ದಾರಿ ತಪ್ಪಿ ಬಾಂಗ್ಲಾ ಗಡಿ ದಾಟಿದ ಭಾರತೀಯ ಯೋಧ ಅರೆಸ್ಟ್​: ಬಿಎಸ್‌ಎಫ್ ಜವಾನನ ವಾಪಸಾತಿಗೆ ಹೈ ಲೆವೆಲ್ ಮೀಟಿಂಗ್​! BSF Soldier

Image of a BSF soldier detained at the India-Bangladesh border
ಭಾರತ-ಬಾಂಗ್ಲಾದೇಶ ಗಡಿಯಲ್ಲಿ ಬಂಧನಕ್ಕೊಳಗಾಗಿರುವ ಬಿಎಸ್‌ಎಫ್ (BSF) ಯೋಧನ ಚಿತ್ರ
Published on: 

ಢಾಕಾ: ಭಾರತ-ಬಾಂಗ್ಲಾ ಗಡಿಯಲ್ಲಿ ಕಾವಲು ಕಾಯುತ್ತಿದ್ದ ನಮ್ಮ ದೇಶದ ಗಡಿ ಭದ್ರತಾ ಪಡೆಯ (BSF) ಸೈನಿಕನೊಬ್ಬ ಅಚಾನಕ್ಕಾಗಿ ಬಾಂಗ್ಲಾದೇಶದ ಭೂಪ್ರದೇಶದೊಳಗೆ ಕಾಲಿಟ್ಟಿದ್ದು, ಅಲ್ಲಿನ ಗಡಿ ರಕ್ಷಕ ಪಡೆ (BGB) ಅವರನ್ನು ವಶಕ್ಕೆ ಪಡೆದುಕೊಂಡ ಬಗ್ಗೆ ವರದಿಯಾಗಿದೆ.

ಈ ಸುದ್ದಿ ಹೊರಬೀಳುತ್ತಿದ್ದಂತೆಯೇ ಗಡಿಯಲ್ಲಿ ಒಂದಷ್ಟು ಹೊತ್ತು ಬಿಗುವಿನ ವಾತಾವರಣ ನಿರ್ಮಾಣವಾಗಿತ್ತು. ಆದರೆ, ಸದ್ಯಕ್ಕೆ ಯಾವುದೇ ಆತಂಕಪಡುವ ಅಗತ್ಯವಿಲ್ಲ. ನಮ್ಮ ಸೈನಿಕನನ್ನು ಸುರಕ್ಷಿತವಾಗಿ ವಾಪಸ್ ಕರೆತರಲು ಭಾರತೀಯ ಅಧಿಕಾರಿಗಳು ಈಗಾಗಲೇ ಕಾರ್ಯಪ್ರವೃತ್ತರಾಗಿದ್ದಾರೆ ಎಂದು ತಿಳಿದುಬಂದಿದೆ.

ಗಡಿಯಲ್ಲಿ ನಡೆದಿದ್ದೇನು?

ಸಿಲ್ಹೆಟ್ ಜಿಲ್ಲೆಯ ಗೋವೈನ್ಘಾಟ್ ಉಪಜಿಲ್ಲೆಗೆ ಸೇರಿದ ಬಿಚಾನಕಂಡಿ ಎಂಬ ಪ್ರದೇಶದಲ್ಲಿ ಈ ಘಟನೆ ನಡೆದಿದೆ. ಮಧ್ಯಾಹ್ನ ಸುಮಾರು 12:30ರ ವೇಳೆಗೆ ನಮ್ಮ ಬಿಎಸ್‌ಎಫ್ ಯೋಧ ಗಸ್ತು ತಿರುಗುತ್ತಿದ್ದಾಗ, ದಾರಿ ತಪ್ಪಿಯೋ ಅಥವಾ ಗಡಿ ಗುರುತು ತಿಳಿಯದೆಯೋ ಅಚಾನಕ್ಕಾಗಿ ಬಾಂಗ್ಲಾದೇಶದ ಗಡಿಯೊಳಗೆ ಸುಮಾರು 200 ಗಜಗಳಷ್ಟು ಒಳಗೆ ಪ್ರವೇಶಿಸಿದ್ದಾರೆ.

