ಧೈರ್ಯದಿಂದ ನಿಂತು ಹೋರಾಡಿ, ನಾವು ನಿಮ್ಮೊಂದಿಗಿದ್ದೇವೆ... ಬಾಂಗ್ಲಾ ಹಿಂದೂಗಳಿಗೆ ಮೋಹನ್ ಭಾಗವತ್ ಅಭಯ | Mohan Bhagwat

ಮುಂಬೈನ ವರ್ಲಿಯ ನೆಹರೂ ಕೇಂದ್ರದಲ್ಲಿ ಆರ್‌ಎಸ್‌ಎಸ್ ಶತಮಾನೋತ್ಸವದ ಅಂಗವಾಗಿ ಆಯೋಜಿಸಲಾದ '100 ವರ್ಷಗಳ ಸಂಘ ಪಯಣ: ಹೊಸ ದಿಗಂತಗಳು' ಎಂಬ ಎರಡು ದಿನಗಳ ವ್ಯಾಖ್ಯಾನಮಾಲಾದಲ್ಲಿ ಮಾತನಾಡಿದ ಭಾಗವತ್, ಬಾಂಗ್ಲಾದೇಶದಲ್ಲಿ ಸುಮಾರು 1.25 ಕೋಟಿ ಹಿಂದೂಗಳಿದ್ದಾರೆ. ಅವರು ಅಲ್ಲಿಯೇ ಇದ್ದು ಹೋರಾಡಲು ನಿರ್ಧರಿಸಿದರೆ, ಪ್ರಪಂಚದಾದ್ಯಂತದ ಇರುವ ಎಲ್ಲಾ ಹಿಂದೂಗಳು ಅವರಿಗೆ ಸಹಾಯ ಮಾಡುತ್ತಾರೆ ಎಂದರು.

ಭಾರತ ವಿರೋಧಿ ವಿದ್ಯಾರ್ಥಿ ನಾಯಕ ಷರೀಫ್ ಉಸ್ಮಾನ್ ಹಾದಿ ನಿಧನದ ಬಳಿಕ ಕಳೆದ ಕೆಲವು ತಿಂಗಳುಗಳಿಂದ ಬಾಂಗ್ಲಾದೇಶದಲ್ಲಿ ಅಲ್ಪಸಂಖ್ಯಾತರ ಮೇಲೆ, ವಿಶೇಷವಾಗಿ ಹಿಂದೂಗಳ ಮೇಲೆ ಗುಂಪು ಹಿಂಸಾಚಾರ ಹೆಚ್ಚಾಗಿದೆ. 2024ರ ಆಗಸ್ಟ್ 5 ರಂದು ಜುಲೈ ದಂಗೆ ಎಂದು ಕರೆಯಲ್ಪಡುವ ವಿದ್ಯಾರ್ಥಿಗಳ ನೇತೃತ್ವದ ಆಂದೋಲನದ ಸಂದರ್ಭದಲ್ಲಿ ಮಾಜಿ ಪ್ರಧಾನಿ ಶೇಖ್ ಹಸೀನಾರನ್ನು ಪದಚ್ಯುತಗೊಳಿಸಿದ ನಂತರ ದೇಶಾದ್ಯಂತ ಪ್ರತಿಭಟನೆಗಳು ಭುಗಿಲೆದ್ದು ಅಶಾಂತಿ ಹೆಚ್ಚಾಯಿತು.

ಈ ವೇಳೆ ದೇಶಾದ್ಯಂತ ಹಿಂದೂ ನಾಗರಿಕರನ್ನು ಗುರಿಯಾಗಿಸಿಕೊಂಡು ಹಿಂಸಾತ್ಮಕ ಗುಂಪುಗಳು ದಾಳಿ ನಡೆಸಿದ್ದು, ಉದ್ಯಮಿಗಳು, ಕಾರ್ಮಿಕರು ಮತ್ತು ವಿದ್ಯಾರ್ಥಿಗಳು ಸೇರಿದಂತೆ ಹಲವಾರು ಜನರು ಸಾವನ್ನಪ್ಪಿದ್ದಾರೆ. ಇದು ಅಲ್ಪಸಂಖ್ಯಾತರ ಮೇಲೆ ಸಂಘಟಿತ ದಾಳಿಗಳಾಗಿ ಮಾರ್ಪಟ್ಟಿದೆ.

ದೇಶೀಯ ಸಮಸ್ಯೆಗಳ ಕುರಿತು ಮಾತನಾಡಿದ ಆರ್​​ಎಸ್​​ಎಸ್​ ಮುಖ್ಯಸ್ಥರು, ಹಿಂದಿನ ಸರ್ಕಾರಗಳು ಭಾರತದಲ್ಲಿ ಬದಲಾಗುತ್ತಿರುವ ಜನಸಂಖ್ಯಾ ಚಲನಶೀಲತೆಯನ್ನು ಪರಿಹರಿಸಲು ಸರಿಯಾಗಿ ಕೆಲಸ ಮಾಡಿಲ್ಲ, ಜನನ ಪ್ರಮಾಣ ಮತ್ತು ಅಕ್ರಮ ವಲಸೆ ಈ ಬದಲಾವಣೆಯ ಹಿಂದಿನ ಪ್ರಮುಖ ಕಾರಣಗಳಾಗಿವೆ, ಈಗ ಸರ್ಕಾರ ಕ್ರಮ ಕೈಗೊಳ್ಳಲು ಪ್ರಾರಂಭಿಸಿರುವುದರಿಂದ ಅದು ಯಶಸ್ವಿಯಾಗುತ್ತದೆ ಎಂದು ಭಾಗವತ್ ಹೇಳಿದರು.

