ಊಟ, ನಿದ್ರೆ ಮಾಡಲು ಆಗ್ತಿಲ್ಲ... ದೋಣಿ ದುರಂತ ನೆನೆದು ಕಣ್ಣೀರಿಟ್ಟ ಕ್ಯಾಪ್ಟನ್​ ಮಹೇಶ್​ ಪಟೇಲ್ | ​Jabalpur Boat Pilot

ಮಧ್ಯಪ್ರದೇಶ: ಬರ್ಗಿ ಡ್ಯಾಮ್​ನ ನರ್ಮದಾ ನದಿಯಲ್ಲಿ ದೋಣಿ ಮಗುಚಿದ ಪರಿಣಾಮ ಅದರಲ್ಲಿದ್ದ ಪ್ರಯಾಣಿಕರ ಪೈಕಿ 9 ಮಂದಿ ದಾರುಣವಾಗಿ ಸಾವನ್ನಪ್ಪಿದ ದುರಂತ ಘಟನೆ (Jabalpur Boat Accident) ಸದ್ಯ ಮೃತರ ಕುಟುಂಬಸ್ಥರನ್ನು ಕಣ್ಣೀರಿನಲ್ಲಿ ಕೈತೊಳೆಯುವಂತೆ ಮಾಡಿದೆ. ಮತ್ತೊಂದೆಡೆ, ದುರ್ಘಟನೆ ನೆನೆದು ಬೋಟ್​ನ ಚಾಲಕ ಕಣ್ಣೀರಿಡುತ್ತಿದ್ದಾರೆ.

ಗುರುವಾರ (ಏ.30) ಸಂಭವಿಸಿದ ದೋಣಿ ದುರಂತದ ಬಗ್ಗೆ ಎನ್​ಡಿಟಿವಿ ಜೊತೆ ಮುಕ್ತವಾಗಿ ಮಾತನಾಡಿದ ಕ್ರ್ಯೂಸ್​ ಬೋಟ್​ ಕ್ಯಾಪ್ಟನ್​ ಮಹೇಶ್​ ಪಟೇಲ್​, ನನ್ನಿಂದ ಎಷ್ಟು ಜನರನ್ನು ಉಳಿಸಲು ಸಾಧ್ಯವೋ ಆ ಪ್ರಯತ್ನವನ್ನು ನಾನು ಮಾಡಿದ್ದೇನೆ. 9 ಮಂದಿಯ ಸಾವಿಗೆ ಮನದಾಳದಿಂದ ಕ್ಷಮೆಯಾಚಿಸುತ್ತೇನೆ ಎಂದು ಕಣ್ಣೀರಿಟ್ಟರು.

ಈ ದುರ್ಘಟನೆ ಹೇಗೆ ಸಂಭವಿಸಿತು ಎಂಬುದನ್ನು ಎಳೆ ಎಳೆಯಾಗಿ ಬಿಚ್ಚಿಟ್ಟ ಪಟೇಲ್​, ಕಮಾರಿಯಾ ದ್ವೀಪದಿಂದ ನಾವು ಹೊರಟೆವು. ಆದರೆ, ಇದಕ್ಕಿದ್ದಂತೆ ಹವಾಮಾನ ಬದಲಾಯಿತು. ಅದಾಗಲೇ ನೀರಿನ ಮಧ್ಯಕ್ಕೆ ತಲುಪಿದ್ದ ನಮಗೆ, ಯಾವುದೇ ವಾರ್ನಿಂಗ್​ ಅಥವಾ ಕೆಟ್ಟ ಹವಾಮಾನ ಪರಿಸ್ಥಿತಿ ಕುರಿತಾಗಿ ಎಚ್ಚರಿಕೆಗಳು ಸಿಗಲಿಲ್ಲ. ಯಾವಾಗ ಗಾಳಿ ಜೋರಾಗಿ ಬೀಸಲಾರಂಭಿಸಿತೋ, ಆಗಲೇ ಬೋಟ್​ ಅನ್ನು ದಡಕ್ಕೆ ತಿರುಗಿಸಿದೆ. ಆದ್ರೆ, ಅಷ್ಟರೊಳಗೆ ದೋಣಿಗೆ ಹಾನಿಗೊಳಗಾಯಿತು ಎಂದರು.

