ಸಂಜಯ್​ ಗಾಂಧಿ ಆಸ್ಪತ್ರೆಯಲ್ಲಿ ಭಾರೀ ಯಡವಟ್ಟು: ನಾಯಿ ಕಚ್ಚಿದೆ ಎಂದು ಆಸ್ಪತ್ರೆಗೆ ಹೋದವನಿಗೆ ಹಾವು ಕಡಿತದ ಇಂಜೆಕ್ಷನ್! Sanjay Gandhi Hospital

ರೀವಾ: ನಾಯಿ ಕಚ್ಚಿದೆ ಎಂದು ಆಸ್ಪತ್ರೆಗೆ ಚಿಕಿತ್ಸೆಗೆ ತೆರಳಿದ್ದ ರೋಗಿಗೆ ಹಾವು ಕಚ್ಚಿದಾಗ ನೀಡುವ ಇಂಜೆಕ್ಷನ್​ ಕೊಟ್ಟಿರುವ ಘಟನೆ, ಮಧ್ಯಪ್ರದೇಶದ ರೀವಾದಲ್ಲಿರುವ ಸಂಜಯ್​ ಗಾಂಧಿ ಆಸ್ಪತ್ರೆ (Sanjay Gandhi Hospital) ಯಲ್ಲಿ ನಡೆದಿದ್ದು, ಜನರ ಆಕ್ರೋಶಕ್ಕೆ ಕಾರಣವಾಗಿದೆ.

ಈ ಮೂಲಕ ಆಸ್ಪತ್ರೆಯಲ್ಲಿ ರೋಗಿಗಳ ಮೇಲೆ ಎಷ್ಟು ನಿಗಾ ವಹಿಸಲಾಗುತ್ತಿದೆ ಎನ್ನುದಕ್ಕೆ ಹಿಡಿದ ಕನ್ನಡಿಯಾಗಿದೆ ಎಂದು ಸಾರ್ವಜನಿಕರು ಆಸ್ಪತ್ರೆ ವಿರುದ್ಧ ಕಿಡಿ ಕಾರುತ್ತಿದ್ದಾರೆ.

ಮಾಹಿತಿ ಪ್ರಕಾರ, ಆಯುಶ್​ ಸಿಂಗ್​ ಎಂಬಾತನಿಗೆ ಶನಿವಾರ (ಸೆ. 5) ರಂದು ಮನೆಯ ಬಳಿ ನಾಯಿಯೊಂದು ಕಚ್ಚಿದೆ. ಕೂಡಲೇ ಆಯುಶ್​ ಸಂಜಯ್ ಗಾಂಧಿ ಆಸ್ಪತ್ರೆಗೆ ದಾಖಲಾಗಿದ್ದು, ತಮ್ಮ ಸಮಸ್ಯೆಯನ್ನು ವೈದ್ಯರಿಗೆ ತಿಳಿಸಿದ್ದಾರೆ.

ಆದರೆ ವೈದ್ಯರು, ನಾಯಿ ಕಡಿತಕ್ಕೆ ನೀಡಬೇಕಾದ ಮದ್ದನ್ನು ನೀಡುವ ಬದಲು, ಹಾವು ಕಡಿದಾಗ ನೀಡುವ ಇಂಜೆಕ್ಷನ್​ಅನ್ನು ಆಯುಶ್​ನಿಗೆ ಕೊಟ್ಟಿದ್ದಾರೆ. ಅಸ್ಪತ್ರೆಯಿಂದ ಆಚೆ ಬರುವಾಗ, ಆಯುಶ್​​ಗೆ, ತನಗೆ ನಾಯಿ ಬದಲು ಹಾವಿನ ಕಡಿತಕ್ಕೆ ನೀಡುವ ಇಂಜೆಕ್ಷನ್​ ನೀಡಿರುವ ಬಗ್ಗೆ ತಿಳಿದಿದೆ. ಕೂಡಲೇ ಆಯುಶ್​ ಆಸ್ಪತ್ರೆ ಸಿಬ್ಬಂದಿಗಳ ಜೊತೆ ಜಗಳಕ್ಕೆ ನಿಂತಿದ್ದಾರೆ.

ನನಗೆ ನಾಯಿ ಕಡಿದಿದೆ ಎಂದು ಆಸ್ಪತ್ರೆಗೆ ಬಂದರೆ ಹಾವಿನ ಕಡಿತಕ್ಕೆ ನೀಡುವ ಇಂಜೆಕ್ಷನ್​ ನೀಡಿದ್ದಿರಾ? ನಿಮಗೇನು ಬುದ್ಧಿ ಇಲ್ಲವಾ? ನಾನು ಸತ್ತು ಹೋದರೆ ಯಾರು ಹೊಣೆ? ನಾನು ಆಸ್ಪತ್ರೆ ವಿರುದ್ಧ ದೂರನ್ನು ದಾಖಲಿಸುತ್ತೇನೆಂದು ಆಯುಶ್​ ಕೂಗಾಡಿದ್ದಾರೆ. ಮತ್ತು ದೂರನ್ನು ಕೂಡ ನೀಡುವುದಾಗಿ ಮಾಧ್ಯಮದವರೊಂದಿಗೆ ಮಾಹಿತಿ ಹಂಚಿಕೊಂಡಿದ್ದಾರೆ.

ಆದರೆ, ಆಸ್ಪತ್ರೆಯವರು, ಆಯುಶ್​ ಸರಿಯಾಗಿ ಮಾಹಿತಿ ನೀಡಲಿಲ್ಲ. ಹೀಗಾಗಿ ಈ ರೀತಿ ಯಾಗಿದೆ ಎಂದು ಸಮಜಾಯಿಷಿ ನೀಡಲು ಮುಂದಾಗಿದ್ದಾರೆ. ಸದ್ಯ ಆಯುಶ್​ನ ಆರೋಗ್ಯದಲ್ಲಿ ಏನು ಸಮಸ್ಯೆ ಕಂಡು ಬಂದಿಲ್ಲವಾದರೂ, ಇದೊಂದು ಗಂಭೀರ ಸ್ವರೂಪದ ಅಪರಾಧವಾಗಿದೆ, (ಏಜನ್ಸೀಸ್).