ಇಸ್ರೋ PSLV-C62 ಮಿಷನ್ ವೈಫಲ್ಯ: 'KID' ಪಾರಾದ ರೋಚಕ ಕಥೆ..isro

ಈ ರಾಕೆಟ್ ಹೊತ್ತೊಯ್ಯುತ್ತಿದ್ದ 16 ಉಪಗ್ರಹಗಳು ನಾಶವಾದವು. ಆದರೆ, ಅಚ್ಚರಿಯ ರೀತಿಯಲ್ಲಿ 'KID' (Kestrel Initial Demonstrator) ಎಂಬ ಪುಟ್ಟ ಉಪಗ್ರಹ ಮಾತ್ರ ಅಪಾಯದಿಂದ ಪಾರಾಗಿ ಭೂಮಿಗೆ ಸಂದೇಶ ರವಾನಿಸಿದೆ. ಸ್ಪ್ಯಾನಿಷ್ ಸ್ಟಾರ್ಟ್ಅಪ್ ಆರ್ಬಿಟಲ್ ಪ್ಯಾರಡೈಮ್‌ನ “KID” ಕ್ಯಾಪ್ಸುಲ್ ದುರಂತದಿಂದ ಬದುಕುಳಿದಿದೆ.

ಸ್ಪೇನ್ ದೇಶದ 'ಆರ್ಬಿಟಲ್ ಪ್ಯಾರಡೈಮ್' (Orbital Paradigm) ಎಂಬ ಸ್ಟಾರ್ಟ್-ಅಪ್ ತಯಾರಿಸಿದ 'KID' ಎಂಬ ಫುಟ್‌ಬಾಲ್ ಗಾತ್ರದ ಪುಟ್ಟ ಕ್ಯಾಪ್ಸುಲ್ ಈ ಮಿಷನ್‌ನ ಭಾಗವಾಗಿತ್ತು.  ರಾಕೆಟ್ ಪಥ ಬದಲಿಸಿ ವಾತಾವರಣಕ್ಕೆ ಮರುಪ್ರವೇಶಿಸುವಾಗ ಉಂಟಾದ ತೀವ್ರ ಒತ್ತಡದ ನಡುವೆಯೂ, ಈ ಕ್ಯಾಪ್ಸುಲ್ ರಾಕೆಟ್‌ನಿಂದ ಯಶಸ್ವಿಯಾಗಿ ಬೇರ್ಪಟ್ಟಿತು.

ಸುಮಾರು 28g ನಷ್ಟು ತೀವ್ರ ಗುರುತ್ವಾಕರ್ಷಣಾ ಒತ್ತಡ ಮತ್ತು ಅತಿ ಹೆಚ್ಚಿನ ಶಾಖವನ್ನು ತಡೆದುಕೊಂಡು ಇದು ಪಾರಾಯಿತು. ಸಾಮಾನ್ಯವಾಗಿ ಇಂತಹ ಪರಿಸ್ಥಿತಿಯಲ್ಲಿ ಯಾವುದೇ ಯಂತ್ರಾಂಶಗಳು ಪುಡಿಪುಡಿಯಾಗುತ್ತವೆ. ರಾಕೆಟ್ ವಿಫಲವಾದರೂ, ಈ ಕ್ಯಾಪ್ಸುಲ್ ಆನ್ ಆಗಿ ಭೂಮಿಗೆ ಸುಮಾರು 3 ನಿಮಿಷಗಳ ಕಾಲ ಅತ್ಯಮೂಲ್ಯವಾದ ಅಂಕಿಅಂಶಗಳನ್ನು  ರವಾನಿಸುವಲ್ಲಿ ಯಶಸ್ವಿಯಾಯಿತು.

ಈ ಪುಟ್ಟ ಉಪಗ್ರಹದ ಯಶಸ್ಸು ಭವಿಷ್ಯದ ಮರುಬಳಕೆ ಮಾಡಬಹುದಾದ ತಂತ್ರಜ್ಞಾನಕ್ಕೆ ಭದ್ರ ಬುನಾದಿ ಹಾಕಿದೆ. ಇಡೀ ಮಿಷನ್ ವಿಫಲವಾದರೂ, ಒಂದು ಪುಟ್ಟ ಯಂತ್ರವು ಅಂತಹ ಕಠಿಣ ಪರಿಸ್ಥಿತಿಯಲ್ಲಿ ಕೆಲಸ ಮಾಡಿದ್ದು ವಿಜ್ಞಾನ ಲೋಕದಲ್ಲಿ ಅಚ್ಚರಿ ಮೂಡಿಸಿದೆ.

ಈ ಯೋಜನೆಯನ್ನು ಫ್ರಾನ್ಸ್ ಮೂಲದ 'ರೈಡ್' (RIDE) ಸಂಸ್ಥೆಯ ತಾಂತ್ರಿಕ ಸಹಯೋಗದೊಂದಿಗೆ ಸಿದ್ಧಪಡಿಸಲಾಗಿದೆ. ಬಾಹ್ಯಾಕಾಶ ಕ್ಷೇತ್ರದಲ್ಲಿ ಉಪಗ್ರಹಗಳ ನಿರ್ವಹಣೆ ಹಾಗೂ ಲಾಜಿಸ್ಟಿಕ್ಸ್ ಸೇವೆಗಳನ್ನು ಸುಧಾರಿಸುವ ನಿಟ್ಟಿನಲ್ಲಿ ನೂತನ ವ್ಯವಸ್ಥೆಗಳನ್ನು ರೂಪಿಸುವುದು ಈ ಕಂಪನಿಯ ಪ್ರಮುಖ ಉದ್ದೇಶವಾಗಿದೆ. 

ವಿಫಲ ಮಿಷನ್‌ನಲ್ಲೂ ಈ ಉಪಗ್ರಹ ಸಂಗ್ರಹಿಸಿದ ಮಾಹಿತಿಯು ಮುಂದಿನ ದಿನಗಳಲ್ಲಿ ಅತ್ಯಂತ ಸುರಕ್ಷಿತವಾದ ಗಗನನೌಕೆಗಳನ್ನು ವಿನ್ಯಾಸಗೊಳಿಸಲು ಮಹತ್ವದ ಮೈಲಿಗಲ್ಲಾಗಲಿದೆ ಎಂದು ವಿಜ್ಞಾನಿಗಳು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.