ಅಮೆರಿಕ-ಇರಾನ್ ಯುದ್ಧದ ಜ್ವಾಲೆಗೆ ಕರಗುತ್ತಿದೆಯೇ ಭಾರತದ ಇಂಧನ ಕೋಟೆ! ಮೋದಿ ಎಚ್ಚರಿಸಿದ ಆ ವಿಪತ್ತಿನ ಅಸಲಿ ರಹಸ್ಯವೇನು? India’s strategic oil reserves

ಭಾರತ ಆಮದು ಮಾಡಿಕೊಳ್ಳುವ ಕಚ್ಚಾ ತೈಲದ ಒಟ್ಟು ಪ್ರಮಾಣದಲ್ಲಿ ಶೇ. 30 ರಷ್ಟು ಭಾಗ ಕೇವಲ 'ಹೊರ್ಮುಜ್ ಜಲಸಂಧಿ ಮೂಲಕವೇ ಹಾದುಬರುತ್ತದೆ. ಸದ್ಯ ಇರಾನ್ ಈ ಜಲಮಾರ್ಗದ ಮೇಲೆ ಕಠಿಣ ನಿಯಂತ್ರಣ ಸಾಧಿಸಿದ್ದು, ವಾಣಿಜ್ಯ ಹಡಗುಗಳಿಗೆ ಪ್ರತಿ ಬ್ಯಾರೆಲ್‌ಗೆ 1 ಡಾಲರ್ ಹೆಚ್ಚುವರಿ ತೆರಿಗೆ ವಿಧಿಸುತ್ತಿದೆ. ಈ ಜಾಗತಿಕ ತೈಲ ದಿಗ್ಬಂಧನದಿಂದಾಗಿ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಬ್ರೆಂಟ್ ಕಚ್ಚಾ ತೈಲದ ಬೆಲೆ ಪ್ರತಿ ಬ್ಯಾರೆಲ್‌ಗೆ 111 ಡಾಲರ್‌ಗೆ ಜಿಗಿದಿದೆ.

ಕಳೆದ ಮೂರು ತಿಂಗಳುಗಳಿಂದ ಜಾಗತಿಕ ಬಿಕ್ಕಟ್ಟು ಇದ್ದರೂ ಭಾರತ ಸರ್ಕಾರ ಸಾರ್ವಜನಿಕರ ಮೇಲೆ ತೈಲ ಬೆಲೆಯ ಭಾರಿ ಹೊರೆಯನ್ನು ಹೇರದೆ ನಿಯಂತ್ರಿಸಿತ್ತು. ಆದರೆ ಮೇ ತಿಂಗಳ ಆರಂಭದ ದತ್ತಾಂಶಗಳ ಪ್ರಕಾರ, ಬೆಲೆ ಏರಿಕೆ ಮಾಡದ ಕಾರಣ ಭಾರತದ ತೈಲ ಮಾರಾಟ ಕಂಪನಿಗಳು (OMCs) ಪ್ರತಿದಿನ ಬರೊಬ್ಬರಿ ₹1,000 ಕೋಟಿ ರೂಪಾಯಿಗಳ ಭೀಕರ ನಷ್ಟವನ್ನು ಅನುಭವಿಸುತ್ತಿವೆ. ಈ ಒತ್ತಡ ತಡೆಯಲಾರದೆ ಕಳೆದ ವಾರವಷ್ಟೇ ಸರ್ಕಾರ ಪೆಟ್ರೋಲ್ ಮತ್ತು ಡೀಸೆಲ್ ದರವನ್ನು ಪ್ರತಿ ಲೀಟರ್‌ಗೆ ₹3 ರಷ್ಟು ಹೆಚ್ಚಿಸಿದೆ. ಸದ್ಯ ದೆಹಲಿಯಲ್ಲಿ ಪೆಟ್ರೋಲ್ ಬೆಲೆ ₹97.77 ಹಾಗೂ ಡೀಸೆಲ್ ಬೆಲೆ ₹90.67 ತಲುಪಿದೆ. ಇಂತಹ ಯುದ್ಧದ ಸಂದರ್ಭಗಳಿಗಾಗಿಯೇ ದೇಶಗಳು ವ್ಯೂಹಾತ್ಮಕ ಪೆಟ್ರೋಲಿಯಂ ಸಂರಕ್ಷಣಾಗಾರಗಳನ್ನು ನಿರ್ಮಿಸುತ್ತವೆ.

