ಹುಂಡಿಯಲ್ಲಿ ಸಿಕ್ಕಿತು ಭಕ್ತನ ವಿಚಿತ್ರ ಕೋರಿಕೆಯ ಪತ್ರ! ಅದರಲ್ಲಿದ್ದ ವಿಷಯ ಕೇಳಿ ಪೂಜಾರಿಯೇ ಗಪ್​ಚುಪ್; ಹೀಗೂ ಉಂಟು​​

ಆಂಧ್ರಪ್ರದೇಶ: ದೇವಸ್ಥಾನ ಎಂದಮೇಲೆ ಭಕ್ತರು ಸಾಮಾನ್ಯ. ಭಕ್ತಾಧಿಗಳು ಎಂದಾಗ ದೇವರಲ್ಲಿ ಕೋರಿಕೆ, ಬೇಡಿಕೆ ಇನ್ನೂ ಸಾಮಾನ್ಯ. ಹೀಗಿರುವಾಗ, ದೇವಾಲಯಕ್ಕೆ ಬರುವ ಜನರು, ತಮ್ಮ ಕಷ್ಟಗಳನ್ನು ನಿವಾರಿಸು ಎಂದು ಕೈಲಾದಷ್ಟು ಕಾಣಿಕೆಯನ್ನು ಹುಂಡಿಗೆ ಹಾಕಿ ಹೋಗುತ್ತಾರೆ. ಇದು ನಮ್ಮ ಭಾರತೀಯ ಹಿಂದೂ ಸಂಪ್ರದಾಯಗಳಲ್ಲಿ ಒಂದು. ಕೆಲವರು ಚಿನ್ನಾಭರಣ, ಹಣವನ್ನು ಅರ್ಪಿಸಿದರೆ, ಇನ್ನೂ ಕೆಲವರು ತಮ್ಮಲ್ಲಿರುವ ಬೆಲೆಬಾಳುವ ವಸ್ತುಗಳನ್ನು ಕಾಣಿಕೆಯ ರೂಪದಲ್ಲಿ ಹಾಕುತ್ತಾರೆ. ಆದ್ರೆ, ಇಲ್ಲೊಬ್ಬ ಭೂಪ ಮಾತ್ರ, ದೇವರಿಗೆ ತನ್ನ ಬೇಡಿಕೆಗಳನ್ನು ಈಡೇರಿಸಿದರೆ ಏನೋ ಕೊಡುತ್ತೇನೆ ಎಂದು ಪತ್ರದ ಮೂಲಕ ಡಿಮಾಂಡ್​ ಮಾಡಿರುವ ಘಟನೆ ಹುಂಡಿಕೆಯ ಎಣಿಕೆಯ ವೇಳೆ ಬೆಳಕಿಗೆ ಬಂದಿದೆ.

ಸಮಸ್ಯೆಗಳಿಂದ ಹೊರಬಂದರೆ ಅಥವಾ ಮುಕ್ತನಾದರೆ ಕಾಣಿಕೆ ಅಥವಾ ಉಡುಗೊರೆಗಳನ್ನು ನೀಡುವ ಖಯಾಲಿ ನಮ್ಮಲ್ಲೇ ಹೆಚ್ಚು. ಆದರೆ, ಎಲೂರು ಜಿಲ್ಲೆಯ ಭಕ್ತ ಮಾತ್ರ ಎಲ್ಲರಿಗಿಂತ ಒಂದು ಹೆಜ್ಜೆ ಮುಂದೆ ಹೋಗಿ, ದೇವರೇ, ನೀನು ನಾನು ಕೇಳಿದ್ದನ್ನು ಈಡೇರಿಸಿದರೆ, ನಾನು ನಿನಗೇನು ಬೇಕೋ ಅದನ್ನ ಮಾಡುತ್ತೇನೆ" ಎಂದು ತಿಳಿಸಿದ್ದಾನೆ. ಜಂಗಾರೆಡ್ಡಿಗುಡೆಮ್ ಮಂಡಲದ ತಡುವಾಯಿ ಗ್ರಾಮದಲ್ಲಿರುವ ಶ್ರೀ ಭದ್ರಕಾಳಿ ವೀರೇಶ್ವರ ಸ್ವಾಮಿ ದೇವಸ್ಥಾನದಲ್ಲಿ ಮಹಾಶಿವರಾತ್ರಿ ಆಚರಣೆಯ ಬಳಿಕ ಹುಂಡಿಯನ್ನು ಎಣಿಸುತ್ತಿದ್ದ ದೇಗುಲ ಮಂಡಳಿಗೆ, ವಿದ್ಯಾರ್ಥಿ ಬರೆದ ವಿಚಿತ್ರ ಪತ್ರ ಈಗ ನಗುವುದೋ, ಅಳುವುದೋ ನೀವೇ ಹೇಳಿ ಎನ್ನುವಂತೆ ಮಾಡಿದೆ.

