ಭಾರತದ ಅತ್ಯಂತ ದುಬಾರಿ ನಂಬರ್ ಪ್ಲೇಟ್ ಹರಾಜು; ಕೇವಲ 0001 ನಂಬರ್‌ಗಾಗಿ ವ್ಯಕ್ತಿಯೊಬ್ಬರು ನೀಡಿದ ಹಣ ಎಷ್ಟು ಗೊತ್ತಾ..? Most Expensive Number Plate

ಕಿರಣ್ ಅವರು ಹರಾಜಿನಲ್ಲಿ DDC 0001 ಎಂಬ ವಿಶೇಷ ನೋಂದಣಿ ಸಂಖ್ಯೆಯನ್ನು ಖರೀದಿಸಿದ್ದಾರೆ. ಈ ಮೊತ್ತವು ಭಾರತದಲ್ಲಿ ಒಂದು ನಂಬರ್ ಪ್ಲೇಟ್‌ಗಾಗಿ ಪಾವತಿಸಲಾದ ಸಾರ್ವಕಾಲಿಕ ಗರಿಷ್ಠ ಮೊತ್ತವಾಗಿದೆ. ಒಂದು ಐಷಾರಾಮಿ ಫೆರಾರಿ ಅಥವಾ ಲಂಬೋರ್ಗಿನಿ ಕಾರಿನ ಬೆಲೆಗಿಂತಲೂ ಈ ನಂಬರ್ ಪ್ಲೇಟ್ ಬೆಲೆ ಹೆಚ್ಚಾಗಿದೆ.

ಈ ನಂಬರ್ ಪ್ಲೇಟ್ ಈ ಮೊದಲು ಐಷಾರಾಮಿ ಕಾರುಗಳ ಮಳಿಗೆ ಬಿಗ್ ಬಾಯ್ ಟಾಯ್ಸ್ ಸಂಸ್ಥಾಪಕ ಜತಿನ್ ಅಹುಜಾ ಅವರ ಬಳಿ ಇತ್ತು. ಈಗ ಹರಾಜಿನ ಮೂಲಕ ಅದು ಕಿರಣ್ ಅವರ ಪಾಲಾಗಿದೆ.

ಭಾರತದಲ್ಲಿ 0001 ಸಂಖ್ಯೆಗೆ ಮೊದಲಿನಿಂದಲೂ ಭಾರಿ ಬೇಡಿಕೆಯಿದೆ. ಆದರೆ ಕೋಟಿ ದಾಟಿದ ಈ ಹರಾಜು ಪ್ರಕ್ರಿಯೆ ಶ್ರೀಮಂತರ ಶೋಕಿ ಮತ್ತು ಸಂಖ್ಯಾಶಾಸ್ತ್ರದ ಮೇಲಿರುವ ನಂಬಿಕೆಯನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದೆ.

ಸಾಮಾನ್ಯವಾಗಿ ವಿಐಪಿ ಸಂಖ್ಯೆಗಳ ಹರಾಜು ಲಕ್ಷಗಳಲ್ಲಿ ನಡೆಯುತ್ತದೆ. ಆದರೆ ಈ DDC 0001 ನಂಬರ್ ಪ್ಲೇಟ್ ಹರಾಜಿನಲ್ಲಿ ಅನೇಕ ಉದ್ಯಮಿಗಳು ಭಾಗವಹಿಸಿದ್ದು, ಅಂತಿಮವಾಗಿ ಕಿರಣ್ ಕೊಲ್ಪಾಕುಲ ಅವರು ₹2.08 ಕೋಟಿ ಬಿಡ್ ಮಾಡಿ ಜಯಗಳಿಸಿದ್ದಾರೆ. ಈ ಸುದ್ದಿಯು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ. ಕೆಲವರು ಇದನ್ನು ಹುಚ್ಚು ಹವ್ಯಾಸ ಎಂದರೆ, ಇನ್ನು ಕೆಲವರು ಇದು ಅವರವರ ಇಷ್ಟ ಮತ್ತು ಅಂತಸ್ತಿನ ಪ್ರದರ್ಶನ ಎಂದು ಕಮೆಂಟ್ ಮಾಡುತ್ತಿದ್ದಾರೆ.

ಈ ಹಿಂದೆ ಕೇರಳ ಮತ್ತು ಚಂಡೀಗಢದಲ್ಲಿ ವಿಐಪಿ ನಂಬರ್ ಪ್ಲೇಟ್‌ಗಳು ಒಂದು ಕೋಟಿ ರೂಪಾಯಿಗಳ ಹತ್ತಿರ ಹರಾಜಾಗಿದ್ದವು. ಆದರೆ 2 ಕೋಟಿಯ ಗಡಿ ದಾಟಿರುವುದು ಇದೇ ಮೊದಲಾಗಿದೆ.

ಕೆಲವರಿಗೆ ವಸ್ತುಗಳ ಮೌಲ್ಯ ಮುಖ್ಯವಾದರೆ, ಇನ್ನು ಕೆಲವರಿಗೆ ಆ ವಸ್ತು ಹೊಂದಿರುವ ಅನನ್ಯತೆ ಮುಖ್ಯವಾಗುತ್ತದೆ. ಕಿರಣ್ ಅವರ ಈ ನಿರ್ಧಾರ ಅದೇ ಸಾಲಿಗೆ ಸೇರುತ್ತದೆ ಎಂದು ಆಟೋಮೊಬೈಲ್ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ,(ಏಜೆನ್ಸೀಸ್).