ಜಡೇಜಾ ಏಕಾಂಗಿ ಹೋರಾಟ: ಲಖನೌ ಬೌಲಿಂಗ್​ ದಾಳಿಗೆ ನಲುಗಿದ ರಾಯಲ್ಸ್! LSGಗೆ 160 ರನ್​ಗಳ ಗುರಿ | LSGvsRR

ಟಾಸ್ ಗೆದ್ದು ಮೊದಲು ಬೌಲಿಂಗ್ ಆಯ್ದುಕೊಂಡ ರಿಷಬ್ ಪಂತ್ ಅವರ ನಿರ್ಧಾರವನ್ನು ಎಲ್‌ಎಸ್‌ಜಿ ಬೌಲರ್‌ಗಳು ಸಮರ್ಥಿಸಿಕೊಂಡಿದ್ದಾರೆ.

ರಾಜಸ್ಥಾನ್ ರಾಯಲ್ಸ್ ಪರ ಇನ್ನಿಂಗ್ಸ್ ಆರಂಭಿಸಿದ ಯುವ ಪ್ರತಿಭೆ ವೈಭವ್ ಸೂರ್ಯವಂಶಿ(8, ರನ್​) ಐಪಿಎಲ್ ಇತಿಹಾಸದಲ್ಲಿ ಒಂದು ಹೊಸ ದಾಖಲೆ ಬರೆದರು. ಅವರು ಅತ್ಯಂತ ವೇಗವಾಗಿ (ಕಡಿಮೆ ಇನ್ನಿಂಗ್ಸ್‌ಗಳಲ್ಲಿ) 500 ಐಪಿಎಲ್ ರನ್ ಪೂರೈಸಿದ ಬ್ಯಾಟರ್ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಆದರೆ, ಅವರ ಈ ಸಾಧನೆಯ ಸಂಭ್ರಮ ಹೆಚ್ಚು ಹೊತ್ತು ಉಳಿಯಲಿಲ್ಲ. ಟೀಮ್ ಇಂಡಿಯಾದ ಅನುಭವಿ ವೇಗಿ ಮೊಹಮ್ಮದ್ ಶಮಿ ಒಂದೇ ಓವರ್‌ನಲ್ಲಿ ಎರಡು ಪ್ರಮುಖ ವಿಕೆಟ್ ಪಡೆಯುವ ಮೂಲಕ ರಾಜಸ್ಥಾನ್ ತಂಡಕ್ಕೆ ಆಘಾತ ನೀಡಿದರು.

ಶಮಿ ನೀಡಿದ ಆರಂಭಿಕ ಆಘಾತದ ನಂತರ, ಎಲ್‌ಎಸ್‌ಜಿ ಪರ ಮೋಹ್ಸಿನ್ ಖಾನ್ ಮತ್ತು ಪ್ರಿನ್ಸ್ ಯಾದವ್ ಅದ್ಭುತ ಬೌಲಿಂಗ್ ಪ್ರದರ್ಶಿಸಿದರು. ಮಧ್ಯಮ ಓವರ್‌ಗಳಲ್ಲಿ ರನ್ ವೇಗಕ್ಕೆ ಬ್ರೇಕ್ ಹಾಕಿದ ಈ ಜೋಡಿ ತಲಾ ಎರಡು ವಿಕೆಟ್ ಕಬಳಿಸಿ ರಾಜಸ್ಥಾನ್ ರಾಯಲ್ಸ್ ದೊಡ್ಡ ಮೊತ್ತ ಗಳಿಸದಂತೆ ತಡೆದರು. ಏಕಾನಾ ಪಿಚ್ ಬೌಲರ್‌ಗಳಿಗೆ ನೆರವು ನೀಡುತ್ತಿರುವುದು ರಾಜಸ್ಥಾನ್ ಬ್ಯಾಟರ್‌ಗಳ ಪರದಾಟಕ್ಕೆ ಸಾಕ್ಷಿಯಾಯಿತು.

ಒಂದು ಹಂತದಲ್ಲಿ 120 ರನ್‌ಗಳ ಒಳಗೆ ಕುಸಿಯುವ ಭೀತಿಯಲ್ಲಿದ್ದ ರಾಜಸ್ಥಾನ್ ರಾಯಲ್ಸ್ ತಂಡಕ್ಕೆ ಅನುಭವಿ ರವೀಂದ್ರ ಜಡೇಜಾ43 ರನ್​ ಮತ್ತು ಶುಭಂ ದುಬೆ 19 ರನ್​ ಹೊಡೆದು ತಂಡಕ್ಕೆ ಆಸರೆಯಾದರು. ಕೊನೆಯ ಓವರ್‌ಗಳಲ್ಲಿ ಜಾಣ್ಮೆಯ ಆಟವಾಡಿದ ಈ ಜೋಡಿ ತಂಡದ ಮೊತ್ತವನ್ನು 150ರ ಗಡಿ ದಾಟಿಸುವಲ್ಲಿ ಯಶಸ್ವಿಯಾದರು. ಜಡೇಜಾ ಅವರ ಸಮಯೋಚಿತ ಬ್ಯಾಟಿಂಗ್ ಮತ್ತು ದುಬೆ ಅವರ ಸಿಕ್ಸರ್‌ಗಳು ರಾಜಸ್ಥಾನ್ ತಂಡಕ್ಕೆ ಹೋರಾಟದ ಮೊತ್ತ ತಂದುಕೊಟ್ಟಿವೆ.