ಅಮೆರಿಕದ ಕೇಂದ್ರ ಬ್ಯಾಂಕ್ ಆದ ಫೆಡರಲ್ ರಿಸರ್ವ್‌ನ ಅಧ್ಯಕ್ಷ ಸ್ಥಾನಕ್ಕೆ 'ಹಾಕಿಶ್' (Hawkish) ಅಂದರೆ ಬಡ್ಡಿ ದರ ಏರಿಕೆಗೆ ಒತ್ತು ನೀಡುವ ವ್ಯಕ್ತಿ ನೇಮಕವಾಗಬಹುದು ಎಂಬ ಸುದ್ದಿ ಮಾರುಕಟ್ಟೆಯಲ್ಲಿ ಸಂಚಲನ ಮೂಡಿಸಿದೆ. ಒಂದು ವೇಳೆ ಬಡ್ಡಿ ದರಗಳು ಹೆಚ್ಚಾದರೆ, ಡಾಲರ್ ಮೌಲ್ಯ ಬಲಗೊಳ್ಳುತ್ತದೆ ಮತ್ತು ಚಿನ್ನದ ಮೇಲಿನ ಹೂಡಿಕೆಯ ಆಕರ್ಷಣೆ ಕಡಿಮೆಯಾಗುತ್ತದೆ. ಈ ಆತಂಕದಿಂದಾಗಿ ಹೂಡಿಕೆದಾರರು ಭಾರಿ ಪ್ರಮಾಣದಲ್ಲಿ ಲಾಭವನ್ನು ನಗದೀಕರಿಸಿಕೊಳ್ಳುತ್ತಿದ್ದಾರೆ (Profit Booking) ಎಂದು ವರದಿ ಉಲ್ಲೇಖಿಸಿದೆ. 

ಶುಕ್ರವಾರದ ಕುಸಿತದ ಹೊರತಾಗಿಯೂ, ಚಿನ್ನವು ಕಳೆದ 40 ವರ್ಷಗಳಲ್ಲೇ ಅತ್ಯುತ್ತಮ ಮಾಸಿಕ ಪ್ರಗತಿಯನ್ನು ದಾಖಲಿಸುವ ಹಾದಿಯಲ್ಲಿದೆ. ಜಗತ್ತಿನಾದ್ಯಂತ ಕಂಡುಬರುತ್ತಿರುವ ಭೌಗೋಳಿಕ ಮತ್ತು ರಾಜಕೀಯ ಉದ್ವಿಗ್ನತೆಗಳು (Geopolitical strains) ಹಾಗೂ ಆರ್ಥಿಕ ಅಸ್ಥಿರತೆಯಿಂದಾಗಿ ಹೂಡಿಕೆದಾರರು ಚಿನ್ನವನ್ನು ಸುರಕ್ಷಿತ ಹೂಡಿಕೆ ಎಂದು ಪರಿಗಣಿಸಿದ್ದರು. ಈ ಕಾರಣದಿಂದಾಗಿ ಜನವರಿ ತಿಂಗಳಲ್ಲಿ ಚಿನ್ನವು 1980ರ ನಂತರದ ಅತಿ ದೊಡ್ಡ ಮಾಸಿಕ ಲಾಭವನ್ನು ತನ್ನದಾಗಿಸಿಕೊಳ್ಳುತ್ತಿದೆ.

ವದಂತಿಗಳ ಬೆನ್ನಲ್ಲೇ ಅಮೆರಿಕದ ಡಾಲರ್ ಮೌಲ್ಯ ಹೆಚ್ಚಾಗಿದ್ದು, ಇತರ ಕರೆನ್ಸಿ ಹೊಂದಿರುವವರಿಗೆ ಚಿನ್ನದ ಖರೀದಿ ದುಬಾರಿಯಾಗಿದೆ. ಆರ್ಥಿಕ ಅಸ್ಥಿರತೆ ಇದ್ದರೂ ಕೇಂದ್ರ ಬ್ಯಾಂಕ್‌ಗಳ ಕಠಿಣ ಕ್ರಮಗಳು ಹೂಡಿಕೆದಾರರನ್ನು ಚಿನ್ನದಿಂದ ದೂರ ಸರಿಯುವಂತೆ ಮಾಡಬಹುದು ಎಂಬ ಚರ್ಚೆ ಶುರುವಾಗಿದೆ. ಭಾರತೀಯ ಮಾರುಕಟ್ಟೆ ವಿಷಯಕ್ಕೆ ಬರುವುದಾರೆ ಅಂತರಾಷ್ಟ್ರೀಯ ಬೆಲೆ ಇಳಿಕೆಯ ನೇರ ಪರಿಣಾಮ ಭಾರತದ ಎಂಸಿಎಕ್ಸ್ (MCX) ಮಾರುಕಟ್ಟೆಯ ಮೇಲೂ ಉಂಟಾಗಿದ್ದು, ಸ್ಥಳೀಯವಾಗಿ ಆಭರಣ ಚಿನ್ನದ ಬೆಲೆ ಕೂಡ ಇಳಿಕೆಯ ಹಾದಿ ಹಿಡಿದಿದೆ.

