ಖಾಸಗಿ ಅಂಗ ಕಾಣುವಂತೆ ಕದ್ದು ಮುಚ್ಚಿ ವಿಡಿಯೋ ರೆಕಾರ್ಡ್​... ಮಿಸ್ ಕೇರಳ ಫಿಟ್‌ನೆಸ್ ಆರತಿ ಕೃಷ್ಣ ಆಕ್ರೋಶ! Aarti Krishna

Aarti Krishna : ಸೋಶಿಯಲ್​ ಮೀಡಿಯಾ ಇನ್​ಫ್ಲ್ಯುಯೆನ್ಸರ್​ ಮತ್ತು ಮಿಸ್ ಕೇರಳ ಫಿಟ್‌ನೆಸ್ ವಿಜೇತೆ ಆರತಿ ಕೃಷ್ಣ, ಮಲಯಾಳಿಗಳಿಗೆ ಚಿರಪರಿಚಿತ ಮುಖ. ಸಾಮಾಜಿಕ ಜಾಲತಾಣ ಬಳಸುವವರಿಗೂ ಆಕೆಯ ಪರಿಚಯ ಇದ್ದೇ ಇರುತ್ತದೆ. ತಮ್ಮ ಫಿಟ್​ಸೆಸ್​ನಿಂದಾಗಿ ಎಲ್ಲರ ಮೆಚ್ಚುಗೆಗೆ ಪಾತ್ರರಾಗಿರುವ ಆರತಿ ಕೃಷ್ಣ, ಇದೀಗ ತಮ್ಮ ವೃತ್ತಿಜೀವನ ಮತ್ತು ವೈಯಕ್ತಿಕ ಜೀವನವನ್ನು ಹಾಳುಮಾಡುತ್ತಿರುವ ಸೈಬರ್ ದಾಳಿಗೆ ಗುರಿಯಾಗಿರುವುದಾಗಿ ಹೇಳಿದ್ದಾರೆ.

ಸಾರ್ವಜನಿಕ ಸ್ಥಳಗಳಲ್ಲಿ ಡ್ರೆಸ್ಸಿಂಗ್ ಮಾಡುವಾಗ ಉಂಟಾಗುವ ಸಣ್ಣ ನಿರ್ಲಕ್ಷ್ಯವನ್ನು ಸಹ ಕದ್ದು ಮುಚ್ಚಿ ವಿಡಿಯೋ ರೆಕಾರ್ಡ್​ ಮಾಡಿ ಲೈಂಗಿಕ ನಿಂದನೆಯೊಂದಿಗೆ ಪ್ರಸಾರ ಮಾಡಲಾಗುತ್ತಿದೆ. ಇದಿಷ್ಟೇ ಅಲ್ಲದೆ, ನನ್ನ ಮಾತುಗಳನ್ನು ತಿರುಚಿ, ಡಬಲ್​ ಮೀನಿಂಗ್​ ಬರುವಂತೆ ಮಾಡಿ ಅವಮಾನಿಸಲಾಗುತ್ತಿದೆ ಎಂದು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿರುವ ವಿಡಿಯೋದಲ್ಲಿ ಆರತಿ ಹೇಳಿಕೊಂಡಿದ್ದಾರೆ. ತಮ್ಮ ಫಾಲೋವರ್ಸ್​ ಸಂಖ್ಯೆಯನ್ನು ಹೆಚ್ಚಿಸಿಕೊಳ್ಳುವ ಸಲುವಾಗಿ ಹುಡುಗಿಯರ ಘನತೆಯನ್ನು ಮಾರಾಟ ಮಾಡುವ ಈ ಕೆಟ್ಟ ಟ್ರೆಂಡ್​ ಅನ್ನು ಕೊನೆಗೊಳಿಸಬೇಕೆಂದು ಆರತಿ ಒತ್ತಾಯಿಸಿದ್ದಾರೆ.

