ಗಣರಾಜ್ಯೋತ್ಸವದಲ್ಲಿ ಇತಿಹಾಸ: 2026ರ ಪರೇಡ್‌ನಲ್ಲಿ ಮೊದಲ ಬಾರಿಗೆ ಸಾಗಲಿದೆ ಭಾರತೀಯ ಸೇನೆಯ 'ಪ್ರಾಣಿ ದಳ'! Indian Army

ನವದೆಹಲಿ: ( Indian Army ) ಗಣರಾಜ್ಯೋತ್ಸವದ ಪರೇಡ್‌ನಲ್ಲಿ ಇದುವರೆಗೆ ನಾವು ಕೇವಲ ಸೈನಿಕರ ಸಾಹಸ ಮತ್ತು ಯುದ್ಧ ವಿಮಾನಗಳ ಪ್ರದರ್ಶನವನ್ನು ಮಾತ್ರ ನೋಡಿದ್ದೆವು. ಆದರೆ, ಜನವರಿ 26, 2026ರ ಪಥಸಂಚಲನದಲ್ಲಿ ಭಾರತೀಯ ಸೇನೆಯು ದೇಶದ ರಕ್ಷಣೆಯಲ್ಲಿ ಸದ್ದಿಲ್ಲದೆ ಸೇವೆ ಸಲ್ಲಿಸುತ್ತಿರುವ 'ಪ್ರಾಣಿ ದಳ'ವನ್ನು ಮೊದಲ ಬಾರಿಗೆ ಪರಿಚಯಿಸಲಿದೆ. ಸೈನಿಕರಂತೆಯೇ ಅತ್ಯಂತ ಶಿಸ್ತುಬದ್ಧವಾಗಿ ಪಥಸಂಚಲನ ನಡೆಸಲಿರುವ ಈ ಮೂಕ ಪ್ರಾಣಿಗಳು ಇಡೀ ಜಗತ್ತಿನ ಗಮನ ಸೆಳೆಯಲು ಸಜ್ಜಾಗಿದ್ದಾರೆ.

ಭಾರತೀಯ ಸೇನೆಯ 'ರಿಮೌಂಟ್ ಅಂಡ್ ವೆಟರಿನರಿ ಕಾರ್ಪ್ಸ್' (RVC) ವತಿಯಿಂದ ಇದೇ ಮೊದಲ ಬಾರಿಗೆ ವಿಶೇಷ 'ಪ್ರಾಣಿ ದಳ' (Animal Contingent) ಪಥಸಂಚಲನ ನಡೆಸಲಿದ್ದು,ಸೇನೆಯಲ್ಲಿ ಪ್ರಾಣಿಗಳು ಸಲ್ಲಿಸುತ್ತಿರುವ ಅಮೋಘ ಸೇವೆಯನ್ನು ಗೌರವಿಸಲು ಮತ್ತು ಅವುಗಳ ಶೌರ್ಯವನ್ನು ಜಗತ್ತಿಗೆ ಪರಿಚಯಿಸಲು ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ.

ಈ ದಳದಲ್ಲಿ ಕೇವಲ ಕುದುರೆಗಳಷ್ಟೇ ಅಲ್ಲದೆ, ಸೇನೆಯ ಅವಿಭಾಜ್ಯ ಅಂಗವಾಗಿರುವ ಇತರ ಪ್ರಾಣಿಗಳೂ ಇರಲಿವೆ. ಸಾಮಾನ್ಯವಾಗಿ ಕುದುರೆ ಸವಾರ ಪಡೆ (Cavalry) ಮಾತ್ರ ಪರೇಡ್‌ನಲ್ಲಿ ಕಾಣಿಸಿಕೊಳ್ಳುತ್ತಿತ್ತು. ಆದರೆ ಈ ಬಾರಿ ಗಡಿ ರಕ್ಷಣೆಯಲ್ಲಿ ಪ್ರಮುಖ ಪಾತ್ರ ವಹಿಸುವ ನಾಯಿಗಳು (Army Dogs) ಮತ್ತು ಪರ್ವತ ಪ್ರದೇಶಗಳಲ್ಲಿ ಸರಕು ಸಾಗಿಸುವ ಕೋವೇರು ಕತ್ತೆಗಳು (Mules) ವಿಶೇಷವಾಗಿ ಪಥಸಂಚಲನ ನಡೆಸಲಿವೆ.

ಯುದ್ಧ ಭೂಮಿ ಮತ್ತು ಹಿಮಪಾತದಂತಹ ಕಠಿಣ ಪರಿಸ್ಥಿತಿಗಳಲ್ಲಿ ಸೈನಿಕರ ಜೀವ ಉಳಿಸಿದ ಮತ್ತು ಸ್ಫೋಟಕಗಳನ್ನು ಪತ್ತೆ ಹಚ್ಚಿದ ಶ್ವಾನ ದಳದ ಶೌರ್ಯವನ್ನು ಇಲ್ಲಿ ಪ್ರದರ್ಶಿಸಲಾಗುತ್ತದೆ.ಈ ಪ್ರಾಣಿಗಳಿಗೆ ದೆಹಲಿಯ ರಾಜಪಥ್ (ಈಗಿನ ಕರ್ತವ್ಯ ಪಥ) ಮೇಲೆ ಶಿಸ್ತುಬದ್ಧವಾಗಿ ನಡೆಯಲು ಕಳೆದ ಹಲವಾರು ತಿಂಗಳುಗಳಿಂದ ವಿಶೇಷ ತರಬೇತಿ ನೀಡಲಾಗುತ್ತಿದೆ.