ಇದನ್ನು ಓದಿ: ಬಂಗಾಳದಲ್ಲಿ ದೀದಿಗೆ ಸುವೇಂದು ಶಾಕ್! ಟಿಎಂಸಿ ಕಾಲದ ಭ್ರಷ್ಟಾಚಾರ, ಮಹಿಳಾ ಕಿರುಕುಳ ತನಿಖೆಗೆ ಹೈಕೋರ್ಟ್ ಜಡ್ಜ್‌ಗಳ ಮಹಾ ಸಮಿತಿ ರಚನೆ! Bengal Corruption Panel

ತುರ್ತು ಪರಿಸ್ಥಿತಿಗಾಗಿ ತೈಲವನ್ನು ಭೂಗತವಾಗಿ ಸಂಗ್ರಹಿಸಿಡುವ ಕಲ್ಪನೆ ಬಂದಿದ್ದು ಎರಡನೇ ಮಹಾಯುದ್ಧದ ಕೊನೆಯಲ್ಲಿ. 1956 ರ ಸೂಯೆಜ್ ಕಾಲುವೆ ಬಿಕ್ಕಟ್ಟು ಮತ್ತು 1973 ರ ಯೋಮ್ ಕಿಪ್ಪೂರ್ ಯುದ್ಧದ ತೈಲ ಆಘಾತದ ಬಳಿಕ ಅಮೆರಿಕ ತನ್ನದೇ ಆದ ಬೃಹತ್ ತೈಲ ಬ್ಯಾಂಕ್ ಸ್ಥಾಪಿಸಿತು. ಸದ್ಯ ಅಮೆರಿಕ 413 ಮಿಲಿಯನ್ ಬ್ಯಾರೆಲ್ ತೈಲ ಸಂಗ್ರಹ ಹೊಂದಿದ್ದರೆ, ಜಗತ್ತಿನಲ್ಲೇ ಅತಿ ದೊಡ್ಡ ತೈಲ ಬ್ಯಾಂಕ್ ಹೊಂದಿರುವ ಚೀನಾ ಬರೊಬ್ಬರಿ 1.4 ಬಿಲಿಯನ್ ಬ್ಯಾರೆಲ್ ಕಚ್ಚಾ ತೈಲವನ್ನು ತುರ್ತು ಪರಿಸ್ಥಿತಿಗಾಗಿ ಬಚ್ಚಿಟ್ಟಿದೆ. ಚೀನಾ ಕೇವಲ ತೈಲವಲ್ಲದೆ ಗೋಧಿ, ಅಕ್ಕಿ, ಹಂದಿ ಮಾಂಸವನ್ನು ಕೂಡ ಜಾಗತಿಕ ಯುದ್ಧ ಎದುರಿಸಲು ಸಂಗ್ರಹಿಸಿಟ್ಟಿದೆ.

ಭಾರತ ಈ ನಿಟ್ಟಿನಲ್ಲಿ ಎಚ್ಚೆತ್ತುಕೊಂಡಿದ್ದು 2004 ರಲ್ಲಿ. ಅಟಲ್ ಬಿಹಾರಿ ವಾಜಪೇಯಿ ನೇತೃತ್ವದ ಎನ್‌ಡಿಎ ಸರ್ಕಾರವು ಇಂಡಿಯನ್ ಸ್ಟ್ರಾಟೆಜಿಕ್ ಪೆಟ್ರೋಲಿಯಂ ರಿಸರ್ವ್ಸ್ ಲಿಮಿಟೆಡ್ (ISPRL) ಅನ್ನು ಸ್ಥಾಪಿಸಿತು. ಪ್ರಧಾನಿ ನರೇಂದ್ರ ಮೋದಿ ಅವರು ಇದರ ಮೊದಲ ಹಂತವನ್ನು 2019 ರಲ್ಲಿ ದೇಶಕ್ಕೆ ಸಮರ್ಪಿಸಿದರು. ಪ್ರಸ್ತುತ ಭಾರತದ ಅಧಿಕೃತ ವ್ಯೂಹಾತ್ಮಕ ತೈಲ ಸಂಗ್ರಹವು ದೇಶದ ಕೇವಲ 9.5 ದಿನಗಳ ಅಗತ್ಯವನ್ನು ಮಾತ್ರ ಪೂರೈಸಬಲ್ಲದು. ಆದರೆ, ತೈಲ ಕಂಪನಿಗಳು ಹೊಂದಿರುವ 64.5 ದಿನಗಳ ಪ್ರತ್ಯೇಕ ದಾಸ್ತಾನನ್ನು ಒಗೂಡಿಸಿದರೆ, ಭಾರತದ ಬಳಿ ಪ್ರಸ್ತುತ ಒಟ್ಟು 74 ದಿನಗಳ ಕಾಲ ದೇಶವನ್ನು ಮುನ್ನಡೆಸಬಲ್ಲ ಇಂಧನದ ಕವಚವಿದೆ. ಇತ್ತೀಚೆಗೆ ಪ್ರಧಾನಿ ಮೋದಿ ಯುಎಇಗೆ ಭೇಟಿ ನೀಡಿದಾಗ ಅಬುಧಾಬಿ ನ್ಯಾಷನಲ್ ಆಯಿಲ್ ಕಂಪನಿ (ADNOC) ಭಾರತದ ಸಂರಕ್ಷಣಾಗಾರಗಳಲ್ಲಿ ಹೆಚ್ಚುವರಿ 30 ಮಿಲಿಯನ್ ಬ್ಯಾರೆಲ್ ತೈಲ ಸಂಗ್ರಹಿಸಲು ಒಪ್ಪಂದ ಮಾಡಿಕೊಂಡಿದೆ.

