ಪಿಒಕೆ ಮತದಾನ ಕೌತುಕ

ಪಾಕ್ ಆಕ್ರಮಿತ ಕಾಶ್ಮೀರ (ಪಿಒಕೆ) ದಲ್ಲಿ ಸದ್ಯ ನಡೆಯಲಿರುವ ಪ್ರಾದೇಶಿಕ ಚುನಾವಣೆಗಳು ಹಿಂಸಾಚಾರಕ್ಕೂ ಸಾಕ್ಷಿಯಾಗುತ್ತಿವೆ. ಮಾಜಿ ಪ್ರಧಾನಿ ಸರ್ದಾರ್ ತನ್ವೀರ್ ಇಲ್ಯಾಸ್ ಅವರ ಮೇಲಿನ ಇತ್ತೀಚಿನ ದಾಳಿ ಹಾಗೂ ಅಭ್ಯರ್ಥಿಗಳ ವಾಹನಗಳಿಗೆ ಬೆಂಕಿ ಹಚ್ಚುತ್ತಿರುವ ಘಟನೆಗಳು ಅಲ್ಲಿನ ಕಾನೂನು ಸುವ್ಯವಸ್ಥೆಯ ಕುಸಿತವನ್ನು ತೋರಿಸುತ್ತಿವೆ. ಮತ್ತೊಂದೆಡೆ ವಿದ್ಯುತ್ ದರ ಏರಿಕೆ ಮತ್ತು ಗೋಧಿ ಮೇಲಿನ ಸಬ್ಸಿಡಿ ಕಡಿತದ ವಿರುದ್ಧ 2023ರಲ್ಲಿ ಆರಂಭವಾದ ಹೋರಾಟವೀಗ ಪಾಕಿಸ್ತಾನದ ದಬ್ಬಾಳಿಕೆ ವಿರುದ್ಧದ ಸಶಸ್ತ್ರ ಬಂಡಾಯವಾಗಿ ಮಾರ್ಪಟ್ಟಿದೆ. ಅಲ್ಲದೆ, ಸ್ಥಳೀಯರ ಹಕ್ಕುಗಳಿಗಾಗಿ ಹೋರಾಡುತ್ತಿರುವ "ಜಮ್ಮು ಮತ್ತು ಕಾಶ್ಮೀರ ಜಾಯಿಂಟ್ ಅವಾಮಿ ಆ್ಯಕ್ಷನ್ ಕಮಿಟಿ" (ಜೆಕೆಜೆಎಎಸಿ) ಸಂಘಟನೆಯನ್ನು ಪಾಕಿಸ್ತಾನ ಸರ್ಕಾರ ಭಯೋತ್ಪಾದಕ ಸಂಘಟನೆ ಎಂದು ಘೋಷಿಸಿ ನಿಷೇಧಿಸಿರುವುದು ಜನರ ಆಕ್ರೋಶದ ಕಟ್ಟೆ ಒಡೆಯುವಂತೆ ಮಾಡಿದೆ. ಇವೆಲ್ಲದರ ನಡುವೆಯೇ ಮೂರು ಹಂತದ ಚುನಾವಣೆ ನಿಗದಿಯಾಗಿದ್ದು, ಕುತೂಹಲ ಕೆರಳಿಸಿದೆ.