15,000 ಅಡಿ ಎತ್ತರದ ಲಡಾಖ್ ಪ್ರಾಂತ್ಯದಲ್ಲಿ 250 ಕೆಜಿ ತೂಕ ಹೊರುವ ಸಾಮರ್ಥ್ಯವಿರುವ ಬ್ಯಾಕ್ಟ್ರಿಯನ್ ಒಂಟೆಗಳು ಈ ದಳದ ಮುಂಚೂಣಿಯಲ್ಲಿರಲಿವೆ. 250 ಕಿಲೋಗ್ರಾಂಗಳಷ್ಟು ಭಾರವನ್ನು ಹೊತ್ತೊಯ್ಯುವ ಸಾಮರ್ಥ್ಯವಿರುವ ಈ ಒಂಟೆಗಳು, ಕನಿಷ್ಠ ನೀರು ಮತ್ತು ಆಹಾರದೊಂದಿಗೆ ದೂರದವರೆಗೆ ಕ್ರಮಿಸಬಲ್ಲವು. ಇವುಗಳೊಂದಿಗೆ ಮೈನಸ್ 40 ಡಿಗ್ರಿ ಚಳಿಯಲ್ಲೂ ಸಿಯಾಚಿನ್‌ನಂತಹ ಕಠಿಣ ಪ್ರದೇಶಗಳಲ್ಲಿ ಕೆಲಸ ಮಾಡುವ ಅಪರೂಪದ 'ಜಾನ್ಸ್ಕರ್ ಕುದುರೆಗಳು' ಹೆಜ್ಜೆ ಹಾಕಲಿವೆ. ದಿನಕ್ಕೆ 70 ಕಿ.ಮೀ ವರೆಗೆ ಗಸ್ತು ತಿರುಗುವ ಇವು ಸೇನೆಯ ಬಲವನ್ನು ಹೆಚ್ಚಿಸಿವೆ.

ಲಡಾಖ್‌ನ ಶೀತಲ ಮರುಭೂಮಿಯಲ್ಲಿ ಸೇವೆ ಸಲ್ಲಿಸುವ ಬ್ಯಾಕ್ಟ್ರಿಯನ್ ಒಂಟೆಗಳು, ಪರ್ವತ ಪ್ರದೇಶದ ದೃಢಕಾಯ ಜಾನ್ಸ್ಕರ್ ಕುದುರೆಗಳು (Ponies), ಕಣ್ಗಾವಲು ನಡೆಸುವ ಹದ್ದುಗಳು (Raptors) ಮತ್ತು ಶೌರ್ಯಕ್ಕೆ ಹೆಸರಾದ ಸೇನಾ ಶ್ವಾನಗಳು ಪಾಲ್ಗೊಳ್ಳಲಿವೆ.

ಭಾರತೀಯ ಮೂಲದ ತಳಿಗಳಾದ ಮುಧೋಳ ಹೌಂಡ್, ರಾಂಪುರ ಹೌಂಡ್, ಚಿಪ್ಪಿಪಾರೈ ಮತ್ತು ರಾಜಪಾಳಯಂ ನಾಯಿಗಳನ್ನು ಸೇನೆಗೆ ಸೇರ್ಪಡೆಗೊಳಿಸಲಾಗಿದೆ. ಇವು ಸ್ಫೋಟಕ ಪತ್ತೆ, ಭಯೋತ್ಪಾದನಾ ನಿಗ್ರಹ ಮತ್ತು ವಿಪತ್ತು ನಿರ್ವಹಣೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿವೆ.

ಈ ಪ್ರಾಣಿ ದಳದ ಪಥಸಂಚಲನವು ಕೇವಲ ಪ್ರದರ್ಶನವಲ್ಲ. ಇದು ದೇಶದ ರಕ್ಷಣೆ ಕೇವಲ ಸೈನಿಕರು ಮತ್ತು ಯಂತ್ರಗಳಿಂದ ಮಾತ್ರವಲ್ಲ, ಈ ಮೂಕ ಪ್ರಾಣಿಗಳ ನಿಷ್ಠೆ ಮತ್ತು ತ್ಯಾಗದಿಂದಲೂ ಸಾಧ್ಯ ಎಂಬುದನ್ನು ನೆನಪಿಸುತ್ತದೆ. ಸಿಯಾಚಿನ್‌ನಿಂದ ಲಡಾಖ್‌ವರೆಗೆ ಇವು ಭಾರತೀಯ ಸೇನೆಯ ಅವಿಭಾಜ್ಯ ಅಂಗವಾಗಿವೆ.