ಬೋಟ್​ನೊಳಗೆ ನೀರು ತುಂಬುತ್ತಿದ್ದಂತೆ ನಾನು ಸಹಾಯಕ್ಕೆ ಹೆಲ್ಪ್​ ಡೆಸ್ಕ್​ನವರಿಗೆ ಕರೆ ಮಾಡಿದೆ. ಅವರು ಬರುವ ಮುನ್ನವೇ ದೋಣಿಯಲ್ಲಿ ಅರ್ಧದಷ್ಟು ನೀರು ತುಂಬಿ ಹೋಗಿತ್ತು ಎಂದರು. ಇದೇ ವೇಳೆ, ಬದುಕುಳಿದ ಪ್ರಯಾಣಿಕರು ಮಾತನಾಡಿ, ವೇಗದ ಗಾಳಿ ಬೀಸುತ್ತಿದ್ದಂತೆ ಬೋಟ್​ ಹಿಂತಿರುಗಿಸಲು ನಾವು ಕೇಳಿಕೊಂಡರೂ ಅವರು ತಿರುಗಿಸಲಿಲ್ಲ ಎಂಬ ಆರೋಪ ಕೇಳಿಬಂದಿದೆ ಎಂಬುದಕ್ಕೆ ಉತ್ತರಿಸಿದ ಪಟೇಲ್​, ಇಲ್ಲ. ಅಲ್ಲಿ ಯಾರೊಬ್ಬರೂ ಸಹ ಆ ರೀತಿ ಕೇಳಿಕೊಳ್ಳಲಿಲ್ಲ ಎಂದಿದ್ದಾರೆ.

ನಾನು ಮೊದಲೇ ಲೈಫ್​ ಜ್ಯಾಕೆಟ್​ಗಳನ್ನು ಹಾಕಿಕೊಳ್ಳುವಂತೆ ಸೂಚಿಸಿದೆ. ಆದರೆ, ಬಹುತೇಕ ಪ್ರಯಾಣಿಕರು ಅದಕ್ಕೆ ಒಪ್ಪಲಿಲ್ಲ. ಬದಲಿಗೆ ಹಾಡಿಗೆ ಕುಣಿಯುತ್ತಾ, ಮೋಜಿನಲ್ಲಿ ತೊಡಗಿದ್ದರು. ಎಲ್ಲರ ಬಳಿಯೂ ಲೈಫ್​ ಜ್ಯಾಕೆಟ್​ಗಳು ಇದೆಯೇ ಎಂಬುದನ್ನು ದೋಣಿ ಮುಳುಗುವ ವೇಳೆಗೆ ಖಾತ್ರಿ ಪಡಿಸಿಕೊಂಡು, ಕಡೆಯದಾಗಿ ಅಲ್ಲಿಂದ ಹೊರಬಂದವನೇ ನಾನು ಎಂದರು.

ಈ ದುರ್ಘಟನೆ ಬಳಿಕ ನನ್ನನ್ನು ಕೆಲಸದಿಂದ ತೆಗೆದು ಹಾಕಿದ್ದಾರೆ. ನನ್ನ ಸಂಪಾದನೆ ಮೇಲೆಯೇ ನಿಂತಿದ್ದ ಕುಟುಂಬಕ್ಕೆ ಈಗ ಭಾರೀ ಸಂಕಷ್ಟ ಎದುರಾಗಿದೆ. 27 ಸಾವಿರ ರೂ. ಸಂಬಳದಿಂದ ಕುಟುಂಬದ ಜೀವನ ಸಾಗುತ್ತಿತ್ತು. ನಾನು ಕ್ಷಮೆ ಕೇಳುತ್ತೇನೆ. ಈ ದುರಂತದಿಂದ ಆಘಾತಕ್ಕೀಡಾಗಿದ್ದೇನೆ. ಊಟ ತಿನ್ನಲು, ನಿದ್ರೆ ಮಾಡಲು ಸಾಧ್ಯವಾಗುತ್ತಿಲ್ಲ ಎಂದು ದುಃಖದ ಮಾತುಗಳನ್ನಾಡಿದರು,(ಏಜೆನ್ಸೀಸ್).