ಅಮೆರಿಕ ಅಥವಾ ಚೀನಾದಂತೆ ಭಾರತ ಭಾರಿ ಪ್ರಮಾಣದಲ್ಲಿ ತೈಲ ಸಂಗ್ರಹಣೆ ವಿಸ್ತರಿಸಲು ಸಾಧ್ಯವಾಗದಿರಲು ಮುಖ್ಯ ಕಾರಣ ಇದರ ತಾಂತ್ರಿಕ ಜಟಿಲತೆ. ಸಮುದ್ರ ತೀರದ ಗಟ್ಟಿಯಾದ ಕಠಿಣ ಪರ್ವತ ಹಾಗೂ ಬಂಡೆಗಳ ಒಳಭಾಗವನ್ನು ಬೃಹತ್ ಟನಲ್ ಬೋರಿಂಗ್ ಯಂತ್ರಗಳ ಮೂಲಕ ಕೊರೆದು, ತೈಲ ಸೋರಿಕೆಯಾಗದಂತೆ ವಿಶೇಷ ಲೈನಿಂಗ್ ಮಾಡಿ ಈ ಭೂಗತ ಗುಹೆಗಳನ್ನು ನಿರ್ಮಿಸಬೇಕಾಗುತ್ತದೆ. ಇದಕ್ಕೆ ಭಾರಿ ಹಣ ಮತ್ತು ಸಮಯದ ಅಗತ್ಯವಿದೆ. ಭಾರತ ಸದ್ಯ ಮೊದಲ ಹಂತದಲ್ಲಿ ಮೂರು ಪ್ರಮುಖ ಕರಾವಳಿ ಭಾಗಗಳಲ್ಲಿ ತೈಲ ಸಂಗ್ರಹಾಗಾರಗಳನ್ನು ಹೊಂದಿದೆ.

ಒಟ್ಟಾರೆಯಾಗಿ ಭಾರತ ಮೊದಲ ಹಂತದಲ್ಲಿ 5.33 ಮಿಲಿಯನ್ ಮೆಟ್ರಿಕ್ ಟನ್ ಕಚ್ಚಾ ತೈಲ ಸಂಗ್ರಹ ಸಾಮರ್ಥ್ಯ ಹೊಂದಿದೆ. ಇದರ ಮುಂದಿನ ಹಂತವಾಗಿ ಒಡಿಶಾದ ಚಂದಿಖೋಲ್ (4 MMT) ಮತ್ತು ಕರ್ನಾಟಕದ ಪಾದೂರಿನಲ್ಲಿ (ಹೆಚ್ಚುವರಿ 2.5 MMT) ಸಾರ್ವಜನಿಕ-ಖಾಸಗಿ ಸಹಭಾಗಿತ್ವದಲ್ಲಿ ವಿಸ್ತರಣಾ ಕಾರ್ಯ ಕೈಗೆತ್ತಿಕೊಳ್ಳಲಾಗಿದೆ. ಇದರೊಂದಿಗೆ ರಾಜಸ್ಥಾನದ ಉಪ್ಪಿನ ಗುಹೆಗಳಲ್ಲಿ 5.625 MMT ಸಾಮರ್ಥ್ಯದ ಮತ್ತು ಮಧ್ಯಪ್ರದೇಶದ ಬಿನಾದಲ್ಲಿ ಮೇಲ್ಮೈ ಸಂಗ್ರಹಾಗಾರಗಳ ನಿರ್ಮಾಣಕ್ಕೆ ರಣತಂತ್ರ ರೂಪಿಸಲಾಗುತ್ತಿದೆ,(ಏಜೆನ್ಸೀಸ್).