ಒಂದು ಚುನಾವಣಾ ಫಲಿತಾಂಶ ಮಾತ್ರವೇ ಪಾಕ್ ಆಕ್ರಮಿತ ಕಾಶ್ಮೀರದ ಭವಿಷ್ಯ ಅಥವಾ ಭಾರತ-ಪಾಕಿಸ್ತಾನ ಸಂಬಂಧವನ್ನು ನಿರ್ಧರಿಸುವುದಿಲ್ಲ. ಅದಾಗ್ಯೂ ಈ ಚುನಾವಣೆ ಭಾರತಕ್ಕೆ ರಾಜಕೀಯ, ರಾಜತಾಂತ್ರಿಕ ಮತ್ತು ಭದ್ರತಾ ದೃಷ್ಟಿಯಿಂದ ಮಹತ್ವದ್ದಾಗಿದೆ. ಪಿಒಕೆಯಲ್ಲಿ ಪಾಕಿಸ್ತಾನವಿರೋಧಿ ಜನಾಭಿಪ್ರಾಯ ದೊಡ್ಡ ಮಟ್ಟದಲ್ಲಿ ವ್ಯಕ್ತವಾದರೆ, ಚುನಾವಣೆ ವ್ಯಾಪಕ ಪ್ರತಿಭಟನೆಗಳು ಅಥವಾ ರಾಜಕೀಯ ಅಸ್ಥಿರತೆಗೆ ಕಾರಣವಾದರೆ ಅವು ಭಾರತಕ್ಕೆ ನಿರ್ಣಾಯಕವಾಗಿ ಪರಿಣಮಿಸಲಿದ್ದು, ಆ ನಿಟ್ಟಿನಲ್ಲಿ ಪ್ರಮುಖ ಕೆಲವು ಸಂಗತಿಗಳು ಇಂತಿವೆ.

ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕಾಶ್ಮೀರಿಗರ ಹಕ್ಕುಗಳ ಬಗ್ಗೆ ಮೊಸಳೆ ಕಣ್ಣೀರು ಸುರಿಸುವ ಪಾಕಿಸ್ತಾನ, ತನ್ನ ಆಡಳಿತದಲ್ಲಿರುವ ಪಿಒಕೆಯಲ್ಲಿ ನಡೆಸುತ್ತಿರುವ ಮಾನವ ಹಕ್ಕುಗಳ ಉಲ್ಲಂಘನೆ ಮತ್ತು ಸೇನಾ ದಬ್ಬಾಳಿಕೆ ಈ ಚುನಾವಣೆ ಮೂಲಕ ಜಗಜ್ಜಾಹಿರಾಗುತ್ತದೆ. ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಪಾಕಿಸ್ತಾನದ ದ್ವಿಮುಖ ನೀತಿ ಬಯಲು ಮಾಡಲು ಭಾರತಕ್ಕೆ ಇದು ಪ್ರಬಲ ಅಸ್ತ್ರ.

ಪಿಒಕೆ ಅಸೆಂಬ್ಲಿಯ 12 ಮೀಸಲು ಸ್ಥಾನಗಳನ್ನು ಪಾಕಿಸ್ತಾನ ತನ್ನ ಸ್ವಾರ್ಥ ಮತ್ತು ರಾಜಕೀಯ ತಂತ್ರಗಾರಿಕೆಗೆ ಬಳಸಿಕೊಳ್ಳುತ್ತಿದೆ. ಇತ್ತ, ಭಾರತ ಜಮ್ಮು-ಕಾಶ್ಮೀರ ವಿಧಾನಸಭೆಯಲ್ಲಿ ಪಾಕ್ ಆಕ್ರಮಿತ ಕಾಶ್ಮೀರದ ಜನರಿಗಾಗಿ 24 ಸ್ಥಾನಗಳನ್ನು ಮೀಸಲಿಟ್ಟಿದ್ದು, ಆ ಭಾಗ ಭಾರತಕ್ಕೆ ಅಧಿಕೃತವಾಗಿ ಮರಳುವವರೆಗೂ ಅವುಗಳನ್ನು ಖಾಲಿ ಉಳಿಸಿಕೊಂಡು ಬಂದಿದೆ. ಇದು ಭಾರತದ ಸಾಂವಿಧಾನಿಕ ಬದ್ಧತೆಯ ದ್ಯೋತಕವಾಗಿದೆ.

