ನನಗೆ ಅವಮಾನವಾಯಿತು!ಪಾಕ್ ಟೆಸ್ಟ್ ತಂಡದ ಕೋಚ್ ಹುದ್ದೆಯಿಂದ ಕೆಳಗಿಳಿದ ಕಾರಣವನ್ನು ಬಹಿರಂಗಪಡಿಸಿದ ಗಿಲ್ಲೆಸ್ಪಿ..Jason Gillespie

ಪಾಕಿಸ್ತಾನ: (Jason Gillespie ) ಪಾಕಿಸ್ತಾನದ ಕ್ರಿಕೆಟ್ ತಂಡದ ಟೆಸ್ಟ್ ಮುಖ್ಯ ತರಬೇತುದಾರರಾಗಿದ್ದ ಆಸ್ಟ್ರೇಲಿಯಾದ ಮಾಜಿ ವೇಗಿ ಜೇಸನ್ ಗಿಲ್ಲೆಸ್ಪಿ, ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಲು ಕಾರಣವಾದ ಅಂಶಗಳನ್ನು ಬಹಿರಂಗಪಡಿಸಿದ್ದಾರೆ.

ಆಸ್ಟ್ರೇಲಿಯಾದ ಮಾಜಿ ವೇಗದ ಬೌಲರ್ ಅವರನ್ನು ಏಪ್ರಿಲ್ 2024 ರಲ್ಲಿ ಮುಖ್ಯ ಕೋಚ್ ಆಗಿ ನೇಮಿಸಲಾಯಿತು ಆದರೆ ದಕ್ಷಿಣ ಆಫ್ರಿಕಾದಲ್ಲಿ ಪಾಕಿಸ್ತಾನದ ಟೆಸ್ಟ್ ಸರಣಿಯ ನಂತರ ಕೇವಲ ಎಂಟು ತಿಂಗಳ ನಂತರ ರಾಜೀನಾಮೆ ನೀಡಿದರು.

ಜನವರಿ 1, 2026 ರಂದು ನಡೆದ ಸಂವಾದವೊಂದರಲ್ಲಿ ಮಾತನಾಡಿದ ಜೇಸನ್ ಗಿಲ್ಲೆಸ್ಪಿ, ಹಿರಿಯ ಸಹಾಯಕ ತರಬೇತುದಾರ ಟಿಮ್ ನೀಲ್ಸನ್ ಅವರನ್ನು ಪಿ‌ಸಿಬಿ ಏಕಾಏಕಿ ವಜಾಗೊಳಿಸಿದ್ದರು. ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (PCB) ಹಲವಾರು ನಿರ್ಧಾರಗಳನ್ನು ತೆಗೆದುಕೊಂಡಿದ್ದು, ಅದು ತನಗೆ ಅವಮಾನವನ್ನುಂಟು ಮಾಡಿದೆ. ಸಹಾಯಕ ಕೋಚ್ ಟಿಮ್ ನೀಲ್ಸನ್ ಅವರನ್ನು ವಜಾಗೊಳಿಸುವ ಮೊದಲು PCB ನನ್ನೊಂದಿಗೆ ಸಂವಹನ ನಡೆಸಲಿಲ್ಲ, ಈ ಕ್ರಮವನ್ನು ಅವರು ಸ್ವೀಕಾರಾರ್ಹವಲ್ಲ ಎಂದಿದ್ದಾರೆ.

ಮುಖ್ಯ ತರಬೇತುದಾರನಾಗಿ ನನ್ನೊಂದಿಗೆ ಯಾವುದೇ ಚರ್ಚೆ ನಡೆಸದೆ ಈ ನಿರ್ಧಾರ ತೆಗೆದುಕೊಳ್ಳಲಾಗಿತ್ತು. ಇದನ್ನು ಒಪ್ಪಲು ಸಾಧ್ಯವೇ ಇಲ್ಲ. ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯ ಸಂವಹನ ಮತ್ತು ನಿರ್ವಹಣೆಯ ಗಂಭೀರ ಸಮಸ್ಯೆಗಳಿಂದಾಗಿ ತಮ್ಮ ನಿರ್ಧಾರಕ್ಕೆ ಕಾರಣ ಎಂದು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (PCB) ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ತಂಡದ ಆಯ್ಕೆ ಸಮಿತಿಯಿಂದ ತರಬೇತುದಾರರನ್ನು ಹೊರಗಿಟ್ಟಿದ್ದಕ್ಕೆ ಗಿಲ್ಲೆಸ್ಪಿ ತೀವ್ರ ಬೇಸರ ವ್ಯಕ್ತಪಡಿಸಿದ್ದಾರೆ. ತಮಗೇ ತಿಳಿಯದಂತೆ ತಂಡದ ಬದಲಾವಣೆಗಳಾಗುತ್ತಿದ್ದವು ಮತ್ತು ಮೈದಾನದಲ್ಲಿ ಕೇವಲ "ಕ್ಯಾಚ್ ಪ್ರಾಕ್ಟೀಸ್" ನೀಡುವ ವ್ಯಕ್ತಿಯಾಗಿ ತನ್ನನ್ನು ಸೀಮಿತಗೊಳಿಸಲಾಗಿತ್ತು ಎಂದು ಅವರು ಕಿಡಿಕಾರಿದ್ದಾರೆ.

ಪಿ‌ಸಿಬಿ ಅಧ್ಯಕ್ಷ ಮೊಹ್ಸಿನ್ ನಖ್ವಿ ಅವರ ನಡವಳಿಕೆಯ ಬಗ್ಗೆಯೂ ಅವರು ಅಸಮಾಧಾನ ಹೊರಹಾಕಿದ್ದಾರೆ. ತಂಡದ ಭವಿಷ್ಯದ ಬಗ್ಗೆ ಚರ್ಚಿಸಲು ಆಯೋಜಿಸಿದ್ದ 'ಕನೆಕ್ಷನ್ ಕ್ಯಾಂಪ್‌'ಗೆ ತಾವು ಆಸ್ಟ್ರೇಲಿಯಾದಿಂದ ಬಂದಿದ್ದರೂ, ಅದೇ ನಗರದಲ್ಲಿದ್ದ ಅಧ್ಯಕ್ಷರು ಭೇಟಿಯಾಗಲು ಬರಲಿಲ್ಲ ಎಂದು ಅವರು ಆರೋಪಿಸಿದ್ದಾರೆ.

ಗಿಲ್ಲೆಸ್ಪಿಯವರ ಹೇಳಿಕೆಗಳು ಪಾಕಿಸ್ತಾನ ಕ್ರಿಕೆಟ್‌ನಲ್ಲಿ ಪಾರದರ್ಶಕತೆಯ ಕೊರತೆ ಮತ್ತು ಕಳಪೆ ನಿರ್ಧಾರ ತೆಗೆದುಕೊಳ್ಳುವಿಕೆಯನ್ನು ಸ್ಪಷ್ಟವಾಗಿ ಎತ್ತಿ ತೋರಿಸುತ್ತವೆ. ಗಿಲ್ಲೆಸ್ಪಿ ಮಾಡಿದ ಹೇಳಿಕೆಗಳಿಗೆ ಪಿಸಿಬಿ ಇಲ್ಲಿಯವರೆಗೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.