ಅದೇ ಸಮಯಕ್ಕೆ ಅಲ್ಲಿ ಗಸ್ತು ತಿರುಗುತ್ತಿದ್ದ ಬಾಂಗ್ಲಾದೇಶ ಗಡಿ ರಕ್ಷಕ ಪಡೆಯ ಸಿಬ್ಬಂದಿಗಳ ಕಣ್ಣಿಗೆ ನಮ್ಮ ಸೈನಿಕ ಬಿದ್ದಿದ್ದಾರೆ. ತಕ್ಷಣವೇ ಕಾರ್ಯಪ್ರವೃತ್ತರಾದ ಬಿಜಿಬಿ ಗಸ್ತು ತಂಡ, ನಮ್ಮ ಯೋಧನನ್ನು ವಶಕ್ಕೆ ಪಡೆದು ತಮ್ಮ ಬಿಚಾನಕಂಡಿ ಬಾರ್ಡರ್ ಔಟ್‌ಪೋಸ್ಟ್‌ಗೆ ಕರೆದೊಯ್ದಿದ್ದಾರೆ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿದೆ.

ಶಸ್ತ್ರಾಸ್ತ್ರದೊಂದಿಗೆ ಗಡಿ ದಾಟಿದ್ದ ಯೋಧ!

ಈ ಘಟನೆಯ ಬಗ್ಗೆ ಬಾಂಗ್ಲಾದೇಶದ ಸಿಲ್ಹೆಟ್ ಬೆಟಾಲಿಯನ್ ಕಮಾಂಡರ್ ಲೆಫ್ಟಿನೆಂಟ್ ಕರ್ನಲ್ ನೂರ್ ಉದ್ದೀನ್ ಅಹ್ಮದ್ ಅಧಿಕೃತವಾಗಿ ಮಾಹಿತಿ ಹಂಚಿಕೊಂಡಿದ್ದಾರೆ. "ಭಾರತದ ಬಿಎಸ್‌ಎಫ್ ಸೈನಿಕರೊಬ್ಬರು ಶಸ್ತ್ರಾಸ್ತ್ರದೊಂದಿಗೆ ನಮ್ಮ ಭೂಪ್ರದೇಶದೊಳಗೆ ಪ್ರವೇಶಿಸಿದ್ದರು. ತಕ್ಷಣವೇ ನಮ್ಮ ಬಿಜಿಬಿ ಗಸ್ತು ತಂಡ ಅವರನ್ನು ವಶಕ್ಕೆ ಪಡೆದುಕೊಂಡಿದೆ" ಎಂದು ಅವರು ತಿಳಿಸಿದ್ದಾರೆ. ಸಾಮಾನ್ಯವಾಗಿ ಗಡಿಯಲ್ಲಿ ಕಾವಲು ಕಾಯುವಾಗ ಸೈನಿಕರ ಬಳಿ ಶಸ್ತ್ರಾಸ್ತ್ರ ಇರುವುದು ಸಹಜ. ಆದರೆ, ಅನ್ಯ ದೇಶದ ಗಡಿಯೊಳಗೆ ಶಸ್ತ್ರಾಸ್ತ್ರ ಸಹಿತ ಪ್ರವೇಶಿಸಿದ್ದರಿಂದ ಬಿಜಿಬಿ ಪಡೆ ಅವರನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದೆ.! Lalit Modi

Also Read
"ಭೂಗತ ಜಗತ್ತಿನ ಬೆದರಿಕೆ ಇತ್ತು, ಪೊಲೀಸರು ಎಫ್‌ಐಆರ್ ದಾಖಲಿಸಲಿಲ್ಲ!" ಭಾರತ ತೊರೆಯಲು ಅಸಲಿ ಕಾರಣ ಬಿಚ್ಚಿಟ್ಟ ಲಲಿತ್ ಮೋದಿ! Lalit Modi
Image of a BSF soldier detained at the India-Bangladesh border

ಸೈನಿಕನ ವಾಪಸಾತಿಗೆ ನಡೀತಿದೆ 'ಫ್ಲಾಗ್ ಮೀಟಿಂಗ್'!

ನಮ್ಮ ಯೋಧ ಬಾಂಗ್ಲಾ ಪಡೆಯ ವಶದಲ್ಲಿದ್ದಾರೆ ಎಂಬ ವಿಷಯ ತಿಳಿಯುತ್ತಿದ್ದಂತೆಯೇ ಭಾರತೀಯ ಬಿಎಸ್‌ಎಫ್ ಅಧಿಕಾರಿಗಳು ಅಲರ್ಟ್ ಆಗಿದ್ದಾರೆ. ಸೈನಿಕನನ್ನು ಸುರಕ್ಷಿತವಾಗಿ ಮರಳಿ ಕರೆತರುವ ನಿಟ್ಟಿನಲ್ಲಿ ಉಭಯ ದೇಶಗಳ ಗಡಿ ಪಡೆಗಳ ನಡುವೆ 'ಫ್ಲಾಗ್ ಮೀಟಿಂಗ್' ಆರಂಭವಾಗಿದೆ ಎಂದು ತಿಳಿದು ಬಂದಿದೆ.