ಪಿಒಕೆ ಸೇರಿ ಇಡೀ ಜಮ್ಮು-ಕಾಶ್ಮೀರ ಭಾರತದ ಅವಿಭಾಜ್ಯ ಅಂಗ ಎಂದು 1994ರಲ್ಲಿ ಭಾರತೀಯ ಸಂಸತ್ತು ಅವಿರೋಧ ನಿರ್ಣಯ ಅಂಗೀಕರಿಸಿದೆ. ಪಿಒಕೆಯಲ್ಲಿ ಪಾಕಿಸ್ತಾನದ ವಿರುದ್ಧ ಎದ್ದಿರುವ ಜನಾಕ್ರೋಶ ಪಾಕಿಸ್ತಾನದ ಅಕ್ರಮ ಆಕ್ರಮಣವನ್ನು ಅಲ್ಲಿನ ಜನರೇ ತಿರಸ್ಕರಿಸುತ್ತಿದ್ದಾರೆ ಎನ್ನುವುದನ್ನು ಸಾಬೀತುಪಡಿಸುತ್ತಿದ್ದು, ಭಾರತದ ಐತಿಹಾಸಿಕ ನಿಲುವಿಗೆ ಮತ್ತಷ್ಟು ಪುಷ್ಟಿ ನೀಡುತ್ತದೆ.

ಪಿಒಕೆ ಮತ್ತು ಗಿಲ್ಗಿಟ್-ಬಾಲ್ಟಿಸ್ತಾನ್ ಮೂಲಕ ಹಾದುಹೋಗುವ ವಿವಾದಾತ್ಮಕ ಚೀನಾ-ಪಾಕ್ ಆರ್ಥಿಕ ಕಾರಿಡಾರ್ ಯೋಜನೆಗೆ ಭಾರತದ ತೀವ್ರ ವಿರೋಧವಿದೆ. ಈ ಪ್ರದೇಶದಲ್ಲಿ ಭುಗಿಲೆದ್ದಿರುವ ಅಸ್ಥಿರತೆ ಮತ್ತು ಬಂಡಾಯ ಚೀನಾದ ಹೂಡಿಕೆಗಳಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಲಿದ್ದು, ಭಾರತದ ಭದ್ರತಾ ಹಿತಾಸಕ್ತಿಗಳ ದೃಷ್ಟಿಯಿಂದ ಇದು ಮಹತ್ವದ್ದಾಗಿದೆ.

ಪಾಕ್ ಆಕ್ರಮಿತ ಕಾಶ್ಮೀರದ ಶಾಸನಸಭಾ ಚುನಾವಣೆಯನ್ನು ಮೂರು ಹಂತಗಳಲ್ಲಿ ನಡೆಸಲು ನಿರ್ಧರಿಸಲಾಗಿದ್ದು, ಮತದಾನ ಜುಲೈ 27ರಂದು ಆರಂಭವಾಗಿ ಆಗಸ್ಟ್ 10ರಂದು ಮುಕ್ತಾಯಗೊಳ್ಳಲಿದೆ ಎಂದು ಪಿಒಕೆ ಮುಖ್ಯ ಚುನಾವಣಾ ಆಯುಕ್ತ ಗುಲಾಂ ಮುಸ್ತಾಫಾ ಮೊಘಲ್ ಘೋಷಿಸಿದ್ದಾರೆ.

ಪಿಒಕೆ ಶಾಸನಸಭೆಯಲ್ಲಿ ಒಟ್ಟು 53 ಸ್ಥಾನಗಳಿದ್ದು, ಆ ಪೈಕಿ 45 ಸ್ಥಾನಗಳಿಗೆ ನೇರ ಚುನಾವಣೆ ನಡೆಯುತ್ತದೆ. ಉಳಿದ ಎಂಟು ಸ್ಥಾನಗಳನ್ನು ಮಹಿಳೆಯರು, ತಂತ್ರಜ್ಞರು ಮತ್ತು ಧಾರ್ಮಿಕ ಪಂಡಿತರಿಗೆ ಮೀಸಲಿಡಲಾಗಿದೆ.

