Silver Lotus: ಬಂಗಾಳ ಗೆದ್ದ ಮೋದಿಗೆ ಜಮ್ಮು ಅಭಿಮಾನಿಯ ಉಡುಗೊರೆ: 3 ಕೆಜಿ ಬೆಳ್ಳಿಯಲ್ಲಿ ಅರಳಿದ ಕಮಲ!

"ಬಂಗಾಳದಲ್ಲಿ ಕಮಲ ಅರಳುವುದನ್ನು ನೋಡಲು ನಾನು ಬರೋಬ್ಬರಿ 15 ವರ್ಷಗಳಿಂದ ಕಾಯುತ್ತಿದ್ದೆ" ಎಂದು ರಿಂಕು ಚೌಹಾಣ್ ಭಾವುಕರಾಗಿ ನುಡಿದಿದ್ದಾರೆ. ಮಮತಾ ಬ್ಯಾನರ್ಜಿ ನೇತೃತ್ವದ ತೃಣಮೂಲ ಕಾಂಗ್ರೆಸ್‌ನ ಭದ್ರಕೋಟೆಯಾಗಿದ್ದ ಬಂಗಾಳದಲ್ಲಿ ಬಿಜೆಪಿ ಅಧಿಕಾರ ಹಿಡಿದ ಕ್ಷಣವನ್ನು ಅಜರಾಮರವಾಗಿಸಲು ಅವರು ಈ ನಿರ್ಧಾರ ಕೈಗೊಂಡಿದ್ದಾರೆ.

ಈ ಸುಂದರ ಬೆಳ್ಳಿಯ ಕಮಲವನ್ನು ಸಿದ್ಧಪಡಿಸಲು ರಿಂಕು ಸತತ ಎರಡು ತಿಂಗಳುಗಳ ಕಾಲ ಶ್ರಮಿಸಿದ್ದಾರೆ. ಸುಮಾರು 3 ಕೆಜಿ ತೂಕದ ಶುದ್ಧ ಬೆಳ್ಳಿಯನ್ನು ಬಳಸಿ, ಅತ್ಯಂತ ಸೂಕ್ಷ್ಮವಾಗಿ ಪಕ್ಷದ ಚಿಹ್ನೆಯನ್ನು ಕೆತ್ತಿದ್ದಾರೆ. "ಇದು ಕೇವಲ ಉಡುಗೊರೆಯಲ್ಲ, ನಮ್ಮಂತಹ ಲಕ್ಷಾಂತರ ಬಿಜೆಪಿ ಕಾರ್ಯಕರ್ತರ ನಿರಂತರ ಹೋರಾಟ ಮತ್ತು ಸಮರ್ಪಣೆಯ ಸಂಕೇತ" ಎನ್ನುತ್ತಾರೆ ಅವರು.

ರಿಂಕು ಅವರ ಪತ್ನಿ ಅಂಜಲಿ ಚೌಹಾಣ್ ಈ ಕುರಿತು ಮಾತನಾಡುತ್ತಾ, "ಈ ಕಲಾಕೃತಿ ಮಾಡುವಾಗ ಅವರು ಊಟ-ನಿದ್ರೆಯನ್ನೂ ಮರೆತಿದ್ದರು. ಪ್ರಧಾನಿ ಮೋದಿಯವರ ಮೇಲಿನ ಭಕ್ತಿ ಮತ್ತು ಬಂಗಾಳದ ಗೆಲುವಿನ ಹಠ ಅವರಲ್ಲಿ ಅಷ್ಟೊಂದು ಉತ್ಸಾಹ ತುಂಬಿತ್ತು" ಎಂದು ನೆನಪಿಸಿಕೊಂಡಿದ್ದಾರೆ.

ಪಶ್ಚಿಮ ಬಂಗಾಳದ 294 ಸದಸ್ಯ ಬಲದ ವಿಧಾನಸಭೆಯಲ್ಲಿ ಬಹುಮತಕ್ಕೆ 196 ಸ್ಥಾನಗಳ ಅಗತ್ಯವಿತ್ತು. ಸೋಮವಾರ ಪ್ರಕಟವಾದ ಫಲಿತಾಂಶದಲ್ಲಿ ಬಿಜೆಪಿ ಬರೋಬ್ಬರಿ 206 ಸ್ಥಾನಗಳನ್ನು ಗೆಲ್ಲುವ ಮೂಲಕ ಐತಿಹಾಸಿಕ ಸಾಧನೆ ಮಾಡಿದೆ. ದಶಕಗಳ ಕಾಲ ಆಳ್ವಿಕೆ ನಡೆಸಿದ್ದ ತೃಣಮೂಲ ಕಾಂಗ್ರೆಸ್ ಕೇವಲ 81 ಸ್ಥಾನಗಳಿಗೆ ಕುಸಿದಿದೆ. ಇನ್ನುಳಿದಂತೆ ಕಾಂಗ್ರೆಸ್ 2, ಸಿಪಿಐ(ಎಂ) 1 ಮತ್ತು ಇತರರು 3 ಸ್ಥಾನಗಳನ್ನು ಪಡೆದಿದ್ದಾರೆ.

ತಮ್ಮ ಕೈಚಳಕದಲ್ಲಿ ಮೂಡಿಬಂದ ಈ ಅಪರೂಪದ ಬೆಳ್ಳಿಯ ಕಮಲವು ಪ್ರಧಾನಮಂತ್ರಿಯವರ ನಿವಾಸ ಅಥವಾ ದೆಹಲಿಯ ಬಿಜೆಪಿ ಕೇಂದ್ರ ಕಚೇರಿಯಲ್ಲಿ ಸ್ಥಾನ ಪಡೆಯಲಿ ಎಂಬುದು ರಿಂಕು ಅವರ ಆಶಯವಾಗಿದೆ,(ಏಜೆನ್ಸೀಸ್).