ಧಾರಕಾರ ಮಳೆಗೆ ಮುಳುಗಿದ ಮುಂಬೈ! ವಿವಿ ಪರೀಕ್ಷೆಗಳು ಮುಂದೂಡಿಕೆ, ರೈಲುಗಳ ಸಂಚಾರ ಸ್ಥಗಿತ

ಮುಂಬೈ: ದೇಶದಲ್ಲಿ ಬಿಸಿಲಿನ ಬೇಗೆಯೇ ಮುಂದುವರಿಯುತ್ತಿದೆ ಎನ್ನುವಾಗಲೇ ಕಳೆದೆರೆಡು ದಿನಗಳಿಂದ ಸುರಿಯುತ್ತಿರುವ ಧಾರಕಾರ ಮಳೆಗೆ ಮಹಾನಗರಿ ತತ್ತರಿಸಿದೆ. ಬಿರುಗಾಳಿ ಸಹಿತ ಮಳೆಗೆ ಮುಂಬೈ-ಪುಣೆ ಸಂಪರ್ಕ ಸಂಪೂರ್ಣವಾಗಿ ಬಂದ್ ಆಗಿದೆ.  

ಮಳೆಯಿಂದಾಗಿ ಭೂಕುಸಿತ ಮತ್ತು ಪ್ರವಾಹ ಉಂಟಾಗಿದ್ದು, ಮುಂಬೈನಿಂದ ಸಂಚರಿಸಬೇಕಿದ್ದ ರೈಲುಗಳು ನಿಂತಲೇ ನಿಂತಿವೆ. ಈ ನಿಟ್ಟಿನಲ್ಲಿ, ವಿಮಾನ ಮತ್ತು ರೈಲು ಸೇವೆಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ. ಮುಂಬೈ-ಪುಣೆ ಎಕ್ಸ್‌ಪ್ರೆಸ್‌ವೇ ಮತ್ತು ಹಳೆಯ ಹೆದ್ದಾರಿ ಎರಡೂ ಮುಚ್ಚಿರುವ ಕಾರಣ, ಪ್ರಯಾಣಿಕರು ಮಾರ್ಗ ಮಧ್ಯೆಯೇ ಸಿಲುಕಿಕೊಂಡಿದ್ದು, ಎರಡೂ ನಗರಗಳ ನಡುವಿನ ಪ್ರಯಾಣ ಅಸ್ತವ್ಯಸ್ತಗೊಂಡಿದೆ.

ಮುಂಬೈನಲ್ಲಿ ಮಳೆಯಾರ್ಭಟ ಹಿನ್ನೆಲೆ ಭಾರತ ಹವಾಮಾನ ಇಲಾಖೆ ಮುಂಬೈನ ಕೆಲವು ಪ್ರದೇಶಗಳಿಗೆ ಆರೆಂಜ್​ ಮತ್ತು ಪುಣೆ ಮತ್ತು ರಾಯ್​ಗಢ ಜಿಲ್ಲೆಗಳಿಗೆ ರೆಡ್​ ಅಲರ್ಟ್ ಘೋಷಿಸಿದೆ. ಈ ಮೂಲಕ ಆಯಾ ಪ್ರದೇಶಗಳ ಸುತ್ತಮುತ್ತಲಿನ ಜನರಿಗೆ ಎಚ್ಚರಿಕೆಯಿಂದ ಇರಲು ಸೂಚಿಸಲಾಗಿದೆ.  ಬೆಳಗಿನ ಜಾವ 3.05ರ ಸುಮಾರಿಗೆ, ಕರ್ಜತ್-ಲೋನಾವಾಲ ಭೋರ್ ಘಾಟ್ ವಿಭಾಗದಲ್ಲಿ ಠಾಕೂರ್ವಾಡಿ ಸಮೀಪ ಭೂಕುಸಿತ ಸಂಭವಿಸಿದೆ. 

ಐಎಂಡಿ ನೀಡಿದ ಆರೆಂಜ್​ ಅಲರ್ಟ್​ ಬೆನ್ನಲ್ಲೇ ಮುಂಬೈ ವಿಶ್ವವಿದ್ಯಾಲಯವು ಇಂದು (ಜು.6) ನಿಗದಿಯಾಗಿದ್ದ ಎಲ್ಲಾ ಪರೀಕ್ಷೆಗಳನ್ನು ಮುಂದೂಡಿದೆ. ಭಾರಿ ಅಥವಾ ಅತಿ ಹೆಚ್ಚಿನ ಮಳೆಯಾಗುವ ಸಾಧ್ಯತೆಯ ಹಿನ್ನೆಲೆ ಕೆಲವು ದಿನಗಳ ಮಟ್ಟಿಗೆ ಪರೀಕ್ಷೆಗಳನ್ನು ಮುಂದೂಡಿಕೆ ಮಾಡಿದ್ದೇವೆ ಎಂದು ಸುತ್ತೋಲೆಯಲ್ಲಿ ಸ್ಪಷ್ಟಪಡಿಸಿದೆ.