ವಿದ್ಯಾರ್ಥಿ ಬರೆದಿದ್ದಾನೆ ಎನ್ನಲಾದ ಪತ್ರದಲ್ಲಿ, ನನಗೆ ವರ್ಷಕ್ಕೆ 20 ಲಕ್ಷ ರೂ. ಪ್ಯಾಕೇಜ್‌ ಇರುವ ಕೆಲಸ ಕೊಡಿಸು ಮತ್ತು ಈಗಷ್ಟೇ ಮುಗಿಸಿರುವ ಪರೀಕ್ಷೆಗಳಲ್ಲಿ 9 ಸಿಜಿಪಿಎ (ಶೇ.85ರಿಂದ 86ರಷ್ಟು) ಶ್ರೇಣಿ ಅಂಕ ಬೇಕು. ನೀನು, ನಾನು ಕೇಳಿದ್ದನ್ನು ಈಡೇರಿಸಿದರೆ, ನಿನಗೆ ಅಭಿಷೇಕ ಮಾಡಿಸಿ, ಹೊಸ ಬಟ್ಟೆಗಳನ್ನು ಅರ್ಪಿಸುವೆ. ಅದು ನನ್ನ ಈ ಆಸೆಗಳು ಈಡೇರಿದರೆ ಮಾತ್ರ ಎಂದು ಬರೆದಿದ್ದಾನೆ. ಇದನ್ನು ಓದಿದ ದೇಗುಲ ಮಂಡಳಿ ಹಾಗೂ ಪೂಜಾರಿ ಒಂದು ನಿಮಿಷ ಅಚ್ಚರಿಗೆ ಒಳಗಾಗಿದ್ದಾರೆ.

ಸದ್ಯ ಈ ಪತ್ರ ಸೋಷಿಯಲ್ ಮೀಡಿಯಾದಲ್ಲಿ ಭಾರೀ ವೈರಲ್ ಆಗಿದ್ದು, ವಿಚಿತ್ರವಾಗಿ ಲಿಖಿತ ರೂಪದಲ್ಲಿ ಇಂತಹ ಬೇಡಿಕೆ. ಆಸೆಗಳನ್ನು ಕೇಳಿಕೊಂಡ ಭಕ್ತನ ಬಗ್ಗೆ ನೆಟ್ಟಿಗರಿಂದ ಮಿಶ್ರ ಅಭಿಪ್ರಾಯಗಳು ವ್ಯಕ್ತವಾಗುತ್ತಿವೆ. ಹಿಂದೂ ಸಂಪ್ರದಾಯದಲ್ಲಿ, ತೆಂಗಿನಕಾಯಿ ಒಡೆಯುವುದರಿಂದ ಹಿಡಿದು ದೇವರಿಗೆ ದಾನ ನೀಡುವವರೆಗೆ, ಎಲ್ಲದರ ಹಿಂದೆಯೂ ಆಳವಾದ ಅರ್ಥವಿದೆ. ಹಿಂದಿನ ತಲೆಮಾರಿನವರು ಇಂದಿಗೂ ಇದನ್ನು ಬಹಳ ಶಿಸ್ತಿನಿಂದ ಪಾಲಿಸಿಕೊಂಡು ಬರುತ್ತಿದ್ದಾರೆ. ಆದ್ರೆ, ಪ್ರಸ್ತುತ 'ಜೆನ್​ಝಯಿ' ಪೀಳಿಗೆ ಮಾತ್ರ ಇಂತಹ ಹುಚ್ಚಾಟದಲ್ಲಿ ಹೆಚ್ಚು ಸಕ್ರಿಯವಾಗಿದೆ ಎಂಬುದಲ್ಲಿ ಅನುಮಾನವೇ ಇಲ್ಲ,(ಏಜೆನ್ಸೀಸ್).