Honor Killing: ಪತ್ನಿಗಾಗಿ ವಿಡಿಯೋ ಮಾಡಿ ಅತ್ತ ಪತಿ: ಎರಡು ತಿಂಗಳ ಬಳಿಕ ಹೊರಬಂತು ಹೃದಯವಿದ್ರಾವಕ ಸತ್ಯ!

ಸುಜಾತಾ ಅವರ ಪತಿ ಗೌರಿಶಂಕರ್ ಕುಮಾರ್ ಕಳೆದ ಎರಡು ತಿಂಗಳಿಂದ ಪತ್ನಿಯ ಬಗ್ಗೆ ಮಾಹಿತಿ ಹುಡುಕುತ್ತಿದ್ದರು. ಆದರೆ ಎಲ್ಲಿಯೂ ಸುಳಿವು ಸಿಗಲಿಲ್ಲ. ಪತ್ನಿಯ ಕುಟುಂಬವೂ ಯಾವುದೇ ಮಾಹಿತಿ ನೀಡಲಿಲ್ಲ. ಇದರಿಂದ ಬೇಸತ್ತ ಗೌರಿಶಂಕರ್, ಸಾಮಾಜಿಕ ಜಾಲತಾಣಗಳಲ್ಲಿ ಭಾವನಾತ್ಮಕ ವಿಡಿಯೋಗಳನ್ನು ಹಂಚಿಕೊಂಡು, "ನನ್ನ ಪತ್ನಿಯ ಕೊಲೆಗಾರರನ್ನು ಬಂಧಿಸಿ, ಇಲ್ಲದಿದ್ದರೆ ನಾನು ಸಾಯುತ್ತೇನೆ" ಎಂದು ಮನವಿ ಮಾಡಿದ್ದರು.

ಸುಜಾತಾ ಮತ್ತು ಗೌರಿಶಂಕರ್ ಪಕ್ಕದ ಗ್ರಾಮಗಳ ನಿವಾಸಿಗಳಾಗಿದ್ದು, ಶಾಲಾ ದಿನಗಳಿಂದಲೇ ಪರಿಚಯ ಹೊಂದಿದ್ದರು. 2020ರಲ್ಲಿ ಅವರ ಸ್ನೇಹ ಪ್ರೀತಿಯಾಗಿ ಮಾರ್ಪಟ್ಟಿತ್ತು. ಕುಟುಂಬದ ವಿರೋಧದ ನಡುವೆಯೂ ಇಬ್ಬರೂ ಈ ವರ್ಷದ ಜನವರಿಯಲ್ಲಿ ಓಡಿ ಹೋಗಿ ಮದುವೆಯಾಗಿದ್ದರು. ನಂತರ ಹರಿಯಾಣದಲ್ಲಿ ವಾಸವಾಗಿದ್ದರು. ಆದರೆ ಬೇರೆ ಜಾತಿಯವರನ್ನು ಮದುವೆಯಾಗಿದ್ದ ಕಾರಣ ಸುಜಾತಾ ಕುಟುಂಬ ತೀವ್ರ ವಿರೋಧ ವ್ಯಕ್ತಪಡಿಸಿತ್ತು.

ನ್ಯಾಯಾಲಯದಲ್ಲಿ ಸುಜಾತಾ ತಾನು ಸ್ವಇಚ್ಛೆಯಿಂದ ಮದುವೆಯಾಗಿದ್ದೇನೆ ಎಂದು ಹೇಳಿದ್ದರು. ಆದರೆ ಕೆಲ ಸಮಯದ ಬಳಿಕ ಹೋಳಿ ಹಬ್ಬದ ವೇಳೆ ಪೋಷಕರ ಮನೆಗೆ ತೆರಳಿದ್ದರು. ಮಾರ್ಚ್ 31ರಂದು ಪತಿಯೊಂದಿಗೆ ಕೊನೆಯ ಬಾರಿ ಮಾತನಾಡಿದ್ದ ಸುಜಾತಾ, ಬಳಿಕ ಏಕಾಏಕಿ ನಾಪತ್ತೆಯಾಗಿದ್ದರು.

ಗೌರಿಶಂಕರ್ ನೀಡಿದ ದೂರಿನ ಆಧಾರದ ಮೇಲೆ ಪೊಲೀಸರು ವಿಶೇಷ ತನಿಖಾ ತಂಡ ರಚಿಸಿದರು. ತನಿಖೆ ವೇಳೆ ಸುಜಾತಾ ಅವರ ಸಹೋದರ ಅಭಿಷೇಕ್ ಕುಮಾರ್ ಪೊಲೀಸರ ವಶಕ್ಕೆ ಬಂದರು. ಪೊಲೀಸರ ಪ್ರಕಾರ, ಸುಜಾತಾ ಮತ್ತೆ ಪತಿಯ ಬಳಿ ಹೋಗಬಹುದು ಎಂಬ ಭಯದಿಂದ ಕುಟುಂಬದ ಸದಸ್ಯರು ಸಂಚು ರೂಪಿಸಿದ್ದರು. ಮೇ 8ರಂದು ಆಕೆಯನ್ನು ಕತ್ತು ಹಿಸುಕಿ ಕೊಲೆ ಮಾಡಿದ್ದು, ನಂತರ ಸಾಕ್ಷ್ಯ ನಾಶ ಮಾಡಲು ಬೂಢಿ ಗಂಡಕ್ ನದಿ ತೀರದಲ್ಲಿ ಮೃತದೇಹಕ್ಕೆ ಬೆಂಕಿ ಹಚ್ಚಲಾಗಿದೆ ಎಂದು ಆರೋಪಿಸಲಾಗಿದೆ.

ಪ್ರಕರಣದಲ್ಲಿ ಐವರಿಗಿಂತ ಹೆಚ್ಚು ಕುಟುಂಬ ಸದಸ್ಯರ ಪಾತ್ರ ಇರುವ ಸಾಧ್ಯತೆ ಇದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಉಳಿದ ಆರೋಪಿಗಳನ್ನು ಬಂಧಿಸಲು ಕಾರ್ಯಾಚರಣೆ ಮುಂದುವರಿದಿದೆ,(ಏಜೆನ್ಸೀಸ್​​).