಾಕಿಸ್ತಾನದ ಜರ್ದಾರಿ ಅವರೇ, ನಿಮ್ಮ ದೇಶದಲ್ಲಿರುವ ಶೇಕಡಾ 3 ರಿಂದ 4 ರಷ್ಟು ಹಿಂದೂ ಜನಸಂಖ್ಯೆಯನ್ನು ತಾವು ಸಹಿಸಿಕೊಳ್ಳುವುದಾಗಿ ಹೇಳಿದ್ದೀರಿ. ಜರ್ದಾರಿ ಅವರೇ, ಶೇಕಡಾ 10 ಕ್ಕಿಂತ ಕಡಿಮೆಯಿರುವ ಯಾವುದರ ಬಗ್ಗೆಯೂ ನಿಮಗೆ ಕರುಣೆ ಅಥವಾ ಕಾಳಜಿ ಇಲ್ಲ ಎಂಬುದನ್ನು ನಾನು ಅರ್ಥಮಾಡಿಕೊಳ್ಳಬಲ್ಲೆ ಎಂದು ಜಾವೇದ್ ಅಖ್ತರ್ ಲೇವಡಿ ಮಾಡಿದ್ದಾರೆ.

ಪಾಕಿಸ್ತಾನದ ಸ್ವಾತಂತ್ರ್ಯ ದಿನಾಚರಣೆಯ ಸಂದರ್ಭದಲ್ಲಿ ಜರ್ದಾರಿ ಮಾಡಿದ ಭಾಷಣದ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದ ನಂತರ ಈ ವಿವಾದ ಆರಂಭವಾಯಿತು. ದೇಶದ ಹಿಂದೂ ಜನಸಂಖ್ಯೆಯನ್ನು ಉಲ್ಲೇಖಿಸಿ ಮಾತನಾಡಿದ್ದ ಜರ್ದಾರಿ, ಪಾಕಿಸ್ತಾನ ಮತ್ತು ಅದರ ಮುಸ್ಲಿಂ ಬಹುಸಂಖ್ಯಾತರು ಶೇಕಡಾ 3-4 ರಷ್ಟಿರುವ ಹಿಂದೂ ಜನಸಂಖ್ಯೆಯನ್ನು ಸಹಿಸಿಕೊಳ್ಳುತ್ತಾರೆ ಎಂದು ಹೇಳಿದ್ದರು.

ಭಾರತೀಯರ ದೃಷ್ಟಿಕೋನವೇ ಬೇರೆ, ಅವರದ್ದೇ ಆದ ಅಜೆಂಡಾ ಅವರ ಮನಸ್ಸಿನಲ್ಲಿದೆ. ಅವರು ಅಖಂಡ ಭಾರತವನ್ನು ನಂಬುತ್ತಾರೆ. ಆದರೆ ಅದರ ಮಧ್ಯೆ ಇರುವ ಅನೇಕ ವಿಷಯಗಳನ್ನು ಅವರು ಮರೆತಿದ್ದಾರೆ ಎಂದು ಆರೋಪಿಸಿದ್ದರು. ಮುಂದುವರಿದು ಮಾತನಾಡಿದ್ದ ಅವರು, ನಾವು ಮುಸ್ಲಿಮರು, ಅವರು ಅಲ್ಲ. ಆದರೆ ನಾವು ಪಾಕಿಸ್ತಾನದಲ್ಲಿರುವ ಶೇಕಡಾ 3-4 ರಷ್ಟು ಹಿಂದೂ ಜನಸಂಖ್ಯೆಯನ್ನು ಸಹಿಸಿಕೊಳ್ಳುವ ಮನಸ್ಥಿತಿಯ ಮುಸ್ಲಿಮರು. ಅವರು ಬೇರೆಲ್ಲಿಯೂ ಇರುವಷ್ಟೇ ಸ್ವತಂತ್ರವಾಗಿ ಮತ್ತು ಚೆನ್ನಾಗಿದ್ದಾರೆ. ಅವರು ಭಾರತಕ್ಕೆ ಹೋಗುವುದಕ್ಕಿಂತ ನಮ್ಮೊಂದಿಗಿರಲು ಬಯಸುತ್ತಾರೆ ಎಂದು ಹೇಳಿಕೊಂಡಿದ್ದರು.