"ಜಾಗತಿಕ ಆರ್ಥಿಕ ಬಿಕ್ಕಟ್ಟಿನ ಸಮಯದಲ್ಲಿ ಚಿನ್ನವು ಯಾವಾಗಲೂ ರಕ್ಷಣಾತ್ಮಕ ಕವಚವಾಗಿ ಕೆಲಸ ಮಾಡುತ್ತದೆ. ಆದರೆ ಬಡ್ಡಿ ದರಗಳ ಬದಲಾವಣೆಯ ಮುನ್ಸೂಚನೆಯು ಮಾರುಕಟ್ಟೆಯಲ್ಲಿ ಇಂತಹ ಕ್ಷಣಿಕ ಏರಿಳಿತಗಳನ್ನು ತರುವುದು ಸಹಜ," ಎಂದು ಮಾರುಕಟ್ಟೆ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲಿನ ಬೆಳವಣಿಗೆಗಳ ಪರಿಣಾಮವಾಗಿ ಭಾರತದ ಪ್ರಮುಖ ನಗರಗಳಲ್ಲಿ ಚಿನ್ನದ ಬೆಲೆ ಗ್ರಾಮ್‌ಗೆ ಸುಮಾರು 750 ರಿಂದ 820 ರೂಪಾಯಿಗಳವರೆಗೆ ಇಳಿಕೆಯಾಗಿದೆ.

24 ಕ್ಯಾರೆಟ್ (ಅಪರಂಜಿ)                           17,062 ರೂ.                                823 ↓

22 ಕ್ಯಾರೆಟ್ (ಆಭರಣ)                             15,640 ರೂ.                                755 ↓

18 ಕ್ಯಾರೆಟ್                                           12,797 ರೂ.                               617 ↓

ಚಿನ್ನದ ಹಾದಿಯಲ್ಲೇ ಸಾಗಿರುವ ಬೆಳ್ಳಿ ಬೆಲೆಯೂ ಇಂದು ಗಮನಾರ್ಹವಾಗಿ ತಗ್ಗಿದೆ. ಬೆಂಗಳೂರಿನಲ್ಲಿ ಪ್ರತಿ 1 ಕೆಜಿ ಬೆಳ್ಳಿಯ ದರವು ಸುಮಾರು 3,95,000 ತಲುಪಿದ್ದು, ಹೂಡಿಕೆದಾರರಲ್ಲಿ ಆಶ್ಚರ್ಯ ಮೂಡಿಸಿದೆ.

ಅಮೆರಿಕದ ಫೆಡರಲ್ ರಿಸರ್ವ್‌ನ ಮುಂದಿನ ಅಧ್ಯಕ್ಷರ ನೇಮಕಾತಿ ಕುರಿತಾದ ವದಂತಿಗಳು ಮತ್ತು ಜಾಗತಿಕ ಮಾರುಕಟ್ಟೆಯಲ್ಲಿ ಡಾಲರ್ ಮೌಲ್ಯ ಸ್ಥಿರತೆ ಪಡೆದುಕೊಳ್ಳುತ್ತಿರುವುದು ಈ ದಿಢೀರ್ ಇಳಿಕೆಗೆ ಮುಖ್ಯ ಕಾರಣ ಎಂದು ಮಾರುಕಟ್ಟೆ ತಜ್ಞರು ವಿಶ್ಲೇಷಿಸಿದ್ದಾರೆ. ನಿನ್ನೆ ದಾಖಲೆ ಮಟ್ಟಕ್ಕೆ ಏರಿದ್ದ ಬೆಲೆ ಇಂದು ಇಳಿಕೆಯಾಗಿರುವುದು ಆಭರಣ ಖರೀದಿದಾರರಿಗೆ ತುಸು ಸಮಾಧಾನ ತಂದಿದೆ,(ಏಜೆನ್ಸೀಸ್​).