ಭಾರತದ ಮೊದಲ ಖಾಸಗಿ ರಾಕೆಟ್‌ ಉಡಾವಣೆಗೆ ಸಣ್ಣ ಅಡಚಣೆ: ಇನ್ನು ಕೆಲವೇ ಕ್ಷಣಗಳಲ್ಲಿ ನಭಕ್ಕೆ ಚಿಮ್ಮಲಿರುವ ವಿಕ್ರಮ್-1..! Vikram-1

ನವದೆಹಲಿ: ಆಂಧ್ರ ಪ್ರದೇಶದ ಶ್ರೀಹರಿಕೋಟಾದಿಂದ ಉಡಾವಣೆಗೆ ಸಜ್ಜಾಗಿದ್ದ ಭಾರತದ ಮೊದಲ ಖಾಸಗಿ ರಾಕೆಟ್ 'ವಿಕ್ರಮ್-1' ( Vikram-1 ) ನಭಕ್ಕೆ ಚಿಮ್ಮುವ ಕೊನೆಯ ಕ್ಷಣದಲ್ಲಿ ಸಣ್ಣದೊಂದು ತಾಂತ್ರಿಕ ಅಡಚಣೆ ಎದುರಾಗಿದೆ.

ಅಂತಿಮ ಹಂತದ ಕೌಂಟ್‌ಡೌನ್ ವೇಳೆ ರಾಕೆಟ್ ಉಡಾವಣೆಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದ್ದು, ರಾಕೆಟ್​ನ ತುರ್ತು ತಪಾಸಣೆ ಪ್ರಕ್ರಿಯೆ ಪ್ರಗತಿಯಲ್ಲಿದೆ. ಎಲ್ಲವೂ ಅಂದುಕೊಂಡಂತೆ ನಡೆದಿದ್ದರೆ ರಾಕೆಟ್​ 11.30ಕ್ಕೆ ಉಡಾವಣೆ ಆಗಬೇಕಿತ್ತು. ಆದರೆ, ಕೌಂಟ್​ಡೌನ್​ ಹಂತದಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ಉಡಾವಣೆ ಸ್ಥಗಿತಗೊಳಿಸಲಾಗಿದೆ. ಸದ್ಯ ವಿಜ್ಞಾನಿಗಳು ತಾಂತ್ರಿಕ ದೋಷವನ್ನು ಸರಿಪಡಿಸಿದ್ದಾರೆ ಎಂಬ ಮಾಹಿತಿ ಸಿಕ್ಕಿದ್ದು, ಮಧ್ಯಾಹ್ನ 12.05ಕ್ಕೆ ವಿಕ್ರಮ್​ -1 ರಾಕೆಟ್​ ಉಡಾವಣೆ ಆಗಲಿದೆ ಎಂಬ ಮಾಹಿತಿ ಬಂದಿದೆ.

ಅಂದಹಾಗೆ, ಭಾರತದ ಬಾಹ್ಯಾಕಾಶ ಇತಿಹಾಸದಲ್ಲೇ ಅತ್ಯಂತ ಮಹತ್ವದ ಮೈಲಿಗಲ್ಲಾಗಲಿರುವ 'ವಿಕ್ರಮ್-1' ರಾಕೆಟ್‌ನ 'ಮಿಷನ್ ಆಗಮನ್' ಉಡಾವಣೆ ದೇಶದ ಖಾಸಗಿ ಬಾಹ್ಯಾಕಾಶ ರಂಗಕ್ಕೆ ಹೊಸ ದಿಕ್ಸೂಚಿಯಾಗಿದೆ. ಇದು ಕೇವಲ ಸರ್ಕಾರಿ ಸ್ವಾಮ್ಯದ ಇಸ್ರೋ ಸಂಸ್ಥೆಗೆ ಸೀಮಿತವಾಗಿದ್ದ ಬಾಹ್ಯಾಕಾಶ ಯಾನವನ್ನು ಉದ್ಯಮ ಆಧಾರಿತವಾಗಿಸುವಲ್ಲಿ ದೇಶದ ಮೊದಲ ಯಶಸ್ವಿ ಹೆಜ್ಜೆಯಾಗಿದೆ. ಈ ಐತಿಹಾಸಿಕ ಕಾರ್ಯಾಚರಣೆಯು ಭಾರತದ ನವೋದ್ಯಮವೊಂದು ಕಕ್ಷೆ ತಲುಪಲು ನಡೆಸುತ್ತಿರುವ ಮೊದಲ ಅತ್ಯಾಧುನಿಕ ಮತ್ತು ಸ್ವಾವಲಂಬಿ ಪ್ರಯತ್ನವಾಗಿದ್ದು, ಜಾಗತಿಕ ಬಾಹ್ಯಾಕಾಶ ಮಾರುಕಟ್ಟೆಯಲ್ಲಿ ಭಾರತದ ಶಕ್ತಿಯನ್ನು ಅನಾವರಣಗೊಳಿಸಲಿದೆ. ಈ ರಾಕೆಟ್​ ಅನ್ನು ಸ್ಕೈರೂಟ್ ಏರೋಸ್ಪೇಸ್ ಸಂಸ್ಥೆ ನಿರ್ಮಾಣ ಮಾಡಿದೆ.

