ರಷ್ಯಾದಲ್ಲಿ ಭಾರತೀಯ ವಿದ್ಯಾರ್ಥಿಗಳ ಮೇಲೆ ಭೀಕರ ದಾಳಿ; 15 ವರ್ಷದ ಬಾಲಕನಿಂದ ರಕ್ತಪಾತ: ನ್ಯಾಯಾಲಯದಲ್ಲಿ ತಪ್ಪೊಪ್ಪಿಗೆ..! Russia

ಮಾಸ್ಕೋದಿಂದ ಪೂರ್ವಕ್ಕೆ ಸುಮಾರು 1200 ಕಿ.ಮೀ ದೂರದಲ್ಲಿರುವ ಬಾಷ್ಕೋರ್ಟೊಸ್ಟಾನ್ ಪ್ರಾಂತ್ಯದ ರಾಜಧಾನಿ ಉಫಾ ನ್ಯಾಯಾಲಯದಲ್ಲಿ ಬಾಲಕನನ್ನು ಹಾಜರುಪಡಿಸಲಾಯಿತು. ವಿಚಾರಣೆಯ ಸಂದರ್ಭದಲ್ಲಿ, ಬಾಲಕನು ಭಾರತೀಯ ವಿದ್ಯಾರ್ಥಿಗಳ ಮೇಲೆ ತಾನು ನಡೆಸಿದ ಹಲ್ಲೆಯನ್ನು ಒಪ್ಪಿಕೊಂಡಿದ್ದಲ್ಲದೆ, ಸಂತ್ರಸ್ತರಿಗೆ ತಾನು ಉಂಟುಮಾಡಿದ ನೋವಿಗೆ ಕ್ಷಮೆಯಾಚಿಸಿದ್ದಾನೆ ಎಂದು ಬಾಶ್‌ಇನ್‌ಫಾರ್ಮ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಪ್ರಕರಣದ ಗಾಂಭೀರ್ಯವನ್ನು ಪರಿಗಣಿಸಿದ ಉಫಾ ನ್ಯಾಯಾಲಯವು ಬಾಲಕನನ್ನು ಏಪ್ರಿಲ್ 7 ರವರೆಗೆ ಎರಡು ತಿಂಗಳ ಕಾಲ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿ ಆದೇಶ ಹೊರಡಿಸಿದೆ. ಈ ಬಾಲಕ ಸ್ಥಳೀಯ ಶಾಲೆಯೊಂದರ ವಿದ್ಯಾರ್ಥಿಯಾಗಿದ್ದು, ಈತ ಅಷ್ಟೊಂದು ಭೀಕರವಾಗಿ ಭಾರತೀಯರನ್ನು ಗುರಿಯಾಗಿಸಲು ಕಾರಣವೇನು ಎಂಬ ಬಗ್ಗೆ ತನಿಖೆ ಮುಂದುವರಿದಿದೆ.

ಘಟನೆ: ಶನಿವಾರದಂದು ನಡೆದ ಈ ದಾಳಿಯಲ್ಲಿ ನಾಲ್ವರು ಭಾರತೀಯ ವೈದ್ಯಕೀಯ ವಿದ್ಯಾರ್ಥಿಗಳು ತೀವ್ರವಾಗಿ ಗಾಯಗೊಂಡಿದ್ದರು.

ಪೊಲೀಸರ ಮೇಲೂ ಹಲ್ಲೆ: ಸ್ಥಳಕ್ಕೆ ಆಗಮಿಸಿದ ಇಬ್ಬರು ಪೊಲೀಸ್ ಅಧಿಕಾರಿಗಳ ಮೇಲೂ ಈ ಕಿರಾತಕ ಬಾಲಕ ದಾಳಿ ನಡೆಸಿದ್ದ.

ಚಿಕಿತ್ಸೆ: ಗಾಯಗೊಂಡ ವಿದ್ಯಾರ್ಥಿಗಳು ಪ್ರಸ್ತುತ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಪ್ರಾಣಾಪಾಯದಿಂದ ಪಾರಾಗಿದ್ದಾರೆ ಎಂದು ತಿಳಿದುಬಂದಿದೆ,(ಏಜೆನ್ಸೀಸ್).