ಬಾ ನಲ್ಲ ಮಧುಚಂದ್ರಕೆ... ಆ್ಯಕ್ಸಿಡೆಂಟ್​ನಲ್ಲಿ ಪತಿ ಸಾವು, ಪತ್ನಿಯ ಚಿನ್ನ ಕಳವು; ಮೇಘಾಲಯ ಹನಿಮೂನ್​ ಕೊಲೆ ನೆನಪಿಗೆ! Honeymoon Murder

ನವದೆಹಲಿ: ಕಳೆದ ವರ್ಷ ಜೂನ್​ನಲ್ಲಿ ಇಡೀ ದೇಶವನ್ನೇ ಬೆಚ್ಚಿಬೀಳಿಸಿದ್ದ ಮೇಘಾಲಯ ಹನಿಮೂನ್ ಕೊಲೆ (Honeymoon Murder) ಪ್ರಕರಣ ನಿಜಕ್ಕೂ ಹಲವು ಯುವಕರ ಮದುವೆ ಆಸೆಯನ್ನೇ ನುಚ್ಚನೂರು ಮಾಡಿತ್ತು. ತನ್ನ ಗಂಡ ರಘು ಸೂರ್ಯವಂಶಿಯನ್ನು ಮದುವೆ ಬೆನ್ನಲ್ಲೇ ಮೇಘಾಲಯಕ್ಕೆ ಹನಿಮೂನ್ ನೆಪದಲ್ಲಿ ಕರೆದೊಯ್ದು ಪ್ರಿಯಕರನ ಜತೆಗೂಡಿ ಭೀಕರವಾಗಿ ಕೊಲೆಗೈದ ಆರೋಪಿ ಸೋನಮ್ ಸದ್ಯ ಕಂಬಿ ಎಣಿಸುತ್ತಿದ್ದಾಳೆ. ಮೂವರು ಸುಪಾರಿ ಹಂತಕರನ್ನು ನೇಮಿಸಿ ತನ್ನ ಗಂಡ ರಾಜಾನಿಗೆ ಗುಂಡಿ ತೋಡಿದ ಈಕೆಯ ಪಾಪದ ಕೃತ್ಯ ಮರೆಯಲಾಗದು. ಸದ್ಯ ಈ ಘಟನೆಯನ್ನೇ ಹೋಲುವಂತ ಮತ್ತೊಂದು ಕೊಲೆ ಇದೀಗ ಬೆಳಕಿಗೆ ಬಂದಿದೆ.

ಕಳೆದ ಶುಕ್ರವಾರ (ಜ.30) ಆಗಷ್ಟೇ ಮದುವೆಯಾಗಿದ್ದ ನವಜೋಡಿ ಆಶಿಶ್ ಮತ್ತು ಅಂಜು, ವಾಕಿಂಗ್ ಹೋಗಲೆಂದು ರಸ್ತೆಗಿಳಿದಿದ್ದೇ ದೊಡ್ಡ ಅನಾಹುತವೇ ಸಂಭವಿಸಿತು. ಪತಿಗೆ ವೇಗವಾಗಿ ಬಂದ ಕಾರೊಂದು ರಭಸವಾಗಿ ಗುದ್ದಿದ ಪರಿಣಾಮ ಆತ ಸ್ಥಳದಲ್ಲೇ ರಕ್ತದ ಮಡುವಿನಲ್ಲಿ ಮೃತಪಟ್ಟರೆ, ಕಳ್ಳರು ಅಂಜು ಬಳಿಯಿದ್ದ ಚಿನ್ನಾಭರಣಗಳನ್ನು ಕದ್ದು ಪರಾರಿಯಾದರು. ಹಿಟ್​ ಅಂಡ್​ ರನ್​ ಕೇಸ್​ನಡಿ ತನಿಖೆಯನ್ನು ಆರಂಭಿಸಿದ ಖಾಕಿ ಪಡೆ 180 ಡಿಗ್ರಿಯಲ್ಲಿ ನೋಡಿದಾಗ ಒಂದು ನಿಮಿಷ ಮೇಘಾಲಯದ ಹನಿಮೂನ್ ಕೊಲೆ ಕೇಸ್​ ನೆನಪಿಗೆ ಬಂದಿದ್ದು ಆಶ್ಚರ್ಯ. ಕಾರಣ, ಇದು ಕೂಡ ಆ ಕೇಸ್​ ಅನ್ನೇ ಹೋಲುವಂತಿದೆ.