ಸ್ವತಃ ಬಾಂಗ್ಲಾ ಕಮಾಂಡರ್ ಲೆಫ್ಟಿನೆಂಟ್ ಕರ್ನಲ್ ನೂರ್ ಉದ್ದೀನ್ ಅವರೇ ಈ ಬಗ್ಗೆ ಸ್ಪಷ್ಟನೆ ನೀಡಿದ್ದು, "ಸೈನಿಕನನ್ನು ಮರಳಿ ಬಿಎಸ್‌ಎಫ್‌ಗೆ ಹಸ್ತಾಂತರಿಸುವ ಪ್ರಕ್ರಿಯೆ ಈಗಾಗಲೇ ಶುರುವಾಗಿದೆ. ಎರಡೂ ದೇಶಗಳ ಹಿರಿಯ ಅಧಿಕಾರಿಗಳ ನೇತೃತ್ವದಲ್ಲಿ ನಡೆಯುವ ಫ್ಲಾಗ್ ಮೀಟಿಂಗ್ ಮೂಲಕ ಅವರನ್ನು ಗೌರವಯುತವಾಗಿ ಹಸ್ತಾಂತರಿಸಲಾಗುವುದು" ಎಂದು ಭರವಸೆ ನೀಡಿದ್ದಾರೆ.

ಗಡಿಯಲ್ಲಿ ಇಂತಹ ಘಟನೆಗಳು ಏಕೆ ನಡೆಯುತ್ತವೆ?

ಭಾರತದ ಪೂರ್ವ ಭಾಗದಲ್ಲಿ ಬಾಂಗ್ಲಾದೇಶದೊಂದಿಗೆ ಬರೋಬ್ಬರಿ 4,096 ಕಿಲೋಮೀಟರ್ ಉದ್ದದ ಅಂತಾರಾಷ್ಟ್ರೀಯ ಗಡಿಯಿದೆ. ಈ ಸುದೀರ್ಘ ಗಡಿಯನ್ನು ನಮ್ಮ ಬಿಎಸ್‌ಎಫ್ ಯೋಧರು ಹಗಲಿರುಳು ಕಾಯುತ್ತಿದ್ದಾರೆ. ಈ ಗಡಿಯ ಹಲವು ಭಾಗಗಳಲ್ಲಿ ನದಿಗಳು, ಕಾಡುಗಳು ಮತ್ತು ಸರಿಯಾದ ತಂತಿ ಬೇಲಿ ಇಲ್ಲದ ಪ್ರದೇಶಗಳಿವೆ. ಹೀಗಾಗಿ, ಗಸ್ತು ತಿರುಗುವಾಗ ಕೆಲವೊಮ್ಮೆ ಸೈನಿಕರಿಗೆ ಗಡಿ ರೇಖೆಯ ಅಂದಾಜು ಸಿಗದೆ ಅಚಾನಕ್ಕಾಗಿ ಆಚೆ-ಈಚೆ ಹೋಗುವ ಸಂದರ್ಭಗಳು ಎದುರಾಗುತ್ತವೆ.

ಇಂತಹ ಸಂದರ್ಭಗಳಲ್ಲಿ ಎರಡೂ ದೇಶಗಳ ಸೇನಾಪಡೆಗಳು ಪರಸ್ಪರ ಮಾತುಕತೆ ನಡೆಸಿ, ಸೈನಿಕರನ್ನು ವಾಪಸ್ ಕಳುಹಿಸುವುದು ಮೊದಲಿನಿಂದಲೂ ನಡೆದುಕೊಂಡು ಬಂದಿರುವ ಪದ್ಧತಿಯಾಗಿದೆ. ಸದ್ಯ ನಮ್ಮ ಯೋಧ ಸುರಕ್ಷಿತವಾಗಿದ್ದು, ಕೆಲವೇ ಗಂಟೆಗಳಲ್ಲಿ ಮತ್ತೆ ಭಾರತದ ಗಡಿಗೆ ಮರಳಲಿದ್ದಾರೆ, (ಏಜೆನ್ಸೀಸ್).