ದೀದಿ ಹೆಸರಲ್ಲೇ ಗೆದ್ದವರು ಈಗ ತಮಾಷೆ ಮಾಡ್ತಿದ್ದಾರೆ!...ಹೊಸ ಅಧ್ಯಕ್ಷರ ಆಯ್ಕೆಗೆ ಸಂಸದೆ ಮಹುವಾ ಮೊಯಿತ್ರಾ ಆಕ್ಷೇಪ | Mahua Moitra

ಬಂಡಾಯದ ಬಾವುಟ ಹಾರಿಸಿರುವ ನಾಯಕರು ಮಮತಾ ಬ್ಯಾನರ್ಜಿ ಅವರ ಮುಖ ಹಾಗೂ ಪಕ್ಷದ ಜೋಡಿ ಹೂವಿನ ಗುರುತನ್ನು ಬಳಸಿಕೊಂಡೇ ಸಂಸದರು ಮತ್ತು ಶಾಸಕರಾಗಿದ್ದಾರೆ ಎಂಬುದನ್ನು ನೆನಪಿನಲ್ಲಿಡಬೇಕು ಎಂದು ಆಕ್ರೋಶ ಹೊರಹಾಕಿರುವ ಸಂಸದೆ ಮೊಯಿತ್ರಾ, ಬಂಗಾಳದಲ್ಲಿ ಸರ್ಕಾರ ಪತನವಾದಾಗಿನಿಂದ ಪ್ರತಿದಿನ ಟಿಎಂಸಿ ನಾಯಕರನ್ನು ಬಂಧಿಸಲಾಗುತ್ತಿದೆ, ಕೋರ್ಟ್ ವಿಚಾರಣೆ ಇಲ್ಲದೆ ಪೊಲೀಸರು ಹೀಗೆ ರಸ್ತೆಯಲ್ಲಿ ಪರೇಡ್ ಮಾಡುವುದು ಕಾನೂನುಬಾಹಿರ ಮತ್ತು ಇದಕ್ಕೆ ಸರ್ಕಾರವೇ ಜವಾಬ್ದಾರಿ ಹೊರಬೇಕು ಎಂದು ಎಚ್ಚರಿಕೆ ನೀಡಿದ್ದಾರೆ.

ಕೋಲ್ಕತ್ತಾದ ಹೋಟೆಲ್​ವೊಂದರಲ್ಲಿ 31 ನಿಮಿಷಗಳ ಕಾಲ ನಡೆದ ಬಂಡಾಯ ಶಾಸಕರು ಮತ್ತು ಮಾಜಿ ಕೌನ್ಸಿಲರ್‌ಗಳ ತುರ್ತು ಸಭೆಯಲ್ಲಿ ಈ ನಿರ್ಣಯ ತೆಗೆದುಕೊಳ್ಳಲಾಗಿದೆ. ವಿಧಾನಸಭೆಯ ವಿರೋಧ ಪಕ್ಷದ ನಾಯಕ ರಿತಬ್ರತ ಬ್ಯಾನರ್ಜಿ ನೇತೃತ್ವದಲ್ಲಿ ನಡೆದ ಈ ಸಭೆಯು ನೇರವಾಗಿ ಮಮತಾ ಬ್ಯಾನರ್ಜಿ ಮತ್ತು ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಅಭಿಷೇಕ್ ಬ್ಯಾನರ್ಜಿ ಅವರ ನಾಯಕತ್ವಕ್ಕೆ ಸವಾಲು ಹಾಕಿದೆ.

ವಿಶೇಷವೆಂದರೆ, ಸಭೆಯ ವೇದಿಕೆಯಲ್ಲಿ ಟಿಎಂಸಿ ಪಕ್ಷದ ಚಿಹ್ನೆ ಇತ್ತಾದರೂ, ಮಹಾತ್ಮಾ ಗಾಂಧಿ, ರವೀಂದ್ರನಾಥ ಟ್ಯಾಗೋರ್ ಮತ್ತು ಬಿ.ಆರ್. ಅಂಬೇಡ್ಕರ್ ಅವರ ಚಿತ್ರಗಳ ನಡುವೆ ಮಮತಾ ಬ್ಯಾನರ್ಜಿ ಅವರ ಭಾವಚಿತ್ರಕ್ಕೆ ಜಾಗವಿರಲಿಲ್ಲ. ಇದರೊಂದಿಗೆ ತಾವೇ ಅಸಲಿ ತೃಣಮೂಲ ಕಾಂಗ್ರೆಸ್ ಎಂದು ಬಿಂಬಿಸಿಕೊಳ್ಳಲು ಭಿನ್ನಮತೀಯರು ಮುಂದಾಗಿದ್ದಾರೆ.

