10000 ರೂ. ಹೆಚ್ಚಳ, ಕಡೆಗೂ 3 ಲಕ್ಷ ಗಡಿದಾಟಿದ ಬೆಳ್ಳಿ! 2025ರಲ್ಲಿ ಗೋಲ್ಡ್​-ಸಿಲ್ವರ್ ಕಂಡ ಏರಿಕೆ ಎಷ್ಟು? ಇಲ್ಲಿದೆ ವಿವರ

ನವದೆಹಲಿ: ಬೆಳ್ಳಿ ಮತ್ತೊಮ್ಮೆ ದಾಖಲೆಗಳ ಬಾಗಿಲನ್ನು ಬಡಿಯುತ್ತಿದೆ. ದಿನದಿಂದ ದಿನಕ್ಕೆ ಕೊಂಚವಾದರೂ ಕಡಿಮೆಯಾಗುವ ಲಕ್ಷಣಗಳನ್ನು ತೋರಬೇಕಿದ್ದ ಚಿನ್ನ-ಬೆಳ್ಳಿಯ ದರಗಳು, ಇದೀಗ ಸಾರ್ವಕಾಲಿಕ ಗರಿಷ್ಠ ದಾಖಲೆ ಮಟ್ಟವನ್ನು ಮೀರಿ ಹೊಸ ದಾಖಲೆಗೆ ಸಾಕ್ಷಿಯಾಗುತ್ತಿವೆ. ಈ ಮಧ್ಯೆ, ಇಂದು ಒಂದೇ ದಿನ ಕೆಜಿ ಬೆಳ್ಳಿ ದರವು 10 ಸಾವಿರ ರೂ. ಹೆಚ್ಚಾಗಿದೆ. ಕಳೆದ ಒಂದು ವರ್ಷದಲ್ಲಿ ರಾಕೆಟ್​ ವೇಗದಲ್ಲಿ ಜಿಗಿದಿರುವ ಗೋಲ್ಡ್-ಸಿಲ್ವರ್​ ಬೆಲೆಯು ಎಷ್ಟು ಪ್ರಮಾಣದಲ್ಲಿ ಏರಿಕೆ ಕಂಡಿದೆ? ಶೇಕಡವಾರು ಎಷ್ಟು? ಎಂಬುದರ ವಿವರ ಹೀಗಿದೆ ಗಮನಿಸಿ.  

ಹೊಸ ವರ್ಷಕ್ಕೆ ಕಾಲಿಟ್ಟ ಬಳಿಕವಾದರೂ ಆಭರಣಗಳ ಬೆಲೆಯಲ್ಲಿ ಕಡಿಮೆಯಾಗುತ್ತೆ ಎಂದು ಗ್ರಾಹಕರು ಅಂದಾಜಿಸಿದ್ದರು. ಆದರೆ, ಕಳೆದ ವರ್ಷದ 2 ಲಕ್ಷ ರೂ. ದಾಟಿಹೋಗಿದ್ದ ಸಿಲ್ವರ್​ ಬೆಲೆಯೂ 2026ರ ಮೊದಲೆರೆಡು ವಾರ ಕಳೆಯುತ್ತಿದ್ದಂತೆ 3 ಲಕ್ಷ ರೂ. ಗಡಿಯನ್ನು ದಾಟಿ, ಹೊಸ ದಾಖಲೆಯನ್ನು ನಿರ್ಮಿಸಿದೆ. ಇಂದು ಒಂದೇ ದಿನ ಬೆಳ್ಳಿ ದರದಲ್ಲಿ 10,000 ರೂ. ಹೆಚ್ಚಾಗಿದೆ. ಅಲ್ಲಿಗೆ, ಕೆಜಿ ಬೆಳ್ಳಿ ಬೆಲೆ 3,05,000 ರೂ.ಗೆ ತಲುಪಿದೆ.   

