ಮುಂಗಾರಿಗೆ ಮುಳುವಾದ ಎಲ್ ನಿನೊ: ಜೂನ್ ಬೆನ್ನಲ್ಲೇ ಜುಲೈನಲ್ಲೂ ಮಳೆ ಕೊರತೆ ಮುನ್ಸೂಚನೆ, ಅನ್ನದಾತನಿಗೆ ಆತಂಕ! IMD

ನವದೆಹಲಿ: ದೇಶಾದ್ಯಂತ ಜೂನ್ ತಿಂಗಳಿನಲ್ಲಿ ದಾಖಲೆಯ ಬಿಸಿಲಿನ ಬೇಗೆಯಿಂದ ಬೆಂದು ಹೋಗಿದ್ದ ಜನತೆಗೆ ಭಾರತೀಯ ಹವಾಮಾನ ಇಲಾಖೆ (IMD) ಮತ್ತೊಂದು ಆಘಾತಕಾರಿ ಸುದ್ದಿ ನೀಡಿದೆ. ಅದೇನೆಂದರೆ, ಪ್ರಸಕ್ತ ಜುಲೈ ತಿಂಗಳೂ ಕೂಡ ನಿರೀಕ್ಷಿತ ಪ್ರಮಾಣದಲ್ಲಿ ಮಳೆಯಾಗದೆ ಒಣ ಹವಾಮಾನ ಮುಂದುವರಿಯಲಿದೆ ಎಂದು ಮುನ್ಸೂಚನೆ ನೀಡಿದೆ.

ಕಳೆದ 125 ವರ್ಷಗಳ ಇತಿಹಾಸದಲ್ಲೇ ಜೂನ್ ತಿಂಗಳು ದೇಶದ 5ನೇ ಅತ್ಯಂತ ಒಣ ಜೂನ್ (ಕನಿಷ್ಠ ಮಳೆ) ಆಗಿ ದಾಖಲಾದ ಬೆನ್ನಲ್ಲೇ, ಈಗ ಜುಲೈ ತಿಂಗಳಿನ ಮಳೆಯೂ ಸಹ ದೀರ್ಘಾವಧಿ ಸರಾಸರಿಗಿಂತ (LPA) ಕೇವಲ ಶೇ. 94 ರಷ್ಟು ಮಾತ್ರ ಇರಲಿದೆ ಎಂದು ಐಎಂಡಿ ತಿಳಿಸಿದೆ. ಹವಾಮಾನ ಇಲಾಖೆಯ ಈ ಆತಂಕಕಾರಿ ಮುನ್ಸೂಚನೆಯು ದೇಶದ ಕೃಷಿ ವಲಯ ಹಾಗೂ ಕುಡಿಯುವ ನೀರಿನ ಲಭ್ಯತೆಯ ಮೇಲೆ ಭಾರಿ ಹೊಡೆತ ನೀಡುವ ಆತಂಕ ಮೂಡಿಸಿದೆ.

ಜುಲೈ ತಿಂಗಳಿನಲ್ಲಿ ಮಳೆಯ ಪ್ರಮಾಣ ಕುಸಿಯುವುದರ ಜೊತೆಗೆ, ದೇಶದ ಬಹುತೇಕ ಭಾಗಗಳಲ್ಲಿ ತಾಪಮಾನವು ವಾಡಿಕೆಗಿಂತ ಅಧಿಕವಾಗಿರಲಿದೆ ಎಂದು ಹವಾಮಾನ ಇಲಾಖೆ ಎಚ್ಚರಿಸಿದೆ. ಇದು ಪ್ರಸ್ತುತ ದೇಶಾದ್ಯಂತ ಬಿರುಸಿನಿಂದ ಸಾಗಬೇಕಿದ್ದ ಪ್ರಮುಖ ಮುಂಗಾರು ಹಂಗಾಮಿನ ಬಿತ್ತನೆ ಚಟುವಟಿಕೆಯ ಮೇಲೆ ತೀವ್ರ ಪರಿಣಾಮ ಬೀರುವ ಆತಂಕವನ್ನು ಸೃಷ್ಟಿಸಿದೆ.

ಈಗಾಗಲೇ ಸರ್ಕಾರದ ಅಂಕಿ-ಅಂಶಗಳ ಪ್ರಕಾರ ಹಲವಾರು ರಾಜ್ಯಗಳಲ್ಲಿ ಬಿತ್ತನೆ ಕಾರ್ಯ ತಡವಾಗಿದ್ದು, ಭಾರತದ ಅರ್ಧಕ್ಕಿಂತ ಹೆಚ್ಚು ಖಾರಿಫ್ ಕೃಷಿ ಭೂಮಿ ಸಂಪೂರ್ಣವಾಗಿ ಮಳೆಯನ್ನೇ ಆಶ್ರಯಿಸಿರುವುದರಿಂದ ರೈತರು ತೀವ್ರ ಚಿಂತೆಗೆ ಒಳಗಾಗಿದ್ದಾರೆ.