ನಾನು ಈ ವಿಡಿಯೋವನ್ನು ತುಂಬಾ ದುಃಖದಿಂದ ಮಾಡುತ್ತಿದ್ದೇನೆ. ನಾನು ಅಥಣಿಯಲ್ಲಿ ಒಂದು ಕಾರ್ಯಕ್ರಮಕ್ಕೆ ಹೋಗಿದ್ದೆ. ಆ ಕಾರ್ಯಕ್ರಮದ ನಂತರ, ಕೆಲವು ಕೆಟ್ಟ ವಿಡಿಯೋಗಳನ್ನು ನೋಡಿದೆ. ನಾನು ಯಾವುದೇ ಕಾರ್ಯಕ್ರಮಕ್ಕೆ ಹೋದಾಗ, ಎಲ್ಲಾ ಮಾಧ್ಯಮಗಳಿಗೆ ಕದ್ದುಮುಚ್ಚಿ ರೆಕಾರ್ಡ್​ ಮಾಡಬೇಡಿ ಎಂದು ಹೇಳುತ್ತೇನೆ. ಈ ವಿಚಾರದಲ್ಲಿ ಮಾಧ್ಯಮಗಳು ನನಗೆ ಹೆಚ್ಚಿನ ಬೆಂಬಲ ನೀಡಿವೆ. ನಾನು ಇಂದು ಇಲ್ಲಿ ನಿಂತಿದ್ದರೆ, ಅದರಲ್ಲಿ ಮಾಧ್ಯಮಗಳ ಪಾತ್ರವು ಪ್ರಮುಖವಾಗಿದೆ. ಅವರ ಬಗ್ಗೆ ನನಗೆ ಅಪಾರ ಗೌರವ ಮತ್ತು ಕೃತಜ್ಞತೆ ಇದೆ. ಆದರೆ ಕಳೆದ ಕಾರ್ಯಕ್ರಮದ ವಿಡಿಯೋ ಹೊರಬಂದಾಗ, ನನಗೆ ತಿಳಿಯದೆಯೇ ನನ್ನನ್ನು ಬೇರೆ ರೀತಿಯ ವರ್ಗಕ್ಕೆ ಸೇರಿಸಲಾಗುತ್ತಿದೆ ಎಂದು ಭಾಸವಾಯಿತು. ಆದರೆ, ನಾನು ಆ ರೀತಿಯ ವ್ಯಕ್ತಿಯಲ್ಲ. ನನ್ನ ಆ ರೀತಿಯ ವ್ಯಕ್ತಿ ಎಂದು ಬಿಂಬಿಸುವ ಪ್ರಯತ್ನ ಮಾಡಬೇಡಿ ಎಂದು ಎಲ್ಲ ಯೂಟ್ಯೂಬರ್‌ಗಳಿಗೆ ಹೇಳುತ್ತಿದ್ದೇನೆ ಎಂದು ಆರತಿ ತಿಳಿಸಿದ್ದಾರೆ.