ಮೀರ್‌ಪುರ್ ವಿಭಾಗದ 13 ಕ್ಷೇತ್ರಗಳಿಗೆ ಜುಲೈ 27ರಂದು ಮತದಾನ ನಡೆಯಲಿದ್ದರೆ, ಮುಜಫರಾಬಾದ್ ವಿಭಾಗದ 9 ಕ್ಷೇತ್ರಗಳು ಮತ್ತು ನಿರಾಶ್ರಿತರ 12 ಕ್ಷೇತ್ರಗಳಿಗೆ ಆಗಸ್ಟ್ 2ರಂದು ಹಾಗೂ ಪೂಂಛ್ ವಿಭಾಗದ 11 ಕ್ಷೇತ್ರಗಳಿಗೆ ಆಗಸ್ಟ್ 10ರಂದು ಮತದಾನ ನಡೆಯಲಿದೆ.

ಜುಲೈ 27

ಆಗಸ್ಟ್ 2

ಆಗಸ್ಟ್ 10

ಭಾರತದ ಜಮ್ಮು ಮತ್ತು ಕಾಶ್ಮೀರ ರಾಜ್ಯದ ಭಾಗ 1947ರಿಂದ ಪಾಕಿಸ್ತಾನದ ಅಕ್ರಮ ವಶದಲ್ಲಿದ್ದು, ಇದನ್ನು ಪಾಕ್ ಆಕ್ರಮಿತ ಕಾಶ್ಮೀರ (ಪಿಒಕೆ) ಎನ್ನಲಾಗುತ್ತದೆ. ಪಾಕಿಸ್ತಾನ ಈ ಪ್ರದೇಶವನ್ನು ಆಜಾದ್ ಜಮ್ಮು ಮತ್ತು ಕಾಶ್ಮೀರ (ಎಜೆಕೆ) ಹಾಗೂ ಗಿಲ್ಗಿಟ್-ಬಾಲ್ಟಿಸ್ತಾನ್ ಎಂದು ಆಡಳಿತಾತ್ಮಕವಾಗಿ ಎರಡು ಭಾಗಗಳಾಗಿ ವಿಂಗಡಿಸಿದೆ.

ಏನಿದರ ಹಿನ್ನೆಲೆ?: 1947ರಲ್ಲಿ ಭಾರತ-ಪಾಕಿಸ್ತಾನ ವಿಭಜನೆ ವೇಳೆ ಪಾಕ್ ಸೇನೆ ಮತ್ತು ಗಡಿನಾಡು ಬುಡಕಟ್ಟು ಪಡೆಗಳು ಜಮ್ಮು-ಕಾಶ್ಮೀರದ ಮೇಲೆ ಆಕ್ರಮಣ ಮಾಡಿದವು. ಕಾಶ್ಮೀರದ ರಾಜ ಮಹಾರಾಜ ಹರಿ ಸಿಂಗ್ ಭಾರತದೊಂದಿಗೆ ವಿಲೀನ ಒಪ್ಪಂದಕ್ಕೆ ಸಹಿ ಹಾಕಿದ ನಂತರ, ಭಾರತೀಯ ಸೇನೆ ಪಾಕ್ ಪಡೆಗಳನ್ನು ಹಿಮ್ಮೆಟ್ಟಿಸಿತು. ವಿಶ್ವಸಂಸ್ಥೆಯ ಮಧ್ಯಸ್ಥಿಕೆಯಲ್ಲಿ ಕದನ ವಿರಾಮ ಜಾರಿಯಾದಾಗ, ಯಾವ ಸೇನೆ ಎಲ್ಲಿತ್ತೋ ಅದೇ ಗಡಿಯಾಯಿತು. ಭಾರತದ ವಶದಲ್ಲಿದ್ದ ಭಾಗ ಜಮ್ಮು-ಕಾಶ್ಮೀರವಾದರೆ, ಪಾಕಿಸ್ತಾನದ ಅಕ್ರಮ ವಶದಲ್ಲುಳಿದ ಭಾಗವೇ ಪಾಕ್ ಆಕ್ರಮಿತ ಕಾಶ್ಮೀರ (ಪಿಒಕೆ). ಇದನ್ನು ಬೇರ್ಪಡಿಸುವ ರೇಖೆಯನ್ನು ಲೈನ್ ಆಫ್ ಕಂಟ್ರೋಲ್ (ಎಲ್ಒಸಿ) ಎಂದು ಕರೆಯಲಾಗುತ್ತಿದೆ.