ಹವಾಮಾನ ಇಲಾಖೆಯ ಮಹಾನಿರ್ದೇಶಕ ಮೃತ್ಯುಂಜಯ್ ಮಹಾಪಾತ್ರ ಅವರು ಈ ಕುರಿತು ಹೇಳಿಕೆ ನೀಡಿದ್ದು, ವಾಯುವ್ಯ ಮತ್ತು ಈಶಾನ್ಯ ಭಾರತದ ಕೆಲವು ಪ್ರದೇಶಗಳು, ಪೂರ್ವ-ಮಧ್ಯ ಭಾರತ ಹಾಗೂ ಪೂರ್ವ ಪೆನಿನ್ಸುಲರ್ (ದ್ವೀಪಕಲ್ಪ) ಭಾಗಗಳನ್ನು ಹೊರತುಪಡಿಸಿ, ದೇಶದ ಉಳಿದ ಬಹುತೇಕ ಭಾಗಗಳಲ್ಲಿ ವಾಡಿಕೆಗಿಂತ ಕಡಿಮೆ ಮಳೆಯಾಗುವ ಸಾಧ್ಯತೆಯಿದೆ. ವಿನಾಯಿತಿ ಪಡೆದ ಈ ಭಾಗಗಳಲ್ಲಿ ಮಾತ್ರ ಸಾಮಾನ್ಯ ಅಥವಾ ಸಾಮಾನ್ಯಕ್ಕಿಂತ ಹೆಚ್ಚಿನ ಮಳೆಯಾಗಬಹುದು ಎಂದು ಸ್ಪಷ್ಟಪಡಿಸಿದ್ದಾರೆ. ಆದಾಗ್ಯೂ, ಸಮಾಧಾನಕರ ಸಂಗತಿಯೆಂದರೆ ಜುಲೈ ತಿಂಗಳ ಮೊದಲ 7 ರಿಂದ 10 ದಿನಗಳ ಅವಧಿಯಲ್ಲಿ ದೇಶಾದ್ಯಂತ ಉತ್ತಮ ಮಳೆಯಾಗಲಿದೆ ಎಂದು ಐಎಂಡಿ ಮುನ್ಸೂಚನೆ ನೀಡಿದೆ.

ಭಾರತೀಯ ಹವಾಮಾನ ಇಲಾಖೆಯ 1971-2020ರ ದೀರ್ಘಾವಧಿ ಸರಾಸರಿ ಲೆಕ್ಕಾಚಾರದ ಪ್ರಕಾರ, ಜುಲೈ ತಿಂಗಳು ಸಾಮಾನ್ಯವಾಗಿ ಭಾರತದ ಅತ್ಯಂತ ಹೆಚ್ಚು ಮಳೆ ಬೀಳುವ ಅವಧಿಯಾಗಿದ್ದು, ಇದು ಇಡೀ ನೈಋತ್ಯ ಮುಂಗಾರು ಋತುವಿನ ಒಟ್ಟು ಮಳೆಯ (870 ಮಿಮೀ) ಶೇ. 32 ರಷ್ಟು ಅಂದರೆ 280.4 ಮಿಮೀ ಮಳೆಯನ್ನು ದೇಶಕ್ಕೆ ಕೊಡುಗೆಯಾಗಿ ನೀಡುತ್ತದೆ.