ಪಕ್ಷವು ಸದ್ಯ ಸಾಂವಿಧಾನಿಕ ಬಿಕ್ಕಟ್ಟಿನಲ್ಲಿದೆ ಎಂದು ಅಭಿಪ್ರಾಯಪಟ್ಟಿರುವ ವಿಪಕ್ಷ ನಾಯಕ ರಿತಬ್ರತ ಬ್ಯಾನರ್ಜಿ, ನಿಯಮಗಳ ಪ್ರಕಾರ ಪ್ರತಿ ಮೂರು ವರ್ಷಕ್ಕೊಮ್ಮೆ ರಾಷ್ಟ್ರೀಯ ಕಾರ್ಯಕಾರಿಣಿ ಸಮಿತಿಯನ್ನು ಪುನರ್​​ರಚಿಸಬೇಕು. ಆದರೆ, 2022ರ ಫೆಬ್ರವರಿಯಲ್ಲಿ ರಚನೆಯಾಗಿದ್ದ ಹಳೆಯ ಸಮಿತಿಯ ಅವಧಿ ಈ ವರ್ಷದ ಫೆಬ್ರವರಿ 11ಕ್ಕೇ ಕೊನೆಗೊಂಡಿದೆ. ಆ ಬಳಿಕ ಯಾವುದೇ ಹೊಸ ಸಮಿತಿ ರಚನೆಯಾಗದ ಕಾರಣ, ತಾವೇ ಹೊಸ ಸಾಂಸ್ಥಿಕ ರಚನೆಯನ್ನು ಮಾಡುವುದು ಅನಿವಾರ್ಯವಾಯಿತು ಎಂದು ಅವರು ಸಮರ್ಥಿಸಿಕೊಂಡಿದ್ದಾರೆ.

ಸಭೆಯಲ್ಲಿ ಅರೂಪ್ ರಾಯ್, ಫಿರ್ಹಾದ್ ಹಕೀಮ್ ಸೇರಿದಂತೆ 10 ಸದಸ್ಯರ ಕಾರ್ಯಕಾರಿಣಿಯನ್ನು ರಚಿಸಿ, ಬಳಿಕ ಅದನ್ನು 30 ಸದಸ್ಯರ ಸಮಿತಿಯಾಗಿ ವಿಸ್ತರಿಸಲಾಯಿತು. ನಂತರ ಹೌರಾ ಸೆಂಟ್ರಲ್ ಶಾಸಕ ಅರೂಪ್ ರಾಯ್ ಅವರನ್ನು ಸರ್ವಾನುಮತದಿಂದ ಪಕ್ಷದ ಹೊಸ ಮುಖ್ಯಸ್ಥರನ್ನಾಗಿ ಆಯ್ಕೆ ಮಾಡಲಾಯಿತು ಎಂದರು. ಇತ್ತೀಚಿನ ಚುನಾವಣಾ ಹಿನ್ನಡೆಯ ಬೆನ್ನಲ್ಲೇ ಟಿಎಂಸಿ ಪಕ್ಷ ಇತಿಹಾಸದಲ್ಲೇ ಕಾಣದಂತಹ ದೊಡ್ಡ ಭಿನ್ನಮತವನ್ನು ಎದುರಿಸುತ್ತಿದ್ದು, ಸಂಘಟನೆಯ ಮೇಲಿನ ಹಿಡಿತಕ್ಕಾಗಿ ಮೂಲ ಮತ್ತು ಬಂಡಾಯಗಾರರ ನಡುವಿನ ಕಾನೂನು ಹಾಗೂ ರಾಜಕೀಯ ಸಮರ ಮುಂಬರುವ ದಿನಗಳಲ್ಲಿ ತೀವ್ರಗೊಳ್ಳುವ ಮುನ್ಸೂಚನೆ ಸಿಕ್ಕಿದೆ(ಏಜೆನ್ಸೀಸ್​​).