ಜಲಸಂಧಿಯಲ್ಲಿ ಭಾರತದ ಹಡಗು ಸೇಫ್: ಯುದ್ಧದ ಕಿಚ್ಚಿನ ನಡುವೆಯೂ ಹಾರ್ಮುಜ್ ದಾಟಿದ LPG ಟ್ಯಾಂಕರ್!

ಹೌದು, ಭಾರತಕ್ಕೆ ಅಡುಗೆ ಅನಿಲ (LPG) ಹೊತ್ತು ಬರುತ್ತಿದ್ದ ಬೃಹತ್ ಟ್ಯಾಂಕರ್ ಹಡಗು ಇಂದು ಯಾವುದೇ ಅಡೆತಡೆಯಿಲ್ಲದೆ ಹಾರ್ಮುಜ್ ಜಲಸಂಧಿಯನ್ನು (Strait of Hormuz) ಯಶಸ್ವಿಯಾಗಿ ದಾಟಿರುವ ಬಗ್ಗೆ ಅಧಿಕೃತ ಮೂಲಗಳು ಖಚಿತಪಡಿಸಿವೆ ಎಂದು ಶನಿವಾರ ವರದಿಯಾಗಿದೆ.

ಇರಾನ್ ವಿಧಿಸಿರುವ ದಿಗ್ಬಂಧನದ ನಡುವೆಯೂ ಭಾರತದ ಹಡಗಿಗೆ ಅವಕಾಶ ನೀಡಿದ ಕುರಿತು ಭಾರತಕ್ಕೆ ಇರಾನ್ ರಾಯಭಾರಿ ಮೊಹಮ್ಮದ್ ಫತಲಿ ಮಹತ್ವದ ಹೇಳಿಕೆ ನೀಡಿದ್ದಾರೆ. "ಭಾರತ ಮತ್ತು ಇರಾನ್ ದೀರ್ಘಕಾಲದ ಮಿತ್ರ ರಾಷ್ಟ್ರಗಳು. ಭಾರತೀಯರ ಸಂಕಷ್ಟ ನಮ್ಮ ಸಂಕಷ್ಟವಿದ್ದಂತೆ. ಸಾಮಾನ್ಯ ಹಿತಾಸಕ್ತಿ ಮತ್ತು ಹಂಚಿಕೆಯ ಭವಿಷ್ಯವನ್ನು ಗಮನದಲ್ಲಿಟ್ಟುಕೊಂಡು ಭಾರತಕ್ಕೆ ಹೋಗುವ ಹಡಗುಗಳಿಗೆ ನಾವು ಸುರಕ್ಷಿತ ಹಾದಿ ಒದಗಿಸುತ್ತೇವೆ," ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಶೀಘ್ರದಲ್ಲೇ ಮತ್ತೊಂದು ಟ್ಯಾಂಕರ್ ಕೂಡ ಭಾರತದತ್ತ ಪ್ರಯಾಣ ಬೆಳೆಸಲಿದೆ ಎಂದು ತಿಳಿದುಬಂದಿದೆ.

ಈ ಬಿಕ್ಕಟ್ಟನ್ನು ಎದುರಿಸಲು ಭಾರತ ಸರ್ಕಾರವು ಹೊಸ ಮಾರ್ಗಸೂಚಿಗಳನ್ನು ಹೊರಡಿಸಿದೆ. ಪೆಟ್ರೋಲಿಯಂ ಸಚಿವಾಲಯವು ನೈಸರ್ಗಿಕ ಅನಿಲ ಪೂರೈಕೆಯನ್ನು ನಾಲ್ಕು ಆದ್ಯತೆಯ ಕ್ಷೇತ್ರಗಳಾಗಿ ವಿಂಗಡಿಸಿದೆ. ಆದಾಗ್ಯೂ, ಭಾರತದ ಪರಿಸ್ಥಿತಿ ಸ್ಥಿರವಾಗಿದೆ ಎಂದು ಸರ್ಕಾರ ಹೇಳಿದೆ.

ಪರ್ಯಾಯ ಮಾರ್ಗ: ಭಾರತದ ಶೇ. 70 ಕ್ಕಿಂತ ಹೆಚ್ಚು ಕಚ್ಚಾ ತೈಲ ಆಮದು ಈಗ ಹಾರ್ಮುಜ್ ಜಲಸಂಧಿಯ ಹೊರತಾದ ಮಾರ್ಗಗಳ ಮೂಲಕ ನಡೆಯುತ್ತಿದೆ.

ಎಲ್‌ಪಿಜಿ ಉತ್ಪಾದನೆ ಏರಿಕೆ: ದೇಶೀಯವಾಗಿ ಎಲ್‌ಪಿಜಿ ಉತ್ಪಾದನೆಯನ್ನು ಶೇ. 28 ರಷ್ಟು ಹೆಚ್ಚಿಸಲಾಗಿದೆ.

ಗಾಬರಿ ಬೇಡ: ಸಾರ್ವಜನಿಕರು ಭಯಭೀತರಾಗಿ ಸಿಲಿಂಡರ್‌ಗಳನ್ನು ಮುಂಗಡವಾಗಿ ಬುಕ್ ಮಾಡುವ ಅವಶ್ಯಕತೆ ಇಲ್ಲ. ದೇಶದಲ್ಲಿ ಗ್ಯಾಸ್ ಕೊರತೆ ಇಲ್ಲ ಎಂದು ಜಂಟಿ ಕಾರ್ಯದರ್ಶಿ ಸುಜಾತಾ ಶರ್ಮಾ ತಿಳಿಸಿದ್ದಾರೆ.

ಫೆಬ್ರವರಿ 28 ರಂದು ಅಲಿ ಖಮೇನಿ ಹತ್ಯೆಯಾದ ನಂತರ ಅಮೆರಿಕ ಮತ್ತು ಇರಾನ್ ನಡುವಿನ ಸಂಘರ್ಷ ವಿಕೋಪಕ್ಕೆ ಹೋಗಿದೆ. ಕೇವಲ 50 ಕಿ.ಮೀ ಅಗಲವಿರುವ ಮತ್ತು 60 ಮೀಟರ್ ಆಳವಿರುವ ಹಾರ್ಮುಜ್ ಜಲಸಂಧಿಯನ್ನು ಇರಾನ್ ಸೇನಾಬಲದಿಂದ ಮುಚ್ಚಲು ಪ್ರಯತ್ನಿಸುತ್ತಿದೆ. ಇದು ಜಾಗತಿಕ ಆರ್ಥಿಕತೆಯ ಮೇಲೆ ಭಾರಿ ಪರಿಣಾಮ ಬೀರಿದೆ. ಆದರೆ ಭಾರತದೊಂದಿಗಿನ ಇರಾನ್‌ನ ಸೌಹಾರ್ದಯುತ ಸಂಬಂಧವು ಈ ಬಿಕ್ಕಟ್ಟಿನ ಸಮಯದಲ್ಲಿ ಆಸರೆಯಾಗಿ ನಿಂತಿದೆ,(ಏಜೆನ್ಸೀಸ್​).