ಬಂಗಾರ ಮತ್ತು ಬೆಳ್ಳಿಯ ಬೆಲೆಯಲ್ಲಿ ಐತಿಹಾಸಿಕ ಏರಿಕೆ: 1.6 ಲಕ್ಷ ದಾಟಿದ ಚಿನ್ನ, 4 ಲಕ್ಷದ ಗಡಿ ಮೀರಿದ ಬೆಳ್ಳಿ..! Silver Price Hike

ಮಲ್ಟಿ ಕಮೋಡಿಟಿ ಎಕ್ಸ್ಚೇಂಜ್ (MCX) ನಲ್ಲಿ ಫೆಬ್ರವರಿ ತಿಂಗಳ ಚಿನ್ನದ ಭವಿಷ್ಯದ ಬೆಲೆಯು ಶೇ. 3.47 (₹5,471) ರಷ್ಟು ಏರಿಕೆಯಾಗಿ, ಪ್ರತಿ 10 ಗ್ರಾಂಗೆ ₹1,63,170 ತಲುಪಿದೆ. ಇನ್ನು ಬೆಳ್ಳಿಯ ಬೆಲೆಯಂತೂ ಹೂಡಿಕೆದಾರರನ್ನು ಬೆರಗುಗೊಳಿಸಿದ್ದು, ಜೂನ್ ತಿಂಗಳ ಡೆಲಿವರಿ ಬೆಲೆಯು ಶೇಕಡಾ 10ಕ್ಕಿಂತಲೂ ಹೆಚ್ಚು ಜಿಗಿದು, ಇತಿಹಾಸದಲ್ಲೇ ಮೊದಲ ಬಾರಿಗೆ ಪ್ರತಿ ಕೆಜಿಗೆ ₹4,11,451 ಗಡಿಯನ್ನು ದಾಟಿದೆ.

ಜಾಗತಿಕವಾಗಿ ಚಿನ್ನದ ಬೆಲೆ ಪ್ರತಿ ಔನ್ಸ್‌ಗೆ 5,270 ಡಾಲರ್ ತಲುಪಿದ್ದರೆ, ಬೆಳ್ಳಿಯು 115.50 ಡಾಲರ್ ಗೆ ಏರಿಕೆಯಾಗಿದೆ. ಅಮೆರಿಕದ ಡಾಲರ್ ಸೂಚ್ಯಂಕವು 96.14 ಕ್ಕೆ ಕುಸಿದಿರುವುದು ಈ ಬೆಳವಣಿಗೆಗೆ ಪ್ರಚೋದನೆ ನೀಡಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಡಾಲರ್ ಮೌಲ್ಯವು ಕುಸಿಯುತ್ತಿರುವುದು ಒಳ್ಳೆಯದೇ ಎಂಬ ಅರ್ಥದಲ್ಲಿ ನೀಡಿದ ಹೇಳಿಕೆಯು ಮಾರುಕಟ್ಟೆಯಲ್ಲಿ ಡಾಲರ್ ಮಾರಾಟದ ಒತ್ತಡವನ್ನು ಹೆಚ್ಚಿಸಿದೆ. ಡಾಲರ್ ಮೇಲಿನ ನಂಬಿಕೆಯ ಬಿಕ್ಕಟ್ಟು ಮತ್ತು ಜಾಗತಿಕ ವ್ಯಾಪಾರ ಸಮರದ ಭೀತಿಯಿಂದಾಗಿ ಹೂಡಿಕೆದಾರರು ಚಿನ್ನದ ಮೊರೆ ಹೋಗುತ್ತಿದ್ದಾರೆ.

ಈ ಅಭೂತಪೂರ್ವ ಏರಿಕೆಯನ್ನು ಗಮನಿಸಿರುವ ಡಾಯ್ಚ ಬ್ಯಾಂಕ್, ಚಿನ್ನದ ಬೆಲೆಯು ಈ ವರ್ಷದ ಅಂತ್ಯಕ್ಕೆ ಪ್ರತಿ ಔನ್ಸ್‌ಗೆ 6,000 ಡಾಲರ್ ತಲುಪಲಿದೆ ಎಂದು ಅಂದಾಜಿಸಿದೆ. ಕೇಂದ್ರ ಬ್ಯಾಂಕ್‌ಗಳು ಡಾಲರ್ ಹೊರತುಪಡಿಸಿ ಇತರ ಆಸ್ತಿಗಳಲ್ಲಿ ಹೂಡಿಕೆ ಮಾಡುತ್ತಿರುವುದು ಇದಕ್ಕೆ ಪುಷ್ಟಿ ನೀಡುತ್ತಿದೆ.

ಬೆಳ್ಳಿ ಬೆಲೆಯ ಏರಿಕೆಯು ಬೆಳ್ಳಿ ಮ್ಯೂಚುವಲ್ ಫಂಡ್‌ಗಳು ಅಥವಾ ಇಟಿಎಫ್‌ಗಳ ಮೇಲೂ ಪರಿಣಾಮ ಬೀರಿದೆ. ಆದಿತ್ಯ ಬಿರ್ಲಾ ಸನ್ ಲೈಫ್, ಮೋತಿಲಾಲ್ ಓಸ್ವಾಲ್ ಮತ್ತು ಐಸಿಐಸಿಐ ಪ್ರುಡೆನ್ಶಿಯಲ್ ಸೇರಿದಂತೆ ಪ್ರಮುಖ ಕಂಪನಿಗಳ ಬೆಳ್ಳಿ ಇಟಿಎಫ್‌ಗಳು ಶೇಕಡಾ 4 ರಿಂದ 6ರಷ್ಟು ಏರಿಕೆ ಕಂಡು ಹೊಸ ಎತ್ತರಕ್ಕೆ ತಲುಪಿವೆ,(ಏಜೆನ್ಸೀಸ್).