ಕಳೆದ ವರ್ಷದ ಚಿನ್ನ ಮತ್ತು ಬೆಳ್ಳಿ ಎರಡೂ ಗಣನೀಯ ಹಾಗೂ ದೊಡ್ಡ ಮಟ್ಟದಲ್ಲಿ ಏರಿಕೆ ಕಂಡಿತು. ಅಂದು ಆದ ಏರಿಕೆ ಇಂದಿಗೂ ಅದ್ಯಾಕೋ ಕುಸಿಯುವ ಲಕ್ಷಣಗಳನ್ನು ತೋರುತ್ತಿಲ್ಲ ಎಂಬುದೇ ಸದ್ಯ ಚಿನ್ನದಂತ ಗ್ರಾಹಕರ ತಲೆಬಿಸಿಯಾಗಿದೆ. ಹಾಗಿದ್ದರೆ, 2025ರ ಆರಂಭದಲ್ಲಿ ಚಿನ್ನದ ಬೆಲೆ ಹಾಗೂ ಬೆಳ್ಳಿ ಬೆಲೆ ಎಷ್ಟಿತ್ತು ಎಂಬುದರ ಐಡಿಯಾ ನಿಮಗಿದೆಯೇ ಅಥವಾ ನೆನಪಿದೆಯೇ? ತಿಳಿದರೆ ಖಂಡಿತ ಅಬ್ಬಾ! ಎಂದು ಹುಬ್ಬೇರಿಸುತ್ತೀರಾ. 

ವರ್ಷದ ಆರಂಭದಲ್ಲಿ, ಚಿನ್ನದ ಬೆಲೆ 24 ಕ್ಯಾರೆಟ್​ 10 ಗ್ರಾಂಗೆ ಬೆಲೆ ಕೇವಲ 71,500 ರೂ. ಇತ್ತು. ಅದೇ 2025ರ ಕೊನೆಯ ಸೋಮವಾರದ ವೇಳೆಗೆ, 1.39 ಲಕ್ಷ ರೂ.ಗೆ ಏರಿಕೆಯಾಗಿತ್ತು. ಇದು ಶೇ.80ರಷ್ಟು ಭಾರೀ ಏರಿಕೆಯನ್ನು ಸೂಚಿಸಿತು. ಇನ್ನು ಬೆಳ್ಳಿ ದರದಲ್ಲಿ ಗಮನಿಸಿದರೆ, ಶೇ.140ರಿಂದ 150ರಷ್ಟು ಹೆಚ್ಚಾಗಿದೆ. ಇದು ಸಾರ್ವಕಾಲಿಕ ದಾಖಲೆಗಳನ್ನು ಮೀರಿ ತನ್ನದೇ ಹೊಸ ದಾಖಲೆಯನ್ನು ನಿರ್ಮಿಸಿದೆ. ಅಲ್ಲಿಗೆ, ವರ್ಷಾಂತ್ಯದಲ್ಲಿ ಆರಂಭದಲ್ಲಿ 90,500 ರೂ.ನಲ್ಲಿದ್ದ ಪ್ರತಿ ಕೆಜಿ ಬೆಳ್ಳಿ ಬೆಲೆಗಳು ವರ್ಷಾಂತ್ಯದ ವೇಳೆಗೆ 2.32 ಲಕ್ಷ ರೂ. ತಲುಪಿತು. ಈಗ ಹೊಸ ವರ್ಷಕ್ಕೆ ಕಾಲಿಟ್ಟು ಎರಡು ವಾರಗಳು ಕಳೆದಿದೆ ಅಷ್ಟೇ! ಅದಾಗಲೇ 3 ಲಕ್ಷ ರೂ. ಗಡಿದಾಟಿದೆ,(ಏಜೆನ್ಸೀಸ್). 

24 ಕ್ಯಾರೆಟ್​ 10 ಗ್ರಾಂ ಚಿನ್ನದ ಬೆಲೆಯಲ್ಲಿ 1,910 ರೂ. ಏರಿಕೆಯಾಗಿದ್ದು, 1,45,690 ರೂ.ಗೆ ತಲುಪಿದೆ. ಇನ್ನು ಕೆಜಿ ಬೆಳ್ಳಿ 10,000 ರೂ.ಗೆ ಏರಿಕೆಗೊಂಡಿದ್ದು, 3,05,000 ರೂ.ಗೆ ತಲುಪಿದೆ. ಇದು ಗ್ರಾಹಕರನ್ನು ಖರೀದಿಯಿಂದ ದೂರ ಸರಿಯುವಂತೆ ಮಾಡಿದೆ.