ಪೊಲೀಸರ ತನಿಖೆಯಲ್ಲಿ ಸ್ಫೋಟಕ ಸಂಗತಿ ಬಯಲಾಗಿದ್ದು, ಪತಿ ಅಪಘಾತದಲ್ಲಿ ಮೃತಪಟ್ಟರು ಎಂದಿದ್ದ ಅಂಜುನೇ ಈ ಕೊಲೆ ಹಿಂದಿರುವ ಮಾಸ್ಟರ್​ಮೈಂಡ್​. ತನ್ನ ಪ್ರಿಯಕರ ಸಂಜು ಮತ್ತು ಆತನ ಸಹಚರರೊಂದಿಗೆ ಜತೆಗೂಡಿ ಪತಿಯ ಮೇಲೆ ಕಾರು ಹರಿಸುವಂತೆ ಅಂಜು ಹೇಳಿದ್ದಾಗಿ ವರದಿಯಾಗಿದೆ. ಇಷ್ಟೆಲ್ಲ ಮಾಡಿ, ತನಗೆ ಏನೂ ಗೊತ್ತಿಲ್ಲದಂತೆ ನಟಿಸಿದ ಕಿರಾತಕಿಯ ಅಸಲಿ ಮುಖವನ್ನು ಕಡೆಗೂ ರಾಜಸ್ಥಾನ ಪೊಲೀಸರು ಕಳಚಿದ್ದಾರೆ.

ಈ ಕುರಿತು ಮಾತನಾಡಿರುವ ರಾಜಸ್ಥಾನ ಪೊಲೀಸ್ ವರಿಷ್ಠಾಧಿಕಾರಿ ಅಮೃತಾ ದುಹಾನ್, ಜನವರಿ 30ರ ರಾತ್ರಿ ಸುಮಾರು 9 ಗಂಟೆಗೆ ಘಟನೆ ಬಗ್ಗೆ ನಮಗೆ ಮಾಹಿತಿ ಸಿಕ್ಕಿತು. ದಂಪತಿಗಳು ರಸ್ತೆಯಲ್ಲಿ ಪ್ರಜ್ಞಾಹೀನ ಸ್ಥಿತಿಯಲ್ಲಿ ಬಿದ್ದಿದ್ದರು. ಇಬ್ಬರನ್ನೂ ಹತ್ತಿರದ ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಈ ವೇಳೆ ಆಶಿಶ್ ಮೃತಪಟ್ಟಿದ್ದಾರೆ ಎಂದು ವೈದ್ಯರು ದೃಢಪಡಿಸಿದರು. ಅಪರಿಚಿತ ಕಾರೊಂದು ಡಿಕ್ಕಿ ಹೊಡೆದಿದ್ದಾಗಿ ಅಂಜು ಹೇಳಿದ್ದಳು. ಇದರ ಹಿನ್ನೆಲೆ ನಾವು ಸ್ಥಳಕ್ಕೆ ಎಫ್​ಎಸ್​ಎಲ್​​ ಹಾಗೂ ಕಾರನ್ನು ಟ್ರೇಸ್​ ಮಾಡಲು ತಂಡವನ್ನು ರಚಿಸಿ, ಮಾಹಿತಿ ನೀಡಿದ್ದೇವೆ ಎಂದರು.

ನನ್ನ ಚಿನ್ನವು ಕಳ್ಳತನವಾಯಿತು ಎಂದ ಅಂಜು ಮಾತುಗಳು ಸ್ಥಳದಲ್ಲಿ ಒಂದು ರೀತಿ ಇದ್ದರೆ, ತನಿಖೆಯಲ್ಲಿ ಬೇರೆಯೇ ಇತ್ತು. ಇದರೊಟ್ಟಿಗೆ ಆಕೆಯ ಮೈಮೇಲೆ ಯಾವುದೇ ಗಾಯಗಳ ಗುರುತು ಇರಲಿಲ್ಲ ಎಂಬುದು ಗಮನಾರ್ಹ. ಅಂಜು ಮೇಲಿನ ಅನುಮಾನಗಳು ಗಟ್ಟಿಯಾಗ್ತಿದ್ದಂತೆ ತನಿಖೆಯನ್ನು ಇನ್ನಷ್ಟು ಚುರುಕುಗೊಳಿಸಿದ ಖಾಕಿ ಪಡೆಗೆ, ಆಕೆಯ ಫೋನ್​ ದಾಖಲೆಗಳನ್ನು ಕೆದಕಿದಾಗ, ಪ್ರಿಯಕರ ಸಂಜು ಬಗ್ಗೆ ಸುಳಿವು ಸಿಕ್ಕಿದೆ. ಕೊಲೆಯ ಹಿಂದಿರುವ ಮಾಸ್ಟರ್​ಮೈಂಡ್​ ಅಂಜು ಎಂಬುದು ಪೊಲೀಸರಿಗೆ ಸ್ಪಷ್ಟವಾಗಿದ್ದು, ಪ್ರಸ್ತುತ, ಆರೋಪಿಗಳನ್ನು ಬಂಧಿಸಿ, ವಿಚಾರಣೆಯನ್ನು ಮುಂದುವರಿಸಿದ್ದಾರೆ,(ಏಜೆನ್ಸೀಸ್).