ತಾಂತ್ರಿಕವಾಗಿ ಅತ್ಯಂತ ಪ್ರಗತಿಪರ ವೈಶಿಷ್ಟ್ಯಗಳನ್ನು ಹೊಂದಿರುವ ವಿಕ್ರಮ್-1 ರಾಕೆಟ್, ಭಾರತದ ಮೊದಲ 'ಆಲ್-ಕಾರ್ಬನ್ ಕಾಂಪೋಸಿಟ್' ಕಕ್ಷೀಯ ರಾಕೆಟ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಸಾಂಪ್ರದಾಯಿಕ ಉಕ್ಕಿನಿಗಿಂತ ಹಗುರ ಹಾಗೂ ಗಟ್ಟಿಯಾದ ಈ ಕಾರ್ಬನ್ ಸಂಯೋಜಿತ ರಚನೆಯು ರಾಕೆಟ್‌ನ ಒಟ್ಟಾರೆ ಕಾರ್ಯಕ್ಷಮತೆಯನ್ನು ಹೆಚ್ಚಿಸುತ್ತದೆ. ಇದರೊಂದಿಗೆ, ರಾಕೆಟ್‌ನ ಮೊದಲ ಹಂತವು ದೇಶದ ಅತಿ ಉದ್ದದ ಏಕಶಿಲೆಯ (ಮೊನೊಲಿಥಿಕ್) ಕಾರ್ಬನ್ ಕಾಂಪೋಸಿಟ್ ಸ್ಟೇಜ್ ಆಗಿದ್ದು, ದೇಶೀಯ ಕಾಂಪೋಸಿಟ್ ಉತ್ಪಾದನೆ ಮತ್ತು ಏರೋಸ್ಪೇಸ್ ಎಂಜಿನಿಯರಿಂಗ್‌ನಲ್ಲಿ ಭಾರತದ ಪ್ರಗತಿಯನ್ನು ಜಗತ್ತಿಗೆ ಸಾರುತ್ತದೆ.

ಈ ರಾಕೆಟ್‌ನ ಮತ್ತೊಂದು ಪ್ರಮುಖ ಮೈಲಿಗಲ್ಲು ಎಂದರೆ, ಇದರಲ್ಲಿ 100 ಪ್ರತಿಶತ 3D-ಪ್ರಿಂಟೆಡ್ ದ್ರವ ಎಂಜಿನ್ ಅನ್ನು ಬಳಸಲಾಗಿದೆ. ಭಾರತದ ಕಕ್ಷೀಯ ಉಡಾವಣಾ ವಾಹನವೊಂದರಲ್ಲಿ ಇಂತಹ ತಂತ್ರಜ್ಞಾನವನ್ನು ಬಳಸಿರುವುದು ಇದೇ ಮೊದಲು. ಇದರೊಂದಿಗೆ, ರಾಕೆಟ್‌ನ ಹಂತಗಳು ಮತ್ತು ಪೇಲೋಡ್‌ಗಳನ್ನು ಬೇರ್ಪಡಿಸಲು ಭಾರತದಲ್ಲೇ ಮೊದಲ ಬಾರಿಗೆ ಅತ್ಯಾಧುನಿಕ 'ಅಲ್ಟ್ರಾ-ಲೋ-ಶಾಕ್ ನ್ಯೂಮ್ಯಾಟಿಕ್ ಸೆಪರೇಷನ್ ಸಿಸ್ಟಮ್' ತಂತ್ರಜ್ಞಾನವನ್ನು ಬಳಸಲಾಗಿದ್ದು, ಇದು ದೇಶೀಯ ಲಾಂಚ್ ವೆಹಿಕಲ್ ವ್ಯವಸ್ಥೆಗೆ ಹೊಸ ಕ್ರಾಂತಿಯನ್ನು ತಂದಿದೆ.