ಪಿಒಕೆ ಭಾರತದ ಅವಿಭಾಜ್ಯ ಅಂಗ: ಗಿಲ್ಗಿಟ್-ಬಾಲ್ಟಿಸ್ತಾನ್ ಸೇರಿದಂತೆ ಇಡೀ ಜಮ್ಮು-ಕಾಶ್ಮೀರ ಮತ್ತು ಲಡಾಖ್ ಪ್ರದೇಶಗಳು ಭಾರತದ ಅವಿಭಾಜ್ಯ ಮತ್ತು ಬೇರ್ಪಡಿಸಲಾಗದ ಅಂಗ ಎಂಬುದು ಭಾರತದ ಸಾರ್ವಕಾಲಿಕ ನಿಲುವು. ಪಾಕಿಸ್ತಾನ ತನ್ನ ಅಕ್ರಮ ವಶದಲ್ಲಿರುವ ಭಾರತೀಯ ಭೂಭಾಗವನ್ನು ತಕ್ಷಣ ತೆರವುಗೊಳಿಸಬೇಕು ಎಂದು 1994ರಲ್ಲಿ ಭಾರತದ ಸಂಸತ್ತು ಸರ್ವಾನುಮತದ ನಿರ್ಣಯ ಅಂಗೀಕರಿಸಿದೆ. ಅಲ್ಲದೆ ಇತ್ತೀಚೆಗಷ್ಟೇ ಗಿಲ್ಗಿಟ್-ಬಾಲ್ಟಿಸ್ತಾನ್ ಅಸೆಂಬ್ಲಿ ಚುನಾವಣೆ ಸಂಬಂಧ ಭಾರತವು ಪಾಕಿಸ್ತಾನಕ್ಕೆ ತೀವ್ರ ವಿರೋಧ ದಾಖಲಿಸಿತ್ತು.

ವ್ಯೂಹಾತ್ಮಕ ಸ್ಥಳ: ಪಾಕ್ ಆಕ್ರಮಿತ ಕಾಶ್ಮೀರವು ಚೀನಾ, ಪಾಕಿಸ್ತಾನ, ಅಫ್ಘಾನಿಸ್ತಾನ ಮತ್ತು ಮಧ್ಯ ಏಷ್ಯಾಕ್ಕೆ ಹತ್ತಿರವಿರುವ ಅತ್ಯಂತ ಪ್ರಮುಖ ರಾಜಕೀಯ-ಸೇನಾ ವಲಯ. ಚೀನಾ-ಪಾಕಿಸ್ತಾನ ಆರ್ಥಿಕ ಕಾರಿಡಾರ್ (ಸಿಪಿಇಸಿ) ಯೋಜನೆ ಇದೇ ಪಿಒಕೆ (ಗಿಲ್ಗಿಟ್-ಬಾಲ್ಟಿಸ್ತಾನ್) ಮೂಲಕ ಹಾದುಹೋಗುತ್ತದೆ, ಇದನ್ನು ಭಾರತ ತೀವ್ರವಾಗಿ ವಿರೋಧಿಸುತ್ತಿದೆ. ಭಾರತಕ್ಕೆ ಹರಿಯುವ ಪ್ರಮುಖ ಸಿಂಧೂ ನದಿ ವ್ಯವಸ್ಥೆಯ ಜಲಮೂಲಗಳು ಈ ಪ್ರದೇಶದ ಮೂಲಕವೇ ಸಾಗುತ್ತವೆ.

