Strait Of Hormuz: ಹಾರ್ಮುಜ್ ಜಲಸಂಧಿಯಲ್ಲಿ ಅತಿ ಹೆಚ್ಚು ಹಡಗುಗಳ ಸಂಚರಿಸಿದ ದೇಶಗಳ ಪಟ್ಟಿಯಲ್ಲಿ ಭಾರತಕ್ಕೆ ಅಗ್ರಸ್ಥಾನ!

ಫೆಬ್ರವರಿ 28ರ ನಂತರ ಇರಾನ್ ಈ ಮಾರ್ಗದಲ್ಲಿ ದಿಗ್ಬಂಧನ ಹೇರಿದೆ. ಆದರೆ, ಭಾರತ ಸರ್ಕಾರವು ಇರಾನ್ ಅಧಿಕಾರಿಗಳೊಂದಿಗೆ ನಡೆಸಿದ ನಿರಂತರ ಮಾತುಕತೆಯ ಫಲವಾಗಿ ಭಾರತೀಯ ಹಡಗುಗಳಿಗೆ ಸಂಚರಿಸಲು ಅನುಮತಿ ಸಿಕ್ಕಿದೆ. ಇರಾನ್ ಈಗಾಗಲೇ ಅಂತಾರಾಷ್ಟ್ರೀಯ ಕಡಲ ಸಂಸ್ಥೆಗೆ (IMO) ಪತ್ರ ಬರೆದಿದ್ದು, "ಶತ್ರು ರಾಷ್ಟ್ರಗಳಲ್ಲದ (Non-hostile) ಹಡಗುಗಳು" ಇರಾನ್ ಅಧಿಕಾರಿಗಳೊಂದಿಗೆ ಸಹಕರಿಸಿದರೆ ಈ ಮಾರ್ಗದಲ್ಲಿ ಸಂಚರಿಸಬಹುದು ಎಂದು ತಿಳಿಸಿದೆ. ಅಮೆರಿಕ ಮತ್ತು ಇಸ್ರೇಲ್ ಸಂಬಂಧಿತ ಹಡಗುಗಳಿಗೆ ಮಾತ್ರ ಇಲ್ಲಿ ಪ್ರವೇಶ ನಿರಾಕರಿಸಲಾಗಿದೆ.

ಇತ್ತೀಚಿನ ವರದಿಗಳ ಪ್ರಕಾರ, ಬೃಹತ್ ಪ್ರಮಾಣದ ಗ್ಯಾಸ್ (LPG) ಮತ್ತು ಕಚ್ಚಾ ತೈಲವನ್ನು ಹೊತ್ತ ಹಡಗುಗಳು ಭಾರತದ ಬಂದರುಗಳನ್ನು ತಲುಪಿವೆ.

MT ಶಿವಾಲಿಕ್ ಮತ್ತು MT ನಂದಾದೇವಿ: ಮಾರ್ಚ್ 16 ಮತ್ತು 17 ರಂದು ಕ್ರಮವಾಗಿ ಮುದ್ರಾ ಮತ್ತು ಕಂಡ್ಲಾ ಬಂದರು ತಲುಪಿವೆ.

ಪೈನ್ ಗ್ಯಾಸ್ ಮತ್ತು ಜಗ ವಸಂತ್: ಮಾರ್ಚ್ 26-28 ರ ನಡುವೆ 92,612 ಟನ್ ಎಲ್‌ಪಿಜಿಯೊಂದಿಗೆ ಭಾರತಕ್ಕೆ ಬಂದಿವೆ.

ಜಗ ಲಾಡ್ಕಿ: ಯುಎಇಯಿಂದ 80,886 ಟನ್ ಕಚ್ಚಾ ತೈಲವನ್ನು ಹೊತ್ತು ಮಾರ್ಚ್ 18 ರಂದು ಗುಜರಾತ್ ತಲುಪಿದೆ.

ಗ್ರೀನ್ ಸಾನ್ವಿ: ಶುಕ್ರವಾರ ರಾತ್ರಿ 46,650 ಮೆಟ್ರಿಕ್ ಟನ್ ಎಲ್‌ಪಿಜಿಯೊಂದಿಗೆ ಹಾರ್ಮುಜ್ ಜಲಸಂಧಿಯನ್ನು ಸುರಕ್ಷಿತವಾಗಿ ದಾಟಿದೆ.

ಇವುಗಳಲ್ಲದೆ BW TYR ಮತ್ತು BW ELM ಎಂಬ ಹಡಗುಗಳು ಕೂಡ ಸಂಘರ್ಷ ವಲಯದಿಂದ ಯಶಸ್ವಿಯಾಗಿ ಹೊರಬಂದಿವೆ.

ವಾಣಿಜ್ಯ ಹಡಗುಗಳ ಸುರಕ್ಷತೆಗಾಗಿ ಭಾರತೀಯ ನೌಕಾಪಡೆಯ ಯುದ್ಧನೌಕೆಗಳು ಸನ್ನದ್ಧ ಸ್ಥಿತಿಯಲ್ಲಿವೆ (Standby). ಯಾವುದೇ ತುರ್ತು ಪರಿಸ್ಥಿತಿ ಎದುರಾದರೆ ತಕ್ಷಣ ಸ್ಪಂದಿಸಲು ನೌಕಾಪಡೆ ಸಿದ್ಧತೆ ಮಾಡಿಕೊಂಡಿದೆ. ಇದು ಭಾರತೀಯ ಹಡಗುಗಳ ಕ್ಯಾಪ್ಟನ್‌ಗಳಲ್ಲಿ ಆತ್ಮವಿಶ್ವಾಸ ತುಂಬಿದೆ.

ಇರಾನ್ ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಬಾಗರ್ ಗಾಲಿಬಾಫ್ ಅವರು ಮತ್ತೊಂದು ಪ್ರಮುಖ ಸಮುದ್ರ ಮಾರ್ಗವಾದ 'ಬಾಬ್ ಎಲ್-ಮಾಂಡೆಬ್' (Bab el-Mandeb) ಜಲಸಂಧಿಯ ಮೇಲೂ ಒತ್ತಡ ಹೇರುವ ಸುಳಿವು ನೀಡಿದ್ದಾರೆ. ಇದು ಜಾಗತಿಕ ತೈಲ, ಎಲ್‌ಎನ್‌ಜಿ ಮತ್ತು ಆಹಾರ ಧಾನ್ಯಗಳ ಸರಬರಾಜಿನ ಮೇಲೆ ಭಾರಿ ಪರಿಣಾಮ ಬೀರಲಿದ್ದು, ಜಗತ್ತಿನ ಆರ್ಥಿಕತೆಗೆ ದೊಡ್ಡ ಸವಾಲಾಗಬಹುದು ಎಂದು ವಿಶ್ಲೇಷಿಸಲಾಗುತ್ತಿದೆ,(ಏಜೆನ್ಸೀಸ್).