ಹೇಳಿದ್ದನ್ನೇ ಹೇಳಿ ಜನರನ್ನು ನಂಬಿಸೋದು ವಿಪಕ್ಷಗಳ ಕೆಲಸ; ರಾಹುಲ್ ಅಂದ್ರೆ ಸುಳ್ಳಿನ ಫ್ಯಾಕ್ಟರಿ; ಕೈ ವಿರುದ್ಧ ಅಮಿತ್​ ಷಾ ಕೆಂಡ | Amit Shah

ಈ ಬಗ್ಗೆ ಶನಿವಾರ ಪುದುಚೇರಿಯ ಕಾರೈಕಲ್‌ನಲ್ಲಿ ನಡೆದ ಬೃಹತ್ ಚುನಾವಣಾ ಪ್ರಚಾರ ಱಲಿಯಲ್ಲಿ ಮಾತನಾಡಿದ ಗೃಹ ಸಚಿವ, ಲೋಕಸಭೆಯ ವಿಪಕ್ಷ ನಾಯಕ ರಾಹುಲ್ ಗಾಂಧಿ ಪ್ರತಿದಿನ ಸುಳ್ಳು ಹೇಳುವ ಹೊಸ ಸಂಪ್ರದಾಯವನ್ನು ಆರಂಭಿಸಿದ್ದಾರೆ ಎಂದು ಲೇವಡಿ ಮಾಡಿದ್ದಾರೆ.

ಮುಂದುವರೆದು ಮಾತನಾಡಿದ ಷಾ, ಸುಳ್ಳು ಹೇಳುವುದು, ಅದನ್ನು ಜೋರಾಗಿ ಹೇಳುವುದು ಮತ್ತು ಅದನ್ನೇ ಪದೇಪದೆ ಪುನರಾವರ್ತಿಸುವುದು ರಾಹುಲ್ ಗಾಂಧಿಯವರ ನೀತಿಯಾಗಿದೆ. ಆದರೆ ಜನರು ಈಗ ನಿಮ್ಮ ಸುಳ್ಳು ಉತ್ಪಾದನಾ ಕಾರ್ಖಾನೆಯನ್ನು ಗುರುತಿಸಿದ್ದಾರೆ ಎಂದು ಗುಡುಗಿದ್ದಾರೆ.

ಮುಕ್ತ ವ್ಯಾಪಾರ ಒಪ್ಪಂದಗಳಿಂದ ರೈತರು ಮತ್ತು ಮೀನುಗಾರರಿಗೆ ತೊಂದರೆಯಾಗುತ್ತದೆ ಎಂಬ ರಾಹುಲ್ ಗಾಂಧಿ ಅವರ ವಾದವನ್ನು ಷಾ ತಳ್ಳಿಹಾಕಿದ್ದಾರೆ.

ಶೇ.100ರಷ್ಟು ರಕ್ಷಣೆ: ಪ್ರಧಾನಿ ನರೇಂದ್ರ ಮೋದಿ ಅವರು ಬ್ರಿಟನ್, ಯುರೋಪಿಯನ್ ಯೂನಿಯನ್ ಮತ್ತು ಅಮೆರಿಕದೊಂದಿಗಿನ ವ್ಯಾಪಾರ ಒಪ್ಪಂದಗಳಲ್ಲಿ ಭಾರತೀಯ ರೈತರು, ಮೀನುಗಾರರು ಮತ್ತು ಪಶುಸಂಗೋಪನೆ ಮಾಡುವವರ ಹಿತಾಸಕ್ತಿಗಳಿಗೆ ಶೇ. 100 ರಷ್ಟು ರಕ್ಷಣೆ ನೀಡಿದ್ದಾರೆ ಎಂದು ಅಮಿತ್​ ಷಾ ಪ್ರತಿಪಾದಿಸಿದ್ದಾರೆ.

ಅವಕಾಶಗಳ ಬಾಗಿಲು: ಈ ಒಪ್ಪಂದಗಳಿಂದ ಮೀನುಗಾರಿಕಾ ಉತ್ಪನ್ನಗಳಿಗೆ ಜಾಗತಿಕ ಮಾರುಕಟ್ಟೆ ಸಿಗಲಿದ್ದು, ಮೀನುಗಾರರಿಗೆ ಹೆಚ್ಚಿನ ಲಾಭವಾಗಲಿದೆ ಎಂದು ಗೃಹ ಸಚಿವರು ಹೇಳಿದ್ದಾರೆ.

ಹಿಂದಿನ ಡಾ. ಮನ್ಮೋಹನ್ ಸಿಂಗ್ ನೇತೃತ್ವದ ಕಾಂಗ್ರೆಸ್ ಸರ್ಕಾರವು ಅಂತಾರಾಷ್ಟ್ರೀಯ ಒಪ್ಪಂದಗಳ ಮೂಲಕ ಭಾರತೀಯ ರೈತರ ಹಿತಾಸಕ್ತಿಗಳನ್ನು ವಿದೇಶಗಳಿಗೆ ಮಾರಿಬಿಟ್ಟಿದ್ದರು ಎಂದು ಷಾ ಗಂಭೀರ ಆರೋಪಿಸಿದ್ದಾರೆ.

ಗಾಂಧಿ ಕುಟುಂಬದ ಎಟಿಎಂ: ಹಿಂದಿನ ನಾರಾಯಣಸ್ವಾಮಿ ಅವರ ಕಾಂಗ್ರೆಸ್ ಸರ್ಕಾರವು ಪುದುಚೇರಿಯನ್ನು ಗಾಂಧಿ ಕುಟುಂಬದ ಎಟಿಎಂನಂತೆ ಬಳಸಿಕೊಂಡಿತ್ತು. ಸುಮಾರು 15,000 ಕೋಟಿ ರೂ. ಅಭಿವೃದ್ಧಿ ನಿಧಿಯನ್ನು ಲೂಟಿ ಮಾಡಲಾಗಿದೆ ಎಂದು ಸಿಎಜಿ (CAG) ವರದಿ ಉಲ್ಲೇಖಿಸಿ ಷಾ ಆರೋಪಿಸಿದ್ದಾರೆ.

ಸ್ವತಂತ್ರ ನಿರ್ಧಾರ: ಹಿಂದೆ ಪುದುಚೇರಿಯ ನಿರ್ಧಾರಗಳನ್ನು ದೆಹಲಿಯ ದರ್ಬಾರ್ ತೆಗೆದುಕೊಳ್ಳುತ್ತಿತ್ತು. ಆದರೆ ಈಗ ಎನ್‌ಡಿಎ ಆಡಳಿತದಲ್ಲಿ ಸ್ಥಳೀಯರೇ ನಿರ್ಧಾರ ತೆಗೆದುಕೊಳ್ಳುತ್ತಿದ್ದಾರೆ ಎಂದಿದ್ದಾರೆ,(ಏಜೆನ್ಸೀಸ್).