ಅಭಿಷೇಕ್ ಬ್ಯಾನರ್ಜಿ ಮೇಲಿನ ದಾಳಿಗೆ ಸ್ವಪಕ್ಷದಲ್ಲಿನ ಭಿನ್ನಮತವೇ ಕಾರಣ? ಟಿಎಂಸಿ ಆಂತರಿಕ ಕಚ್ಚಾಟ ಬಯಲಿಗೆಳೆದ ಬಿಜೆಪಿ! BJP On Abhishek Banerjee Attack

ಅಭಿಷೇಕ್ ಬ್ಯಾನರ್ಜಿ ಮೇಲಿನ ಹಲ್ಲೆಯನ್ನು ಕೇವಲ ಸಾರ್ವಜನಿಕ ದಾಳಿ ಎಂದು ಒಪ್ಪಲು ನಿರಾಕರಿಸಿರುವ ಬಿಜೆಪಿ ರಾಷ್ಟ್ರೀಯ ವಕ್ತಾರ ಪ್ರದೀಪ್ ಭಂಡಾರಿ, ಟಿಎಂಸಿಯ ಆಂತರಿಕ ಕಚ್ಚಾಟವನ್ನು ಜಗತ್ತಿನ ಮುಂದೆ ತೆರೆದಿಟ್ಟಿದ್ದಾರೆ. ಈ ಬಗ್ಗೆ ತಮ್ಮ ಎಕ್ಸ್​ನಲ್ಲಿ ಪೋಸ್ಟ್ ಮಾಡಿದ್ದು, ಅಭಿಷೇಕ್ ಬ್ಯಾನರ್ಜಿ ಮೇಲಿನ ದಾಳಿಗೆ ಟಿಎಂಸಿ ಒಳಗಿನ ಭೀಕರ ಬಣ ರಾಜಕಾರಣವೇ ನೇರ ಹೊಣೆ ಅಲ್ಲವೇ ಎಂದು ಪ್ರಶ್ನಿಸಿದ್ದಾರೆ. ಅಲ್ಲದೆ, ಈ ಪ್ರಕರಣದಲ್ಲಿ ಪೊಲೀಸರಿಂದ ಬಂಧನಕ್ಕೊಳಗಾಗಿರುವ ಆರು ಜನ ದುಷ್ಕರ್ಮಿಗಳು ಮಾಜಿ ಶಾಸಕಿ ಲವ್ಲಿ ಮೈತ್ರಾ ಅವರ ಪರಮ ಆಪ್ತರು. ಇದರರ್ಥ ಟಿಎಂಸಿ ಕೆಳಮಟ್ಟದ ಕಾರ್ಯಕರ್ತರೇ ಈಗ ಭೈಪೋ ವಿರುದ್ಧ ದಂಗೆ ಎದ್ದಿದ್ದಾರೆ. ಮಮತಾ ಬ್ಯಾನರ್ಜಿ ಅವರ ಸೋದರಾವಳಿಯ ವಿರುದ್ಧ ಬಂಗಾಳದಲ್ಲಿ ಯಾವ ಮಟ್ಟದ ಆಡಳಿತ ವಿರೋಧಿ ಅಲೆ ಸೃಷ್ಟಿಯಾಗಿದೆ ಎಂಬುದನ್ನು ನೀವೇ ಊಹಿಸಿಕೊಳ್ಳಿ ಎಂದು ಲೇವಡಿ ಮಾಡಿದ್ದಾರೆ.

