ಸ್ವಚ್ಛ ನಗರಕ್ಕೆ ಕಪ್ಪು ಮಸಿ...ಅವರು ಬಿಸ್ಲೇರಿ ಕುಡಿದು ಮಜಾ ಮಾಡ್ತಿದ್ದಾರೆ, ಬಡವರು ವಿಷದ ನೀರು ಕುಡಿದು ಸಾಯ್ತಿದ್ದಾರೆ ಸ್ವಪಕ್ಷದ ವಿರುದ್ಧ ಉಮಾ ಭಾರತಿ ಆಕ್ರೋಶ | Indore Deaths

ಅಧಿಕಾರದಲ್ಲಿರುವವರು ಮತ್ತು ಅಧಿಕಾರಿಗಳು ಸುರಕ್ಷಿತವಾಗಿ ಕುರ್ಚಿಗಳ ಮೇಲೆ ಕುಳಿತು ಬಿಸ್ಲೇರಿ ಕುಡಿಯುತ್ತಾ ಮಜಾ ಮಾಡುತ್ತಿದ್ದಾರೆ. ಆದರೆ ಇತ್ತ ಸಾಮಾನ್ಯ ಜನರು ವಿಷಪೂರಿತ ನೀರು ಕುಡಿದು ಸಾಯುತ್ತಿದ್ದಾರೆ ಎಂದು ಕಿಡಿಕಾರಿದರು.

ತಮ್ಮ ಎಕ್ಸ್ ಖಾತೆಯಲ್ಲಿ ಸರಣಿ ಪೋಸ್ಟ್​ಗಳನ್ನು ಹಂಚಿಕೊಂಡಿರುವ ಉಮಾಭಾರತಿ, ಈ ದುರಂತಕ್ಕೆ ಕಾರಣರಾಗಿರುವ ಅಧಿಕಾರಿಗಳು ಮತ್ತು ನಾಯಕರಿಗೆ ಕಠಿಣ ಶಿಕ್ಷೆ ವಿಧಿಸಬೇಕು, ಇಂತಹ ಪಾಪವನ್ನು ಕೇವಲ ವಿವರಣೆ ಮತ್ತು ಕ್ಷಮೆಯಾಚನೆಯಿಂದ ಸರಿಪಡಿಸಲು ಸಾಧ್ಯವಿಲ್ಲ ಎಂದಿದ್ದಾರೆ.

ದೇಶದಲ್ಲಿಯೇ ಅತ್ಯಂತ ಸ್ವಚ್ಛ ನಗರ ಎಂಬ ಪ್ರಶಸ್ತಿ ಪಡೆದ ನಗರದಲ್ಲಿ ಕೊಳಕು ಮತ್ತು ವಿಷಪೂರಿತ ನೀರು ಹಲವಾರು ಜೀವಗಳನ್ನು ತೆಗೆದುಕೊಂಡಿದೆ. ಇದು ಇನ್ನೂ ಹಾಗೆಯೇ ಮುಂದುವರೆದಿದ್ದು, ಸಾವಿನ ಸಂಖ್ಯೆ ಏರಿಕೆಯಾಗುತ್ತಿದೆ. ಇದಕ್ಕೆ ಪರಿಹಾರ ಮತ್ತು ಜೀವದ ಬೆಲೆ ಕೇವಲ 2 ಲಕ್ಷ ರೂಪಾಯಿಗಳಲ್ಲ, ಜನರ ಜೀವದ ನಷ್ಟವನ್ನು ಎಷ್ಟೇ ಹಣವು ಸರಿದೂಗಿಸಲು ಸಾಧ್ಯವಿಲ್ಲ, ಮೃತರ ಕುಟುಂಬಗಳು ಜೀವನಪರ್ಯಂತ ದುಃಖದಲ್ಲಿ ಮುಳುಗಿರುತ್ತವೆ ಎಂದರು.

ಮುಖ್ಯ ಕುಡಿಯುವ ನೀರಿನ ಪೈಪ್‌ಲೈನ್ ಹಾದುಹೋಗುವ ಜಾಗದ ಮೇಲೆಯೇ ನಿಯಮಬಾಹಿರವಾಗಿ ಶೌಚಾಲಯವೊಂದನ್ನು ನಿರ್ಮಾಣವಾಗಿದ್ದು, ಈ ಶೌಚಾಲಯಕ್ಕೆ ಸರಿಯಾದ ಸೆಪ್ಟಿಕ್ ಟ್ಯಾಂಕ್ ಇರಲಿಲ್ಲ, ಅಲ್ಲಿನ ತ್ಯಾಜ್ಯವನ್ನು ಗುಂಡಿಯೊಂದಕ್ಕೆ ಹರಿಸಲಾಗುತ್ತಿತ್ತು. ಕುಡಿಯುವ ನೀರಿನ ಮುಖ್ಯ ಪೈಪ್‌ಲೈನ್‌ನಲ್ಲಿ ಸೋರಿಕೆ ಉಂಟಾಗಿದ್ದು, ಶೌಚಾಲಯದ ತ್ಯಾಜ್ಯ ನೀರು ಈ ಸೋರಿಕೆಯ ಮೂಲಕ ನೇರವಾಗಿ ಕುಡಿಯುವ ನೀರಿನ ಪೈಪ್‌ಲೈನ್‌ಗೆ ಸೇರಿಕೊಂಡಿದೆ. ಜನರು ಹಲವು ದಿನಗಳಿಂದ ನೀರಿನ ರುಚಿ ಮತ್ತು ವಾಸನೆಯ ಬಗ್ಗೆ ದೂರು ನೀಡಿದ್ದರೂ, ಅಧಿಕಾರಿಗಳು ಸಕಾಲಕ್ಕೆ ಸ್ಪಂದಿಸಿ ಸೋರಿಕೆಯನ್ನು ಪತ್ತೆಹಚ್ಚುವಲ್ಲಿ ವಿಫಲರಾಗಿದ್ದರು(ಏಜೆನ್ಸೀಸ್​).