ಭಾರತದಲ್ಲಿ ಇರಬೇಕಾದರೆ ವಂದೇ ಮಾತರಂ ಹಾಡಲೇಬೇಕು! ಬಂಗಾಳದ ಮದರಸಾಗಳಲ್ಲೂ ರಾಷ್ಟ್ರೀಯ ಗೀತೆ ಕಡ್ಡಾಯಗೊಳಿಸಿದ ಸಿಎಂ ಸುವೇಂದು! CM Suvendu On Vande Mataram

ವಿಶ್ವವಿದ್ಯಾಲಯಗಳು ಮತ್ತು ಮದರಸಾಗಳಲ್ಲಿ ವಂದೇ ಮಾತರಂ ಕಡ್ಡಾಯಗೊಳಿಸಿರುವ ಸರ್ಕಾರದ ಅಧಿಸೂಚನೆಗೆ ಅಖಿಲ ಭಾರತ ಮುಸ್ಲಿಂ ವೈಯಕ್ತಿಕ ಕಾನೂನು ಮಂಡಳಿ (AIMPLB) ಆತಂಕ ವ್ಯಕ್ತಪಡಿಸಿದೆ. ಮಂಡಳಿಯ ವಕ್ತಾರ ಡಾ. ಎಸ್‌ಕ್ಯೂಆರ್ ಇಲ್ಯಾಸ್ ಪ್ರಕಟಣೆ ಹೊರಡಿಸಿ, ಯಾವುದೇ ವಿದ್ಯಾರ್ಥಿಗೆ ಅವರ ಧಾರ್ಮಿಕ ನಂಬಿಕೆಗೆ ವಿರುದ್ಧವಾದ ಗೀತೆ ಅಥವಾ ಪಠ್ಯವನ್ನು ಬಲವಂತವಾಗಿ ಓದಿಸುವುದು ಸಂವಿಧಾನ ನೀಡಿರುವ ಮೂಲಭೂತ ಹಕ್ಕುಗಳ ಸ್ಪಷ್ಟ ಉಲ್ಲಂಘನೆಯಾಗಿದೆ. ಈ ವಿವಾದಾತ್ಮಕ ಆದೇಶವನ್ನು ತಕ್ಷಣವೇ ಹಿಂಪಡೆಯಬೇಕು ಅಥವಾ ಮುಸ್ಲಿಂ ವಿದ್ಯಾರ್ಥಿಗಳಿಗೆ ಇದರಿಂದ ಕಡ್ಡಾಯ ವಿನಾಯಿತಿ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.

ಮುಸ್ಲಿಂ ಮಂಡಳಿಯ ತೀವ್ರ ಆಕ್ಷೇಪಕ್ಕೆ ತಮ್ಮದೇ ಶೈಲಿಯಲ್ಲಿ ಅತ್ಯಂತ ಖಡಕ್​ ಕೌಂಟರ್ ನೀಡಿರುವ ಸಿಎಂ ಸುವೇಂದು, ಈ ದೇಶದಲ್ಲಿ ಬದುಕಬೇಕಾದರೆ ಪ್ರತಿಯೊಬ್ಬರೂ ವಂದೇ ಮಾತರಂ ಮತ್ತು ಜನ ಗಣ ಮನ ಹಾಡಲೇಬೇಕು. ಜನವರಿ ೨೬ ಮತ್ತು ಆಗಸ್ಟ್ ೧೫ ಅನ್ನು ಗೌರವಿಸಲೇಬೇಕು. ಪ್ರತಿಯೊಂದು ಶಾಲೆಯಲ್ಲೂ ವಂದೇ ಮಾತರಂ ಕಡ್ಡಾಯ. ಇದು ಭಾರತೀಯ ಸಂಸ್ಕೃತಿ, ಇದು ಸನಾತನ ಸಂಸ್ಕೃತಿ. ಈ ದೇಶವನ್ನು ಯಾರದ್ದೋ ಕೈಗೆ ಹೋಗಲು ನಾವು ಬಿಡುವುದಿಲ್ಲ ಎಂದು ಗುಡುಗಿದ್ದಾರೆ.