ವಿಶೇಷವೆಂದರೆ, 2021ರ ಚುನಾವಣೆಯಲ್ಲಿ ಭಾರಿ ಬಹುಮತ ಸಾಧಿಸಿದ್ದ ಇಮ್ರಾನ್ ಖಾನ್ ಅವರ "ಪಾಕಿಸ್ತಾನ್ ತೆಹ್ರೀಕ್-ಎ-ಇನ್ಸಾಫ್" ಪಕ್ಷವು ಪಿಒಕೆಯಲ್ಲಿ ನಡೆಯುತ್ತಿರುವ ಹಿಂಸಾಚಾರ, ಪ್ರತಿಭಟನಾಕಾರರ ಮೇಲಿನ ದಬ್ಬಾಳಿಕೆ ಹಾಗೂ ಹದಗೆಟ್ಟಿರುವ ಕಾನೂನು ಸುವ್ಯವಸ್ಥೆಯನ್ನು ಖಂಡಿಸಿ ಈ ಚುನಾವಣೆಯನ್ನು ಬಹಿಷ್ಕರಿಸಿದೆ.

ಪಿಒಕೆಯಲ್ಲಿ ರಾಜಕೀಯ ಹಿಂಸಾಚಾರ ತೀವ್ರಗೊಂಡಿದ್ದು, ಪ್ರಾದೇಶಿಕ ಚುನಾವಣೆಗಳ ಹಿನ್ನೆಲೆಯಲ್ಲಿ ಇಸ್ತೆಕಾಮ್-ಎ-ಪಾಕಿಸ್ತಾನ್ ಪಾರ್ಟಿ (ಐಪಿಪಿ) ಮುಖ್ಯಸ್ಥ ಹಾಗೂ ಪಿಒಕೆ ಮಾಜಿ ಪ್ರಧಾನಿ ಸರ್ದಾರ್ ತನ್ವೀರ್ ಇಲ್ಯಾಸ್ ಅವರ ಬೆಂಗಾವಲು ಪಡೆ ಮೇಲೆ ಇತ್ತೀಚೆಗೆ ಮಾರಣಾಂತಿಕ ದಾಳಿ ನಡೆದಿದೆ. ಚುನಾವಣಾ ಪ್ರಚಾರಕ್ಕಾಗಿ ಸೆಂಟ್ರಲ್ ಬಾಗ್-ಗೆ ತೆರಳುತ್ತಿದ್ದಾಗ ಧಾಲ್ಕೋಟ್ ಕ್ರಾಸಿಂಗ್ ಬಳಿ ಪರ್ವತದ ಮೇಲಿಂದ ಅಪರಿಚಿತ ಬಂದೂಕುಧಾರಿಗಳು ಏಕಾಏಕಿ ಗುಂಡಿನ ದಾಳಿ ನಡೆಸಿದ್ದು, ಇದರಲ್ಲಿ ಇಲ್ಯಾಸ್ ಪಾರಾಗಿದ್ದರೂ, ಅವರ ಓರ್ವ ವೈಯಕ್ತಿಕ ಭದ್ರತಾ ಸಿಬ್ಬಂದಿ ತಲೆಗೆ ಗುಂಡು ತಗುಲಿ ಮೃತಪಟ್ಟರು. ಮತ್ತೊಬ್ಬ ಸಿಬ್ಬಂದಿ ಗಂಭೀರ ಗಾಯಗೊಂಡಿದ್ದಾರೆ. ಪಾಕಿಸ್ತಾನದ ಆಡಳಿತದ ವಿರುದ್ಧ ಸ್ಥಳೀಯರಲ್ಲಿ ಆಕ್ರೋಶ ಭುಗಿಲೆದ್ದಿರುವುದನ್ನು ಈ ಘಟನೆ ಎತ್ತಿತೋರಿಸುತ್ತಿದೆ. ಇದಕ್ಕೂ ಮುನ್ನ ಪ್ರಚಾರದ ವೇಳೆ ಪಾಕಿಸ್ತಾನ್ ಪೀಪಲ್ಸ್ ಪಾರ್ಟಿ (ಪಿಪಿಪಿ) ಅಭ್ಯರ್ಥಿಯ ವಾಹನಕ್ಕೆ ಕಾಶ್ಮೀರಿ ಪ್ರತಿಭಟನಾಕಾರರು ಬೆಂಕಿ ಹಚ್ಚಿದ್ದರು. ಪಾಕಿಸ್ತಾನದ ರಾಜಕೀಯ ಪ್ರಭಾವ ಕೊನೆಗಾಣಿಸುವ ವ್ಯವಸ್ಥಿತ ಪ್ರಯತ್ನವಾಗಿ ಈ ದಾಳಿಗಳು ಮತ್ತು ವಾಹನಗಳಿಗೆ ಬೆಂಕಿ ಹಚ್ಚುವ ಘಟನೆಗಳು ನಡೆಯುತ್ತಿವೆ.