ಇದಕ್ಕೆ ಹೋಲಿಸಿದರೆ, ಜೂನ್ ತಿಂಗಳು ಸಾಮಾನ್ಯವಾಗಿ 165.3 ಮಿಮೀ (ಒಟ್ಟು ಮುಂಗಾರಿನ ಶೇ. 19) ಮಳೆಯನ್ನು ದಾಖಲಿಸಬೇಕಿತ್ತು, ಆದರೆ ಈ ವರ್ಷ ಜೂನ್ ತಿಂಗಳಿನಲ್ಲಿ ವಾಡಿಕೆಗಿಂತ ಶೇ. 40 ರಷ್ಟು ಕಡಿಮೆ, ಅಂದರೆ ಕೇವಲ 99.5 ಮಿಮೀ ಮಳೆಯಷ್ಟೇ ದಾಖಲಾಗಿದೆ. ಇದು 1901ರ ನಂತರದ ಇತಿಹಾಸದಲ್ಲೇ ದೇಶದ 5ನೇ ಅತ್ಯಂತ ಒಣ ಜೂನ್ ತಿಂಗಳಾಗಿದ್ದು, ಕೊನೆಯದಾಗಿ 2014ರಲ್ಲಿ 92.8 ಮಿಮೀ ಮಳೆಯಾಗಿದ್ದನ್ನು ಬಿಟ್ಟರೆ ಕಳೆದ 12 ವರ್ಷಗಳಲ್ಲೇ ಅತ್ಯಂತ ಕನಿಷ್ಠ ಮಳೆಯಾದ ಜೂನ್ ತಿಂಗಳು ಇದಾಗಿದೆ. ಇನ್ನು ಭಾರತದ ಇತಿಹಾಸದಲ್ಲೇ 2009ರ ಜೂನ್ ತಿಂಗಳು (ಕೇವಲ 87.6 ಮಿಮೀ) ಇದುವರೆಗಿನ ಅತ್ಯಂತ ಬರಡಾದ ಜೂನ್ ಆಗಿ ದಾಖಲಾಗಿದೆ.

ಭಾರತೀಯ ಹವಾಮಾನ ಇಲಾಖೆಯ ಪ್ರಕಾರ, ಜೂನ್ ತಿಂಗಳಿನಲ್ಲಿ ಮಳೆಯ ಕೊರತೆಗೆ ಪ್ರಮುಖವಾಗಿ ನಾಲ್ಕು ಹವಾಮಾನ ವೈಪರೀತ್ಯಗಳು ಕಾರಣವಾಗಿವೆ. ಮೊದಲನೆಯದಾಗಿ, ಮಳೆಯನ್ನು ಸೆಳೆಯುವ ಕನಿಷ್ಠ ಒತ್ತಡದ ಪ್ರದೇಶಗಳು ಸೃಷ್ಟಿಯಾಗದಿರುವುದು. ಇನ್ನೂ ಎರಡನೆಯದಾಗಿ, ಪೆಸಿಫಿಕ್ ಮಹಾಸಾಗರದಲ್ಲಿ ಮಳೆಯನ್ನು ಕ್ಷೀಣಿಸುವಂತೆ ಮಾಡುವ 'ಎಲ್ ನಿನೋ' ಪ್ರಭಾವ ಎದುರಾಗಿರುವುದು.

ಮೂರನೆಯದಾಗಿ, ಸಮಭಾಜಕ ವೃತ್ತದ ಸುತ್ತ ಚಲಿಸುತ್ತಾ ಮಳೆ ತರುವ ಮೋಡ ಹಾಗೂ ವಿಂಡ್ ವ್ಯವಸ್ಥೆಯಾದ 'ಮ್ಯಾಡೆನ್-ಜುಲಿಯನ್ ಆಸಿಲೇಷನ್' ಪೂರಕವಾಗಿಲ್ಲದಿರುವುದು ಮತ್ತು ನಾಲ್ಕನೆಯದಾಗಿ, ಹಿಂದೂ ಮಹಾಸಾಗರದ ತಾಪಮಾನದ ವ್ಯತ್ಯಾಸವನ್ನು ಸೂಚಿಸುವ 'ಇಂಡಿಯನ್ ಓಷನ್ ಡೈಪೋಲ್' ತಟಸ್ಥ ಸ್ಥಿತಿಯಲ್ಲಿರುವುದು. ಸಾಮಾನ್ಯವಾಗಿ ಈ ಇಂಡಿಯನ್ ಓಷನ್ ಡೈಪೋಲ್ ಧನಾತ್ಮಕವಾಗಿದ್ದಾಗ, ಪಶ್ಚಿಮ ಹಿಂದೂ ಮಹಾಸಾಗರವು ಹೆಚ್ಚು ಬೆಚ್ಚಗಾಗಿ ಮುಂಗಾರು ಮೋಡಗಳಿಗೆ ಭಾರಿ ಪ್ರಮಾಣದ ಮಳೆಯನ್ನು ಒದಗಿಸುತ್ತದೆ, ಆದರೆ ಈ ಬಾರಿ ಅದು ತಟಸ್ಥವಾಗಿದ್ದರಿಂದ ಜೂನ್ ತಿಂಗಳು ಮಳೆಯಿಲ್ಲದೆ ಒಣಗುವಂತಾಯಿತು ಎಂದು ಹವಾಮಾನ ಇಲಾಖೆ ವಿವರಿಸಿದೆ, (ಏಜೆನ್ಸೀಸ್​).