ವಾಣಿಜ್ಯ ಉದ್ದೇಶಗಳ ಜೊತೆಗೆ ಪರಿಸರ ಕಾಳಜಿಯನ್ನೂ ಹೊಂದಿರುವ ಈ ಮಿಷನ್, ಭವಿಷ್ಯದ ಬಾಹ್ಯಾಕಾಶ ತ್ಯಾಜ್ಯ (Space Debris) ವಿಲೇವಾರಿಗಾಗಿ ರೊಬೊಟಿಕ್ ಆರ್ಮ್ ತಂತ್ರಜ್ಞಾನವನ್ನು ಒಳಗೊಂಡಿರುವ 'EMBRACE' ಪೇಲೋಡ್ ಅನ್ನು ಹೊತ್ತೊಯ್ಯುತ್ತಿದೆ. ಭೂಮಿಯ ಕಕ್ಷೆಯಲ್ಲಿ ದಟ್ಟಣೆಯಾಗುತ್ತಿರುವ ಬಾಹ್ಯಾಕಾಶ ಕಸವನ್ನು ಸ್ವಚ್ಛಗೊಳಿಸುವ ನಿಟ್ಟಿನಲ್ಲಿ ಇದೊಂದು ಪ್ರಮುಖ ಪರೀಕ್ಷೆಯಾಗಿದೆ. ಇದರ ಜೊತೆಗೆ, ವಾಣಿಜ್ಯ ಮತ್ತು ಸಾಂಸ್ಕೃತಿಕ ಅಭಿವ್ಯಕ್ತಿಯ ಭಾಗವಾಗಿ 'ಕಾಸ್ಮಿಕ್ ಬ್ಲೂಮ್' ಎಂಬ ಪ್ರಥಮ ಪ್ರಯೋಗಾಲಯ ನಿರ್ಮಿತ ವಜ್ರವನ್ನು (Lab-Grown Diamond) ಸಹ ಈ ರಾಕೆಟ್ ಮೂಲಕ ಕಕ್ಷೆಗೆ ಕಳುಹಿಸಲಾಗುತ್ತಿದೆ.

ವಿಜ್ಞಾನ ಮತ್ತು ಕಲೆಯ ವಿಶಿಷ್ಟ ಸಮ್ಮಿಲನವಾಗಿರುವ ಈ ಮಿಷನ್‌ನಲ್ಲಿ, ಭಾರತದ ಹೆಮ್ಮೆಯ ವಿಜ್ಞಾನಿಗಳಾದ ಡಾ. ವಿಕ್ರಮ್ ಸಾರಾಭಾಯ್, ಸರ್ ಸಿ.ವಿ. ರಾಮನ್ ಮತ್ತು ಡಾ. ಎ.ಪಿ.ಜೆ. ಅಬ್ದುಲ್ ಕಲಾಂ ಅವರ ಕಿರು ಶಿಲ್ಪಗಳನ್ನು ಒಳಗೊಂಡ ಸಣ್ಣ ಚಿನ್ನದ ರಾಕೆಟ್ ಅನ್ನು ಕಳುಹಿಸಲಾಗುತ್ತಿದೆ. ಇದೆಲ್ಲದರ ಜೊತೆಗೆ, ಪ್ರಧಾನಿ ನರೇಂದ್ರ ಮೋದಿ ಅವರ 'ವಂದೇ ಮಾತರಂ' ಎಂಬ ಸಂದೇಶ ಮತ್ತು ಶುಭ ಹಾರೈಕೆಗಳ ಕಾರ್ಡ್ ಹಾಗೂ ಪ್ರಪಂಚದಾದ್ಯಂತದ ನೂರಾರು ಬೆಂಬಲಿಗರ ಗ್ರೀಟಿಂಗ್ಸ್‌ಗಳನ್ನು ಹೊತ್ತೊಯ್ಯುವ ಮೂಲಕ, ಈ ಮಿಷನ್ ಭಾರತದ ಬೆಳೆಯುತ್ತಿರುವ ಬಾಹ್ಯಾಕಾಶ ಮಹತ್ವಾಕಾಂಕ್ಷೆಯನ್ನು ದೇಶದ ನಾಗರಿಕರ ಆಶಯಗಳೊಂದಿಗೆ ಭಾವನಾತ್ಮಕವಾಗಿ ಜೋಡಿಸಿದೆ, (ಏಜೆನ್ಸೀಸ್​).