ಭಾರತವನ್ನು ಇನ್ನು ಮಂದೆ ಒಡೆಯಲು ಸಾಧ್ಯವಿಲ್ಲ. ಒಂದು ವೇಳೆ ಯಾರಾದರೂ ಆ ಪ್ರಯತ್ನಕ್ಕೆ ಕೈ ಹಾಕಿದರೆ ಅವರು ಅದಕ್ಕೆ ತಕ್ಕ ಉತ್ತರ ಪಡೆಯಲಿದ್ದಾರೆ ಎಂದರು.

ಆರ್​​ಎಸ್​​ಎಸ್​​ ಯಾರ ವಿರೋಧಿಯೂ ಅಲ್ಲ. ಅದಕ್ಕೆ ಯಾವುದೇ ರೀತಿಯ ಅಧಿಕಾರ ಬೇಕಾಗಿಲ್ಲ. ಸಮಾಜವನ್ನು ಒಗ್ಗೂಡಿಸುವುದು ಮಾತ್ರ ಸಂಘದ ಉದ್ದೇಶ ಎಂದಿರುವ ಭಾಗವತ್​, ಸಮಾಜದಲ್ಲಿ ಏಕತೆಯ ಕೊರತೆಯನ್ನು ಗುರುತಿಸಿದ ಬಳಿಕ ಆರ್‌ಎಸ್‌ಎಸ್ ಸಂಸ್ಥಾಪಕ ಡಾ. ಕೇಶವ ಬಲಿರಾಮ್ ಹೆಡ್ಗೆವಾರ್ 1925 ರಲ್ಲಿ ಈ ಸಂಘಟನೆಯನ್ನು ಪ್ರಾರಂಭಿಸಿದರು ಎಂದು ಸ್ಮರಿಸಿಕೊಂಡರು.

ಸಂಘ ಸಾಂಸ್ಥಿಕ, ಕಾರ್ಪೋರೇಟ್​ ಹಣವನ್ನು ಅವಲಂಬಿಸಿಲ್ಲ ಎಂದು ಹೇಳಿದ ಆರ್​ಎಸ್​​ಎಸ್​​ ಮುಖ್ಯಸ್ಥರು, ಜನರು ಸಂಘ ನಿಧಿಗಳ ಬಗ್ಗೆ ಕುತೂಹಲ ಹೊಂದಿದ್ದಾರೆ. ನಾವು ನಮ್ಮ ಕಾರ್ಯಕರ್ತರಿಂದ ಹಣವನ್ನು ಸಂಗ್ರಹಿಸುತ್ತೇವೆ. ನಾವು ಪ್ರಯಾಣಿಸುವಾಗ, ಆಹಾರವನ್ನು ಖರೀದಿಸುವ ಬದಲು ಟಿಫಿನ್ ಕೇಳುತ್ತೇವೆ. ನಾವು ಕಾರ್ಮಿಕರ ಮನೆಗಳಲ್ಲಿಯೇ ಇರುತ್ತೇವೆ, ಹೋಟೆಲ್‌ಗಳಲ್ಲಿ ಅಲ್ಲ ಎಂದು ಹೇಳಿದರು.

ನಾಯಕತ್ವ ಮತ್ತು ಜಾತಿಯ ಬಗ್ಗೆ ಮಾತನಾಡಿದ ಭಾಗವತ್, ಆರ್‌ಎಸ್‌ಎಸ್ ತಾರತಮ್ಯ ಮಾಡುವುದಿಲ್ಲ, ಯಾವುದೇ ಜಾತಿಯ ಯಾರಾದರೂ ಆರ್‌ಎಸ್‌ಎಸ್ ಮುಖ್ಯಸ್ಥರಾಗಬಹುದು. ಎಸ್‌ಸಿ-ಎಸ್‌ಟಿ ಎನ್ನುವುದು ಅನರ್ಹತೆ ಅಲ್ಲ ಮತ್ತು ಬ್ರಾಹ್ಮಣ ಎನ್ನುವುದು ಅರ್ಹತೆಯೂ ಅಲ್ಲ. ಆರ್‌ಎಸ್‌ಎಸ್ ಆರಂಭದಲ್ಲಿ ಬ್ರಾಹ್ಮಣರೊಂದಿಗೆ ಪ್ರಾರಂಭವಾದರೂ, ನಾವು ಎಲ್ಲಾ ಜಾತಿಗಳಿಗಾಗಿ ಕೆಲಸ ಮಾಡುತ್ತೇವೆ ಎಂದರು(ಏಜೆನ್ಸೀಸ್​​).