ಇನ್ನೊಂದೆಡೆ, ಪಶ್ಚಿಮ ಬಂಗಾಳದ ಸಚಿವೆ ಹಾಗೂ ಬಿಜೆಪಿ ನಾಯಕಿ ಅಗ್ನಿಮಿತ್ರಾ ಪಾಲ್ ಅವರು ಈ ಘಟನೆಯಲ್ಲಿ ಬಿಜೆಪಿಯ ಪಾತ್ರವಿದೆ ಎಂಬ ಟಿಎಂಸಿ ಆರೋಪಗಳನ್ನು ಸಂಪೂರ್ಣವಾಗಿ ತಳ್ಳಿಹಾಕಿದ್ದಾರೆ. ನಾವು ಪ್ರಸ್ತುತ ಬಂಗಾಳದ ಬೀದಿಗಳಲ್ಲಿ ನೋಡುತ್ತಿರುವುದು ಕೇವಲ ರಾಜಕೀಯ ದಾಳಿಯಲ್ಲ, ಅದು ಶುದ್ಧ ಸಾರ್ವಜನಿಕ ಆಕ್ರೋಶವಾಗಿದೆ. ಕಳೆದ 15 ವರ್ಷಗಳಿಂದ ಮಮತಾ ಬ್ಯಾನರ್ಜಿ, ಅಭಿಷೇಕ್ ಬ್ಯಾನರ್ಜಿ ಮತ್ತು ಅವರ ಟಿಎಂಸಿ ಗೂಂಡಾಗಳು ರಾಜ್ಯದ ಜನರ ಮೇಲೆ ನಡೆಸಿದ ದೌರ್ಜನ್ಯ, ಸೇಡಿನ ರಾಜಕಾರಣ ಮತ್ತು ರಕ್ತಸಿಕ್ತ ಹಿಂಸಾತ್ಮಕ ಸಂಘರ್ಷಗಳಿಗೆ ಸಿಕ್ಕ ಜನತಾ ನ್ಯಾಯವಿದು ಎಂದು ಆಕ್ರೋಶ ಹೊರಹಾಕಿದ್ದಾರೆ.

ಹಳೆಯ ಆಡಳಿತಾವಧಿಯಲ್ಲಿ ನಡೆದ ಮಹಿಳಾ ದೌರ್ಜನ್ಯಗಳು ಹಾಗೂ ಕಾನೂನು ಸುವ್ಯವಸ್ಥೆಯ ವೈಫಲ್ಯಗಳನ್ನು ಉಲ್ಲೇಖಿಸಿದ ಪಾಲ್, ಬಂಗಾಳದ ಜನತೆ ಈಗಾಗಲೇ ಟಿಎಂಸಿಗೆ ತಕ್ಕ ತೀರ್ಪು ನೀಡಿದ್ದಾರೆ ಎಂದಿದ್ದಾರೆ. ಮಮತಾ ಅವರೇ, ನೀವು ಮತ್ತೆ ನಿಮ್ಮ ಹಳೆಯ ಹಿಂಸಾತ್ಮಕ ರಾಜಕಾರಣವನ್ನು ಮಾಡಲು ಯತ್ನಿಸಿದರೆ, ಹೊಸ ಬಿಜೆಪಿ ಸರ್ಕಾರ ಅದನ್ನು ಯಾವುದೇ ಕಾರಣಕ್ಕೂ ಸಹಿಸುವುದಿಲ್ಲ. ನಮ್ಮ ಗುರಿ ಬಂಗಾಳದ ಸಮಗ್ರ ಅಭಿವೃದ್ಧಿ ಮಾತ್ರ ಎಂದು ಎಚ್ಚರಿಸಿದ್ದಾರೆ.

ಬಿಜೆಪಿಯ ಈ ಎಲ್ಲಾ ಆರೋಪಗಳನ್ನು ತೃಣಮೂಲ ಕಾಂಗ್ರೆಸ್ ಕಟುವಾಗಿ ಖಂಡಿಸಿದೆ. ಈ ಬಗ್ಗೆ ಮಾತನಾಡಿದ ಹಿರಿಯ ಟಿಎಂಸಿ ಸಂಸದ ಸೌಗತಾ ರಾಯ್, ಈ ದಾಳಿಯು ಟಿಎಂಸಿ ನಾಯಕರನ್ನು ಮುಗಿಸಲು ಬಿಜೆಪಿ ನಡೆಸುತ್ತಿರುವ ಹೆಡಮುರ್ಗಿ ಸಂಚಿನ ಮುಂದುವರಿದ ಭಾಗವಾಗಿದೆ ಎಂದು ಆಪಾದಿಸಿದ್ದಾರೆ. ಸೋನಾರ್‌ಪುರಕ್ಕೆ ಅಭಿಷೇಕ್ ಭೇಟಿ ನೀಡಿದಾಗ ಅಲ್ಲಿ ಯಾವುದೇ ಪೊಲೀಸ್ ಭದ್ರತೆ ಇರಲಿಲ್ಲ ಎಂಬುದನ್ನು ಅವರು ಬಹಿರಂಗಪಡಿಸಿದ್ದಾರೆ.

