ಅಕ್ರಮ IVF ದಂಧೆ ಬಯಲು: ಅಂಡಾಣು ಸಂಗ್ರಹ–ಮಾರಾಟ ಆರೋಪ! IVF ಬಗ್ಗೆ ಕಾನೂನು ಹೇಳೋದೇನು..?

ತನಿಖೆ ಪ್ರಕಾರ, ಬಡ ಮಹಿಳೆಯರಿಗೆ ಹಣದ ಆಮಿಷವೊಡ್ಡಿ ಅವರನ್ನು IVF ಪ್ರಕ್ರಿಯೆಗೆ ಒಳಪಡಿಸಲಾಗುತ್ತಿತ್ತು. ಮಹಿಳೆಯರಿಗೆ ಹಾರ್ಮೋನ್ ಇಂಜೆಕ್ಷನ್ ನೀಡಿ ಹೆಚ್ಚಿನ ಅಂಡಾಣು ಉತ್ಪಾದನೆ ಮಾಡಿಸಿ, ನಂತರ ಅವನ್ನು ಹೊರತೆಗೆದು ಮಕ್ಕಳಿಲ್ಲದ ದಂಪತಿಗಳಿಗೆ ಲಕ್ಷಾಂತರ ರೂಪಾಯಿಗೆ ಮಾರಾಟ ಮಾಡಲಾಗುತ್ತಿತ್ತು ಎಂದು ಆರೋಪಿಸಲಾಗಿದೆ. ಮಾರ್ಚ್ 6ರಿಂದ ಸ್ಥಳೀಯ ಆಸ್ಪತ್ರೆಗಳ ಮೇಲೆ ನಡೆದ ದಾಳಿಗಳ ವೇಳೆ ಈ ಅಕ್ರಮ ಚಟುವಟಿಕೆಗಳು ಬಹಿರಂಗಗೊಂಡಿವೆ.

ತಜ್ಞರ ಪ್ರಕಾರ, ಇಂತಹ ಪ್ರಕ್ರಿಯೆಗಳು ಮಹಿಳೆಯರ ಆರೋಗ್ಯಕ್ಕೆ ಗಂಭೀರ ಹಾನಿ ಉಂಟುಮಾಡಬಹುದು. ಹೆಚ್ಚುವರಿ ಅಂಡಾಣು ಉತ್ಪಾದನೆಗಾಗಿ ನೀಡುವ ಹಾರ್ಮೋನ್‌ಗಳಿಂದ Ovarian Hyperstimulation Syndrome ಉಂಟಾಗುವ ಸಾಧ್ಯತೆ ಇದೆ. ಜೊತೆಗೆ, ಸರಿಯಾದ ವೈದ್ಯಕೀಯ ಸೌಲಭ್ಯಗಳಿಲ್ಲದೆ ಅಂಡಾಣು ಸಂಗ್ರಹಿಸಿದರೆ ಸೋಂಕು, ಭವಿಷ್ಯದಲ್ಲಿ ಸಂತಾನೋತ್ಪತ್ತಿ ಸಮಸ್ಯೆಗಳು ಎದುರಾಗುವ ಅಪಾಯವೂ ಇದೆ.

ಈ ರೀತಿಯ ಅಕ್ರಮ ಚಟುವಟಿಕೆಗಳು ಹಲವು ಸಿನಿಮಾಗಳಲ್ಲಿ ತೋರಿಸಲ್ಪಟ್ಟಿವೆ. ಉದಾಹರಣೆಗೆ Yashoda ಚಿತ್ರದಲ್ಲಿ ಇಂತಹ ದಂಧೆಯನ್ನೇ ಹೈಲೈಟ್ ಮಾಡಲಾಗಿತ್ತು. ಈಗ ಅದೇ ಮಾದರಿಯ ಘಟನೆ ವಾಸ್ತವದಲ್ಲಿಯೂ ನಡೆಯುತ್ತಿರುವುದು ಜನರಲ್ಲಿ ಆತಂಕ ಹೆಚ್ಚಿಸಿದೆ.

ಭಾರತದಲ್ಲಿ IVF ಹಾಗೂ ಅಂಡಾಣು ಸಂಗ್ರಹಕ್ಕೆ ಕಟ್ಟುನಿಟ್ಟಿನ ನಿಯಮಗಳಿವೆ. Assisted Reproductive Technology (Regulation) Act, 2021 ಪ್ರಕಾರ, ಅಂಡಾಣು ಮಾರಾಟ ಅಥವಾ ಕಳ್ಳಸಾಗಣೆ ಶಿಕ್ಷಾರ್ಹ ಅಪರಾಧ, ಒಬ್ಬ ಮಹಿಳೆಯಿಂದ ಕೇವಲ ಒಂದೇ ಬಾರಿ ಅಂಡಾಣು ಸಂಗ್ರಹಿಸಲು ಅನುಮತಿ, ದಾನಿಯ ವಯಸ್ಸು 23ರಿಂದ 35 ವರ್ಷದೊಳಗಿರಬೇಕು ಅಲ್ಲದೆ, ಪ್ರಕ್ರಿಯೆ ಪಾರದರ್ಶಕ ಹಾಗೂ ಸುರಕ್ಷಿತವಾಗಿರಬೇಕು ಎಂದು ಹೇಳುತ್ತದೆ. ಈ ಪ್ರಕರಣದ ತನಿಖೆ ಮುಂದುವರಿದಿದ್ದು, ಇನ್ನಷ್ಟು ಅಕ್ರಮ IVF ಕೇಂದ್ರಗಳು ಬಯಲಾಗುವ ಸಾಧ್ಯತೆ ಇದೆ,(ಏಜೆನ್ಸೀಸ್​).