ಕೇಂದ್ರ ಸಚಿವ ಕಿರಣ್ ರಿಜಿಜು ಕೂಡ ಮುಖ್ಯಮಂತ್ರಿ ನಿರ್ಧಾರವನ್ನು ಬೆಂಬಲಿಸಿದ್ದು, ವಂದೇ ಮಾತರಂ ಇಡೀ ರಾಷ್ಟ್ರಕ್ಕೆ ಸೇರಿದ್ದಾಗಿದ್ದು, ಇದರಲ್ಲಿ ರಾಜಕೀಯ ಮಾಡಲು ಯಾವುದೇ ಅವಕಾಶವಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ಇದೇ ವೇಳೆ, ಕಾಂಗ್ರೆಸ್ ಸಂಸದ ಶಶಿ ತರೂರ್ ಅವರು ವಂದೇ ಮಾತರಂನ ಎಲ್ಲಾ ಐದು ಚರಣಗಳನ್ನು ಅಧಿಕೃತ ಕಾರ್ಯಕ್ರಮಗಳ ಆರಂಭ ಮತ್ತು ಕೊನೆಯಲ್ಲಿ ಹಾಡುವುದನ್ನು ಅಗತ್ಯವಿಲ್ಲದ ಹೊರೆ ಎಂದು ಕರೆದು ಹೊಸ ವಿವಾದ ಸೃಷ್ಟಿಸಿದ್ದಾರೆ.

ಈ ಬಗ್ಗೆ ಕೇರಳದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ತರೂರ್, ಸಾಮಾನ್ಯವಾಗಿ ಮೊದಲ ಒಂದು ಅಥವಾ ಎರಡು ಚರಣಗಳನ್ನು ಎಲ್ಲರೂ ಹಾಡುತ್ತಾರೆ, ಆದರೆ ಪೂರ್ಣ ಆವೃತ್ತಿಯನ್ನು ಕಡ್ಡಾಯಗೊಳಿಸುವುದು ತಪ್ಪು ಎಂದಿದ್ದಾರೆ. ಇದಕ್ಕೆ ತೀವ್ರ ಕೌಂಟರ್ ನೀಡಿರುವ ಕೇರಳ ಬಿಜೆಪಿ ಅಧ್ಯಕ್ಷ ರಾಜೀವ್ ಚಂದ್ರಶೇಖರ್, ಕಾಂಗ್ರೆಸ್ ಪಕ್ಷದ ರಾಷ್ಟ್ರೀಯತೆ ಮತ್ತು ರಾಜಕೀಯವನ್ನು ಮುಸ್ಲಿಂ ಲೀಗ್ ಹಾಗೂ ಎಸ್‌ಡಿಪಿಐ ಮುಂತಾದ ಸಂಘಟನೆಗಳು ನಿಯಂತ್ರಿಸುತ್ತಿವೆ. ಇಂದು ರಾಷ್ಟ್ರೀಯ ಗೀತೆಯನ್ನು ವಿರೋಧಿಸುವವರು ನಾಳೆ ರಾಷ್ಟ್ರಗೀತೆಯನ್ನೂ ವಿರೋಧಿಸುತ್ತಾರೆ ಎಂದು ಚಾಟಿ ಬೀಸಿದ್ದಾರೆ.

ಬಂಕಿಮ ಚಂದ್ರ ಚಟರ್ಜಿ ಅವರು ೧೮೭೦ ರ ದಶಕದಲ್ಲಿ ಬರೆದ ಮತ್ತು ೧೯೫೦ ರಲ್ಲಿ ಭಾರತದ ರಾಷ್ಟ್ರೀಯ ಗೀತೆಯಾಗಿ ಅಂಗೀಕರಿಸಲ್ಪಟ್ಟ ‘ವಂದೇ ಮಾತರಂ’ ಸುತ್ತ ಈಗ ಪಶ್ಚಿಮ ಬಂಗಾಳದಿಂದ ಕೇರಳದವರೆಗೆ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಮಹಾಸಂಗ್ರಾಮ ಸೃಷ್ಟಿಯಾಗಿದೆ,(ಏಜೆನ್ಸೀಸ್​).