ನಾನು ಯಾವುದೇ ಕೊಲಾಬರೇಷನ್​ ಮಾಡುವುದಿಲ್ಲ. ವಿದೇಶಿ ಮಹಿಳೆಯೊಬ್ಬರು ನನಗೆ ಕೆಲವು ಬಟ್ಟೆಗಳನ್ನು ಉಡುಗೊರೆಯಾಗಿ ನೀಡಿದರು. ನನಗೆ, ಕಾರ್ಯಕ್ರಮಕ್ಕೆ ಬಂದಾಗ ಬಟ್ಟೆಗಳನ್ನು ಹೊಂದಿಸುವುದೇ ಒಂದು ದೊಡ್ಡ ಸವಾಲಾಗಿದೆ. ನಮಗೆ ಅಂತಹ ಉಡುಪನ್ನು ಉಡುಗೊರೆಯಾಗಿ ಪಡೆದಾಗ, ನಿಜಕ್ಕೂ ಅದೊಂದು ದೊಡ್ಡ ವಿಷಯ. ನಾವು ಉಡುಪುಗಳ ಸಂಗ್ರಹವನ್ನು ಪಡೆದಾಗ, ನಮಗೆ ಸೂಕ್ತವಾದದನ್ನು ಆಯ್ಕೆ ಮಾಡುವುದು ತುಂಬಾನೇ ಕಷ್ಟ. ಕೆಲವು ಬಟ್ಟೆಗಳು ನಮ್ಮ ದೇಹಕ್ಕೆ ಸರಿಹೊಂದುವುದಿಲ್ಲ. ಕೆಲವು ಬಟ್ಟೆಗಳು ತುಂಬಾ ಡಿಪ್​ ನೆಕ್​ ಹೊಂದಿರಬಹುದು. ಇಂತಹ ಸಂದರ್ಭದಲ್ಲಿ ನಾವು ಸಣ್ಣ ವಿಷಯ ಎಂದು ಭಾವಿಸಿ ಆ ಬಟ್ಟೆಗಳನ್ನು ಬಳಸಬಹುದು. ನಾವು ಒಂದೇ ಸಮಯದಲ್ಲಿ ಅನೇಕ ವಿಷಯಗಳತ್ತ ಗಮನ ಹರಿಸಿದಾಗ, ಕೆಲವೊಮ್ಮೆ ನಮಗೆ ಬಟ್ಟೆಗಳನ್ನು ನಿರ್ವಹಿಸಲು ನಮಗೆ ಸಾಧ್ಯವಾಗುವುದಿಲ್ಲ. ಕೆಲವೊಮ್ಮೆ ನಾವು ಬಾಗಿದಾಗ, ಬಟ್ಟೆಯು ಕುತ್ತಿಗೆ ಕೆಳಗೆ ಬೀಳಬಹುದು. ಇದರಿಂದ ಎದೆ ಸೀಳು ಕಾಣಬಹುದು. ನಾವು ಯಾವಾಗಲೂ ಎಲ್ಲವನ್ನೂ ನೋಡಿಕೊಳ್ಳಲು ಸಾಧ್ಯವಿಲ್ಲ ಎಂದು ಆರತಿ ಬೇಸರದಿಂದ ಹೇಳಿದ್ದಾರೆ.

ನಾನು ಇನ್ನೊಂದು ದಿನ ಭಾಗವಹಿಸಿದ್ದ ಕಾರ್ಯಕ್ರಮದಲ್ಲಿ ಕಪ್ಪು ಉಡುಪನ್ನು ಧರಿಸಿದ್ದೆ. ಅಲ್ಲಿಯೂ ಇದೇ ರೀತಿ ಬಟ್ಟೆ ಸ್ವಲ್ಪ ಮೇಲೆ ಕೆಳಗೆ ಆಗಿತ್ತು. ಅನೇಕ ಯೂಟ್ಯೂಬರ್‌ಗಳು ವಿಡಿಯೋವನ್ನು ಹಂಚಿಕೊಂಡರು. ಆ ವಿಡಿಯೋ ನೋಡಿದ ಅನೇಕ ಜನರು ಅದನ್ನು ನನಗೆ ಕಳುಹಿಸುತ್ತಿದ್ದಾರೆ. ನಾನು, ನನ್ನ ಕುಟುಂಬ, ನನ್ನ ತಾಯಿ ಮತ್ತು ನನ್ನ ಸುತ್ತಮುತ್ತಲಿನ ಜನರು ಮಾತ್ರ ಇದನ್ನು ನೋಡುತ್ತಿದ್ದಾರೆ. ಇದನ್ನು ನೋಡಿ ನನ್ನ ತಾಯಿ ತುಂಬಾ ಅಸಮಾಧಾನಗೊಂಡಿರಬೇಕು. ಆದರೆ, ನಾನು ಅಂತಹವಳಲ್ಲ ಅನ್ನೋದು ನನ್ನ ತಾಯಿಗೆ ಸ್ಪಷ್ಟವಾಗಿ ತಿಳಿದಿದೆ ಎಂದ ಆರತಿ, ಈ ವಿಚಾರವಾಗಿ ಏನು ಮಾಡಬೇಕೆಂದು ನನಗೆ ತಿಳಿಯುತ್ತಿಲ್ಲ ಅಂತ ಬೇಸರ ಹೊರಹಾಕಿದರು, (ಏಜೆನ್ಸೀಸ್​).