ಭಾರತೀಯ ವಾಯುಪಡೆಗೆ ಮಹಾಶಕ್ತಿ: ಮಿಗ್-29 ಬತ್ತಳಿಕೆಗೆ ಬಂತು ಈ ಯುರೋಪಿಯನ್ ಕ್ಷಿಪಣಿ! ಚೀನಾ-ಪಾಕ್‌ಗೆ ನಡುಕ! ASRAAM

ಮಾರ್ಚ್ 25 ರಂದು ರಕ್ಷಣಾ ಸಚಿವಾಲಯವು ಈ ಸಂಬಂಧ ಪ್ರಸ್ತಾವನೆಯನ್ನು ಸಲ್ಲಿಸಿದ್ದು, ಮಿಗ್-29 ಯುಪಿಜಿ (UPG) ಮಾದರಿಯ ವಿಮಾನಗಳಲ್ಲಿ ಈ ಕ್ಷಿಪಣಿಗಳ ಏಕೀಕರಣ ಮತ್ತು ಪರೀಕ್ಷೆಗೆ ಚಾಲನೆ ನೀಡಿದೆ.

ಇದುವರೆಗೆ ಮಿಗ್-29 ವಿಮಾನಗಳು 1980ರ ದಶಕದ ಸೋವಿಯತ್ ಕಾಲದ R-73 ಕ್ಷಿಪಣಿಗಳನ್ನು ಅವಲಂಬಿಸಿದ್ದವು. ಆದರೆ ಈ ಹಳೆಯ ಕ್ಷಿಪಣಿಗಳ ವ್ಯಾಪ್ತಿ ಕೇವಲ 10 ರಿಂದ 15 ಕಿಲೋಮೀಟರ್‌ಗಳಷ್ಟಿತ್ತು. ಈಗ ಇವುಗಳ ಜಾಗಕ್ಕೆ ಬಲಿಷ್ಠ ಅಸ್ರಾಮ್ ಲಗ್ಗೆ ಇಡುತ್ತಿದೆ.

ವ್ಯಾಪ್ತಿ: ಅಸ್ರಾಮ್ ಕ್ಷಿಪಣಿಯ ವ್ಯಾಪ್ತಿ 25 ಕಿಲೋಮೀಟರ್‌ಗೂ ಅಧಿಕವಾಗಿದ್ದು, ಇದು ಹಳೆಯ ಕ್ಷಿಪಣಿಗಳಿಗಿಂತ ಎರಡರಷ್ಟು ಶಕ್ತಿಯುತವಾಗಿದೆ.

ವೇಗ: ಶಬ್ದಕ್ಕಿಂತ ಮೂರು ಪಟ್ಟು ಹೆಚ್ಚು ವೇಗವಾಗಿ ಚಲಿಸುವ ಸಾಮರ್ಥ್ಯ ಇದರಲ್ಲಿದೆ.

ತಂತ್ರಜ್ಞಾನ: ಇದು ಫೈರ್ ಅಂಡ್ ಫರ್ಗೆಟ್ ತತ್ವದ ಮೇಲೆ ಕಾರ್ಯನಿರ್ವಹಿಸುತ್ತದೆ. ಒಮ್ಮೆ ಉಡಾವಣೆ ಮಾಡಿದರೆ, ಇದು ತನ್ನ ಗುರಿಯನ್ನು ತಾನೇ ಹುಡುಕಿ ನಿಖರವಾಗಿ ಧ್ವಂಸ ಮಾಡುತ್ತದೆ.