ಬಿಜೆಪಿಯ ರಾಜ್ಯ ನಾಯಕರು ಹೊರಗಡೆ ಶಾಂತಿಯ ಮಾತನಾಡುತ್ತಾರೆ, ಆದರೆ ಒಳಗೊಳಗೇ ತಮ್ಮ ಕಾರ್ಯಕರ್ತರನ್ನು ಪ್ರಚೋದಿಸಿ ಟಿಎಂಸಿ ನಾಯಕರ ಮೇಲೆ ಕಲ್ಲು, ಮೊಟ್ಟೆಗಳನ್ನು ಎಸೆಯುವಂತೆ ಮಾಡುತ್ತಿದ್ದಾರೆ. ಬಿಜೆಪಿ ನಾಯಕರ ಈ ಇಬ್ಬಂದಿ ನೀತಿಯನ್ನು ನಾನು ತೀವ್ರವಾಗಿ ಖಂಡಿಸುತ್ತೇನೆ. ಪ್ರಧಾನಿ ನರೇಂದ್ರ ಮೋದಿ ಮತ್ತು ಗೃಹ ಸಚಿವ ಅಮಿತ್ ಷಾ ಅವರು ತಕ್ಷಣವೇ ತಮ್ಮ ಪಕ್ಷದ ಗೂಂಡಾಗಳನ್ನು ನಿಯಂತ್ರಿಸಬೇಕು. ಇಲ್ಲದಿದ್ದರೆ ಬಂಗಾಳ ಸಂಪೂರ್ಣವಾಗಿ ಭೀಕರ ಅರಾಜಕತೆಗೆ ತಲುಪಲಿದೆ ಎಂದು ರಾಯ್ ಕಠಿಣ ಸಂದೇಶ ರವಾನಿಸಿದ್ದಾರೆ. ಇದರ ಬೆನ್ನಲ್ಲೇ ಟಿಎಂಸಿ ನಾಯಕ ಮದನ್ ಮಿತ್ರಾ ಪೊಲೀಸರ ವಿರುದ್ಧ ನೀಡಿದ ಹೇಳಿಕೆಯನ್ನು ಮುಂದಿಟ್ಟುಕೊಂಡು ಬಿಜೆಪಿ ನಾಯಕ ದೇವ್‌ಜಿತ್ ಸರ್ಕಾರ್ ಮತ್ತೊಂದು ಸುತ್ತಿನ ವಾಗ್ದಾಳಿ ಆರಂಭಿಸಿದ್ದು, ಬಂಗಾಳದ ರಾಜಕೀಯ ಹವಾಮಾನ ಗರಿಷ್ಠ ಮಟ್ಟದ ತಾಪಮಾನ ತಲುಪುವಂತೆ ಮಾಡಿದೆ.

ಪಶ್ಚಿಮ ಬಂಗಾಳದಲ್ಲಿ ದಿನದಿಂದ ದಿನಕ್ಕೆ ಹಿರಿಯ ನಾಯಕರ ಮೇಲಿನ ಭೌತಿಕ ದಾಳಿಗಳು ಮತ್ತು ಸ್ವಪಕ್ಷದ ಒಳಗಿನ ಬಣ ರಾಜಕಾರಣದ ಸತ್ಯಗಳು ಹೊರಬರುತ್ತಿರುವುದು ಮುಂಬರುವ ದಿನಗಳಲ್ಲಿ ಬಂಗಾಳದ ರಾಜಕೀಯ ಚಿತ್ರಣವನ್ನು ಮತ್ತಷ್ಟು ರಕ್ತಸಿಕ್ತಗೊಳಿಸುವ ಮುನ್ಸೂಚನೆ ನೀಡಿದೆ,(ಏಜೆನ್ಸೀಸ್​).