ಪಾಕಿಸ್ತಾನದ ಸೇನೆ, ಭಾರತದೊಂದಿಗಿನ ಬಾಂಧವ್ಯ ಮತ್ತು ಪ್ರಾದೇಶಿಕ ರಾಜಕೀಯ ವಿಷಯಗಳ ಬಗ್ಗೆ ಮಾತನಾಡುವಾಗ ಜರ್ದಾರಿ ಈ ಹೇಳಿಕೆ ನೀಡಿದ್ದರು. ಬ್ರಿಟಿಷ್ ಭಾರತದ ವಿಭಜನೆಯ ನಂತರ ರಚನೆಯಾದ ಪಾಕಿಸ್ತಾನವು ಆಗಸ್ಟ್ 14 ರಂದು ತನ್ನ ಸ್ವಾತಂತ್ರ್ಯ ದಿನವನ್ನು ಆಚರಿಸುತ್ತದೆ (ಭಾರತಕ್ಕಿಂತ ಒಂದು ದಿನ ಮುಂಚಿತವಾಗಿ).

ಜಾವೇದ್ ಅಖ್ತರ್ ಅವರು ಪಾಕಿಸ್ತಾನದ ನೀತಿಗಳು ಮತ್ತು ದ್ವಿಪಕ್ಷೀಯ ಸಂಬಂಧಗಳ ಬಗ್ಗೆ ಈ ಹಿಂದೆಯೂ ಅನೇಕ ಬಾರಿ ಬಹಿರಂಗವಾಗಿ ಆಕ್ರೋಶ ಹೊರಹಾಕಿದ್ದಾರೆ. ಮೇ ತಿಂಗಳಲ್ಲಿ ಮುಂಬೈನಲ್ಲಿ ನಡೆದ ಪುಸ್ತಕ ಬಿಡುಗಡೆ ಸಮಾರಂಭವೊಂದರಲ್ಲಿ ಮಾತನಾಡಿದ್ದ ಅವರು, ಪಾಕಿಸ್ತಾನ ಮತ್ತು ನರಕದ ನಡುವೆ ಆಯ್ಕೆ ಮಾಡುವ ಪರಿಸ್ಥಿತಿ ಬಂದರೆ, ತಾವು ನರಕಕ್ಕೆ ಹೋಗಲು ಆದ್ಯತೆ ನೀಡುವುದಾಗಿ ಹೇಳಿದ್ದರು. ಭಾರತ ಮತ್ತು ಪಾಕಿಸ್ತಾನ ಎರಡೂ ದೇಶಗಳ ಮತಾಂಧರು ಪ್ರತಿದಿನ ತಮಗೆ ಬೈಯ್ಯುತ್ತಾರೆ ಎಂದು ಅವರು ಬಹಿರಂಗಪಡಿಸಿದ್ದರು.

ಯಾರಾದರೂ ಒಬ್ಬರು ನನಗೆ ಬೈಯುವುದನ್ನು ನಿಲ್ಲಿಸಿದರೆ ನನಗೆ ಆತಂಕವಾಗುತ್ತದೆ. ಒಂದು ಕಡೆಯವರು ನೀನು ಕಾಫಿರ್, ನರಕಕ್ಕೆ ಹೋಗುತ್ತೀಯಾ ಎಂದು ನಿಂದಿಸಿದರೆ, ಇನ್ನೊಂದು ಕಡೆಯವರು ಜಿಹಾದಿ, ಪಾಕಿಸ್ತಾನಕ್ಕೆ ಹೋಗು ಎಂದು ಬೈಯ್ಯುತ್ತಾರೆ ಎಂದಿದ್ದ ಅಖ್ತರ್, ಸಭಿಕರ ಚಪ್ಪಾಳೆಯ ನಡುವೆ ಒಂದು ವೇಳೆ ಪಾಕಿಸ್ತಾನ ಮತ್ತು ನರಕದ ನಡುವೆ ಒಂದನ್ನು ಆಯ್ಕೆ ಮಾಡಬೇಕಾಗಿ ಬಂದರೆ, ನಾನು ನರಕಕ್ಕೇ ಹೋಗಲು ಇಷ್ಟಪಡುತ್ತೇನೆ ಎಂದು ಹೇಳಿದ್ದರು(ಏಜೆನ್ಸೀಸ್​).