ಪಿಒಕೆ ಚುನಾವಣೆ ಸನ್ನಿಹಿತವಾಗಿರುವ ಬೆನ್ನಲ್ಲೇ ಪಾಕಿಸ್ತಾನದ ಮಾಜಿ ಪ್ರಧಾನಿ ನವಾಜ್ ಷರೀಫ್ ತನಗೆ ಪಿಒಕೆ ಪ್ರಧಾನಿಯಾಗುವ ಆಸೆ ಇದೆ ಎಂದಿದ್ದಾರೆ. ಚುನಾವಣಾ ರ್ಯಾಲಿಯಲ್ಲಿ ಮಾತನಾಡಿದ ಅವರು, ತಮ್ಮ ಪಕ್ಷ ಪಿಎಂಎಲ್-ಎನ್ ಗೆದ್ದರೆ ತಮ್ಮ ಸಹೋದರ ಹಾಗೂ ಪ್ರಸ್ತುತ ಪಾಕಿಸ್ತಾನ ಪ್ರಧಾನಿ ಷೆಹಬಾಜ್ ಷರೀಫ್ ಬಳಿ ತನ್ನನ್ನು ಪಿಒಕೆ ಪ್ರಧಾನಿಯನ್ನಾಗಿ ಮಾಡುವಂತೆ ಕೋರುವುದಾಗಿ ತಿಳಿಸಿದ್ದಾರೆ. ಆದರೆ, ಪಿಒಕೆ ಸಂವಿಧಾನದ ಪ್ರಕಾರ ನವಾಜ್ ಷರೀಫ್ ಈ ಹುದ್ದೆಗೆ ಸಂಪೂರ್ಣ ಅನರ್ಹ. ನಿಯಮಗಳ ಪ್ರಕಾರ, ಪಿಒಕೆಯ ಕಾಯಂ ನಿವಾಸಿ (ಡೊಮಿಸಿಲ್) ಹಾಗೂ ಅಲ್ಲಿನ ಮತದಾರರಾದವರು ಮಾತ್ರವೇ ಅಲ್ಲಿನ ಪ್ರಧಾನಿಯಾಗಲು ಸಾಧ್ಯ. ಪಂಜಾಬ್ ಪ್ರಾಂತ್ಯದ ಮೂಲದವರಾದ ಷರೀಫ್ ಅವರಿಗೆ ಈ ಹುದ್ದೇಗೇರಲು ಕಾನೂನಿನಲ್ಲಿ ಅವಕಾಶವಿಲ್ಲ.

ಪಾಕಿಸ್ತಾನ್ ಪೀಪಲ್ಸ್ ಪಾರ್ಟಿಯ ಫೈಸಲ್ ಮುಮ್ತಾಜ್ ರಾಥೋರ್ ಪಿಒಕೆಯ ಹಾಲಿ ಪ್ರಧಾನಿ. ಕಳೆದ ವರ್ಷ ನವೆಂಬರ್‌ನಲ್ಲಿ ನಡೆದ ಅವಿಶ್ವಾಸ ನಿರ್ಣಯದ ಬಳಿಕ ಇವರು ಅಧಿಕಾರ ವಹಿಸಿಕೊಂಡರು. ಇವರು ಈಗ ಬಾಘ್-4 ಕ್ಷೇತ್ರದಿಂದ ಕಣಕ್ಕಿಳಿದಿದ್ದಾರೆ.