ಚೀನಾ ತನ್ನ J-20 ಮತ್ತು J-16 ವಿಮಾನಗಳಲ್ಲಿ PL-10 ಕ್ಷಿಪಣಿಗಳನ್ನು ಅಳವಡಿಸಿದೆ. ಪಾಕಿಸ್ತಾನ ಕೂಡ ಇದೇ ಮಾದರಿಯ ಕ್ಷಿಪಣಿಗಳನ್ನು ತನ್ನ JF-17 ವಿಮಾನಗಳಲ್ಲಿ ಬಳಸುತ್ತಿದೆ. ಆದರೆ ರಕ್ಷಣಾ ತಜ್ಞರ ಪ್ರಕಾರ, ಅಸ್ರಾಮ್ ಕ್ಷಿಪಣಿಯ ಬೃಹತ್ ರಾಕೆಟ್ ಮೋಟಾರ್ ಮತ್ತು ಅತ್ಯಾಧುನಿಕ ಹೀಟ್-ಸೀಕಿಂಗ್ ತಂತ್ರಜ್ಞಾನವು ಚೀನಾದ ಕ್ಷಿಪಣಿಗಳಿಗಿಂತ ಹೆಚ್ಚಿನ ಕಾರ್ಯಕ್ಷಮತೆಯನ್ನು ಹೊಂದಿದೆ.

ಭಾರತದ ಭಾರತ್ ಡೈನಾಮಿಕ್ಸ್ ಲಿಮಿಟೆಡ್ ಮತ್ತು ಯುರೋಪಿಯನ್ ಸಂಸ್ಥೆ MBDA ನಡುವೆ 2021 ರಲ್ಲಿ ಒಪ್ಪಂದ ಏರ್ಪಟ್ಟಿದೆ. ಇದರ ಪ್ರಕಾರ, ಅಸ್ರಾಮ್ ಕ್ಷಿಪಣಿಗಳ ಜೋಡಣೆ ಮತ್ತು ಪರೀಕ್ಷೆ ಈಗ ಹೈದರಾಬಾದ್‌ನಲ್ಲಿ ನಿರ್ಮಾಣವಾಗುತ್ತಿರುವ ವಿಶೇಷ ಕೇಂದ್ರದಲ್ಲಿ ನಡೆಯಲಿದೆ. ಇದು ಮೇಕ್ ಇನ್ ಇಂಡಿಯಾ ಅಭಿಯಾನಕ್ಕೆ ದೊಡ್ಡ ಬಲ ನೀಡಲಿದೆ.

1987 ರಲ್ಲಿ ಭಾರತೀಯ ವಾಯುಪಡೆಗೆ ಸೇರ್ಪಡೆಯಾದ ಮಿಗ್-29, ಅಂದಿನಿಂದಲೂ ಭಾರತದ ಆಕಾಶದ ರಕ್ಷಣೆ ಮಾಡುತ್ತಿದೆ.

ಇತ್ತೀಚೆಗೆ ಮಾರ್ಚ್ 12 ರಂದು ವಾಯುಪಡೆ ಮುಖ್ಯಸ್ಥ ಏರ್ ಚೀಫ್ ಮಾರ್ಷಲ್ ಎಪಿ ಸಿಂಗ್ ಅವರು ಸ್ವತಃ ಮಿಗ್-29 ಹಾರಿಸಿ ಗಡಿಯ ಸಿದ್ಧತೆಯನ್ನು ಪರಿಶೀಲಿಸಿದ್ದರು.

2025ರ 'ಆಪರೇಷನ್ ಸಿಂಧೂರ್' ಕಾರ್ಯಾಚರಣೆಯಲ್ಲಿಯೂ ಈ ವಿಮಾನಗಳು ಮಹತ್ವದ ಪಾತ್ರ ವಹಿಸಿದ್ದವು.

ಪ್ರಸ್ತುತ ಭಾರತದ ಬಳಿ 55ಕ್ಕೂ ಹೆಚ್ಚು ಮಿಗ್-29 ವಿಮಾನಗಳಿದ್ದು, ಇವೆಲ್ಲವೂ ಈಗ ಅಸ್ರಾಮ್ ಬಲದೊಂದಿಗೆ ಶತ್ರುಗಳ ಪಾಲಿಗೆ ಸಿಂಹಸ್ವಪ್ನವಾಗಲಿವೆ,(ಏಜೆನ್ಸೀಸ್).